Matiye 19

Sə Galile a Yerusalem

(19:1—20:34)

Əyak na Yesu aka wən nawɗak dət gulku

(MAR 10:1-12)

1Adan Yesu agrak əpeləska, appanək dələv na Galile, ambat aka dələv na Yude dəgar ki məlpa na Yurdeŋ. 2Ɗiy diyɗa azbanənka, ambəlgitik adaka.

3Farisaɗe azzoŋguk azani vi karman də wən na mani. Assohõnənka:

Məppani tive sən ɗəf narɓəhət guluk nan vi an dəgəɗ pak sa? 4#VAA 1:27; 5:2Yaŋ azlani, amna: Kəŋɗanən na, də wətəŋ na Maŋgəlva aɗɗak ɗəf mizilin dət gulku, 5#VAA 2:24gəm anahək na: Vi vaski ɗəf mizilin wappan afən dət man kawsap dət goni, ndəɗaŋ sulegit pak wakkpaŋgaŋ gəɓa zit taka. 6Vas na assoŋ na sula əmpa ɓa, wakkpaŋgaŋ gəɓa zit taka. Vi vaski zəga məs Maŋgəlva asapani, ɗəf adawɗakan ɓa. 7#ƏMS 24:1-4; MAT 5:31Aɓsənən na: Vimi kan Moyis aɗi wən napsət ɗerewel nappat an ɗəf van tay uɗak dəndət di? 8Azlan sitik na: Sən ɓəɓəl na mokrokumi Moyis appan sukum tive narɓəh gil nokum ɓana; də ətəŋ na tay vasɓa. 9#MAT 5:32; 1KO 7:10,11In tat ənah sukum: Ɗəf dəppat ɗak nani an aka wən na əku a gizbe yi ɓa ɓa, yaŋ akay maɓɓata, məku a gizbe yi.

10Gewleɗ nan aɓɗaŋ na: An wən na ɗəf dət guluk tay vasna, gabban tay əkay guluk ɓa. 11Yesu azlan sit na: Ɗiy pak pak dədaprəmnən gabba əpelis an ɗiy en Maŋgəlva apsitiŋ ɓa ɓa. 12Vi ɗiy meɓɓet məwet na zit tay ɓa, ɗiy meɓɓet na zit tay ɓa vi ɗiy dərgetini, ɗiy meɓɓet tamə ndəɗaŋ dəŋglaŋ əsso vas aka wən na məlĩ na disiŋ. Ɗəf an nawɓap əprəmən dəprəma.

Yesu aɗɗak əzaɓ aket kirin memeɗeŋɗe

(MAR 10:13-16; LUK 18:15-17)

13Yaŋ ɗiy akiyaŋ kirin memeɗeŋɗe sən Yesu, vi dəɗigən van aketi, dəkkamgən aketi, yaŋ gewleɗ nan ahayẽtini. 14Yaŋ Yesu amna: Məppet kirin memeɗeŋɗe, kəteknin dazzoŋ azaw ɓa, vi məlĩ na disiŋ tay viyit ɗiy en dəgilyoŋ va ndəɗaŋ. 15Aɗiyək van aketi, yaŋ ambat sədaka.

Gawla məsarya

(MAR 10:17-31; LUK 18:18-30)

16Yaŋ ɗəf maɓɓan ade aza Yesu, assohõni: Mərbəzəga, zəga moggon awani nədaɗɗa nərahgən zeŋgile nassa faɗ di? 17Yaŋ Yesu azlan səna: Vimi kəssohow aka zəga moggon di? Takay moggon kaka'ə. An mok aka ətoŋ addəv zeŋgile na, arme mahenziŋɗe. 18#ƏGI 20:13; ƏMS 5:17 ƏGI 20:14; ƏMS 5:18 ƏGI 20:15; ƏMS 5:19 ƏGI 20:16; ƏMS 5:20Assohõnək Yesu, awet di? Yesu azlan sən na: Kədawbay gəbay ɓa, kədaku a gizbe ɓa, kədawhal ɓa, kədawa wən aka ɗəf ɓa, 19#ƏGI 20:12; ƏMS 5:16 MƏS 19:18agagdakan afuk dət moko, aŋglu meggok va kəŋglu ki zuko. 20Gawla nak anah sən na: Zəgeɗis pak nərmeke, awan dəpəl su naɗɗa əmpa di? 21Yesu aɓsən na: An kəŋgələk əsok salala, dok əvəl arya nok pakə, apsit məssehẽŋɗe, vasna wakərah arya məzaɓan a disiŋ. Asna kədegən əzbaw kana. 22Adan gawla aprəm əpel vaska, ambatək gədəvən mədan vi tay də arya diyɗa sawɓa.

23Yesu aɓsit gewleɗ nan na: Gesiŋ nədawnah sukum, tuwãhi aza məsarya nawtoŋ addəv məlĩ na disiŋ. 24In tat ənah sukum əmpa: Dəɗah zlogomo watoŋ dəddəv vov na lapina ki məsarya ətoŋ məlĩ na Maŋgəlva. 25Adan gewleɗ nan aprəmənən vaska, aggətaŋgək sawɓa, aɓɗaŋ na: Ya naway nawkõh kan di? 26Yesu asəŋletike, aɓsit na: Azet ɗiyi wərəh nan tuwãhi, ya aza Maŋgəlva wərəh nan tay tuwãh ɓa.

27Piyer azlani aɓsən na: Yaŋ na nam məppanək zəga pakə, məzbokko, kawsan səm mbar kandi? 28#MAT 25:31 LUK 22:30Yesu aɓsit na: Gesiŋ nədawnah sukum. Pay Wətən Ɗəf adawsan aka mazaŋga na gagdak nani aka dələv meleketeni, munokum məzəzbawən kəlaw kikum sulaŋ wakəssoŋ də in aket mezeŋgeɗ na məlĩ kəlaw kiyit sula vi kawtaw wən aket mahəlfaɗe net mə Israyelɗe kəlaw kiyit sula. 29Ɗəf awandi pak dəpan gəla nani, milmiŋgiɗin mezeŋleketi, məguluŋgiti, afəni, mani, kirtini awaniɓa gulyeŋɗe nan aka iya nawa, warah mədayki aska gəm əmpa warah zeŋgile nassa hã faɗə. 30#MAT 20:16; LUK 13:30Ɗiy diyɗa maddaabəŋ wakkpaŋgaŋ meddirɓe, en meddirɓe ka maddaabəŋ.

Currently Selected:

Matiye 19: GB

Highlight

Copy