Apostolu sira nia Istoria 3

Pedro kura ema ain aat ida

1Iha loron ida, tuku tolu lokraik, Pedro ho João baa iha Nai Maromak nia Uma Kreda Boot, hodi halo orasaun. 2Sira foin atu tama ba iha portaun naran ‘portaun kapaas’, sira haree mane ida ain aat, lao la diak, komesa nia moris. Loro-loron ema hulan nia baa tau iha nebaa, atu nia bele husu ezmola ba ema nebee mak tama ba iha Uma Kreda nee. 3Bainhira nia haree Pedro ho João atu tama ba laran, nia lolo liman baa hodi husu, “Senhor sira, hanoin hau baa! Foo netik osan ruma mai hau.”

4Sira nain rua fihir nia, i Pedro hatete, “Irmaun! Haree mai ami!”

5Ema nee foti oin, haree ba sira ho laran metin atu simu buat ruma.

6Maibee Pedro hatete, “Irmaun, osan mean ka osan mutin hau la iha, atu foo deit osan doit ida ba o mos hau la iha. Maibee saida mak hau iha, hau foo. Hodi Nai Jesus Kristu ema Nazaré nia naran, hau hatete ba o, ‘Hamriik i lao ona!’ ”

7Pedro kaer nia liman loos, hodi foti nia hamriik, i nia ain diak i forti kedas. 8Nia hamriik, haksoit i lao baa-mai. Nia lao, hodi haksoit-haksoit ho hahii Nai Maromak, tutuir sira nain rua tama ba kintal Uma Kreda Boot nian. 9Bainhira ema hotu haree nia lao ho hahii Nai Maromak, 10sira konhese nia, sira admira i dehan, “Ema nee sempre tuur iha Portaun Kapaas, hodi husu ezmola. Oinsaa mak nia bele lao tiha nee?!”

Pedro esplika iha Uma Kreda Boot laran

11Ema ida nebee foin hetan kura nee tutuir Pedro ho João too iha Varanda Salomão. Nia kaer metin hela sira, i ema barak halai mai hobur sira ho admira. 12Bainhira Pedro haree sira nunee, nia hatete, “Maluk Israel sira, tanba saa mak imi admira nunee? Nusaa mak imi haree bebeik mai ami nunee? Imi hanoin ami mak halo ema nee lao hodi ami nia poder rasik, ka tanba ami moris tuir Nai Maromak nia hakarak? 13Lae! Ita nia bei-ala Abraão, Isac ho Jacó́, ho ita nia bei-ala sira hotu, adora Nai Maromak. Nia nee mak kura ema nee hodi foti aas Jesus, ida nebee sempre tuir Maromak nia hakarak. Jesus nee uluk imi entrega tiha ba governador Pilatus. Tuir loloos governador atu hasai Nia, maibee imi mak lakohi.#Ezodu 3:15 14Imi kontra Jesus ida nebee moris loos, i la iha sala. Imi tau lia ba Pilatus hodi haruka hasai ema ohodor ida hosi kadeia.#Mateus 27:15-23; Marcos 15:6-14; Lucas 23:13-23; João 19:12-15 15Imi oho tiha Jesus, ida nebee moris hotu-hotu nia huun. Nia mate duni, maibee Nai Maromak halo Nia moris fali. Ami haree rasik ho matan.

16Nai Jesus nee Nia poder mak halo ema ain aat nee agora lao diak tiha ona. Imi rasik konhese nia i haree katak nia diak ona. Ema nee hetan kura, tanba ami fiar ba Nai Jesus.

17Maun-alin sira, hau hatene katak bainhira imi ho imi nia boot sira halo aat ba Jesus, imi la hatene saida mak imi halo. 18Maibee liu hosi dalan nee Nai Maromak kumpri Nia liafuan nebee Nia foo sai hori uluk ona, liu hosi Nia profeta sira, dehan Ema ida nebee Nia hili ona nee, tenki hetan terus barak. 19Tanba nee, imi tenki husik ona imi nia sala i fila ba Nai Maromak, atu Nia bele hamoos imi nia sala hotu. 20Depois Nia sei halo imi nia laran hakmatek, i haruka ba imi, Ema ida nebee Maromak hili ona, Nia nee mak Jesus. 21I Jesus nee sei hein iha lalehan too tempu para Nai Maromak halo buat hotu-hotu foun, tuir Nai Maromak promete ona liu hosi Nia profeta sira.

22Uluk profeta Moisés koalia kona ba Nai Jesus dehan,

‘Nai Maromak sei foti ema ida hosi imi para sai Nia profeta, hanesan hau. Imi tenki see tilun hodi rona buat nebee mak Nia atu foo sai ba imi. 23Maibee see mak lakohi rona Ema nee, Nai Maromak sei fila kotuk ba nia, i sei soe sai nia hosi Nai Maromak nia povu.’#Deuteronomio 18:15,18,19

24Profeta Samuel ho profeta sira seluk mos, Nai Maromak uza hodi foo sai kona ba buat nebee mak ita haree agora. 25Nai Maromak halo aliansa ona ho ita nia bei-ala Abraão, dehan,

‘Liu hosi o nia jerasaun, Hau sei foo bensaun ba ema hotu-hotu iha mundu.’#Jenesis 22:18

Aliansa nee agora tuun ona ba imi, povu Israel sira. 26Nai Maromak haruka Nia Oan nee hodi foo bensaun ba imi, atu imi husik tiha hahalok aat sira. Nai Maromak haruka nia Oan nee ba uluk imi ema Israel, depois foin haruka ba nasaun sira seluk.”

Currently Selected:

Apostolu sira nia Istoria 3: BTDT

Highlight

Copy