João 14

La iha dalan seluk hodi hadame ema ho Aman Maromak, so liu hosi Jesus deit

1Jesus koalia tan, “Imi lalika hanoin barak. Fiar ba Nai Maromak no fiar mos mai Hau. 2Iha Hau nia Aman nia uma iha fatin barak teb-tebes. Se karik fatin la too, Hau foo hatene kedas ona ba imi. Agora Hau atu baa prepara fatin ba imi iha nebaa. 3Bainhira Hau baa ona i prepara fatin ba imi hotu ona, Hau sei mai fali hodi lori imi baa hamutuk ho Hau. Nunee, iha fatin nebee Hau hela, imi mos hela iha nebaa. 4I imi hatene ona dalan ba fatin nebee Hau atu baa nee.”

5Maibee Tome husu ba Nia dehan, “Senhor! Ami la hatene Ita Boot atu baa nebee. Oinsaa ami bele hatene dalan ba nebaa?”

6Jesus foo hatene dehan, “Hau mak dalan, lia loos no moris. La iha ema ida mai iha Hau nia Aman, se la liu hosi Hau. Tanba Hau mak dalan mesak hodi baa Maromak, Hau mak lia loos nia huun, no Hau mak foo moris loloos ba ema. 7Se karik imi konhese Hau diak, imi mos konhese Hau nia Aman. Nunee, agora ba oin, imi konhese ona Nia, i haree ona Nia.”

8Filipe husu, “Senhor! Hatudu Ita Boot nia Aman mai ami, ida nee deit too ona.”

9Jesus foo hatene ba nia dehan, “Filipe, Hau hamutuk ho o kleur ona, maibee o seidauk konhese Hau didiak, ka? Tanba ema nebee haree Hau, nia haree mos Hau nia Aman. Nusaa mak o husu dehan, ‘Hatudu Ita Boot nia Aman mai ami’? 10Nee oinsaa? Bainhira Hau dehan Hau laran ida ho Aman, i Aman mos laran ida ho Hau, o fiar mai Hau, ka lae? Liafuan sira nebee Hau koalia ba imi nee, laos hosi Hau rasik, maibee mai hosi Hau nia Aman. Nia uza Hau hodi halao nafatin Nia serbisu. 11Fiar ba Hau bainhira Hau dehan, Hau laran ida ho Hau nia Aman, i Nia mos laran ida ho Hau. Maibee se imi la fiar Hau nia liafuan, pelu-menus fiar ba buat sira nebee Hau halo ona. 12Hau nia liafuan nee loos! Ema nebee fiar Hau, nia sei halo buat nebee Hau halo. Maibee, tanba Hau baa hamutuk ho Hau nia Aman, ema nebee fiar Hau sei halo buat nebee Hau halo, i bele halo liu tan. 13Imi nebee hamutuk ho Hau iha direitu husu hodi Hau nia naran. Nunee, bainhira imi halo orasaun hodi husu saida deit, lori Hau nia naran,#14:13:Halo orasaun “lori Hau nia naran” nia signifikadu dehan, ita halo orasaun tuir Jesus nia hakarak. Ita iha direitu hodi “lori Jesus nia naran” se ita sai Nia ema, se ita moris laran ida ho Nia, se ita rona ba Nia, i se ita fiar dehan, Nia mate hodi hamoos ita nia sala sira. Nunee, “lori Jesus nia naran”, la hanesan ho “temi deit Jesus nia naran.” Hau sei foo ba imi. Ho nunee, Hau foti aas Hau nia Aman, para ema hotu bele konhese Nia. 14Hau foo hatene fila fali: imi halo orasaun hodi husu saida deit, lori Hau nia naran, Hau sei foo ba imi.”

Nai Jesus promete atu haruka Nai Maromak nia Espiritu mai

15Jesus kontinua koalia, “Se imi hadomi Hau, imi tenki halo tuir Hau nia ukun-fuan sira. 16-17Bainhira Hau la hamutuk ona ho imi, Hau sei husu ba Hau nia Aman para Nia foo Tulun-Nain ida hodi hatudu dalan ba imi. Nia nee, Maromak nia Espiritu nebee hanorin imi buat nebee loos. Ema balu iha mundu nee lakohi simu Nia, tanba sira la bele haree Nia no la konhese Nia. Maibee imi konhese Nia tanba Nia hamutuk ho imi. Nia sei hela iha imi nia laran, i Nia sei hamutuk ho imi nafatin.

18Ho nunee, Hau la husik imi mesak, hanesan oan nebee la iha inan-aman. Maibee, keta haluha, Hau sei fila fali mai ba imi. 19La kleur tan, ema iha mundu nee la haree tan Hau ona, maibee imi haree Hau. Tanba Hau moris fali, imi mos hetan moris loloos. 20I bainhira Hau moris fali, imi hatene loos dehan, Hau hamutuk ho Hau nia Aman; imi hamutuk ho Hau; Hau mos hamutuk ho imi.

21Ema nebee simu no halo tuir Hau nia ukun-fuan sira, nia mak hadomi Hau. Hau nia Aman mos hadomi ema nebee hadomi Hau nunee. Hau mos hadomi nia, i hatudu Hau nia aan ba nia.”

22Iha nebaa, iha ema ida naran Judas. Nia nee, laos Judas Eskariotes. Bainhira nia rona Jesus nia koalia, nia husu, “Nai atu hatudu aan mai ami, maibee tanba saa Ita Boot la hatudu aan ba ema seluk iha mundu nee?”

23Jesus hataan, “Ema nebee hadomi Hau, nia sei halo tuir Hau nia Liafuan. Hau nia Aman mos hadomi nia. I Hau ho Hau nia Aman sei mai moris hamutuk laran ida ho nia. 24Maibee ema nebee la hadomi Hau, nia la halo tuir Hau nia Liafuan. Buat hotu nebee imi rona hosi Hau nee, laos hosi Hau rasik, maibee hosi Hau nia Aman nebee haruka Hau mai.

25Agora Hau sei hamutuk ho imi. Nee mak Hau foo hatene kedas buat sira nee ba imi. 26Tuir mai, Hau nia Aman sei haruka Tulun-Nain ida mai. Nia nee mak Espiritu Santu. Nia mai lori Hau nia naran. Nia serbisu mak: hanorin buat hotu ba imi, i foo hanoin ba imi buat hotu nebee Hau foo hatene ona ba imi.

27Bainhira Hau baa ona, Hau halo imi bele moris iha dame no laran hakmatek. So Hau deit mak bele foo laran hakmatek hanesan nee. Buat hotu iha mundu nee la halo imi laran hakmatek. Nunee, la bele laran taridu no tauk. 28Imi rona ona Hau foo hatene ba imi dehan, ‘Hau baa husik hela imi, maibee Hau sei fila fali mai.’ Keta laran susar. Se imi hadomi Hau, imi nia laran senti haksolok, tanba Hau baa ona Hau nia Aman. I Hau nia Aman, boot liu Hau. 29Hau foo hatene kedas ba imi nunee, bainhira buat sira nee akontese, imi bele fiar mai Hau. 30La kleur tan, Hau la koalia tan ho imi ona, tanba diabu mai ona. Nia mak kaer ukun iha mundu nee, maibee nia la iha kbiit hodi domina Hau. 31Husik nia mai baa, maibee Hau serbisu nafatin hodi halo tuir Hau nia Aman nia hakarak. Nee hodi hatudu ba ema iha mundu nee katak, Hau hadomi teb-tebes Hau nia Aman.

Mai ita baa ona!”

Currently Selected:

João 14: BTDT

Highlight

Copy