Matiye 20

Məɗɗaŋ wəza addivit megezlembirkeɗi

1Məlĩ na disiŋ agilik va Afən guli net megezlembirkeɗ dəgil də mompumo pum vi kawkay məɗɗaŋ wəza a guli net megezlembirkeɗ nani. 2Aslerik dit məɗɗaŋ wəza aka suley aza pay pakə, aslin a guli net megezlembirkeɗ nani. 3Agilik əmpa də təbəz vaytakə, awlek ɗiy meɓɓeti tahəŋ ziwziw a gəla lumu, də meti. 4Aɓsit na: Nokum pak məddoŋ a guli net megezlembirkeɗ nawa, a nəfaɗ sukum an məs dəslə azokum. 5Addoŋguk a guli ananda. Yaŋ agil tataŋpay əmpa, agilik də təbəz hoku'e aɗɗak va an lahəŋka. 6Agilik də təbəz sle əmpa, arəhik ɗiy meɓɓet tahəŋ ziwziw a gəla lumu də meti. Assohotike vimi kədasɓətaŋ aŋ huruɓ də mokum di? 7Azlan sənən na: Vi ɗəf tay dəgəməm aka wəza ɓa. Anah sit na: Nokum pak məddoŋ a guli net megezlembirkeɗ nawa.

8 # MƏS 19:13; ƏMS 24:15 Adan pay atəpə, afən guli net megezlembirkeɗ aɓsən daya na wəza nan na: Aye məɗɗaŋ wəza, afaɗ sit deleɗ neti, ətəŋgən dit en meddirɓe əbay man dit en maddaabəŋ. 9En na təbəz sle azzoŋ kana, yaŋ arəhaŋ naway di pak suley taka taka. 10En maddaabəŋ azzoŋ tamə, azet na warəhaŋ dayki aska, yaŋ arahaŋ net pak suley taka taka. 11Səza atafən na aɗɗaŋgək wərwər aka afən gulyo. 12Aɓɗaŋ na: Ɗiyeŋki dərɓedərɓe azzoŋgu, təbəz taka aɗɗaŋ kaka'ə, yaŋ kəfaɗ sit dakadaka də mənam məs məzəmsahã ara pay sla'sla huruɓu. 13Yaŋ azlan sən ɗəf taka səmmbeti, amna: Baynawa, nəgəɗ suk mataka taka ɓa. Məsler də'is aka suley taka ɓa sa? 14Agəm suley noko, doko, naw nəŋgəl kawfaɗ sən ɗəf an meddirɓe gba noko. 15Ya nəɓap na əɗɗa wəza dit suleyɗe naw va nəŋgəl ɓa sa? Awaniɓa kotorok kəgəɗ vi nəsaw moggow sa? 16#MAT 19:30; MAR 10:31; LUK 13:30Vaski ɗiy en meddirɓe wakkpaŋgaŋ ɗiy en maddaabəŋ, ɗiy en maddaabəŋ wakkpaŋgaŋ ɗiy en meddirɓe.

Yesu tay əpel aka əmta gəm əsilye nan səka əmta təl mohokoni

(MAR 10:32-34; LUK 18:31-34)

17Adan Yesu adaddan a Yerusalem, andek gewleɗ nan kəlaw kiyit sula takərgiti. Aka tive na, apel sitike, amna: 18Mənam tat əpeŋ a Yerusalem yaŋka, wapsənən Wətən Ɗəf avet deyeɗe net məsdəlveŋge dit mərbaŋ-mahenziŋ. Watawən wən namta akani. 19Wapsətin avet ɗiy-ɗarə, wamasaŋ akani, wavərnəni gəm wakkpa'nən aka məzliwrihe. Pay mohoko'ən wasil səka əmta.

Wəssõh nat met mãy Yakob də Yohanna

(MAR 10:35-45)

20Yaŋ met kirtin Zebede təzar aza Yesu dit kirtita. Tuppu'u gəm təssõh zəga avani. 21Yesu anah sət na: Mi kəŋgəl di? Təɓsən na: Kəta aɗi wən nan na, kirtu suleŋ dəssoŋgən taka aka vok dəzəŋ, taka aka vok zlaɓay addəv məlĩ noko. 22Yesu azlani amna: Kəsənən an kədassohoŋ ɓa. Wakəɓapən wəsət huloŋguk na tatwãh məs nədawsa van sa? Aɓsənən na: Waməɓapa. 23Yaŋ Yesu aɓsit na: Wakəɓapən wəsət huloŋguk na tatwãh nawa, Ya wən nasa aka dəzəŋ naw gəm aka zlaɓay naw na, intə naɗɗan ɓa. Tay viyit ɗiy en Afu azaɓani.

24Adan gewleɗ kəlaw aprəmən vaska, gidivit adək aka ɗiy də məlma zit sula neki. 25#LUK 22:25,26Yaŋ Yesu aye pakə, amna: Kəsənənka, məlyeŋge net ɗiy-ɗar watakən kiyit də gagay neti, ɗiy gugriɗ tamə tahəŋ ərbanən gagdak net aketi. 26#MAT 23:11; MAR 9:35; LUK 22:26Adawsan vas a waloŋkum ɓa. Ɗəf dəŋgəl nawsan metiŋ a walaŋkum dərəŋ na, dəsaŋgən məgəɗ wəza nokum. 27Ɗəf dəŋgəl nawsan ɗəf nabe sə walaŋkum dəsan balam nokum. 28Vaski kana Wətən Ɗəf dəde ɗiy dəɗɗaŋ sənəngən wəza ɓa, ya vi dəgəɗgən wəza gəm kappan zeŋgilen vi kawbit ɗiy diyɗa.

Yesu tay əmbəlgit daŋgarɗe sula

(MAR 10:46-52; LUK 18:35-43)

29Adan agilyoŋ sə Yeriko, ɗiy diyɗa azbanənək Yesu. 30Daŋgarɗe sula tahəŋ ɗewɗew aba tive, adan aprəmən na Yesu tay ətoŋgo, aŋzlaŋgək vaŋvəla, aɓɗaŋ na: Aw Daya wətən Davit, awəl sahã akamə. 31Yaŋ ɗiy ahayẽtin dəɓətaŋgəni. Anzlaŋgək vaŋvəl dərəŋ day ki lahəŋka aɓɗaŋ na: Daya, wətən Davit, awəl sahã akamə. 32Yesu aziwke, ayeke, assohẽt na: Mi kəŋglaŋ nəgəɗ sukumgən di? 33Azlanənək na: Daya, haram dəkolu. 34Yesu awlak sasahti, arəŋgən hereti, heret akoluk go'ləŋgə, azbanənka.

Currently Selected:

Matiye 20: GB

Highlight

Copy