Apostolu sira nia Istoria 15

Nai ulun kristaun sira halibur hamutuk iha Jerusalém

1Bainhira Paulo ho Barnabé sei iha Antiokia, ema sarani Judeu balu too mai hosi Judeia. Sira hanorin sarani sira dehan, “Se imi hakarak hetan salvasaun, imi tenki sunat, tuir lisan nebee Nai Maromak foo ona ba profeta Moisés.”#Levitiku 12:3

2Maibee Paulo ho Barnabé kontra makaas sira nia hanorin nee, i haksesuk malu makaas ho sira. Tanba sira kontra malu nunee, sarani sira desidi para haruka Paulo ho Barnabé ho sarani balu hosi Antiokia, lori asuntu nee ba Nai Jesus nia apostolu sira ho presbiteru sira iha Jerusalém.

3Entaun sarani sira iha Antiokia haruka delegasaun nee ba Jerusalém. Sira lao liu hosi provinsia Fenísia ho provinsia Samaria. Iha dalan, sira tama tutuir sarani sira nia uma hodi konta dehan, “Ema nebee laos ema Judeu mos fiar ona ba Nai Jesus.” Rona nunee, sarani sira haksolok.

4Bainhira sira too iha Jerusalém, Nai Jesus nia apostolu sira ho presbiteru sira ho sarani sira tomak, simu sira ho diak. Paulo ho Barnabé foo hatene buat hotu nebee Nai Maromak halo ona liu hosi sira, too ema barak nebee laos Judeu mos fiar ona ba Nai Jesus. 5Maibee sarani Judeu balu hosi grupu relijiaun Farizeu hamriik hodi dehan, “Ema nebee laos Judeu, mak hakarak tuir Jesus, sira tenki sunat i mos tenki tuir ita nia lei nebee Nai Maromak foo liu hosi profeta Moisés.”

6Entaun apostolu sira, ho presbiteru sira, halibur hamutuk hodi rezolve asuntu ida nee. 7Sira diskuti baa-mai, iha ikus, Pedro hamriik hodi koalia dehan, “Maun-alin sira, imi rasik hatene katak, uluk Nai Maromak hili ona hau, hosi imi, atu lori Jesus nia Liafuan ba ema sira nebee laos Judeu. Tan Nia hakarak atu sira mos fiar ba Jesus.#Apostolu sira nia Istoria 10:1-43 8Nai Maromak hatene ita ida-idak nia laran. I Nia mak foo Nia Espiritu Santu ba sira, hanesan uluk Nia foo ona ba ita. Ho nunee, ita hatene katak Nai Maromak mos simu sira.#Apostolu sira nia Istoria 2:4; 10:44 9Tan Nia haree sira ho ita hanesan. Nia hamoos ona sira nia laran tanba sira fiar ba Jesus, hanesan mos Nia halo ona mai ita. 10Agora, Nai Maromak simu ona sira, nusaa mak imi sei obriga tan sira tuir lei Moisés nian?! Ita ho ita nia bei-ala sira rasik la konsege halo tuir ita nia relijiaun nia lei hotu. Nee duni, ita keta obriga sira halo nunee. 11Maromak foo salvasaun ba ita, laos tanba ita tuir lei relijiaun, maibee tanba Nai Jesus hatudu Nia grassa ba ita.”

12Rona nunee, la iha ema ida mak koalia tan.

Tuir mai, Paulo ho Barnabé konta tan, oinsaa Maromak uza ona sira hodi halo milagre ho sinal oi-oin ba ema nebee laos Judeu. 13Koalia tiha hotu, Tiago hamriik hodi dehan, “Maun-alin sira, imi rona hau lai! 14Irmaun Simão Pedro#15:14:Lian Gregu hakerek ‘Simão’. Nia naran seluk, Pedro. konta ona mai ita katak, Nai Maromak foin hatudu Nia domin ba ema nebee laos Judeu, hodi foti sira balu sai Nia ema. 15Nee han-malu ho buat nebee Nai Maromak nia profeta sira hakerek hori uluk dehan,

16‘Too nia tempu, Hau sei fila fali mai.

Tanba Hau hakarak harii fila fali liurai David nia ukun nebee monu tiha ona.

Tan nia ukun nebee rahun tiha ona nee,

Hau sei foti fila fali hodi ukun no sei haforsa nia.

17-18Ho nunee, ema hosi nasaun sira seluk mos sei mai buka no hasoru Hau nudar sira nia Nai.

Hau mos hili ona sira nebee laos judeu hodi sai Hau nia ema.

