Luka 19

Yesu gəm Zakayus

1Ya səza agul a Yeriko, atoŋguk dəddəvən. 2Yaŋ ɗəf məsarya adawyaŋ na Zakayus, daya net məkkalaŋ nzalaka, 3Akay tive kawla naway Yesu di, ya dəɓap ɓa sən ɗiy tahəŋ diyɗa vi maŋgərzla yi. 4Anzanək abe, apeŋ aka korvoŋ vi kawlani, vi Yesu dədak adawtoŋgo. 5Adan Yesu agap a təki nani, aslanək harani, aɓsən na: Zakayus agəm zuk apriki, vi dəpaŋ adahək nasawgən eŋgil anokda. 6Zakayus nak prik də kakara, atafək də ənneke. 7Adan ɗiy awlanən vaska, aɗɗaŋgək wərwərə, aɓɗaŋ na: Ana ɗəf məs mambray da al əsani. 8Yaŋ Zakayus aziw aba Məman Daya, amna: Daya wanəpsit wəɗak na arya naw sit məssehẽŋɗe. An ɗəf tay məs nəgəm zəga nan də vurum wanəmndagan sən təl poɗo. 9Yesu aɓsən na: Əkõh atoŋguk eŋgiləŋ dəpaŋka, vi nan pak wətən Abrahami. 10#MAT 18:11Vi Wətən Ɗəf ade na kawkayan gəm kawkõhgən an dəzə.

Wənməkkpaŋga də suley na meleŋge

(MAT 25:14-30)

11Səza ɗiy aprəmən wənəska, Yesu apelik wənməkkpaŋga maɓɓan əmpa vi tay go'o də Yerusalem gəm vi ɗiy tay əɗɗumoŋ na məlĩ na Maŋgəlva warban zən kakaŋ kakaŋka. 12Yaŋ anah kan na: ɗəf məs zeŋvit ɗiy gagdakɗe ambatək aka dələv faraɗa kawrəh məlĩ adaka, gəm kawmilyeni. 13Ayek belemɗe nan kəlawə, apsitik suley taka taka sən nawaydi pakə, aɓsit na: məman vokum hã gap əmilye nawa. 14Ya ɗiy nan azelnənka, aslənaŋgək maslənɗe dərɓagan dawnəh na: Məŋgəm na ɗəfəs dəzəmgən məlĩ akam ɓa.

15Adan amndan səza arah məlyã ya anah dəyen sənin belemɗe məs apsit suley na təbəz babar naka, vi dəsəngən an arahaŋ də əman veti. 16An daabəŋ adeke amna: Daya suley nok nak awək kəlaw akani. 17Daya nan aɓsən na: Lewi, balam moggok gəm məs maɗɗula kənani, kəsokuk təstəs də zəga siɗikke, asok də gagdak aket walaŋgəleɗe gugriɗ kəlawə. 18An masula'ən adeke, amna: Daya suley nok nak awək sle' akani. 19Aɓsən tam na: Nok pak asok aket walaŋgəleɗe gugriɗ sle'i. 20Ɗəf maɓɓan pay dawnəh na: Daya suley nok məs nətər addəv kesekese nəɗi ta' a maŋgava nak yaŋka. 21Vi nawgeslne' suko, ɗəf ɓəɓəl kənani, kawgəm zəga an məs is kəɗi ɓa, kakkal zəga na mabardaw məza is kəzlga ɓa. 22Yaŋ aɓsən na: Wanətaw wən akok aka əpel na moko, balam mbərayən. Kəsənək na naw ɗəf ɓəɓəl nani, nawgəm zəga an məs in nəɗi ɓa, gəm nakkal zəga na mabardaw məs in nəzlga ɓa. 23Ya vimi kəɗi suley naw abaŋ ɓa di? An nədek na də ərah akan nədawgəmən kəta. 24Yaŋ anah sit ɗiy dəssoŋ adak na: Məmõh suley sə vani, məpsən ɗəf an dit suleyɗe kəlaw naka. 25Aɓsənən na: Daya, tay dit suleyɗe kəlawə. 26#MAT 13:12; MAR 4:25; LUK 8:18In tat ənah sukum, ɗəf an də zəga avan pak kapsəni azani, ya ɗəf an tay də zəga avan ɓa an navan siɗikke zlaŋ kawgəmni. 27#MAT 25:14-30Ya məzuzelɗe nawiŋ, ndəɗaŋ məs dəŋglaŋ nəzəmgən məlĩ aket ɓaŋki, məki aŋka, mətaw wəlet abawa.

