Matiye 17

Əddəɗ na zə Yesu

(MAR 9:2-13; LUK 9:28-36)

1Dərɓaga əvoŋ sləre, Yesu agəmək Piyer də Yakob gəm Yohanna an məlməni, akek ɓuh aka mossorgo metiŋ məɓayən. 2Gəɓa zən akkpaŋgək a mahereti. Haran tay əwiɗ va paya, lukutɗe nan kpaŋgaŋ əwiɗ babarɗe ndasl va əkeɗeɗe'e. 3Yaŋ Moyis də Eliya arbaŋ a maheret əpeleŋ dəndəni. 4Piyer azlani, aɓsən Yesu na: Daya moggoni məsamgən aŋka. An kəŋgəlka, wanəgəɗ gizlirkeɗe hoku, taka suko, taka sən Moyis, taka sən Eliya. 5#VAA 22:2; GLƊ 2:7; ISA 42:1; MAT 3:17; 12:18; MAR 1:11; LUK 3:22 ƏMS 18:15#2PI 1:17,18Aka adawpele, slaybuwən məzuwiɗ adeke, asirite, ɓaɓəlma adek səddəv slaybuwən naka, amna: Aŋki wətu an nəŋgələ, in tat ənneken zu dəndən sawɓa. Məprəm mani. 6Adan gewleɗ aprəməni, askotoŋguk kup afuŋ, geslne armek diyɗa. 7Yesu zar azeti, arəŋgiti, amna: Məsili, kədawgeslne'eŋ ɓa. 8Aslanənək hereti, dulaŋ ɗəf təttaka abbər Yesu van takərgən ɓa.

9Adan adapirkeŋ səka mossorgo metiŋ, Yesu abayək meti dawnəh na: Kədawnahən an kulaŋ sən ɗəf ɓa hã gap an Wətən Ɗəf asilik səka əmta. 10#MAL 3:23Yaŋ gewleɗ assohõnən na. Vimi kan mərbaŋ-mahenziŋ adawnahaŋ na, si Eliya dədazzan daabəŋ tagay di? 11Yaŋ nan azlani, amna: Gesiŋ Eliya wade daabəŋ, dəzaɓetgin zəgeɗ pakə. 12#MAT 11:14Naw in tat ənah sukum: Eliya adek səkay, ɗiy dəsənən ɓa, aɗɗaŋ sənənək an aŋglaŋ pakə, vaski adawzəmgənən sahã na Wətən Ɗəfa'e.

13Gewleɗ aprəmənək kan na, aka wən na Yohanna məgəɗ baptem adawpel siti.

Yesu tay əmbəlgən wiyən məs tuyeŋge akani

(MAR 9:14-29; LUK 9:37-43)

14Adan agapaŋ go'o azet ɗiyi, ɗəf pay aza Yesu, akdukuk takpran abani, 15amna: Aw Daya awəl sahã aka wətuwəŋka. Tuyeŋge tahəŋ akani, tay əzəmsahã sawɓa, ndən əskot ɗayɗay aka offo, mãy aret iŋkile. 16Nəki sitik gewleɗ noko, ya dəɓap əmbəlgənən ɓa. 17Yesu agəmək əpel amna: Sayit ɗiy məs tahəŋ də ətaf ɓa gəm məreygiti, hã gap dewe nədawsaw də mənokum di? Pay gbəgbari nədazban əɓəskum di? Məki su aŋka. 18Yesu ahayanək tuya, agilik səka wiyna, wiyən ambələk daska'a ləŋgə.

19Dərɓagani gewleɗ na Yesu azzoŋ azan takərgiti, assohõnənka: Vi mi nam məɓap wəgilgən tuya van ɓa di? 20#MAT 21:21; MAR 11:23; 1KO 13:2Yesu azlan sitik na: Vi ətaf nokum gəsi. Gesiŋ nədawnah sukum: Va munokum tat də wətaf siɗikke va zev meslene, wakənahaŋ sənən mossorgo metiŋgiŋ azar saŋka, dok ada, wazarə, zəga tay dədawday kikum ɓa. [ 21Ya zev tuya nan kawgilgini an də əkkama gəm də əɗɗa meme yi ɓa ɓa.]

Yesu tay əmsak əpel wən na əmta gəm əsilye səka əmta nani

(MAR 9:30-32; LUK 9:43-45)

22Adan akkalaŋ pay mbərən a Galile. Yesu aɓsit na: Kapsəni Wətən Ɗəf avet ɗiyi. 23Wabaynəni, pay mahokoni wasil səka əmta. Yaŋ aɗəkaŋ diyɗa.

Əfaɗ nzalaka na gəla na Maŋgəlva

24 # ƏGI 30:13; 38:26 Adan agapaŋ a Kafarnahum, mətafaŋ nzalaka na gəla na Maŋgəlva zaraŋ aza Piyer, aɓsənən na: Məsən zəga nokuməŋ afaɗ nzalaka na gəla Maŋgəlva ɓa sa? 25Piyer amna, awfaɗa. Səza Piyer atoŋ addəv gəla, Yesu apel sənək daabəŋ aɓsən na: Mbari kəɗɗum di Simoŋ? Mədəŋgaŋ məfaɗaŋ nzalaka awaniɓa deleɗ na mekeleŋ sit milyeŋge na dələv di? Ɗiy na dələv nan sa, awaniɓa melekeɗ sa? 26Piyer azlan sən na: Melekeɗəŋ dədawfaɗaŋ. Yesu amna an vaski na ɗiy na dələv afaɗaŋ na ɓa. 27Ya vi mədawdan sit gidivit ɓa, doko a pehe, azgan teklem, agəm kilif an dədarma daabəŋ pak aha' mani wakərah deleɗ na təbəz amani, an kəgimike, apsit an naw gəm an noko.

Currently Selected:

Matiye 17: GB

Highlight

Copy