Mateus 5

Nai Jesus hanorin iha foho ida

1Bainhira Jesus haree ema barak nee, Nia sae baa iha foho ida. Too iha nebaa Nia tuur, i Nia eskolanti sira mai haleu Nia. 2Depois Nia komesa hanorin sira.

See mak hetan bensaun

(Lucas 6:20-23)

3Jesus hanorin nunee: ”Ema sira nebee senti kiak iha Maromak nia futar oin no depende ba Nia,

sira hetan bensaun, tanba sira nee Maromak nia ema.

4Ema sira nebee tanis ho laran susar, sira hetan bensaun,

tanba Maromak sei hamaran sira nia matan been.#Isaías 61:2

5Ema sira nebee simples no maus,

sira hetan bensaun, tanba Maromak sei foo fatin ba sira iha mundu nee.#Salmu sira 37:11

6Ema sira nebee hamlaha no hamrook ba lia loos,

sira hetan bensaun, tanba Maromak sei foo laran hakmatek.#Isaías 55:1-2

7Ema sira nebee mak hatudu laran diak ba ema seluk,

sira hetan bensaun, tanba Maromak sei hatudu Nia laran diak ba sira.

8Ema sira nebee laran moos,

sira hetan bensaun, tanba sira sei haree Maromak.#Salmu sira 24:3-4

9Ema sira nebee lori dame,

sira hetan bensaun, tanba Maromak sei bolu sira nee Nia oan.

10Ema nebee hetan terus tanba moris tuir lia loos,

sira hetan bensaun, tanba sira nee Maromak nia ema.#1 Pedro 3:14

11Bainhira ema hatete aat imi i halo terus imi tanba imi tuir Hau, ka sira bobar lia tuun-sae hodi hatete aat imi nia naran tanba Hau, imi hetan bensaun.#1 Pedro 4:14 12Kuandu ema halo imi terus nunee, simu ho haksolok i kontenti deit baa, tanba Maromak sei foo premiu boot ba imi iha lalehan. Keta haluha katak, Maromak nia profeta sira nebee moris iha tempu uluk mos, ema halo terus sira hanesan nee.”#2 Kronikas 36:16; Apostolu sira nia Istoria 7:52

Ema nebee mak tuir Nai Jesus, hanesan masin ho naroman

(Marcos 9:50; Lucas 14:34-35)

13“Imi hanesan masin ba mundu. Maibee se masin nee sai miis ona, ita la bele halo meer fila fali, la iha folin tan ona. Ita soe tiha deit i ema sama baa-mai.#Marcos 9:50; Lucas 14:34-35

14Imi mos hanesan naroman ba mundu. Imi nia naroman hanesan sidade nebee mak harii iha foho leten, ema hotu-hotu bele haree.#João 8:12; 9:5 15Nunee mos bainhira ema sunu ahi-oan, nia la taka ho sanan. Maibee ahi-oan tenki tau iha fatin aas para bele foo naroman ba ema hotu nebee iha uma laran.#Marcos 4:21; Lucas 8:16; 11:33 16Imi nia moris mos tenki nunee, imi tenki sai naroman ba ema seluk atu nunee sira bele haree buat diak nebee imi halo. Nunee sira sei hahii imi nia Aman iha lalehan.”#1 Pedro 2:12

Nai Jesus no Maromak nia Ukun Fuan sira

17“La bele hanoin katak, Hau mai iha mundu nee atu halakon Moisés nia lei ho profeta sira nia hakerek. Lae! Hau mai laos atu halakon maibee atu kumpri loloos buat hotu-hotu nebee mak sira hakerek tiha ona. 18Hau hatete ba imi, bainhira lalehan ho rai sei iha, buat hotu nebee hakerek iha lei nee, mezmu ke letra kiik-oan liu ida, ka pontu ida mos sei la lakon, too buat hotu nebee Maromak hatete, sai realidade.#Lucas 16:17 19Nunee, see mak halakon Maromak nia ukun fuan ruma mezmu ke hanoin lei nee kiik-oan deit, i hanorin ema seluk atu lalika halo tuir, Maromak sei konsidera nia ema kiik liu iha Nia reinu. Maibee see mak moris tuir ukun fuan sira nee i hanorin ema seluk mos atu halo tuir, Maromak sei konsidera nia ema boot iha Nia reinu. 20Hau dehan ba imi, imi tenki moris loos liu fali mestri relijiaun sira ho ema Farizeu sira. Se lae imi la bele tama iha Maromak nia reinu.”

Keta hirus malu

(Lucas 12:57-59)

21Jesus hanorin nafatin Nia eskolanti sira dehan, “Imi rona ona katak uluk ita nia bei-ala sira rona ukun fuan ida nebee dehan, ‘La bele oho ema. See mak oho ema, nia sei hetan kastigu.’#Ezodu 20:13; Deuteronomio 5:17 22Maibee Hau hatete ba imi, ‘See mak hirus nia maun-alin ida, nia sei hetan kastigu. See mak tolok nia maun-alin ida, nia sei baa hataan iha tribunal. I see mak hirus ema seluk dehan, ‘O beik-teen’, ema nee lao dadauk ona ba iha ahi infernu nebee lakan.

23Nunee, se o baa iha altar atu foo o nia oferta ba Maromak, maibee too iha nebaa o hanoin hetan ema ruma hirus o, tanba o nia hahalok aat ba nia, 24husik lai o nia oferta iha altar oin, i baa dame malu lai ho ema nee mak o foin fila fali mai hodi foo oferta nee ba Maromak.

