Matiye 21

Lumu taka məs dətoŋ addəv Yerusalem gəm go'o dəndəni

(21:1—27:66)

Yesu tay ətoŋ a Yerusalem

(MAR 11:1-11; LUK 19:28-40; YOH 12:12-19)

1Adan azaraŋ go'o də Yerusalem, agapaŋ go'o də Betfage, aza gərəm net heremeɗi, Yesu aslənək gewleɗ nan sula. 2Aɓsit na: Məddoŋ a walaŋgəla an nabokum ndaka, wakərəhən koro dət wətən tahəŋ miyneti. Məpile, məkisuwe. 3An ɗəf apel sukumuk mi pakə, mənah sən na: Wəray Daya tay azani, wappet sukum go'u.

4Agəɗ vasna vi na məskəleŋ apel lahəŋ dəgəɗgəni, anah na:

5 # ZAK 9:9 Mənah sət waŋ na Siyon.

Məlĩ nok yaŋ əzzan anokda awkaɓ ɓa,

tay ka'a akat korku gəm akat wətət korku.

6Gewleɗ nan ambataŋka aɗɗanənək va Yesu anah siti. 7Akisənənək koro gəm wətən naka. Apakənək lukutɗe net aketi, Yesu asan aketi. 8Ɗiy diyɗa apekinik lukutɗe aka tive, ɗiy meɓɓet akslohoŋguk vet wəleŋɗe apekin aka tive, 9#GLƊ 118:25,26ɗiy en dərɓaga Yesu dit en naban tahəŋ ənzlaŋ vaŋvəl dawnəh na: Hozana sən wətən Davit, Əzaɓ aka məzəzzan də iya na Daya, Hozana a disiŋ mə səɗəɗə.

10Adan Yesu atoŋ a Yerusalem, walaŋgəla-metiŋ pak aɓəlka. Yaŋ adawnahaŋ na: Aŋ naway di? 11Ɗiy aɓɗaŋ na: Yesu məskəleŋ na Nazaret naka dələv na Galile yi.

Yesu addəv gəla na Maŋgəlva

(MAR 11:15-19; LUK 19:45-48; YOH 2:13-22)

12Yaŋ Yesu atoŋ addəv gəla na Maŋgəlva. Arɓih məvəlaŋ zəga dit məlbahaŋ zəga naddəv gəla na Maŋgəlva pakə, aslaŋgan tabəl net məddəɗaŋ deleɗi mãy mazaŋgeɗ net məvəlaŋ biŋgeɗ na maha. 13#ISA 56:7; YER 7:11Aɓsit na: Məverni na: Kawyani Gəla naw na, gəla nakkama, yaŋ nokum kəkkpaŋganən ka bətəŋ net məvoŋgoŋ tive.

14Daŋgarɗe dit vədalɗe azzoŋguk aza Yesu addəv gəla na Maŋgəlva, ambəlgitike. 15Adan deyeɗe net məsdəlveŋge dit mərbaŋ-mahenziŋ awlanən wəza an naggət akan məs agəɗə gəm Kirin məzəŋzlaŋ vaŋvəl addəv gəla na Maŋgəlva, ənahaŋ na: Hozana sən wətən Davit, gidivit adək sawɓa. 16#GLƊ 8:3Aɓsənən Yesu na: Kaprəm an Kirin adawnahaŋgəŋ ɓa sa? Yesu azlan sitik na: Ha'aw, in tat əprəmni. Kəŋɗanən an məverin ɗah ɓa sa: Də met kirin memeɗeŋɗe gəm en məzuwaɗaŋ bideŋ kəzaɓan əɗi kiya noko. 17Yaŋ appeti, agil sə walaŋgəla-metiŋ, ambat a Betani, avoŋ adaka.

Yesu tay əɗɗa mefɗeke aka sokoyo

(MAR 11:12-14; MAR 11:20-24)

18Dawmilyen də mompumo a walaŋgəla-metiŋ mãy armak Yesu. 19Awələk sokoyo taka aba tive, amzlahək ammbani, ya dərah zəga akan abbər gaslamba kaka' ɓa. Yaŋ Yesu anah sən sokoyo na: Kəwə na ɗah ɓa. Go'ləŋgə sokoyo akəlka. 20Adan gewleɗ nan awlanən vaska, aggətaŋgək sawɓa. Aɓɗaŋ na: Mbarmbar sokoyo ŋ aŋkəl go'ləŋ di? 21#MAT 17:20; 1KO 13:2Yesu azlani, aɓsit na: Gesiŋ nədawnah sukum: An munokum tat də ətafa, məza kuzuŋ ɓa, an dəgəɗ aka sokoyo kədaɗɗaŋ kaka ɓa. An kənah sənənək mossorgo metiŋgiŋ na azar saŋka, dok abət a pehe, wagəɗə. 22An kədassohoŋ addəv əkkam də ətaf pakə wakərəhəni.

Səŋga gagdak na Yesu ade di?

