João 15

Nai Jesus hanesan ai uvas nia huun

1Jesus hatete, “Hau mak hanesan ai uvas nia huun loloos.#15:1:Iha Eskritura Testamentu Tuan, ema sira nebee hakerek, gosta kompara povu Israel ho ai uvas nia huun ida, ka uvas iha toos ida. Haree iha Salmu sira 80:8-16; Isaias 5:1-7; Jeremias 2:21; Ezekiel 15:1-8, 19:10-14; Oseias 10:1; ho hakerek iha Eskritura sira seluk tan. Maibee povu Israel sees hosi Maromak nia dalan loos. Nee mak iha nee Jesus temi rasik dehan, Nia nee, mak ‘ai uvas huun loloos’, tanba Nia la sees hosi Maromak nia hakarak. I Hau nia Aman mak hanesan toos nain. 2Ema nebee dehan nia hamutuk ho Hau, maibee la halo buat ida, Hau nia Aman sei soe tiha nia, hanesan toos nain tesi tiha sanak sira nebee la foo fuan. Maibee ema hotu nebee metin ho Hau, Hau nia Aman sei hamoos foer iha nia laran, hanesan toos nain tesi sai tiha sanak sira nebee la foo fuan para nia foo fuan barak liu.

3Hau nia Liafuan nee bele hamoos imi nia laran, hanesan toos nain hamoos ai nia sanak sira. 4Imi tenki metin nafatin ho Hau, hanesan Hau metin ho imi. Sanak nebee tesi sai ona hosi nia huun la foo fuan tan ona. Nunee mos ho imi. Imi la bele halo buat diak ruma, se imi la metin nafatin ho Hau.

5Hau hanesan ai uvas huun ida. Imi hanesan nia sanak. Ema nebee metin nafatin ho Hau, no Hau mos metin ho nia, nia hanesan sanak nebee foo fuan barak. Tanba, se imi la metin nafatin ho Hau, imi la bele halo buat diak ida. 6Ema nebee la metin nafatin ho Hau, nia hanesan sanak nebee la iha folin. Sanak hanesan nee, toos nain tesi soe tiha, para sai ai maran. Depois ema halibur ai maran nee hodi baa sunu tiha. 7Maibee se imi metin nafatin ho Hau, i Hau nia Liafuan mos hela metin iha imi nia laran, maka imi bele husu saida deit ba Nai Maromak, Nia sei foo ba imi.

8Se imi halo buat diak barak, nee hanesan sanak nebee foo fuan barak. Nunee imi foti aas Nai Maromak no hatudu katak imi nee, Hau nia eskolante sira.

9Hanesan Aman hadomi Hau, nunee mos Hau hadomi imi. Imi tenki metin nafatin ho Hau, para Hau bele hatudu Hau nia domin ba imi. 10Se imi halo tuir Hau nia ukun-fuan sira, entaun imi metin nafatin ho Hau, nunee Hau bele hatudu Hau nia domin nafatin ba imi. Nee hanesan Hau halo tuir Hau nia Aman nia ukun-fuan, para Nia hatudu nia domin nafatin mai Hau.

11Hau foo hatene buat sira nee ba imi hori uluk kedas, para imi bele haksolok, hanesan Hau mos haksolok. Hau nia hakarak para imi haksolok teb-tebes. 12Hau nia ukun-fuan nunee: imi tenki hadomi malu, hanesan Hau hadomi ona imi.#João 13:34; 15:17; 1 João 3:23; 2 João 5 13Se ema ida mate para nia belun sira bele moris, nee hatudu katak nia hadomi teb-tebes nia belun. La iha domin ida nebee boot liu domin ida nee. 14Se imi tuir Hau nia ukun-fuan nafatin, imi sai Hau nia belun. 15Hau lakohi bolu tan imi, Hau nia ‘atan.’ Tanba atan la komprende didiak nia patraun nia hakarak. Maibee Hau bolu imi, Hau nia ‘belun’, tanba Hau foo hatene momoos ba imi buat hotu nebee Hau nia Aman foo hatene ona mai Hau. 16Laos imi mak hili Hau. Maibee Hau mak hili no foti imi hodi halao serbisu nee. Nunee imi tenki baa halo buat diak barak nebee bele dura. Nee hanesan ai uvas huun ida nebee foo fuan diak nafatin. Se imi halo nunee, imi bele husu saida deit ba Hau nia Aman lori Hau nia naran, i Nia sei foo ba imi. 17Hau nia ukun-fuan ba imi mak nee: imi tenki hadomi malu.”

Ema iha mundu nee odi Nai Jesus nia ema sira

18Jesus hatutan tan dehan, “Se ema iha mundu nee odi imi, hanoin baa, tanba uluk sira mos odi ona Hau. 19Se imi hanesan ho ema iha mundu nee, sira mos hadomi imi. Maibee imi la hanesan ho sira. Hau haketak ona imi hosi sira. Nee mak sira odi imi.

20Keta haluha buat nebee Hau foo hatene ona ba imi dehan, ‘Atan ida la boot liu nia patraun.’ Entaun se sira halo terus Hau, sira mos halo terus imi. Se sira rona Hau nia Liafuan, entaun sira mos rona ba imi.#Mateus 10:24; Lucas 6:40; João 13:16 21Sira sei halo terus imi, tanba imi hamutuk ho Hau. Sira halo nunee, tanba sira la konhese Nia nebee haruka Hau mai. 22Se Hau la baa foo hatene ba sira, no hatudu dalan loos ba sira, sira hanoin dehan, sira la iha sala ida. Maibee Hau mai ona, no foo hatene tiha ona. Nunee, se sira halo sala, sira la iha tan razaun hodi dehan, ‘Ami la hatene buat nebee ami halo nee, sala.’

23Ema nebee odi Hau, nia mos odi Hau nia Aman. 24Hau halo ona milagre barak iha imi nia oin, nebee ema seluk la bele halo. Se Hau la halo milagre sira nee, sira mos la sala, se sira lakohi simu Hau. Afinal sira haree ona milagre oi-oin nebee Hau halo ona. Maski nunee, sira sei odi Hau no odi mos Hau nia Aman iha lalehan. 25Maibee buat sira nee hotu akontese tuir saida mak hakerek ona iha Maromak nia Eskritura Sagrada dehan, ‘Sira odi Hau, maibee la iha razaun ida.’#Salmu sira 35:19; 69:5

26Bainhira Tulun-Nain nee mai, Nia mak Espiritu nebee halo imi komprende saida mak loos. Nia mai hosi Hau nia Aman. Bainhira Hau baa ona Hau nia Aman, Hau sei haruka Nia Espiritu ba imi. Nia sei sai sasin kona ba Hau. 27Imi mos sei foo hatene ba ema kona ba Hau, tanba imi hamutuk ona ho Hau hosi hahuu kedas.

Currently Selected:

João 15: BTDT

Highlight

Copy