Ester 3
3
Amaan hirus Mordekai
1Liu tiha buat sira nee hotu, liurai Ahasuweros hakarak hatudu nia respeitu ba Amaan, Amedata nia oan, Agage nia jerasaun. Nee mak nia foti Amaan sai ema boot liu nia funsionariu sira seluk.#1 Samuel 15:7-33 2Liurai mos foo orden para bainhira Amaan tama-sai odamatan palasiu nian, funsionariu sira seluk tenki hakneak hodi foo respeitu ba nia. I ema hotu-hotu hatudu sira nia respeitu ba Amaan nunee.
Maibee Mordekai la hakneak no la hatudu nia respeitu ba Amaan.
3I funsionariu sira seluk nebee iha palasiu nia odamatan tama husu ba Mordekai dehan, “Senhor! Tanba saa mak senhor la halo tuir liurai nia orden?”
4Mordekai hataan dehan, “Hau ema Judeu. Nee mak hau la bele hakneak ba ema no ba sasaan sira nebee ema adora. Nee duni hau la bele hakneak ba Amaan.”#3:4:Ema matenek sira dehan, karik Mordekai lakohi kontra Ukun fuan hosi Exodus 20:4-5 nebee hakerek dehan, “La bele halo estatua nebee modelu hanesan sasaan saida deit iha loro leten, ka iha rai, ka rai okos, ka iha bee laran. La bele hakneak ba sira, no adora ba sira. Tanba Hau nee, mak imi nia NAI Maromak, laran moras, i lakohi para imi hakruuk ba buat seluk, liu fali Hau...”
Sira husu ba nia loro-loron, maibee nia lakohi rona ba sira. I sira mos foo hatene ba Amaan, atu haree se Amaan husik deit Mordekai nunee, ka lae.
5Bainhira Amaan hatene katak Mordekai lakohi hakneak no lakohi hakruuk ba nia, Amaan siak makaas. 6Maibee Amaan la kontenti se hakarak oho Mordekai mesak deit. Tanba nia mos hakarak oho tiha hotu Mordekai nia ema Judeu tomak iha provinsia 127 nebee liurai Ahasuweros nia ukun.
Amaan halo planu atu oho ema Judeu hotu
7Iha fulan Abril, bainhira liurai Ahasuweros ukun ona durante tinan 12, Amaan haruka dehan, “Foo hatene mai hau, tempu nebee mak diak para ita oho hotu Mordekai nia povu Judeu sira.” I sira dada rifa iha Amaan nia oin, hodi buka hatene nunee. I rifa nee monu iha loron 7 fulan Marsu, tinan oin.#3:7:Biblia lian Ebreu hakerek dehan, sira dada rifa iha fulan Nisan, nee iha fulan Marsu-Abril tuir ita nia kalendariu. Rifa nee hatudu fulan Adar, nee iha fulan Fevreiru-Marsu. Haree mos iha Ester 3:13. Buat sira nee akontese mais-ou-menus iha tinan 472 MK (Molok Kristu). Biblia tetun kopia data sira nee tuir ita nia kalendariu agora. Se ‘rifa’, lian Ebreu dehan, pur (ida/singular). Nee mak too agora, ema Judeu tinan-tinan halo festa Purin (pur-in: liu ida/plural) hodi hanoin istoria nee bainhira Maromak uza Ester ho Mordekai hodi hasai sira hosi mate nia laran.
8Entaun Amaan baa iha liurai Ahasuweros hodi husu dehan, “Amu liurai mak hau respeita! Iha povu ida hosi rai liur nebee moris namkari iha amu nia provinsia 127 nee hotu. Maibee sira la hanesan ema hotu. Sira foti aan i lakohi kahur malu ho povu sira seluk iha nee. Sira nia lisan no regra la hanesan ho povu sira seluk, i sira mos la halo tuir amu liurai nia orden. La serve se sira lakohi respeita ita nia regra sira. Nunee diak liu, amu liurai keta husik sira moris tan. 9Se tuir amu liurai nia hakarak, hau foo hanoin nunee: amu liurai hasai orden ida nebee dehan, povu sira seluk iha nee tenki oho hotu, sira nee la iha folin. Se amu liurai hakarak, husik baa hau foo ba ema nebee toma konta liurai nia osan mutin karoon 10.000.#3:9:Biblia lian Ebreu hakerek dehan, “talenta 10.000”. Talentu ida nia todan, mak kilu 34. Nee mak Amaan atu foo osan mutin tonelada 340. Ema matenek nain sira hanoin dehan, keta halo be Amaan hakarak simu fali osan sira nee hotu, ho hadau riku-soin hosi ema Judeu sira nebee nia oho nee. I uza osan sira nee hodi selu ema sira nebee trata asuntu sira nee.”
10Amu liurai dehan, “Diak!” I nia hasai nia kadeli hosi nia liman nebee nia uza hanesan karimbu, entrega ba Amaan hodi tau ba surat orden nee. (Amaan nee, nia inimigu mak povu Judeu sira. Nia mak Amadata nia oan, nebee jerasaun hosi Agage.)
11Liurai foo hatene ba Amaan dehan, “Osan sira nee konformi o deit. I o hakarak halo saida ba povu nee mos, konformi o.”
12Nunee iha loron 17 fulan Abril, Amaan halibur liurai nia ema sira nebee hakerek surat. Sira hakerek surat dekretu ida tuir loloos saida mak Amaan haruka. Sira hakerek foo ba governador ida-idak iha provinsia ida-idak. Sira foo mos ba povu ida-idak no ba katuas lia nain sira iha suku-suku. Sira hakerek tuir povu iha provinsia ida-idak nia lian ho sira nia maneira hakerek rasik. Surat nebee atu haruka uza liurai Ahasuweros nia naran, i tau karimbu hosi liurai nia kadeli rasik nebee nia entrega ona ba Amaan. 13I sira foo surat sira nee ba ema sira nebee bai-bain lori lia menon hodi baa foo iha provinsia 127 nee. Iha surat sira nee hotu, hakerek hanesan dehan, “Ukun nain sira tenki prepara para iha loron 7 fulan Marsu, sira tenki oho no harahun tiha hotu ema Judeu sira, feto-mane, kiik-boot, katuas-ferik, foin sae sira hotu. Ema nebee toma konta ba asuntu nee bele hadau ema Judeu sira nia riku-soin hotu.” 14Bainhira surat sira nee too ona iha provinsia ida-idak, sira tenki hakerek fila fali hodi lee ba povu para povu bele hatene iha surat nee dehan saida, atu nunee sira bele prontu para oho hotu ema Judeu sira iha loron nebee marka tiha ona.
15Bainhira liurai haruka nia ema sira nebee lori lia menon baa lalais, i sira lori kedas surat orden nee ba fatin hotu-hotu. Iha sidade Suzan, sira lee surat nee para ema hotu bele hatene. I liurai tuur haan-hemu hamutuk ho Amaan. Maibee povu iha sidade Suzan sira nia laran la hakmatek ho bainhira sira rona lia menon nee.
Currently Selected:
Ester 3: BTDT
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Timor-Leste.
