Mateus 10

Nai Jesus hili Nia apostolu sanulu resin rua

(Marcos 3:13-19; Lucas 6:12-16)

1Iha loron ida Jesus bolu Nia eskolanti nain sanulu resin rua, i foo kbiit ba sira hodi duni sai espiritu aat hosi ema i kura moras oi-oin. 2Sira nain sanulu resin rua nia naran mak hanesan tuir mai nee:

Primeiru, Simão, ema mos bolu nia Pedro, ho nia alin André,

Tiago ho nia alin João, sira nain rua Zebedeu nia oan,

3Filipe ho Bartolomeu,

Tomé ho Mateus, Mateus nee kobrador impostu,

Tiago, Alfeu nia oan ho Tadeu,

4Simão, ida nebee tuir partidu Patriota,#10:4:Partidu Patriota nee luta para ema Judeu sira bele sai hosi estadu Roma nia okos hodi ukun rasik aan. Partidu nee mos naran Zelote.

ho Judas Iscariotes, nebee ikus mai nia mak faan Jesus.

Nai Jesus haruka Nia apostolu sira

(Marcos 6:7-13; Lucas 9:1-6)

5-6Liu tiha nee, Jesus haruka Nia apostolu nain sanulu resin rua, no Nia foo orden dehan: “La bele baa tama iha ema nebee laos ema Judeu sira nia leet. Ema Samaria nia aldeia mos la bele tama. Maibee imi tenki baa iha ema Israel sira deit, tanba sira hanesan bibi malae nebee lao sala dalan ona. 7Baa foo hatene ema Israel sira dehan, ‘Tempu besik ona atu Maromak ukun imi.’ 8Baa kura ema moras, halo moris fali ema mate, halo ema moras lepra isin moos fali, i duni sai espiritu aat hosi ema nia laran. Imi simu kbiit nee ho gratis, nunee mos imi tenki foo ho gratis. 9La bele lori osan mean ka osan mutin, ka doit riti ida mos la bele. 10Lalika lori bukae, lalika lori hena tahan rua ka sandalias, i lalika lori ai tonka. Tanba ema nebee serbisu, nia iha direitu atu ema foo buat nebee mak nia presiza.#1 Korintu 9:14; 1 Timóteo 5:18

11Bainhira imi tama iha sidade ida ka aldeia ida, buka ema nebee laran diak, i hela iha nia uma too imi sai hosi fatin nee. 12Bainhira imi tama iha ema nia uma, imi dehan: "Shalom, Maromak foo bensaun ba imi". 13Se uma nain simu imi nia liafuan nee ho diak, sira sei hetan bensaun. Se lae, Maromak dada fila fali bensaun nee hosi sira. 14Se imi baa iha uma ida ka aldeia ida i ema la simu imi ka lakohi rona imi nia liafuan, husik tiha fatin nee, i baku rai rahun hosi imi nia ain okos nudar sinal katak sira rasik mak sei lori todan.#Apostolu sira nia Istoria 13:51 15Hau hatete loloos ba imi, iha loron ikus bainhira Maromak tesi ema hotu-hotu nia lia, ema iha aldeia nee sei simu kastigu todan liu fali ema aat sira nebee uluk hela iha rai Sodoma no Gomora.”#Lucas 10:4-12; Mateus 11:24; Jenesis 19:24-28

Nai Jesus nia eskolanti sira sei simu terus no susar

(Marcos 13:9-13; Lucas 21:12-17)

16“Rona didiak, Hau haruka imi baa hanesan bibi malae baa tama iha asu fuik nia leet. Imi tenki matenek hanesan samea. I imi nia laran tenki moos hanesan manu pombu.#Lucas 10:3 17Maibee kuidadu, tanba ema sei mai kaer imi hodi lori imi ba iha tribunal relijiaun nian. Sira sei baku imi ho sikoti iha sira nia uma kreda laran. 18Sira mos sei foo sala ba imi iha liurai ho nai ulun sira nia oin. Buat sira nee hotu sai nunee tanba imi tuir Hau. Nee oportunidade ba imi atu foo sai Novidade Diak ba sira ho mos ba ema nebee mak laos Judeu. 19Bainhira ema lori imi baa hataan iha tribunal, lalika preokupa atu koalia saida ka atu hataan oinsaa. Tanba iha momentu nee Maromak sei foo hatene ba imi liafuan nebee mak imi atu koalia. 20Iha tempu nee, laos imi mak koalia, maibee imi nia Aman nia Espiritu mak koalia liu hosi imi.#Marcos 13:9-11; Lucas 12:11-12; 21:12-15

21Iha uma laran ida, se iha ema ida mak fiar mai Hau, nia maun-alin rasik mak sei entrega nia ba nai ulun sira para oho nia. Se oan ida fiar mai Hau, nia aman rasik mak entrega nia ba ema seluk para oho nia. I se inan-aman mak fiar, sira nia oan rasik mak hamriik hasoru sira hodi foo ba ema oho sira.#Marcos 13:12; Lucas 21:16 22Ema iha nebee-nebee deit sei odi imi tanba imi tuir Hau. Maibee ema nebee mak aguenta nafatin too rohan, Maromak sei salva sira.#Mateus 24:9; 24:13; Marcos 13:13; Lucas 21:17 23Bainhira ema halo terus imi iha sidade ida tanba imi fiar mai Hau, halai ba sidade seluk. Hau hatete loloos ba imi, imi seidauk haleu sidade hotu iha Israel laran, Hau Ema Oan fila fali mai ona.