25Se ema ruma atu lori o ba iha tribunal, diak liu molok too tribunal o dame malu kedas ho nia. Se lae ema nee bele entrega o ba iha juiz, juiz bele entrega o ba iha polisia, i polisia hatama o iha kadeia. 26Hau dehan loloos ba o, o selu kotu tiha o nia tusan mak foin bele sai hosi kadeia.”

Ita tenki husik tiha buat nebee mak halo ita monu ba sala

27“Imi rona ona ukun fuan nebee dehan, ‘La bele halo relasaun seksual ho ema nebee laos o nia feen ka o nia laen.’#Ezodu 20:14; Deuteronomio 5:18 28Maibee Hau hatete ba imi, se mane ida fihir feto ida hodi hanoin foer ba nia, mane nee halo ona sala adulteriu ho feto nee iha nia laran. 29Se o nia matan sorin loos halo o monu ba sala karik, sukit sai o nia matan nee i soe tiha. Diak liu o moris ho matan sorin deit, duke o iha matan rua maibee tama ba infernu.#Mateus 18:9; Marcos 9:47 30Se o nia liman loos halo o monu ba sala karik, tesi sai o nia liman nee i soe tiha. Diak liu o moris ho liman ida deit, duke o iha liman rua maibee o tama ba infernu.”#Mateus 18:8; Marcos 9:43

Feen ho laen la bele soe malu

(Mateus 19:9; Marcos 10:11-12; Lucas 16:18)

31“Iha lei ida nebee dehan, ‘See mak soe nia feen, tenki halo surat deklarasaun fahe malu ida foo ba nia.’#Deuteronomio 24:1-4; Mateus 19:7; Marcos 10:4 32Maibee Hau hatete ba imi, mane so bele soe nia feen bainhira nia feen halo fali relasaun seksual ho ema seluk. Se nia feen la sala, maibee mane nee soe nia, nee dehan katak, mane nee mak foo dalan ba nia feen atu halo adulteriu. Tanba se nia feen hola fali mane seluk, nee sala ona. I se mane ida kaben fali ho feto nebee nia laen soe tiha nee, mane nee mos halo adulteriu.”#Mateus 19:9; Marcos 10:11-12; Lucas 16:18; 1 Korintu 7:10-11

Nai Jesus hanorin kona ba juramentu

33“Nunee mos imi rona ona katak, uluk ita nia bei-ala sira simu lei ida nebee dehan, ‘Buat nebee mak o jura ba Nai Maromak, o tenki halo tuir duni, la bele kontra fali.’#Levitiku 19:12; Numerus 30:2; Deuteronomio 23:21 34Maibee Hau hatete ba imi, la bele halo juramentu ba saida deit. La bele jura temi lalehan, tanba lalehan nee fatin hodi Maromak tuur kaer ukun.#Tiago 5:12; Isaías 66:1; Mateus 23:22 35La bele jura temi rai, tanba rai nee fatin hodi Maromak tau Nia ain. La bele jura temi Jerusalém, tanba Jerusalém nee Liurai Boot nia sidade.#Isaías 66:1; Salmu sira 48:3 36I la bele jura temi imi nia ulun rasik, tanba imi la iha kbiit ida hodi hametan ka hamutin imi nia fuuk lahan rasik. 37Entaun se imi promete atu halo buat ruma, dehan deit, ‘Loos, hau sei halo.’ Se lae, dehan deit, ‘Lae.’ Se imi dehan liu hosi ida nee, entaun liafuan sira nee mai hosi aat nain.”

La bele halo aat ba ema nebee halo aat mai ita

(Lucas 6:29-30)

38“Imi rona ona lei nebee dehan, ‘Se ema ruma halo aat o nia matan, o tenki halo aat fali nia matan, se ema ruma harahun o nia nehan, o tenki harahun fali nia nehan.’#Ezodu 21:24; Levitiku 24:20; Deuteronomio 19:21 39Maibee Hau hatete ba imi: la bele halo aat ba ema nebee halo aat ba imi. Se ema ruma basa imi nia hasan sorin loos, foo tan hasan sorin karuk ba nia. 40Se iha ema ruma hakarak hadau imi nia faru, foo mos imi nia faru manas ba nia. 41Se militar ruma obriga imi atu hulan nia sasaan lao kilometru ida, kontinua lao ho nia too kilometru rua. 42Se ema husu imi nia sasaan ruma, foo deit baa. Se ema hakarak empresta buat ruma hosi imi, foo empresta baa.”

Hadomi ita nia inimigu

(Lucas 6:27-28; 6:32-36)

43“Imi rona ema dehan, ‘Hadomi ema seluk no odi o nia inimigu.’#Levitiku 19:18 44Maibee Hau hatete ba imi, hadomi imi nia inimigu sira, i harohan ba Maromak para tulun ema nebee halo terus imi. 45Se imi halo nunee, imi hatudu katak imi sai ona Aman Maromak iha lalehan nia oan duni. Tanba Nia halo loro matan sae hodi foo naroman ba ema diak ho mos ema aat. I Nia foo udan ba ema nebee moris loos ho mos ba ema nebee moris iha sala laran. 46Se imi hadomi deit ema nebee mak hadomi imi, imi atu manaan saida? Tanba kobrador impostu sira gosta han-matak ema maibee sira mos hadomi ema nebee mak hadomi sira. 47Se imi kumprimenta deit imi nia maluk, imi nia hahalok nee diak liu ema seluk ka? Lae! Ema nebee la fiar Maromak mos halo nunee. 48Aman Maromak iha lalehan hadomi ema hotu-hotu, nunee imi tenki hadomi mos hanesan Nia.”#Levitiku 19:2; Deuteronomio 18:13

Currently Selected:

Mateus 5: BTDT

Highlight

Copy