Luka 20

Səŋga gagdak na Yesu ade di?

(MAT 21:23-27; MAR 11:27-33)

1Pay maɓɓani Yesu tay ərban wən sit ɗiy addəv Gəla na Maŋgəlva, anah sitik alabara neneke. Deyeɗe net məsdəlveŋge dit mərbaŋ-mahenziŋ gəm ɗiy gugriɗ azzoŋko, 2yaŋ apeleŋ dawnah sən na: Anah səm ɗa də gagdak na mi kədaɗɗe zəgeɗiŋ di? Awaniɓa, nawa dəpsuk gagdak nan di? 3Yesu aɓsit na: Naw pak wanəssohokum wən taka. Mənah suwa: 4Baptem na Yohanna na sə disiŋ ade sa səzet ɗiyi? 5Apeleŋgik awalaŋ zit dawnəh na: An mənahək na: Sə disiŋgi, wanah səm na: Ya vimi kətafnən ɓa di? 6Ya an mənahək na səzet ɗiyi, ɗiy pak waskəmən dit gərmeŋge, vi atafənək na Yohanna məskəleŋgi. 7Yaŋ azlanən na: Məsən sə təki ade ɓa. 8Yaŋ Yesu aɓsit na: Naw pak nənah sukum na gagdak məs nədaɗɗe zəgeɗis dəndən ɓa.

Wənməkkpaŋga net məzənseŋ mbəreyti

(MAT 21:33-46; MAR 12:1-12)

9 # ISA 5:1 Yesu atəŋgək əpel wənməkkpaŋgaŋ sit ɗiyi: Ɗəf ampək megezlembirkeɗ a gulyo, appan avet məɗɗaŋ wəza ka nawfaɗ sən akani, ndən mbat malaka nanziya diyɗa. 10Adan pay nawɓuh uwa net agapə, aslən balam nan azet məɗɗaŋ wəza addivit megezlembirkeɗi, vi dəpsənəngən uwa net megezlembirkeɗ haran nani. Yaŋ məɗɗaŋ wəza addivit megezlembirkeɗ nak arganən maslən naka, arɓahanən van halayhalay. 11Ndən slən balam nan maɓɓani, yaŋ net avərən əmpa, arbəsənən wili arɓahanən van halayhalay. 12Aslənək maslən mohoko'it əmpa, yaŋ net aɗiyaŋ sənən vamviya, azganən appaka. 13Yaŋ afən guli net megezlembirkeɗ amna: Mbar nədaɗɗa di? Wanəslən wətu an nəŋgələ, kuzuŋ nan wagagdakanən soko. 14Ya adan məɗɗaŋ wəza net megezlembirkeɗ awlanəni, apeleŋgik awalaŋ zit dawnəh na: Aŋ məzəmgəla yi, məbay səmə zəga nawzəmgəla dəsangən ka namə. 15Səza azganən appaka a mapoho na guli net megezlembirkeɗi, abayənka.

Ya kan na, mi afən guli net megezlembirkeɗ adawgəɗ sit di? 16Wade, wabey məɗɗaŋ wəza addivit megezlembirkeɗ vetiski, wappan guli net megezlembirkeɗ van avet ɗiy meɓɓeti. Səza ɗiy aprəmən vaska, aɓɗaŋ na agəɗ na ɗah ɓa. 17#GLƊ 118:22Ya Yesu awleke amna: Mbar an məverinəŋ aŋgəl ənah di?

Gərəm məs mərkaŋ gəla azgaŋgə

akkpaŋgək gərəm kiwən naka bezler.

18Naway dəzbər aka kunəŋ pak waŋzlan zəni. Ya an kunəŋ abətək aka ɗəfa, watakaɗa.

Nzalaka məfaɗən sən məlĩ metiŋ

(MAT 22:15-22; MAR 12:13-17)

