Apostolu sira nia Istoria 4

Xefi relijiaun sira ameasa Pedro ho João iha tribunal

1Bainhira Pedro ho João sei koalia hela ho ema sira nee, nai-lulik relijiaun Judeu sira, ho komandante seguransa Uma Kreda Boot, ho mos ema hosi grupu relijiaun Saduseu too mai.#4:1:Ema hosi grupu relijiaun Saduseu, sira la fiar katak ema mate sira sei moris fali. 2Sira siak Pedro ho João, tanba sira nain rua sempre foo sai ba ema hotu dehan, Jesus moris fali ona hosi mate, ho nunee Nia loke dalan ba ema mate sira mos bele moris fali. 3Entaun sira foo orden hodi baa kaer sira nain rua. Maibee tanba kalan ona, sira hatama sira nain rua ba iha kadeia, para aban hodi tesi lia nee. 4Maibee ema sira nebee rona apostolu sira nia hanorin nee, barak fiar ba Nai Jesus. Nee mak ema sarani amenta barak, too ema mane deit mais-ou-menus ema rihun lima. Nee seidauk konta feto ho labarik.

5Iha aban fali, lider relijiaun Judeu sira halibur hamutuk iha Jerusalém. Sira nee mak xefi relijiaun sira, lia nain sira, mestri relijiaun Judeu sira, 6ho nai-lulik sira nia boot, naran Anás. Iha ema boot seluk tan hanesan, Kaifás, João, Alexandre, ho nai-lulik boot nia familia sira. 7Bainhira sira hotu hamutuk ona, sira foo orden para lori Pedro ho João mai aprezenta ba iha sira. Bainhira sira nain rua too mai, ulun boot sira husu, “Oinsaa mak imi bele kura ema ain aat nee? Imi uza see nia poder? I see mak foo lisensa ba imi hodi halo nunee?”

8Espiritu Santu domina Pedro, i nia hataan,

“Nai ulun boot ho lia nain Israel nian. 9Senhor sira atu buka lia ho ami tanba deit ami ajuda ema ain aat ida. Senhor sira hakarak hatene, ami uza see nia poder hodi kura nia. 10Hau hakarak hatete ba senhor sira ho povu Israel tomak katak, hodi Nai Jesus Kristu ema Nazaré nia naran mak ami kura ema ain aat nee. Imi prega tiha ona Nia ba iha krus too mate. Maibee Nai Maromak halo Nia moris fali hosi mate. 11Uluk ema hakerek kona ba fatuk ida, hodi hatudu ba Nai Jesus nunee,

‘Iha fatuk ida mak badaen sira foti soe tiha ona;

maibee agora fatuk nee sai fali fatuk prinsipal liu.’#Salmu sira 118:22

12Iha mundu tomak, la iha dalan seluk mak Maromak foo hodi salva ema. So iha dalan ida deit, mak Jesus. Se laos Nia, la iha tan ema seluk mak bele salva ita.”

13Ema sira nebee tesi lia nee hatene katak Pedro ho João ema baibain, la eskola boot. Nunee sira admira teb-tebes ho sira nain rua nia brani nee, i sira hatene katak ema nain rua nee, uluk hamutuk ho Jesus. 14Sira la iha buat ida koalia hasoru Pedro ho João, tanba ema nebee hetan kura nee hamriik hela iha sira nia oin. 15Entaun sira haruka sira nain rua sai ba liur, atu sira husu liafuan ba malu. 16Sira koalia ba malu dehan, “Ita tenki halo saida ba ema nain rua nee? Tan ema hotu-hotu iha Jerusalém hatene ona dehan sira mak halo milagre nee. Ita la bele nega. 17Diak liu ita buka meius para lia nee la bele namkari ba iha nebee-nebee. Agora ita ameasa no bandu Pedro ho João, para sira la bele hanorin tan kona ba Jesus.”

18Depois sira haruka bolu fali sira nain rua tama ba laran, hodi foo hatene dehan, “Kuidadu! Imi la bele hanorin tan ema ida kona ba Jesus!”

19Maibee Pedro ho João hataan, “Senhor sira desidi rasik baa. Nebee mak diak liu? Halo tuir senhor sira nia orden ka halo tuir Nai Maromak nia orden? 20Buat nebee ami rasik haree ho matan, i rona ho tilun, ami tenki foo sai nafatin!”