24Estudante ida la bele boot liu nia mestri, i atan ida la bele boot liu nia patraun.#Lucas 6:40; João 13:16; 15:20 25Se estudante ida sai hanesan nia mestri, nee too ona. I atan ida sai hanesan nia patraun, nee mos too ona. Se xefi familia rasik ema bolu dehan, diabu Belzebu, saa tan membru familia sira iha uma laran nee.”#Mateus 9:34; 12:24; Marcos 3:22; Lucas 11:15

La bele tauk ba ema, tauk deit ba Maromak

(Lucas 12:2-7)

26“Nunee lalika tauk ema sira nee. Tanba buat hotu-hotu nebee agora taka hela, loron ida sei nakloke. I buat hotu-hotu nebee agora subar hela, aban-bainrua ema sei hatene.#Marcos 4:22; Lucas 8:17 27Buat nebee mak Hau foo hatene ba imi iha kotu-kotuk, imi tenki hatete sai. I saida mak Hau hanorin bis-bisu deit ba imi, imi tenki foo sai ho lian makaas iha ema barak nia oin. 28La bele tauk ema nebee mak hakarak oho imi, tanba sira so bele oho deit imi nia isin lolon, imi nia klamar sira la bele oho. Diak liu imi tauk ba Maromak, tanba Nia mak iha kbiit hodi oho imi nia isin lolon i soe imi nia klamar ba infernu. 29Hanoin took manu liin. Manu liin rua, ema faan sentavus ida deit. Maski baratu liu, maibee la iha ida mak monu ba rai, se imi nia Aman iha lalehan la foo lisensa. 30Laos nee deit, maibee Maromak mos hatene loloos imi nia fuuk lahan hira mak iha imi nia ulun. 31Nee duni, lalika tauk, tanba imi folin boot liu manu liin barak.”

Keta moe foo sai katak ita tuir Nai Jesus

(Lucas 12:8-9)

32“See mak foo sai iha ema nia oin katak nia fiar mai Hau, aban-bainrua Hau mos sei foo sai iha Hau nia Aman iha lalehan nia oin katak, nia Hau nia ema. 33Maibee see mak nega Hau iha ema nia oin, aban-bainrua Hau mos sei nega nia iha Hau nia Aman iha lalehan nia oin.”#2 Timóteo 2:12

Nai Jesus mai, halo ema fahe malu

(Lucas 12:51-53; 14:26-27)

34“Keta hanoin dehan Hau mai iha mundu nee lori dame. Hau mai laos lori dame, maibee Hau mai halo ema kontra malu. 35Hau mai para halo ‘oan mane kontra nia aman, oan feto kontra nia inan, feto foun kontra nia banin feto.

36I sira nia inimigu mai hosi nia uma laran rasik.’#Miquéias 7:6

37See mak hadomi liu nia inan-aman duke nia hadomi Hau, nia la serve atu sai Hau nia ema. Nunee mos see mak hadomi nia oan mane ka oan feto liu fali Hau, nia la serve sai Hau nia ema. 38See mak hakarak sai Hau nia ema, nia tenki lori nia krus hodi tuir Hau, i tenki prontu atu simu terus too mate. Se lae, nia la serve sai Hau nia ema.#Mateus 16:24; Marcos 8:34; Lucas 9:23 39Ema nebee hanoin liu nia moris iha mundu nee, nia sei lakon nia moris. Maibee see mak lakon nia moris iha mundu nee tanba nia tuir Hau, nia sei hetan moris rohan-laek.”#Mateus 16:25; Marcos 8:35; Lucas 9:24; 17:33; João 12:25

Nai Maromak sei selu buat nebee mak ita halo

(Marcos 9:41)

40“See mak simu imi, nia simu Hau. See mak simu Hau, nia simu Ida nebee haruka Hau mai.#Marcos 9:37; Lucas 9:48; 10:16; João 13:20 41See mak simu profeta ida tanba profeta nee foo sai Maromak nia Liafuan, bainhira Maromak selu profeta sira nia kolen, ema nee mos sei simu hanesan profeta sira simu. I see mak simu ema ida nebee moris loos tanba nia moris nee loos, bainhira Maromak selu ema moris loos sira nia kolen, ema nee mos sei simu hanesan. 42Hau dehan loloos ba imi, see mak foo bee kopu ida deit ba ema kiik ida tanba ema nee tuir Hau, Maromak la haluha nia kolen.”

Currently Selected:

Mateus 10: BTDT

Highlight

Copy