Apostolu sira nia Istoria 2

Espiritu Santu tuun i domina Nai Jesus nia povu

1-2Too iha ema Judeu sira nia loron boot nebee sira bolu ‘Loron Pentekosta’,#2:1-2:Hosi loron boot Paskua too Pentekosta, loron lima-nulu. Ho nunee ita hatene katak, hosi Nai Jesus moris fila fali too Espiritu Santu tuun, loron lima-nulu. ema sira nebee tuir Nai Jesus nee halibur hamutuk iha uma ida. Derpenti sira rona lian ida mai hosi lalehan hanesan anin boot. Lian nee makaas teb-tebes, too sira hotu iha fatin nee la rona tan ema seluk nia lian.#Levitiku 23:15-21; Deuteronomio 16:9-11 3I sira haree hanesan nanaal, hanesan ahi lakan namkari iha ida-idak nia ulun leten. 4Nai Maromak nia Espiritu Santu domina sira hotu. I sira komesa koalia lian oi-oin nebee sira nunka aprende, tuir saida mak Espiritu foo ba sira hodi koalia.

5Iha tempu nee, iha ema Judeu barak mai ona iha Jerusalem hosi nasaun hotu-hotu. Ema sira nee tuir duni Nai Maromak. 6Bainhira sira rona lian nee, ema barak halai baa haree. Sira ida-idak rona sira nia lian rasik hosi ema fiar sira nia ibun. Nee mak halo sira hotu admira 7i sira dehan ba malu, “Sira nebee koalia nee, mesak ema Galileia! 8Oinsaa, ita bele rona sira koalia ho ita ida-idak nia lian rasik? 9Ita mai hosi provinsia Pártia, Média, Elam, Mezopotámia, Judeia, Kapadósia, Pontu, Ázia, 10Frígia, Panfília, Ejiptu, hosi Líbia besik ho sidade Sirene, i balu mai hosi sidade Roma. 11Iha tan balu mai hosi ilha Kreta, ho hosi rai Arabi. Ita balu ema Judeu, i balu mos ema hosi nasaun seluk nebee tama ona relijiaun Judeu. Maibee ita hotu bele rona ema sira nee koalia fali ho ita nia lian, kona ba sinal nebee Nai Maromak halo ona.”

12Sira hotu admira teb-tebes i sai bilan tiha, hodi husu ba malu, “Saida mak nee?”

13Maibee ema seluk goza sira dehan, “Lalikan rona sira! Sira tua lanu.”

Pedro hatoo liafuan ba ema barak

14Depois Pedro hamriik ho Jesus nia apostolu nain sanulu resin ida nee. I nia hakat ba oin hodi koalia ho lian makaas ba ema barak nee dehan, “Maluk Judeu sira, ho imi sira nebee mak hela iha sidade Jerusalém. See tilun mai hodi rona didiak saida mak hau atu hatoo. 15Keta hanoin ami nee tua lanu. Agora foin tuku sia! See mak hemu tua lanu iha dadeer-saan hanesan nee? La iha! 16Imi rona ami koalia ho imi ida-idak nia lian. Nee hodi kumpri liafuan nebee uluk Nai Maromak nia profeta Joel hakerek ona dehan:

17‘Nai Maromak hatete, “Molok mundu remata,

Hau sei fakar Hau nia Espiritu ba ema hotu-hotu.

Imi nia oan mane sira ho imi nia oan feto sira,

sei foo sai buat nebee ke Hau foo hatene ba sira.

Imi nia oan foin sae sira,

sei haree buat nebee mak Hau hatudu ba sira.

I ema katuas ho ferik sira,

sei mehi buat nebee mak Hau foo ba sira.

18Molok mundu nee remata,

Hau sei fakar Hau nia Espiritu ba ema hotu nebee halo tuir Hau nia orden.

Hau sei foo ba mane,

ho mos ba feto.

I sira sei foo sai saida mak Hau hatete ona ba sira.

19-21Molok Nai Maromak nia loron nee too mai,

Hau sei halo uluk sinal oi-oin iha loro-leten, ke halo ema admira.

Loro matan sei sai nakukun;

fulan sei sai mean hanesan raan.

Hau mos sei halo sinal oi-oin iha mundu nee.

Hanesan raan, ahi, ho suar sae ba leten.

I see mak husu tulun ba Nai Maromak,

sei hetan salvasaun.’ ”#Joel 2:28-32

Liafuan sira nee mak uluk profeta Joel foo sai ona.

22Maun-alin Israel sira, see tilun mai. Nai Maromak hili ona Jesus, ema Nazaré. Imi rasik hatene buat nee, tanba imi haree ona Nai Maromak hatudu ona Jesus hodi halo milagre ho sinal iha imi nia leet. Sinal sira nee halo ema admira. 23Maibee imi oho tiha Nia; imi tau lia ba ema aat sira hodi prega Nia ba krus too mate. Nee tenki sai nunee duni, hodi kumpri Nai Maromak nia planu hori uluk kedas.#Mateus 27:35; Marcos 15:24; Lucas 23:33; João 19:18 24Maibee mate la bele domina Nia. Nee mak Nai Maromak hasai Nia hosi ema mate nia leet, i halo Nia moris fali.#Mateus 28:5-6; Marcos 16:6; Lucas 24:5

25Hori uluk, liurai David hakerek ona kona ba Jesus dehan,

‘Hau hatene Maromak sempre hamutuk ho hau.

