Ester 5
5
Ester konvida liurai ho Amaan ba iha festa
1Bainhira sira jejun ona loron tolu, Ester hatais tiha nia ropa liurai feto nian, i baa hamariik natoon loos iha liurai nia odamatan oin. Odamatan nee, hodi tama ba iha liurai nia fatin hodi ukun. Liurai tuur hela iha nia kadeira ukun hateke ba odamatan nee. I odamatan nakloke luan hela. 2Bainhira liurai haree Ester hamriik hela iha odamatan oin, nia laran haksolok. Nee mak nia lolo nia rota osan mean, hodi hatudu katak nia hakarak simu Ester ho diak. I Ester hakat ba oin kona iha nia rota tutun.
3I liurai husu ba nia dehan, “Oinsaa, Ester? Presiza saida? Hakarak husu buat ruma mai hau, dehan deit! Hau sei foo! Maski o hakarak husu hau nia riku-soin nasaun nian fahe ba rua mos, hau foo deit.”
4Ester hataan dehan, “Amu liurai mak hau respeita. Hau prepara hahaan hodi halo festa ida ba liurai. Nunee, se amu liurai hakarak, ita bele mai iha festa nee. Se bele, lori mos Amaan mai hotu. Tanba la kleur buat hotu prontu ona!”
5Depois liurai haruka nia ema sira dehan, “Baa dehan ba Amaan, haruka nia mai agora kedas! Tanba ami atu baa liurai feto Ester nia festa.” I sira mos baa.
Bainhira Amaan mai ona, nia baa hamutuk ho liurai ba festa nebee Ester prepara ona ba sira. 6Bainhira sira hemu tua, liurai husu dala ida tan ba Ester dehan, “Oinsaa, Ester? Agora o bele hatete ona, saida mak o presiza? O atu husu saida mai hau, dehan deit! Hau sei foo. Maski o husu hau nia riku-soin nasaun nian fahe ba rua mos, hau foo.”
7Entau Ester foo hatene dehan, “Amu liurai mak hau hadomi. Hau nia presiza mak ida nee deit: 8se amu liurai hadomi hau, i halo tuir hau nia hakarak, hau husu deit nunee: aban hau halo tan festa ida ba amu liurai. Aban, se liurai mai haan iha nee, foin hau foo hatene saida mak hau nia presiza. Amaan mos bele mai hotu.”
Amaan laran moras, hakarak atu oho Mordekai
9Iha tempu nebaa, bainhira Amaan atu fila hosi festa nee, nia fuan-laran haksolok loos. Maibee bainhira nia sai hosi odamatan palasiu nian, nia haree Mordekai la hamriik hodi foo respeita ba nia, i la hatudu senti tauk ituan mos. Nee halo Amaan hetok hirus liu tan Mordekai. 10Maski nia hirus nunee, nia sei kontrola aan, hodi fila ba uma.
Too ho too iha uma, nia bolu nia kolega sira ho nia kaben Seres. 11Bainhira sira halibur ona, Amaan koalia ho lian makaas dehan, “Hau iha riku-soin barak no hau nia oan mos barak. I liurai hatudu nia respeitu mai hau ho maneira oi-oin. Nia mos foti hau boot liu funsionariu sira hotu no ema boot sira seluk nebee serbisu ba nia. 12Laos liurai deit mak hatudu nia respeitu mai hau, maibee ohin liurai nia kaben Ester husu para liurai ho hau baa iha festa nebee nia prepara ona. So ami nain rua deit! La iha tan ema seluk. Laos nee deit, maibee nia mos konvida ona liurai ho hau para aban-baa tan iha festa nee. Ida nee laos halimar. 13Maibee hau senti buat sira nee hotu la iha folin ida. Tanba bainhira hau tama-sai odamatan palasiu nian, hau haree ema Judeu, Mordekai nee, tuur iha nebaa. Nia nunka hamriik hodi hatudu respeitu mai hau! Nee demais liu ona!”
14I Amaan nia kaben Seres, ho nia kolega sira hotu, koalia dehan, “Se nunee, ami hatoo ami nia hanoin ida nunee: haruka ema harii ai-riin ida ho nia naruk metru 22.#5:14:Biblia lian Ebreu hakarek dehan, ai-riin nee nia naruk “ꞌamma 50”. Hasta (metru kubiku) 50, mais-ou-menus metru 22,5. Tuir mai, iha aban dadeer-saan husu ba liurai para haruka ema tara tiha Mordekai iha ai-riin nee too mate. I tuir mai, bainhira baa haan hamutuk ho liurai, o nia laran bele hakmatek, tanba o nia problema ho Mordekai hotu ona.”
Entaun Amaan simu ho diak sira nia hanoin nee, i nia haruka ema harii ai-riin nee, para nia bele tara mate Mordekai iha nebaa.
Currently Selected:
Ester 5: BTDT
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Timor-Leste.
