Ester 2

Sira foti Ester para kaben fali ho liurai

1Kleur-kleur liurai Ahasuweros nia hirus komesa para. Maibee nia sei hanoin nafatin nia kaben Vasti, ho nia hahalok sira nee, i ho nia surat dekretu nebee foo hatene kona ba nia kastigu.

2I liurai nia ema sira nebee serbisu ba nia nee dehan, “Amu liurai, ami hakarak foo hanoin ida nunee: ami haruka ba buka labarik feto bonita sira nebee sei feto raan. 3Iha provinsia ida-idak, amu liurai bele foti ema balu sai funsionariu hodi buka feto bonita sira, i lori mai tau hamutuk iha muru forti nia laran, iha Suzan. Tanba iha nee iha ona senhor Hegai, nebee ema kapa ona. I amu liurai foti ona nia hodi toma konta feto sira iha palasiu. Nia mak xefi hodi kuidadu no tau matan ba feto bonita sira nee. Nia mos bele tau matan ba ema sira nebee serbisu iha salon para hadiak menina bonita sira nia kulit, nia fuuk ho sira nia ropa hotu. 4I nunee, amu liurai bele haree feto bonita sira nee hotu. Ida nebee mak monu ba liurai nia laran, liurai bele foti nia sai liurai nia kaben, hodi troka Vasti.”

Rona tiha liafuan sira nee hotu, liurai simu ho diak, i halo tuir.

5Iha tempu nebaa, iha sidade Suzan, iha ema Judeu ida, naran Mordekai. Nia hosi suku Benjamin. Nia aman naran Jair; nia avoo naran Simei; i nia avoo alak naran Kis. 6Uluk, bainhira Nabukodonozor sai liurai iha Babilonia, i Joaquim sai liurai iha Juda, Nabukodonozor kaer tiha Joaquim, Kis, ho ema sira seluk, obriga lori sira hosi Jerusalem ba Babilonia.#2 Liurai sira 24:10-16; 2 Kronikas 36:10 7Nee mak Kis nia jerasaun Mordekai, boot iha Babilonia, i sira nia familia mos aumenta barak iha nebaa, i Bainhira nia aman kiik ho nia kaben mate, Mordekai foti nia aman kiik nia oan feto ba hakiak, hanesan nia oan rasik. Labarik feto nia naran Adasa bolu ho lian Ebreu. Ho lian Farsi, bolu Ester. I Ester nee, isin diak no bonita teb-tebes.

8Bainhira notisia kona ba liurai nia fahe malu ho senhora Vasti i buka feto seluk namkari ona iha nebee ba nebee, sira hahuu kedas buka feto bonita iha fatin hotu-hotu hodi halibur sira iha sidade Suzan. Sira mos lori Ester ba iha liurai nia palasiu.

Sira husu Hegai tau matan ba nia, tanba Hegai mak kuidadu ba feto hotu iha palasiu. 9Hegai gosta loos Ester, i hatudu nia laran luak ba nia. Nee mak nia foo ba Ester mina oi-oin, i haruka ema sira nebee serbisu iha salon ajuda halo nia sai bonita liu tan. Nia foo ba Ester hahaan nebee furak, i haruka feto nain hitu hosi palasiu para ajuda nia. Depois nia muda Ester sira ba fatin nebee diak liu iha feto sira nia fatin iha palasiu.

10Mordekai hameno kedas ba Ester para la bele konta ba see-see deit dehan, nia ema Judeu, i nia familia mak see. I Ester halo tuir nia orden. 11Loro-loron Mordekai lao baa-mai iha fatin nebee feto sira hela ba nee nia oin, hodi buka hatene oinsaa ho Ester nia moris.

12Tuir regra, feto raan ida-idak tenki hela lai fulan 12 iha palasiu, foin too nia tempu ba toba hamutuk ho liurai Ahasuweros. Sira hotu tenki tuir regra hotu nebee foo ba feto sira iha palasiu. Regra sira nee mak: durante fulan 6, ema sira nebee serbisu pinta ema nee kose sira nia isin ho mina hosi ai-morin mira nia been. I durante fulan 6 tan, sira kose sira nia isin ho mina morin oi-oin ho pomada sel-seluk tan. 13Bainhira too ona nia tempu para feto raan ida tama ba toba ho liurai, sira husik nia hili ropa tuir nia hakarak, tara korenti osan mean ka osan mutin tuir nia hakarak rasik. Nia bele husu saida deit hosi feto sira nia fatin iha palasiu nee. 14Bainhira atu kalan ona, sira lori nia ba iha liurai nia kuartu. Iha aban dadeer-saan, nia la bele fila fali ba fatin nebee feto sira halibur baa, tanba feto sira nee seidauk baa toba hamutuk ho liurai. Iha senhor ida tan ema kapa tiha ona, nia naran Sasgas. Nia mak tau matan ba grupu segundu nee. Bainhira liurai gosta feto raan ida, liurai husu mos nia naran, foin nia bele fila para ba toba fali ho liurai.