(MAR 11:27-33; LUK 20:1-8)

23Adan Yesu atoŋ addəv gəla na Maŋgəlva, deyeɗe net məsdəlveŋge dit ɗiy məsɓet azzoŋguk azan aka adawyaget ɗiyi, aɓsənən na: Də gagdak na mi kədaɗɗe zəgeɗiŋ di? Naway dəpsuk gagdak nan di? 24Yesu aɓsit na: Naw pak wanəssohokum wən taka. An kəzlan suwənka, naw tam wanənah sukum gagdak məs nədaɗɗe zəgeɗ vetis dəndənəŋka. 25Baptem na Yohanna na səŋga ade di? Sə disiŋ sa səzet ɗiyi? Atəŋgaŋgək əbayma a walaŋ zit dawnəh na: An mənahək na: Sə disiŋgi, wanah səm na: Ya vi mi kətafnən ɓa di? 26Ya an mənahək na səzet ɗiyi, məgeslne səm sit ɗiyi, vi ɗiy pak aɗiyənək Yohanna ka məskəleŋ. 27Azlan sənən Yesu, aɓɗaŋ na: Məsən ɓa. Yaŋ nan pak aɓsit na: Naw pak nənah sukum na gagdak məs nədaɗɗe zəgeɗis dəndən ɓa.

Wənməkkpaŋga net kirin sula

28Mi kədaɗɗumoŋ aka wən aŋ di? Ɗəf tay dit kirin sula. Yaŋ ambat aza wiyən an daabəŋ, aɓsən na: Dok əgəɗ wəza a guli net megezlembirkeɗ dəpaŋka. 29Yaŋ azlani, amna, nəŋger na ɓa. Dərɓagani addəɗanək əɗɗum nani, ndən mbat a guli naka. 30Yaŋ ambat aza ma sula'ən, anah sən wən məstaka. Yaŋ nan azlani, amna: Əndawa əbba. Ya dəmbat ɓa. 31Awani səmmbet kirin sules dəgəɗ əŋgla na afən di? Aɓɗaŋ na: An daabəŋ dəɗɗa. Yaŋ Yesu aɓsit na: Gesiŋ nədawnah sukum: Mətafaŋ nzalaka dit gil məpolkoyeɗ watoŋgoŋ məlĩ na Maŋgəlva daabəŋ kikum. 32#LUK 3:12; 7:29,30Yohanna adeke arban sukumək tive an moggoni kətafnən ɓa. Mətafaŋ nzalaka dit gil məpolkoyeɗ dərəŋ atafnənka. Dərɓaga kulanən vas zlaŋ kəddəɗanən əɗɗum nokum vi kawtafən ɓa.

Wənməkkpaŋga net məzənseŋ mbəreyti

(MAR 12:1-12; LUK 20:9-19)

33 # ISA 5:1,2 Ya məprəm wənməkkpaŋga maɓɓani: Ɗəf afən gəla ampək guli net megezlembirke, abas kiyən də mambara, akkpihik katafay nawɗot uwa net addəvni, arkak gəla məɓayən nawga guli van addəvən. Appan guli van avet məɗɗaŋ wəza ka nawfaɗ sən akani, ndən mbat malaka. 34Adan pay nawɓuh uwa net agapə, aslənik belemɗe nan azet məɗɗaŋ wəza addivit megezlembirkeɗi, vi dəpsənəngən haran nani. 35Yaŋ məɗɗaŋ wəza addivit megezlembirkeɗ armenin belemɗe nani, arbəsənən an taka, abayənən an mbərən, askanən mohoko'it dit gərmeŋge. 36Aslənik belemɗe diyɗa daykiyit en maddaabəŋ neki, aɗɗaŋ məstaka. 37Sə dərɓagani, aslənək wətən azeti dawnəh na: Waɗinən ki wətuwa. 38Adan məɗɗaŋ wəza net megezlembirkeɗ awlanən wətəni, apeleŋ a walaŋ ziti: Ndəni məzəmgəla. Mədam məbay səmə, an nawzəmgəla nan azan dəsan səmgəni. 39Adan armanəni, azganənək appaka na guli net megezlembirkeɗi, yaŋ abayəni.

40An afən guli net megezlembirkeɗ adek kan na, mi adawgəɗ sit ɗiy dəgəmənən guli net megezlembirkeɗ vet di? 41Azlan sənənək na: Wazet ɗiy mbəreytis məza ula sahã aket ɓa, wappan guli net megezlembirkeɗ nan avet ɗiy meɓɓeti, en məs napsənən uwa net aka pay neti. 42#GLƊ 118:22,23Yesu aɓsit əmpa na: Kəŋɗanən ɗah an məs məverin ɓa sa?

Gərəm məs mərkaŋ gəla azgaŋgə,

akkpaŋgək gərəm kiwən naka bezler.

Səza Daya ade,

zəga na sekene yi ama haramə.

43Sən aski nədawnah sukum na: Kawgəmni məlĩ na Maŋgəlva faraɗa səzokum, kapsit ɗiy-ɗar məs naɗɗaŋ ətərwəraya. [ 44Naway dəzbər aka kunəŋ pak waŋzlan zəni. Ya an kunəŋ abətək aka ɗəfa, watakaɗa.]

45Adan deyeɗe net məsdəlveŋge dit Farisaɗe aprəmən wənməkkpaŋga nanəska, asənənka aket adawpele. 46Yaŋ akayaŋ kuket narmani, ya ageslne'eŋgək vi vanday net ɗiyi, vi ɗiy tay əɗinən ka məskəleŋ.

Currently Selected:

Matiye 21: GB

Highlight

Copy