Apostolu sira nia Istoria 14

Paulo ho Barnabé iha sidade Ikóniu

1Bainhira Paulo ho Barnabé too iha sidade Ikóniu, sira baa foo sai Nai Maromak nia Novidade Diak iha ema Judeu sira nia uma kreda. Sira nia koalia nee halo ema Judeu barak ho mos ema barak nebee laos Judeu fiar ba Nai Jesus. 2Maibee ema Judeu sira nebee lakohi fiar ba Jesus tau lia ba ema balu nebee laos Judeu para odi ema sarani sira. 3Maski nunee, Paulo ho Barnabé hela kleur iha sidade nee hodi foo sai ho brani nafatin katak, Nai Jesus hatudu nia grasa ba ema hotu-hotu. Nai Maromak mos foo poder ba sira nain rua hodi halo milagre ho sinal oi-oin nebee halo ema admira, para ema hotu hatene katak sira nia hanorin nee loos duni.

4Maibee povu iha sidade nee fahe ba rua. Balu tuir ema Judeu sira nebee lakohi fiar ba Jesus, ema balu tuir Nai Jesus nia apostolu sira.

5Iha ema Judeu balu ho ema balu nebee laos Judeu, hamutuk ho sira nia boot sira, kombina malu atu halo terus apostolu sira, i mos atu tuda Paulo ho Barnabé ho fatuk. 6Maibee Paulo sira rona kona ba planu nee. Entaun sira halai. Sira baa sidade Listra ho sidade Derbe iha provinsia Likaónia, ho rai sira nebee besik. 7Iha nebaa sira foo sai nafatin Nai Jesus nia Novidade Diak.

Paulo ho Barnabé iha sidade Listra ho sidade Derbe

8Iha sidade Listra, Paulo ho Barnabé hasoru ema ida ain aat, dezde nia moris, i nia nunka lao. 9Ema nee rona Paulo nia koalia. Paulo hateke didiak ba nia, i haree katak ema nee fiar dehan Nai Jesus bele kura nia. 10Entaun nia bolu, “Irmaun, hamriik ona!” Rona nunee, ema nee haksoit i komesa lao kedas.

11Bainhira ema barak nee haree buat nebee Paulo halo, sira hotu admira. Sira hakilar ho sira nia lian Likaónia dehan, “Nee maromak nain rua nebee nakfilak aan ba ema tuun mai iha ita ema nia leet.” 12Sira hanoin Barnabé mak sira nia maromak ida naran Zeus. I Paulo, sira hanoin dehan, maromak Hermes, tanba baibain nia mak koalia.#14:12:Ema Listra sira fiar ba maromak bara-barak. Tuir sira nia fiar, Zeus (nebee ema mos bolu Júpiter) mak maromak ida boot liu. Hermes (nebee ema mos bolu Merkúriu) mak lori mensajen ba maromak sira. 13Iha portaun atu tama ba sidade, iha uma lulik ida, hodi adora maromak Zeus. Ema nebee hein uma lulik nee, dada karau vaka aman ida ho ai funan. Nia hamutuk ho ema lubuk ida atu oho karau nee hodi halo sakrifisiu para adora Paulo ho Barnabé.

14Maibee bainhira Jesus nia apostolu sira hatene katak ema atu adora sira, sira nain rua protesta kedas. Sira lees tiha sira nia ropa hanesan sinal katak sira la konkorda. I sira halai tama ba iha ema lubuk nee nia leet, hodi hakilar dehan, 15“Maluk sira! Nusaa mak imi halo fali nunee? Ami laos maromak. Ami ema hanesan imi. Ami mai atu foo hatene ba imi Novidade Diak katak, imi tenki husik ona imi nia lulik sira nebee la iha folin, hodi tuir Maromak ida nebee moris. Nia mak halo lalehan, rai, tasi, ho buat hotu-hotu.#Ezodu 20:11; Salmu sira 146:6 16Uluk, Nai Maromak husik nasaun sira moris tuir sira ida-idak nia hakarak. 17Maibee Maromak hatudu sinal oi-oin atu nasaun hotu hatene katak, Maromak nee diak duni. Nia mak haruka udan mai imi. Nia mak halo imi nia toos foo ai haan barak. Nia mak foo hahaan ba imi, i halo imi nia laran kontenti.”

18Maski apostolu sira koalia nunee, ema sira nee ulun toos hakarak duni adora Paulo ho Barnabé. Ikus mai sira nain rua konsege bandu sira.

19Liu tiha nee, ema Judeu balu too mai hosi sidade Antiokia ho sidade Ikóniu. Sira tau lia ba povu hodi kontra sira nain rua, too sira mos tuda Paulo ho fatuk. I sira rasta nia sai hosi sidade. Sira hanoin dehan nia mate tiha ona.

20Maibee bainhira ema sarani sira mai hamriik haleu Paulo, nia mos hamriik fali hodi tama fali ba sidade. Iha aban, nia ho Barnabé lao hamutuk ba sidade Derbe.

Paulo ho Barnabé fila fali ba sidade Antiokia iha provinsia Síria

21Iha Derbe, Paulo ho Barnabé foo sai Nai Jesus nia Novidade Diak. Ema barak mos komesa tuir Jesus. Depois sira nain rua fila fali ba Listra, ho Ikóniu. Hosi nebaa, sira lao nafatin ba iha Antiokia iha provinsia Pisídia. 22Iha fatin hirak nee sira koalia ho sarani sira hodi hametin sira nia laran. Sira foo hanoin dehan, “Ita nebee fiar ba Nai Jesus sei hetan terus oi-oin, maibee ita tenki tuir nafatin Jesus, para ita bele moris hamutuk ho Nai Maromak iha nia reinu.”

23Paulo ho Barnabé foti ema balu sai presbiteru ba sarani sira iha fatin ida-idak. Sira halo orasaun ho jejun, hodi entrega presbiteru sira ba Nai Jesus, nebee sira fiar.

24Liu tiha nee, Paulo ho Barnabé lao liu hosi provinsia Pisídia baa too iha provinsia Panfília. 25Iha nebaa, sira foo sai Maromak nia Liafuan iha sidade Perge. Depois sira baa too iha sidade Atália. 26Sira sae roo hodi fila ba sidade Antiokia iha provinsia Síria. Iha sidade nee mak ema sarani sira uluk entrega sira nain rua ba Maromak nia grasa hodi halao Nia serbisu. Agora sira nia serbisu nee remata ona.

27Too iha Antiokia, Paulo ho Barnabé halibur sarani sira hodi konta buat hotu-hotu nebee Maromak halo ona liu hosi sira. Sira mos foo hatene dehan Maromak loke ona dalan ba ema sira nebee laos Judeu hodi fiar ba Jesus. 28Paulo ho Barnabé sei hela kleur ho Nai Jesus nia ema sira iha nebaa.

Currently Selected:

Apostolu sira nia Istoria 14: BTDT

Highlight

Copy