Apostolu sira nia Istoria 1

Nai Maromak promete atu haruka Nia Espiritu Santu mai

1-3Hau Lucas, hatoo hau nia respeitu ba senhor Teófilo.#1:1-3:Naran Teófilo iha lian Gregu dehan katak ‘ema nebee hadomi Maromak’. Nee Lucas nia livru segundu nebee nia hakerek foo ba Teófilo. Haree Evanjelhu Lucas 1:1-4.

Iha hau nia livru dahuluk, hau hakerek ona kona ba buat hotu-hotu nebee Nai Jesus halo ona, ho buat hotu-hotu nebee mak Nai Jesus hanorin ona, komesa hosi Nia hahuu Nia serbisu too Nia sae fila fali ba lalehan. Maski ema oho tiha ona Nia , maibee Nai Maromak halo Nia moris fila fali. Depois Jesus hatudu Aan ba Nia apostolu sira fila-fila durante loron haat-nulu, hodi hatudu loloos katak Nia moris fali duni. Nia mos foo hatene ba sira kona ba Nai Maromak nia reinu. I apostolu sira nebee Nia hili ona nee, Nia foo instrusaun ba sira ho Espiritu Santu nia poder.

4Iha loron ida, Jesus haan hamutuk ho Nia apostolu sira, Nia foo orden ba sira dehan,

“Keta husik lai Jerusalém. Imi tenki hein iha nee too Hau nia Aman foo Nia Espiritu Santu ba imi, tuir Nia promete ona, i tuir imi mos rona ona hosi Hau. 5Uluk João sarani imi ho bee, maibee iha loron hira tan, Nai Maromak sei foo Nia Espiritu Santu hodi domina imi.”#1:5:Ho lian Gregu dehan ‘foo sarani ho Espiritu Santu’. #Lucas 24:49; Mateus 3:11; Marcos 1:8; Lucas 3:16; João 1:33

Nai Jesus sae ba lalehan

6Bainhira Jesus hasoru malu fali ho Nia apostolu sira, sira husu, “Nai, tempu too ona atu Ita Boot halo ita ema Israel ukun aan fila fali ka lae?”

7Jesus hataan, “Kona ba tempu ho loron nee, so Hau nia Aman deit mak iha direitu hodi desidi tuir Nia knaar. Imi la presiza hatene. 8Maibee bainhira Espiritu Santu tuun iha imi, imi sei simu kbiit. Depois mak imi baa foo sasin kona ba Hau, iha sidade Jerusalém, iha provinsia Judeia no Samaria tomak, no too rai ulun rai ikun.”#Mateus 28:19; Marcos 16:15; Lucas 24:47-48

9Jesus koalia tiha hotu, Maromak foti Nia sae ba lalehan iha sira nia oin. La kleur kalohan taka tiha Nia, i sira la haree tan Nia ona.#Marcos 16:19; Lucas 24:50-51

10Sira sei hateke nafatin ba leten, derepenti ema nain rua hatais hena mutin hamriik hela iha sira nia sorin. 11Ema nain rua nee dehan, “Ema Galileia sira, nusaa mak imi hateke nafatin ba lalehan? Ohin imi haree Jesus sae ba lalehan husik hela imi, aban-bainrua Nia sei fila fali mai hosi lalehan hanesan mos imi foin haree.”

Sira buka ema seluk hodi troka Judas Eskariotes

12Liu tiha nee, Jesus nia apostolu sira tuun fila fali hosi foho Oliveira fila ba sidade Jerusalém. Hosi foho nee ba sidade Jerusalém maizomenus kilometru ida.#1:12:Iha tempu nee, mestri relijiaun Judeu sira dehan iha loron Sabdu, ema Judeu sira la bele lao dook, tanba iha loron nee la bele kaer serbisu. Ema bele lao deit too mais-ou-menus kilometru ida. Iha versikulu nee, Lucas hakerek ‘loron Sabdu nia dook’, nee dehan katak, kilometru ida.

13Too iha sidade, sira baa tama iha uma ida nebee sira hela baa, i sira sae liu ba iha andar leten. Jesus nia apostolu sira nia naran mak nee:

Pedro,

João,

Tiago,

André,

Filipe,

Tomé,

Bartolomeu,

Mateus,

Tiago (Alfeu nia oan),

Simão (membru partidu Zelot),#1:13:Partidu ‘Zelot’ nee hakarak para Israel ukun rasik an. Sira hakarak atu duni sai governu Roma hosi sira nia rain.

ho Judas (Tiago nia oan).#Mateus 10:2-4; Marcos 3:16-19; Lucas 6:14-16

14Sira halibur hamutuk bebeik hodi halo orasaun ho neon ida laran ida. Sira halo orasaun nee hamutuk ho Jesus nia inan Maria, ho feto balu tan, ho mos Jesus nia alin sira.

15Iha loron ida, sira halibur hamutuk, mais-ou-menus ema atus ida rua-nulu. I Pedro hamriik hodi hatete, 16“Maun-alin sira hotu, ita hatene Judas uluk lori ema baa kaer Jesus. Buat nee hodi kumpri Nai Maromak nia Liafuan, nebee Nia Espiritu foo ba liurai David uluk kedas kona ba Judas. 17Nia nee ita nia ema, i nia mos serbisu hamutuk ho ita.”

18(Bainhira Judas faan tiha Jesus, osan ida nebee nia simu nee, hodi baa hola rai pedasuk ida. Iha fatin nee nia monu riba ba rai, too nia kabun nakfera, i nia tee-oan fakar sai ba liur. 19Novidade nee ema konta iha nebee ba nebee, too ema hotu iha sidade Jerusalém rona kona ba nia mate nee. Tanba nee mak sira tau naran ba fatin nee hodi sira nia lian Aram dehan Akeldama, nee katak ‘rai raan nian’.)#Mateus 27:3-8

20Pedro koalia tan, “Hori uluk liurai David hakerek ona iha livru Salmus kona ba Judas, dehan,

‘Nia hela fatin nee sei sai fuik;

la iha ema ida hela tan iha nebaa.’

Nia mos hakerek dehan,

‘Nia knaar nee, sei foo ba ema seluk.’#Salmu sira 69:25; 109:8

21-22Nee duni ita tenki buka ema seluk hodi troka Judas. Ita presiza ema ida nebee tuir Nai Jesus ba iha nebee-nebee hamutuk ho ita, komesa kedas iha João sarani Jesus too Nia sae fila fali ba lalehan. Ema nee sei foo sasin hamutuk ho ita kona ba Jesus nia moris fali hosi mate.”#Mateus 3:16; Marcos 1:9; 16:19; Lucas 3:21; 24:51

23Bainhira Pedro koalia hotu ona, sira hatudu ema nain rua. Ida naran José. (Baibain ema bolu Barsabás, nia naran ida tan, mak Justu.) Ida tan naran Matias. 24-25Tuir mai, sira halo orasaun, nunee, “Nai Maromak, Ita Boot hatene ema hotu-hotu nia laran. Judas mate tiha ona husik hela nia knaar. Nee duni, Nai Maromak hatudu mai ami hosi ema nain rua nee, see mak Nai hili hodi troka Judas, para sai Nai Jesus nia apostolu.” 26Depois sira dada rifa, i rifa monu kona iha Matias. Nunee sira foti nia sai Jesus nia apostolu hamutuk ho sira nain sanulu resin ida.

Currently Selected:

Apostolu sira nia Istoria 1: BTDT

Highlight

Copy