Lumu taka an dərɓe faɗ gəm go'o də Yerusalem

(19:28—23:56)

Yesu tay əmbat a Yerusalem

(MAT 21:1-11; MAR 11:1-11; YOH 12:12-19)

28Səza apel wənəska ndən toŋ abet ɗiy əmbat a Yerusalem. 29Adan agap aza Betfage də Betani, go'o də gərəm net heremeɗi, ndən slən gewleɗ nan sula. 30Aɓsit na: Məddoŋ a walaŋgəla nabeska. An kətoŋgoŋguk addəvən, wakərahaŋ wət koro miynata, ɗəf dəpeŋ ɗah akat tagay ɓa. Məpəlta, məkiyta 31An ɗəf assohõkumək na kami kədawpələn di na, mənah sən na: Wəray Daya tay azani. 32Səza maslənɗe ambataŋgə, arəhənək va anah siti. 33Aka adawpəlnən wət koro, migilin aɓsitin na: Vimi kədawpəlnən wət koro van di? 34Azlanənək na: Wəray Daya tay azani. 35Akinənək sən Yesu, abasənək lukutɗe net akani apeŋgənən Yesu. 36Adan atəŋ əmbata ɗiy apekinik lukutɗe net aka tive. 37Aka adawgap aka surohho na mossorgo metiŋ net heremeɗi, gewleɗ pak zit anneke, atəŋgaŋgək əɗi ki Maŋgəlva, də wəlet dayadaya, vi sekeneɗ məs awlaŋ pakə. 38#GLƊ 118:26Aɓɗaŋ na: əzaɓ aka məlĩ məzəzzan də iya na Daya, zazay a disiŋ gagdak a təki məsəɗəɗə.

39Farisaɗe meɓɓet naweleŋgit ɗiyi aɓsənən na: Mərbəzəga, ahayẽt gewleɗ noko. 40Yesu azlanəka amna: In tat ənah sukum, an aɓətaŋka, kuneŋgeŋ waɗiyaŋ geŋgere.

Yesu tay əhəmgən Yerusalem

41Aka Yesu azar go'o awla walaŋgəla-metiŋ, ahəmgənka. 42Amna: Va pay dəpaŋkəŋ nok kəsənək va mbar ərəh zazay asani! Ya kakaŋ məɗamni səma horoko. 43Vi pay wade akoko, məzuzelkun wampaŋ mambara akoko, wasərŋgəslkuni, wahãslokun də təki pakə. 44Wakkãhkuni, is dit kirtuk addəvko. Appaŋ sukun na kuwən aka kuwən ɓa, vi kəsən pay məs Maŋgəlva ade wəbbah suk ɓa.

Yesu addəv Gəla na Maŋgəlva

(MAT 21:12-17; MAR 11:15-19; YOH 2:13-22)

45Yaŋ Yesu atoŋ addəv gəla na Maŋgəlva. Arɓih məvəlaŋ zəga, 46#ISA 56:7; YER 7:11aɓsit na: Məverni na: Gəla naw na gəla nakkami, yaŋ nokum kəkkpaŋganən ka bətəŋ net məvoŋgoŋ tive.

47 # LUK 21:37 Tay ərban wən pay pak addəv Gəla na Maŋgəlva. Ya ɗiy deyeɗe net məsdəlveŋge dit mərbaŋ-mahenziŋ gəm ɗiy tektek naweleŋgit. Akayaŋgək tive nawbayni. 48Ya awsənən va adarmanən ɓa, vi ɗiy pak tay əgayaŋ əprəm əpel nani.

Currently Selected:

Luka 19: GB

Highlight

Copy