Ester 4
4
Mordekai husu ba Ester para tulun nia ema Judeu rasik
1Bainhira Mordekai hatene ona buat hotu nebee Amaan sira atu halo ba ema Judeu sira, nia lees tiha nia hena iha nia isin. I nia hatais fali ropa nebee halo hosi karoon, i tau mos akudesan iha nia ulun hanesan sinal katak nia laran tristi teb-tebes. Depois nia sai hosi nia uma baa iha dalan-dalan sira iha sidade, hodi tanis hakilar, tanba nia laran susar la halimar. 2Maibee bainhira nia too iha odamatan atu tama ba palasiu, nia la bele tama, tanba ema nebee hatais ropa hosi karoon la bele tama iha nebaa.
3Bainhira liurai nia surat orden too ona iha provinsia ida-idak, i nia povu mos rona ona surat nee dehan saida, nunee ema Judeu sira laran susar teb-tebes. Sira tanis makaas hanesan ema ida foin mate. I sira mos jejun. Sira barak mak troka tiha sira nia ropa hodi hatais fali ropa nebee halo hosi karoon, i sira mos tau akudesan iha sira nia ulun rasik hanesan sinal katak, sira nia laran tristi teb-tebes.
4Bainhira feto sira nebee ajuda Ester no mane sira nebee toma konta feto sira nee mai foo hatene ba Ester kona ba Mordekai, nunee halo Ester nia laran susar atu mate. Entaun nia haruka hena diak hodi ba foo ba Mordekai, hodi troka tiha ropa hosi karoon nee. Maibee nia lakohi simu. 5Depois Ester bolu ema ida, naran Hatak. (Nia nee, mane ida nebee kapa ona, nebee liurai haruka nia serbisu ba Ester.) I Ester haruka Hatak ba buka Mordekai, hodi buka hatene tanba saa mak Mordekai laran tristi teb-tebes hodi hatais fali ropa hosi karoon ho tanis makaas nunee.
6Nee mak Hatak sai ba buka Mordekai iha fatin publiku laran iha odamatan palasiu nia oin, hodi husu tuir hanesan Ester nia haruka.
7I Mordekai konta buat hotu-hotu nebee akontese ho nia. Nia mos konta osan valor hira nebee Amaan promete ona atu hatama ba iha liurai nia kofre, para ema hodi oho hotu ema Judeu sira. 8I Mordekai foo ba Hatak surat dekretu ida nebee sira taka tiha ona iha sidade Suzan, nebee hakerek dehan, liurai foo orden para oho tiha hotu ema Judeu iha provinsia 127 nee. I Mordekai husu ba Hatak dehan, “Lori surat nee ba hatudu ba liurai nia kaben, Ester. Konta buat hotu-hotu ba nia. Hatete ba nia dehan, hau mak haruka nia para baa hasoru liurai hodi defende nia povu rasik, i husu para liurai hatudu nia laran diak mai ami hotu.”
9Entaun Hatak fila hodi konta ba Ester buat hotu-hotu nebee Mordekai dehan.
10I Ester haruka Hatak lori lia menon fila ba Mordekai dehan, nunee: 11“Iha lei ida nebee ema sira serbisu iha palasiu no povu hotu iha provinsia 127 nee hatene tiha ona, katak: se iha mane ka feto nebee baa besik liurai nia kuartu ukun, se liurai la bolu, maka lei dehan, ema nee tenki hetan kastigu mate. So iha dalan ida deit, bainhira liurai lolo nia rota osan mean ba ema nee. Se liurai halo nunee, foin ema nee bele tama. Maibee agora, loron 30 ona mak liurai la bolu hau.”
12Depois Hatak baa foo hatene ba Mordekai buat hotu-hotu nebee Ester dehan ona.
13Maka Mordekai hataan dehan, “Ba hatete ba liurai nia kaben, Ester, dehan, ‘Keta hanoin dehan, o hela iha liurai nia palasiu, nebee ema la oho o karik. 14Keta haluha, se o la koalia buat ruma agora, ema seluk bele ajuda no salva ema Judeu sira. Maibee se nunee deit, maka o ho o nia familia sei mate hotu. See mak hatene? Agora o sai liurai nia kaben nee, para hodi hetan dalan diak hosi problema hanesan nee.’ ”
15Depois Ester haruka lia menon ba Mordekai dehan, 16“Baa halibur ema Judeu hotu iha sidade Suzan nee. Hau husu ba imi jejun no harohan mai hau loron tolu, kalan tolu. La bele haan, no la bele hemu buat ida. Hau ho hau nia ema feto sira nebee serbisu mai hau nee mos jejun no harohan hotu. Depois, hau sei baa koalia ho liurai, maski kontra lei. Se karik hau tenki mate ba ida nee, hau prontu mate.” 17I Mordekai fila, no halo tuir buat hotu nebee Ester haruka.
Currently Selected:
Ester 4: BTDT
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Timor-Leste.