Nee mak hau la nakdoko,

tanba Nai Maromak sempre iha hau nia sorin loos.

26Nee mak hau nia laran haksolok;

hau mos adora bebeik Nia,

i hau hein deit ba Nia ho hakmatek.

27Tan Nai Maromak la husik hela hau iha ema mate sira nia fatin.

I Nia la husik Nia Ema Santu nia isin dodok iha rate.

28Nai Maromak hatudu ona mai hau dalan nebee foo moris.

Nia halo hau nia laran haksolok teb-tebes,

tanba Nai Maromak hamutuk ho hau.’#Salmu sira 16:8-11

Ida nee mak liurai David hakerek hori uluk kedas.

29Irmaun sira hotu, David koalia nee, la hatudu ba nia aan. Tanba nia mate, i hakoi tiha ona. Nia rate sei iha hela ita nia leet too ohin loron. 30Maibee liurai David nee, Nai Maromak nia profeta. I nia hatene katak Nai Maromak promete i jura ona dehan ema ida hosi David nia jerasaun sei kaer ukun.#Salmu sira 132:11; 2 Samuel 7:12-13 31David haree ba aban-bainrua nian. Nia foo hatene antes kedas dehan, Ema ida nebee Nai Maromak hili ona nee,#2:31:‘Ema ida nebee Nai Maromak hili ona nee’, ho lian Ebreu dehan Mesias, ho lian Gregu dehan Kristu. sei moris fila fali hosi mate. I Maromak sei la husik hela Nia iha ema mate sira nia fatin, i Nia mate isin sei la dodok.

32Ema nebee David dehan nee, mak Jesus! Nai Maromak halo Nia moris fali hosi mate, i ami nee hotu haree ho ami nia matan rasik. 33Agora Nai Maromak foti ona Jesus hodi tuur iha Nai Maromak nia sorin loos, iha fatin aas. I Jesus simu Espiritu Santu hosi Nia Aman hodi foo fali mai ami, tuir Nai Maromak promete ona hori uluk. Saida mak imi rona ho haree agora nee, Maromak nia Espiritu nia serbisu. 34David rasik la sae ba lalehan, maibee nia hakerek kona ba Jesus dehan,

‘Nai Maromak hatete ba hau nia Nai dehan,

“Tuur iha Hau nia sorin loos iha fatin aas,

35too Hau tau O nia inimigu sira iha O nia ain okos.’ ”#Salmu sira 110:1

36Nunee imi ema Israel hotu-hotu tenki hatene katak, Jesus ida nebee imi prega mate tiha iha krus nee, mak Ema ida nebee Nai Maromak hili ona. Nai Maromak mos foti ona Nia sai ita nia Nai.”

37Rona nunee, halo sira nia laran susar. I sira husu ba Pedro ho Jesus nia apostolu sira seluk dehan, “Entaun, irmaun sira! Ami tenki halo saida?”

38Pedro hataan, “Imi ida-idak tenki husik ona imi nia sala, i tuir Nai Maromak nia hakarak. Imi mos tenki sarani hodi Nai Jesus Kristu nia naran. Nee hanesan sinal katak imi tuir ona Jesus Kristu i Nai Maromak hamoos ona imi nia sala. Depois imi sei simu Nai Maromak nia Espiritu Santu.

39Tan Nai Maromak promete ona atu foo Nia Espiritu nee ba ema hotu nebee Nia bolu tiha ona. Promesa nee Nia foo ba imi, ho imi nia jerasaun sira, ho mos ba ema sira nebee sei iha liur nebaa.”

40Pedro koalia liafuan barak tan hodi buka atu dada sira ba dalan loos. Nia dehan, “Agora dadauk ema barak lao sees ona hosi dalan loos. Keta tuir sira! Tuir deit Nai Maromak nia dalan loos, para bele moris nafatin ho Nia.”

41Ema nebee mak simu Pedro nia liafuan nee, mos sarani. Sira mais-ou-menus ema rihun tolu. Sira tama tan ba ema sira seluk nebee fiar ona ba Jesus. 42Sira badinas rona apostolu sira nia hanorin kona ba Nai Jesus, i sira haree malu diak. Sira mos haan hamutuk,#2:42:Tuir ema matenek sira, iha tempu nebaa, sarani sira haan hamutuk, depois simu tan Santa Seia hamutuk. i badinas halo orasaun hamutuk.

Ema sarani sira adora Maromak i hadomi malu

43Iha tempu nee, Nai Jesus nia apostolu sira halo milagre ho sinal barak, halo ema hotu admira ho mos respeita sira. 44Ema sira nebee fiar ba Nai Jesus sempre neon ida laran ida. Sasaan nebee mak sira iha, ema hotu bele uza.#Apostolu sira nia Istoria 4:32-35 45Iha balu faan sira nia sasaan ka sira nia riku ruma, i osan nee sira fahe ba ema sarani sira, tuir ida-idak nia presiza. 46Loro-loron sira baa adora Nai Maromak hamutuk iha Uma Kreda Boot Judeu sira nian. Sira sempre haan hamutuk iha uma ba uma ho laran haksolok. Sira gosta ajuda malu ho fuan-laran. 47Sira hahii Nai Maromak bebeik. Ema seluk gosta teb-tebes sira, ho haree sira diak. Loro-loron Nai Maromak salva ema, i nunee Jesus nia ema sira amenta barak ba bebeik.

Currently Selected:

Apostolu sira nia Istoria 2: BTDT

Highlight

Copy