Matiye 18

Naway nawsan daya di?

(MAR 9:33-37; LUK 9:46-48)

1 # LUK 22:24 Pay nani gewleɗ na Yesu azaraŋgək azani, assohõnəni: «Naway daya addəv məlĩ na disiŋ di?» 2Yaŋ Yesu aya wiyən muzliya, aziwgin a weleŋgti. 3#MAR 10:15; LUK 18:17Amna: Gesiŋ nədawnah sukum an kəkkpaŋgaŋ kəsoŋgən va kirin muzliyeɗ ɓa, sessel kətoŋgoŋ na addəv məlĩ na disiŋ ɓa. 4Ɗəf an məs dəɓegən kiyən va wiyən muzliyaŋka, ndəni nawsan daya addəv məlĩ na disiŋ. 5Ɗəf dətaf wiyən muzliya va an yaŋkəŋ vi iya nawa, anaw atafə.

Əsla zə ɗəf ka adamzlagən ɗəfa

(MAR 9:42-48; LUK 17:1-2)

6Ɗəf an dəzbərgən wiyən taka səmmbet kirni məs dətafwəniŋki dəɗah sən əlawsən gərəm metiŋgin awlan dətəpgən addəv kpukpum na pehe. 7Əray aka dəlva, vi tay dit zəgeɗ diyɗa nazbərgitin ɗiy addəv mambraya. Tay an dədawtak zəga nazbərgən ɗəf dazzan ɓa, ya əray aka ɗəf məs wən na əzbərgən ɗəf ade dəzani.

8 # MAT 5:30 An voki awaniɓa tulki dədazbərguk addəv mambraya, atawa azgan faraɗa səzoko. Dəɗah suk ətoŋ addəv zeŋgile nassa faɗ də vok taka awaniɓa də təluk taka, ki ətoŋ də vok sulagəni awaniɓa təluk sulagən aka offo məs amta ɓa. 9#MAT 5:29Ya an horok dədawkuk əɗɗa mambraya, akdaha, azgan faraɗa səzoko, dəɗah ərəh zeŋgilok də horok taka məkdahən ki əmbat addəv offo məs amta ɓa də horok sulagəni.

Wənməkkpaŋga na time məzan mərəhni

(LUK 15:3-7)

10 # LUK 19:10 Məzi zukum kədawzelenən taka səmmbet muzliyeɗəŋ ɓa. In tat ənah sukum gesiŋ: Maslayɗe net tahəŋ aba Afu na disiŋ ziwziwi. [ 11Wətən Ɗəf ade na vi kawkõhgən an dəzə yi.]

12Mbar kədaɗɗumoŋ di? An ɗəf tay dit timiŋgiɗ səkatə, yaŋ taka səret azə, appet na en kaklaw vaytak kiyit vaytak aket mossorgoɗe gugriɗ ndən kadan əkayan an dəzə ɓa sa? 13Gesiŋ nədawnah sukum: An arəhəka, wanneken zən aka wən nan dayki aka wən net en kaklaw vaytak kiyit vaytak məs dəzaŋ ɓeŋki. 14Vaski yi'e, Afukum na disiŋ dəŋgəl ɗəf taka dəzəgən səmmbet kirin muzliyeɗiŋ ɓa.

An məlmuk agəɗ sukuk mbərayən

15 # LUK 17:3 An məlmuk agəɗ sukuk mbərayən, dok əpel sən munokum sula sula. An aprəmkuko asna kəkõhgənək məlmuko. 16#ƏMS 19:15Ya an dəprəm ɓa, dok azan də ɗəf taka awaniɓa ɗiy sula, vi wən pak dəziwgin dəka əpel net məziwweɗe sula awaniɓa hoku. 17An aɓoŋguk daprəm meti, anah sən əkkal net məzutafaŋgə. An aɓoŋguk daprəm ma əkkal net məzutafaŋgə, dəsan azok va ɗəf ɗarə awaniɓa va məkkal nzalaka.

18 # MAT 16:19; YOH 20:23 Gesiŋ nədawnah sukum: An məs kədaynaŋ aka dəlvafuŋ pak wasan miynan a disiŋ, an kədawpəlaŋ aka dəlvafuŋ pak wasan məpələn a disiŋ.

19In tat ənah sukum əmpa: An ɗiy sula sə walaŋkum aka dəlvafuŋ aslereŋgək aka an adakkamawən pakə. Afu na disiŋ wapsiti. 20Vi a təki an ɗiy sula awaniɓa hoku akkalaŋ vi iya nawa, wanəsaw aweleŋgit adaka.

Wənməkkpaŋga na məgəɗ wəza dəɓoŋ davvuyon mambraya

21 # LUK 17:3,4 Yaŋ Piyer adder aza Yesu, assohõni: Daya, an məlmu azbanək əgəɗ su mbərayən na, nəvvuyon səngən təl mbarwa di? Təl buhul sa? 22#VAA 4:24Yesu azlan sən na: Awwo təl buhuli ɓa, təl kaklaw buhul təl buhul. 23Sən aski məsla məlĩ na disiŋ də məlĩ məs dəŋgəl məɗɗaŋ wəza nan dəŋɗan sənəngən wəŋɗa na arya nani. 24Səza atəŋ wən nani, akisənənək ɗəf məs adazban dəmən net deleɗ gap dubu kəlawə. 25Adan ɗəf van tay də zəga nawfaɗ dəmən nan ɓa, daya net aɗi wən nan dəvəlningəni. Ndəni dət ɗak nani gəm kirtin pak kawfaɗ dəmən nani. 26Yaŋ məgəɗ wəza nak appu' aba daya nan dawnəh na: Kamə ambər su paya, wanəfaɗ suk pakə. 27Yaŋ daya na məgəɗ wəza vanəs awəl sahã akani, appani, appan sən dəmən nani.

28Yaŋ məgəɗ wəza vanəs agili, aləm də ɗəf taka məgəɗ wəza dəndən an məs dəmən nan akan deleɗ səkat taka, arma arrəsl wəlan dawnəh na: Afaɗ su dəmən nawa. 29Məgəɗ wəza dəndən nak appu' aban akkamani, amna: Kamə ambər su paya, wanəfaɗ suko. 30Ya aɓoŋko, yaŋ aka əzgan a fərsəna hã an afaɗək dəmən nan pakə. 31Adan məɗɗaŋ wəza dəndən meɓɓet awlanən vaska, assetik sawɓa, addoŋguk ənah sən daya net aka zəga an dəgəɗ pakə. 32Yaŋ daya net aya ɗəf naka, aɓsən na: Nok məgəɗ wəza mbərayuk kənani, nəvvuyon sukuk dəmən nakok pak vi kəkkamawa. 33Kaŋ moggoni kuwəlgən sahã aka makkoyok va naw tam nəwəl sahã akokəŋ ɓa sa? 34Gədəv daya net adək akan diyɗa sawɓa azganək a fərsəna an tatwãha hã an afaɗək dəmən nan pakə. 35Vaski yi'e Afu na disiŋ adawgəɗ sukum, an ɗəf sərokum avvuyon mambray an məlmən agəɗ sən də makran taka ɓa.

Currently Selected:

Matiye 18: GB

Highlight

Copy