Apostolu sira nia Istoria 13

Sarani Antiokia haruka Barnabé ho Saulo baa halao Maromak nia serbisu

1Iha sidade Antiokia, iha sarani balu Nai Maromak uza hanesan profeta, i balu hanesan mestri. Sira nee mak:

Barnabé,

Simeão, nebee baibain ema bolu ‘Metan’,#13:1a: Lian Gregu dehan ‘Niger’, nee dehan katak ‘metan’.

Lúcio hosi sidade Sirene,

Manaen, nebee hakiak dezde kiik hamutuk ho liurai Erodes,#13:1b: Liurai Erodes nee mak Erodes Antipas nebee oho João Sarani Nain. Nia aman naran Erodes Ida Boot mak haruka oho labarik nurak sira iha Belém momentu Nai Jesus moris. Nia oan Erodes Agripa mak haruka oho Tiago.

ho Saulo.

2Iha loron ida, sira adora hela Nai Maromak no halo jejun, Espiritu Santu hatete ba sira dehan, “Hili Barnabé ho Saulo hodi halo serbisu nebee Hau prepara ona ba sira.”

3Sira halo orasaun ho jejun tan, depois sira tau liman ba Barnabé ho Saulo, hodi haruka sira baa halao serbisu nee.

Barnabé ho Saulo baa iha rai Xipre

4-5Espiritu Santu haruka Barnabé ho Saulo baa. Nunee sira baa iha sidade ida besik tasi ibun, naran Seléusia. João Marcos mos akompanha hodi ajuda sira. Too iha nebaa, sira sae roo hodi baa rai kiik ida naran Xipre. I sira tuun iha sidade ida naran Salamina. Sira baa tama iha uma kreda Judeu nian balu hodi foo sai Nai Maromak nia Liafuan.

6Liu tiha nee, sira tama tutuir iha aldeia ba aldeia, hosi rai ulun Salamina too rai ikun Pafos. Iha sidade Pafos nee, sira hetan matan-dook ida naran Barjesus. Nia ema Judeu, i sempre lohi ema dehan nia Nai Maromak nia profeta. 7Nia belun diak ho governador rai nee, naran Sérgio Paulo. Governador nee ema matenek. Nia haruka ema baa bolu Barnabé ho Saulo, tanba nia hakarak rona Nai Maromak nia Liafuan. 8Maibee Barjesus (ho lian Gregu bolu Elimas) baa tau lia ba governador para la bele fiar ba Nai Jesus.

9Maibee Espiritu Santu domina Saulo, nebee ema mos bolu Paulo. Nia hateke didiak ba matan-dook nee hodi dehan, 10“Satanás nia oan! Bosok-teen! O nia laran nakonu ho buat aat. Buat nebee diak hotu-hotu, o kontra. O sempre lohi kona ba Nai Maromak nia lia loos. 11Tan nee, Nia sei kastigu o. Agora kedas o nia matan sei delek tiha iha tempu balu.”

Derpenti nakukun ida taka tiha nia matan, too nia la haree buat ida. Nia lamas baa-mai buka ema para kaer nia liman hodi hatudu dalan ba nia.

12Bainhira governador haree nunee, i rona sira nia hanorin kona ba Nai Jesus, nia admira teb-tebes, i nia mos fiar ba Nai Jesus.

Paulo sira baa iha sidade Antiokia iha provinsia Pisídia

13Hosi sidade Pafos, Paulo ho nia kolega sira sae roo hodi baa iha Perge, iha provinsia Panfília. Too iha nebaa, sira tuun hosi roo, i João Marcos lao husik hela sira, hodi fila ba Jerusalém. 14Hosi Perge sira lao ain ba iha sidade Antiokia iha provinsia Pisídia.

Iha loron Sabadu, nebee ema Judeu sira nia loron hodi harohan hamutuk, sira baa iha ema Judeu sira nia uma kreda. 15Hanesan baibain, ema lee liafuan balu hosi profeta Moisés nia livru, ho profeta sira seluk nia hakerek. Depois sira nebee toma konta uma kreda nee haruka ema husu ba Paulo ho Barnabé dehan, “Irmaun sira. Se imi iha liafuan ruma atu foo sai mai ami, para hametin ami nia laran, bele koalia.”

Paulo foo sai kona ba Jesus ba ema Antiokia

16Entaun Paulo hamriik, nia halo sinal ho liman husu para sira nonook. Nia koalia dehan, “Maun-alin Israel sira ho maun-alin sira hosi nasaun seluk, nebee hamtauk ba Nai Maromak. See tilun mai.