21Depois xefi relijiaun sira ameasa tan sira nain rua nee, i haruka sai. Tanba sira la iha razaun ida hodi kastigu Pedro ho João, i sira mos tauk povu, tan ema hotu-hotu agradese hela ba Maromak, ba milagre nee. 22Afinal, ema nee ain aat durante tinan haat-nulu resin ona, foin nia hetan kura.

Sarani sira halo orasaun husu brani

23Bainhira sira husik tiha Pedro ho João, sira nain rua fila ba sira nia kolega sira. I sira konta buat hotu-hotu nebee mak nai-lulik nia xefi sira ho lia nain sira bandu ona sira. 24Rona nunee, sira hotu halo orasaun hamutuk ho neon ida laran ida dehan, “Nai Maromak, nebee halo lalehan ho rai, ho tasi no buat hotu-hotu.#Ezodu 20:11; Neemias 9:6; Salmu sira 146:6 25Uluk Espiritu Santu uza Ita Boot nia atan, ami nia liurai David, hanesan profeta hodi hakerek kona ba ema nebee kontra Jesus dehan,

‘Nasaun sira nebee la konhese Maromak, hirus nar-naran deit.

Ema kombina malu arbiru deit, la iha huun ho tutun.

26Liurai sira iha mundu prepara aan hamutuk,

ho nai ulun sira kombina lia ida, hodi kontra Nai Maromak

ho kontra Ema ida nebee Maromak hili ona.’#Salmu sira 2:1-2

27Buat nebee liurai David hakerek agora sai loos duni. Iha sidade nee, liurai Erodes ho governador Pónsiu Pilatus hamutuk ona ho nai ulun sira hosi Israel, ho nai ulun sira hosi nasaun seluk. Sira hotu kombina hodi kontra Jesus, Ita Boot nia Oan Santu, nebee Ita Boot hili ona. Nia sempre halo tuir Ita Boot nia hakarak.#Mateus 27:1-2; Marcos 15:1; Lucas 23:1; 23:7-11; João 18:28-29 28Maibee buat sira nee hotu, hodi kumpri Maromak nia planu, i kumpri buat nebee mak Maromak desidi tiha ona hori uluk. 29Agora, Nai Maromak haree ba sira nia ameasa nee. Ami husu Ita Boot foo aten brani mai ami, atu ami bele baa foo sai ba ema hotu-hotu, kona ba Nai Jesus nia Novidade Diak. 30Ami mos husu Nai Maromak foo poder mai ami, atu ami bele kura ema moras, i halo milagre, ho sinal oi-oin, para ema hatene katak, kbiit nee mai hosi Ita Boot nia Oan Santu Jesus.”

31Sira sei halo hela orasaun, fatin nebee sira hodi halibur malu ba nee, nakdoko. I Espiritu Santu domina sira, i sira baa foo sai Nai Maromak nia Novidade Diak ho brani.

Kristaun sira nia maneira moris

32Ema hotu nebee fiar ba Jesus, sira moris neon ida laran ida. La iha ema ida karak-teen, sira sempre foo sasaan ba malu. La iha ema ida mak dehan sasaan nebee nia iha, ninian mesak. Sasaan saida mak nia iha, hotu-hotu bele uza.#Apostolu sira nia Istoria 2:44-45 33I Maromak foo poder boot ba apostolu sira, para sira foo sasin ba ema katak Nai Jesus moris fali ona hosi mate, hanesan sira rasik haree ho matan. I Nai Maromak mos foo bensaun boot ba sira hotu. 34-35Sira balu faan tiha sira nia rai ho uma, i osan nee sira foo ba apostolu sira, hodi fahe ba ema nebee presiza. Nee mak la iha ema ida ke iha falta.

36-37Ezemplu hanesan José. Nia Levi nia jerasaun, hosi ilha Xipre. Apostolu sira bolu nia Barnabé. Naran nee dehan katak, ‘ema nebee hametin ema seluk nia laran’. Nia faan nia rai pedasuk ida, i nia lori osan rai nian nee, baa entrega ba apostolu sira.

Currently Selected:

Apostolu sira nia Istoria 4: BTDT

Highlight

Copy