15-16Entaun, mais-ou-menus hahuu iha fulan Janeiru, bainhira liurai Ahasuweros kaer ukun tinan hitu ona,#2:15-16:Lian Ebreu hakerek dehan iha fulan ida nee, mak Tebeth. Entaun tuir ema sira nebee matenek kona ba istoria, ita bele hatene, se Ester tama iha liurai Ahasuweros entre fulan Dezembru nia klaran, tinan 479 MK (Molok Kristu), ho Janeiru nia klaran, tinan 478 MK, nee tuir ita nia kalendariu agora. foin Ester hetan nia tempu para tama ba palasiu hodi toba hamutuk ho liurai. (Ester nee, Abiail nia oan. Abiail nee, Mordekai nia aman kiik. I Mordekai mak hakiak Ester hosi kiik.) Bainhira Ester hetan nia tempu hodi tama ba palasiu, nia la husu buat ida. Nia so husu Hegai atu hatudu dalan diak ba nia, tan Hegai mak tau matan ba feto sira nebee seidauk ba toba hamutuk ho liurai. I nia tuir deit dalan nee. Nee mak bainhira nia atu baa, ema hotu nebee haree Ester gosta teb-tebes nia.

17Bainhira Ester baa iha palasiu, liurai hadomi liu nia dukee feto sira seluk. Nia gosta teb-tebes Ester no hatudu nia domin ba nia. Nee mak liurai foti nia, hodi tau koroa liurai nian ba nia ulun, hodi troka Vasti nebee nia duni tiha ona nee.

18Depois liurai halo festa boot ida ba Ester. I nia konvida funsionariu hotu-hotu no ema boot sira hotu ba sira haan rame-rame, i nia foo ba konvidadu sira prezenti oi-oin nebee mesak didiak. I nia desidi dehan, loron nee, loron deskansa ba provinsia 127.

Mordekai rona dehan ema atu oho liurai

19Bainhira sira halibur ona labarik feto sira ba dala rua,#2:19:Lian Ebreu iha nee la klaru. sira mos foti Mordekai sai funsionariu iha liurai nia palasiu. 20Maibee tuir Mordekai nia lia menon ba Ester, nia nunka foo hatene ba ema dehan, nia ema Judeu, i nia familia mak see. Tanba Ester rona Mordekai, no halo tuir nia orden hotu, hanesan uluk Mordekai sei hakiak nia.

21Iha loron ida, bainhira Mordekai halao serbisu iha palasiu nia odamatan oin, iha funsionariu rua nebee hein iha palasiu laran, hanoin aat ba liurai. Entaun sira halo planu atu oho mate liurai Ahasuweros. Sira nain rua nee mak Bigtan ho Teres.

22Maibee Mordekai hatene tiha sira nain rua nia planu aat nee. I nia dehan ba liurai nia kaben, Ester. Entaun Ester baa hatete ba liurai dehan, Mordekai mak dehan ba nia. 23Bainhira liurai nia ema sira investiga didiak asuntu nee, afinal loos duni. I sira kastigu mate ema nain rua nee tuu iha ai riin too mate.#2:23:Iha tempu uluk, maneira ida mak liurai sira uza hodi hatudu sira nia forsa ba sira nia inimigu (sira nebee sei moris), mak sira tuu sira nia inimigu sira nia mate isin iha ai-riin. Iha maneira rua: 1) Uza ai-riin kameik, i tuu iha kidun, depois halo hamriik ai nee para ema barak bele haree; 2) husik mate isin monu tuun ba ai kameik para tuu iha nia kabun ka kanotak. I husik hela mate isin iha nebaa para ema hotu bele haree. Istoria sira nee hotu, sira hakerek iha liurai nia livru istoria nian. Tempu nee, liurai mos haree rasik sira hakerek ida nee.

Currently Selected:

Ester 2: BTDT

Highlight

Copy