17Nai Maromak hili ita ema Israel nia bei-ala sira hori uluk. Nia halo sira nia jerasaun aumenta barak durante sira hela iha rai Ejitu, nebee laos sira nia rain. Tuir mai, Nai Maromak uza Nia forsa hodi hasai sira hosi rai nebaa.#Ezodu 1:7; 12:51 18Depois sira muda fatin baa-mai iha rai fuik maran durante tinan haat-nulu. Maski sira ulun toos, maibee Maromak lori sira ho pasiensia.#Numerus 14:34; Deuteronomio 1:31 19Iha ikus, Maromak halo rahun tiha nasaun hitu iha rai Kanaán, hodi fahe rai sira nee foo ba ita nia bei-ala sira para sai sira nia rikusoin.#Deuteronomio 7:1; Josué 14:1 20Nee hotu durante tinan atus haat lima-nulu.

Nee liu tiha, Nai Maromak foti juis hodi ukun sira, too tempu profeta Samuel.#Juiz sira 2:16; 1 Samuel 3:20 21Bainhira Samuel ukun sira, ita nia bei-ala sira husu para bele iha liurai. Nunee Nai Maromak foti Kis nia oan Saul, hosi suku Benjamim, sai liurai. Saul ukun durante tinan haat-nulu.#1 Samuel 8:5; 10:21 22Depois Nai Maromak hatuun tiha Saul, i foti fali David sai liurai. Nai Maromak dehan, ‘Jessé nia oan David nee monu ba Hau nia laran. Nia sei halo tuir hotu Hau nia hakarak.’#1 Samuel 13:14; 16:12; Salmu sira 89:20 23Maromak promete atu haruka David nia jerasaun ida mai, hodi salva povu Israel. Salvador nee mak Jesus.”

Paulo dehan Jesus nee mak Maromak promete ona atu haruka mai

24“Molok Nai Jesus hahuu Nia serbisu, iha ema ida naran João foo sai ba ema Israel hotu-hotu katak sira tenki husik ona sira nia sala, i tenki sarani hanesan sinal katak sira diak malu fali ona ho Maromak.#Marcos 1:4; Lucas 3:3 25Maibee bainhira João nia serbisu atu remata, nia hatete dehan, ‘Imi keta hanoin hau nee mak Ema ida nebee Maromak promete atu haruka mai. Lae! Ema nee atu mai ona. Nia boot liu hau. Hakruuk hodi kore Nia sapatu talin deit mos, hau la serve.’#Mateus 3:11; Marcos 1:7; Lucas 3:16; João 1:20,27

26Maun-alin sira. Imi nebee Abraão nia jerasaun, ho mos imi hosi nasaun seluk nebee hamtauk ba Nai Maromak. Nai Maromak foo ona Novidade Diak ba ita, atu ita bele hetan salvasaun. 27Nai ulun Judeu ho povu Jerusalém kastigu mate Jesus. Nunee sira halo tuir buat nebee profeta sira hakerek hori uluk ona. Sabdu-Sabdu sira baa iha ema Judeu sira nia uma kreda hodi rona profeta sira nia liafuan. Maski nunee, sira la hatene katak Jesus nee mak Ema ida nebee Nai Maromak promete atu haruka mai nee. 28Sira la hetan razaun ida para atu oho Jesus. Bele nunee mos, sira husu ba governador Pilatus para oho Nia.#Mateus 27:22-23; Marcos 15:13-14; Lucas 23:21-23; João 19:15 29Governador hataan, i sira prega Jesus iha krus, too mate. Buat sira nee hotu sai tuir loloos saida mak profeta sira hakerek tiha ona. Depois sira hatuun Nia mate isin hosi krus, i lori baa hakoi.#Mateus 27:57-61; Marcos 15:42-47; Lucas 23:50-56; João 19:38-42 30Maibee Nai Maromak halo Jesus moris fali hosi mate.

31Bainhira Jesus moris fila fali, Nia hatudu Aan fila-fila durante loron barak, ba ema sira nebee uluk lao hamutuk ho Nia hosi provinsia Galileia too Jerusalém. I sira nee mak agora sai sasin ba povu Israel.”#Apostolu sira nia Istoria 1:3

Paulo foo hatene dehan Nai Maromak uza ona nia profeta sira hodi foo sai kona Jesus

32Paulo hatutan nia koalia dehan, “Ami nain rua lori Novidade Diak nee foo ba imi katak, buat nebee mak Maromak promete ona ba ita nia bei-ala sira, agora kumpri ona. 33Maromak halo Jesus moris fali hosi mate, nee tuir liafuan iha livru Salmus nebee dehan,

‘O nee Hau nia Oan.

Ohin loron, Hau hatudu katak Hau O nia Aman.’#Salmu sira 2:7

34Hori uluk Nai Maromak promete ona dehan, Nia sei halo Jesus moris fali, i Nia sei la mate tan. Nunee Maromak halo tuir Nia Liafuan nebee dehan,

‘Hori uluk Hau promete ona ba liurai David atu foo bensaun ba nia.