19Yaŋ mərbaŋ-mahenziŋ dit deyeɗe net məsdəlveŋge akayaŋgək ərman Yesu daska'e ləŋgə, ya ageslne'eŋgək viyit ɗiyi, asənənka aketi apel wənməkkpaŋgaska. 20Atəŋgaŋgək əga Yesu, aslənaŋgək məkkeseŋ gabba wən məzulaŋ va ɗiy təstəsə, vi karman də əpel na mani, kappan addəv gagdaka gəm addəv əɓap na daya na kivadəlva. 21Assohõnənək dawnəh na: Mərbəzəga, məsənək na, an kədawpel də an kədarba na təstəsi. Ɗiy dakadakaŋ azoko, is tat ərban tive na Maŋgəlva də gegesiŋ. 22Mənam tat də tive nawfaɗ nzalaka sən Kaysara sa tay ɓa? 23Yesu asənək kuket neti, aɓsit na: 24Mərbə su suley ɗa. Foto də əver na naway akanəŋ di? Azlanənək na: Na Kaysara. 25Yaŋ aɓsit na: Məpsən Kaysara an dəslə aza Kaysara, məpsən Maŋgəlva an dəslə aza Maŋgəlva. 26Dərəhaŋ wən sə man narman abet ɗiy ɓa. Ya aggətaŋgək aka wəzlan nani, ndəɗaŋ ɓata'ə.

Əssõh aka wən na əsilye net ɗiy mimtiti

(MAT 22:23-33; MAR 12:18-27)

27 # WNM 23:8 Yaŋ ɗiy meɓɓet səmmbet Sadukiɗe azzoŋgu. Ndəɗaŋ məzunahaŋ na əsilye səka əmta tay ɓa. Assohõnən na: 28#ƏMS 25:5Mərbəzəga, Moyis aver səmək na: An ɗəf amtəka, ya ɗəf van tay dət gulku məza dərah uwa ɓa, məlmən dəgəmət guluk vatə, dəɗisəngən zev məlməni. 29Kirin tahəŋ də məlma zit buhul. An daya akayək gulku, yaŋ amtə məza uwa ɓa. 30Masula'ən, 31siske mohoko'it agəmtənka. Ha ndəɗaŋ buhul pakə, amtaŋ məza əppa zeŋve ɓa. 32Siske na guluk tam zamə. 33Vasna, gulukəs pay əsilye səka əmta na ga nawa tədawsat səmmbet di? Vi ndəɗaŋ buhul pak aɗitənka.

34Yesu azlan sitik na: Ɗiy naka dəlvəŋki, zel tay əɗiyaŋ gili, gil tay əgəmaŋ zeli, 35ya ɗiy en dədahaŋ nasso aka dələv vanəska gəm nawsilyoŋ səka əmta, aɗiyaŋ na gil ɓa, aɗiyaŋ na zel ɓa. 36Amtaŋ na əmpa ɓa. Vi dakadakaŋ dit maslayɗe, kirtin Maŋgəlva əŋgə adan assoŋ kirtin əsilyo səka əmta. 37#ƏGI 3:6Əsilye səka əmta na, Moyis arbanək addəv an apel aka alabara net geslembeɗ rəɓə, aka anah na: Daya Maŋgəlva na Abraham, Maŋgəlva na Isak, Maŋgəlva na Yakob. 38Maŋgəlva na, Maŋgəlva net ɗiy mimtit ɓa, net ɗiy medereti, vi ɗiy pak mederetiŋ azani. 39Mərbaŋ-mahenziŋ meɓɓet aɓɗaŋ na: Mərbəzəga moggoni kəpeli. 40Tay an adawgaraŋ sənən əttokon wən ɓa.

Kristu gəm Davit

(MAT 22:41-46; MAR 12:35-37)

41Yaŋ aɓsit na: Mbari adawnahaŋ na Kristu na Wətən Davit iyi di? 42#GLƊ 110:1Vi Davit sən kiyən anahək addəv ɗerewel net gəlyeɗe na:

Daya anah sən Daya naw na:

Asok aka dəzəŋ nawa,

43hã gap an nəvoŋgitik məzuzelɗe nok ammba təlko.

44Davit ayak na Daya ya mbarmbari asan wətən di?

Məsla zukum səzet mərbaŋ-mahenziŋ

(MAT 23:1-36; MAR 12:38-40)

45Aka ɗiy pak tahəŋ sləmet pakpak əprəməni, aɓsit gewleɗ nan na: 46Məsla zukum səzet mərbaŋ-mahenziŋ. Aŋglaŋgək əbbalaŋ dit lukutɗe zezekɗe, zit nek ɗiy dəsɗetingin a gəlet lumiɗi, də əssa aket mezeŋgeɗ nabe addəv gəla nakkal net mə Yudeɗi, gəm aket mezeŋgeɗ nabe a təki nawzəma. 47Tay əzəmən arya net gil net gəbayɗe, kawbay heret ɗiy na, tay ənziyaŋ diyɗa aka əkkama. Kawtawi wən an tatwãh diyɗa aketi.

Currently Selected:

Luka 20: GB

Highlight

Copy