Nee mak Maromak nia liafuan

i Nia koalia nunee hori uluk kedas.’ ”#Amós 9:11-12

19Tiago hatutan tan hanesan nee, “Tuir hau nia hanoin, se ema nebee laos Judeu hakarak tuir Nai Maromak, ita keta foo todan ba sira. 20Ita tenki hakerek surat ida ba sira, para sira lalika tuir ita nia lei hotu. Ita foo hanoin deit ba sira dehan, sira la bele haan naan nebee mak hamulak tiha ona ba lulik. Sira la bele halo relasaun seksual ho ema nebee laos nia feen ka laen. Sira la bele haan naan raan. I la bele haan naan animal nebee la koa kakorok halo raan sai.#Ezodu 34:15-17; Levitiku 17:10-16; 18:6-23 21Tan lei sira nee laos buat foun ida. I ema barak hatene ona katak, ita ema Judeu nia lisan nunee duni. Dezde uluk kedas Moises nia lei sira nee lee bebeik iha uma kreda Judeu nian, iha Sabdu-Sabdu.”

Ema kristaun sira nebee laos Judeu simu surat hosi sarani sira nia lideransa

22Depois Nai Jesus nia apostolu sira, presbiteru sira ho sarani sira hotu iha Jerusalém konkorda haruka ema baa foo hatene kona ba sira nia desizaun ba sarani sira iha sidade Antiokia. Sira hili ema nain rua nebee sarani sira respeita hodi halao serbisu nee. Ida naran Silas, ho ida tan naran Judas (nebee ema mos bolu Barsabás). I sira haruka sira nain rua baa hamutuk ho Paulo no Barnabé. 23Sira lori surat ida hakerek nunee:

“Ba ema sarani nebee laos Judeu iha sidade Antiokia, iha provinsia Síria tomak, ho mos provinsia Silísia.

Kumprimentus hosi ami, Nai Jesus nia apostolu, ho presbiteru sira iha Jerusalém. Ami hakerek surat nee foo ba imi, nebee ami hadomi hanesan ami nia maun-alin rasik.

24Ami rona dehan, iha ema balu hosi Jerusalém baa hanorin imi ho doutrina nebee la loos. Ida nee halo imi nia laran susar ho laran rurua kona ba salvasaun. Sira nee laos ami mak haruka baa. 25-27Nunee ami halibur malu hodi koalia kona ba asuntu nee. Depois ami ho laran ida hili Judas ho Silas baa hodi ami nia naran, atu hatoo rasik ba imi saida mak hakerek iha surat nee. Ami mos haruka irmaun doben Barnabé ho Paulo, nebee prontu foo aan ba mate tanba serbii Nai Jesus Kristu.

28Maromak nia Espiritu Santu foo hatene ona ba ami, i ami mos konkorda katak, imi lalika tuir ami nia lisan Judeu hotu. Tan lisan sira nee foo todan deit ba imi. Maibee iha lei balu mak imi tenki halo tuir:

29La bele haan naan nebee ema hamulak tiha ona ba lulik.

La bele haan naan raan.

La bele haan naan animal nebee la koa kakorok halo raan sai lai.

I la bele halo relasaun seksual ho ema nebee laos nia feen ka laen. Se imi halo tuir buat hirak nee, diak ona.

Ami nia liafuan too iha nee deit.”

30Sira nain haat simu tiha surat nee, sira lori kedas ba sidade Antiokia. Too iha nebaa, sira halibur sarani sira hotu, hodi foo surat nee ba sira. 31Bainhira lee tiha surat nee, sarani sira hotu haksolok, tanba liafuan nee hametin sira nia fuan-laran.

32Judas ho Silas mos profeta. Sira koalia buat barak ba ema sarani sira hodi hametin sira nia laran i halo forti sira nia fiar. 33Sira nain rua hela laduun kleur. Depois sira fila fali, lori kumprimentus hosi sarani sira hosi Antiokia ba sarani sira iha Jerusalém, nebee haruka sira baa. 34[Maibee Silas desidi hela nafatin iha nebaa.]#15:34:Iha dokumentu antigu barak, versikulu 34 nee la iha.

35Paulo ho Barnabé mos sei hela iha Antiokia. Hamutuk ho ema barak tan, sira hanorin ho foo sai Nai Maromak nia Liafuan.

Paulo ho Barnabé fahe malu

36Liu tiha nee, Paulo hatete ba Barnabé, “Irmaun, mai ita fila fali baa vizita sarani sira nebee uluk ita foo sai Maromak nia Liafuan ba nee. Ita baa haree took sira nia moris oinsaa.” 37Nunee Barnabé hakarak lori João baa ho sira. (João nee sira bolu mos Marcos.) 38Maibee Paulo lakohi. Tanba uluk, iha provinsia Panfília, Marcos lao husik hela tiha sira.#Apostolu sira nia Istoria 13:13 39Paulo ho Barnabé diskuti malu makaas, too sira nain rua fahe malu. Entaun Barnabé lori tiha Marcos baa sae roo hodi baa ilha Xipre.

40Maibee Paulo lori Silas. Molok sira nain rua atu sai, sarani sira iha Antiokia halo orasaun ba Nai Maromak atu kuidadu sira i hatudu Nia grasa ba sira. Depois sira nain rua baa ona. 41Sira lao lemo provinsia Síria ho provinsia Silísia hodi hametin sarani sira nia fuan-laran.

Currently Selected:

Apostolu sira nia Istoria 15: BTDT

Highlight

Copy