Agora Hau halo fali promesa nee ho imi.’#Isaías 55:3

35Iha Salmus seluk mos hatete,

‘Maromak sei la husik Nia Ema Santu nia mate isin dodok iha rate.’#Salmu sira 16:10

36Nee la koalia kona ba David. Ita hatene nunee, tanba liurai David serbii tiha ona nia povu tuir Nai Maromak nia hakarak, depois nia mate, i nia mate isin dodok tiha ona. 37Nunee Salmus nee koalia kona ba ema seluk. Bainhira ema nee mate, Nai Maromak halo moris fali Nia. Nee mak Nia mate isin la dodok.

38-39Maun-alin sira, rona didiak mai. Ema nee mak Jesus! Se ita fiar ba Nia, mak Nai Maromak hamoos ita nia sala hotu, hodi simu ita hanesan ema nebee moris loos. Bele ita hakaas aan atu tuir lei hotu nebee profeta Moisés rai hela ba ita mos, nee la bele halo ita moris loos iha Nai Maromak nia futar oin hanesan nee. So ita fiar ba Nai Jesus, mak Nai Maromak hamoos ita nia sala. 40Hanoin didiak! Keta halo-be buat nebee mak uluk profeta sira foo sai nee, kona ba imi. Sira hakerek kona ba ema nebee kontra Jesus dehan,

41‘Imi nebee gosta hatete aat Hau,

haree ba buat nebee mak Hau halo.

Imi sei admira, i mate!

Tanba Hau halo dadauk buat ruma iha imi nia leet,

bele ema konta buat nee ba imi,

maibee imi sei la fiar.’ ”#Habacuque 1:5

42Bainhira Paulo ho Barnabé lao sai hosi uma kreda nee, ema sira iha nebaa husu ba sira para fila fali iha Sabdu oin hodi esplika buat sira nee diak liu tan. 43Ema Judeu ho mos ema laos Judeu nebee hamtauk ba Nai Maromak, barak akompanha Paulo ho Barnabé. I sira nain rua foo konselhu dehan, “Imi tenki laran metin nafatin ba Nai Maromak, tanba Nia hatudu ona laran diak mai ita.”

Nai ulun Judeu tau lia ba povu hodi kontra Paulo ho Barnabé

44Sabdu tuir mai, kuaze ema hotu iha sidade nee mai rona Nai Maromak nia Liafuan kona ba Jesus. 45Bainhira nai ulun Judeu sira haree ema barak mai rona Paulo ho Barnabé, sira laran moras. Nunee sira hatete aat Paulo i kontra kedas nia koalia.

46Maibee Paulo ho Barnabé koalia ho aten brani teb-tebes dehan, “Nai Maromak haruka ami ba hatoo uluk Nia Liafuan ba ema Judeu. Maibee imi lakohi simu. Nee hatudu katak imi la merese atu hetan moris rohan laek hamutuk ho Nai Maromak. Nunee agora, ami sei lori Novidade Diak nee ba hatoo ba iha nasaun sira seluk. 47Tan Nai Maromak foo ona orden mai ami dehan,

‘Hau foti ona o sai hanesan ahi oan hodi lori naroman ba ema nebee laos Judeu,

atu o lori Maromak nia salvasaun ba iha mundu tomak.’ ”#Isaías 42:6; 49:6

48Bainhira ema sira nebee laos Judeu rona nunee, sira kontenti teb-tebes. Sira hahii Nai Maromak dehan, “Maromak nia Novidade diak teb-tebes!” I ema sira nebee mak Nai Maromak desidi ona para hetan moris rohan laek, sira hotu fiar ba Nai Jesus.

49Nunee Nai Maromak nia Liafuan hatutan hosi ibun ba ibun iha rejiaun nee tomak.

50Depois nai ulun Judeu balu mai tau lia ba senhora balu nebee riku i hamtauk ba Nai Maromak, ho mos ba ema boot sira iha sidade nee. I sira tau lia ba povu para halo terus Paulo ho Barnabé, too duni sai sira hosi nebaa. 51Molok sira sai hosi sidade nee, sira nain rua baku rai rahun hosi sira nia ain hanesan sinal katak, ema iha sidade nee lakohi rona ba Nai Maromak. I sira baa fali iha sidade seluk ida naran Ikóniu.#Mateus 10:14; Marcos 6:11; Lucas 9:5; 10:11

52Maibee, ema sira nebee tuir Nai Jesus iha Antiokia, sira nia laran haksolok, i Espiritu Santu domina sira nafatin.

Currently Selected:

Apostolu sira nia Istoria 13: BTDT

Highlight

Copy