Luka 18

Wənməkkpaŋga nat gagəbaya gəm mətawwəna

1Yaŋ Yesu apel sit wənməkkpaŋga vi adahək dəkkamaŋgən pay pakə məza əppan ɓa. 2Aɓsit na: Mətawwən tay a walaŋgəla-metiŋ maɓɓani awgeslne' sən Maŋgəlva ɓa, ɗiy tuturɗe ɓa pakə. 3Ga gəbay tat a walaŋgəla-metiŋ vanəs məzəzzat azan ənah sən na: Ataw su wən na walaŋgu də məzuseɓ nawəŋka. 4Ya mətaw wən van anziyək aka əɓoŋgo, ya dərɓagani, aɗɗumuk a makran na: Də nawgeslne' sən Maŋgəlva ɓa, ɗəf titir ɓa zlaŋ, 5adan guluk kəŋ tat əki mawa, wanətaw sət wən nata, vi tədazzat təkastəkas əkrap su kiyu ɓa. 6Yaŋ Daya amsak ənəh na: Məprəm an ɗəf mətawwən mbəraynəs anahə. 7Sessel vasna Maŋgəlva agəɗ na təstəs sit ɗiy məs awel məzuhəmaŋ sənən dəfəɗ də kapay pak ɓa, wappet əlyaŋ sa? 8In tat ənah sukum, wagəɗ sit təstəs go'ləŋ. Ya an Wətən Ɗəf adek na, warah ətaf aka dəlvafuŋ sa?

Wənməkkpaŋga aka mə Farisa gəm aka məkkal nzalaka

9Yaŋ Yesu apel wənməkkpaŋga maɓɓan əmpa, vi məzulanən zit va ɗiy təstəsə gəm əzeletin ɗiy meɓɓeti: 10Ɗiy sula tahəŋ dəmbataŋ addəv Gəla na Maŋgəlva vi kakkama, taka mə Farisa, maɓɓani məkkal nzalaka. 11Mə Farisa aziwke, akkamək də makran vaska: Aw Maŋgəlva nəgəɗ sukuk əsoko vi in tat va ɗiy meɓɓet ɓa, va mehelɗe, məɗɗaŋ mbərayən, məkuwaŋ a gizbe, awaniɓa va məkkal nzalakaŋ ɓa. 12In tat əɗɗa meme addəv pay buhul pak təl sula, in tat əgəm makəlaw na ərəh naw pakə. 13Məkkal nzalaka aziwik faraɗa, dəɗɗum naw slan haran a disiŋ ɓa, ya tay ərga makrani, amna: Aw Maŋgəlva awəl sahã akawa, in məs mambraya. 14#MAT 23:12; LUK 14:11In tat ənah sukum, ɗəf nan aslerik də Maŋgəlva aka amndan eŋgil ananda ki ɗəf an maɓɓanəŋka. Vi ɗəf an dəɓaygən kizən pak kawgəsani, ɗəf an dəgəsan kizən pak kawɓaygəni.

Yesu aɗɗak əzaɓ aket kirni

(MAT 19:13-15; MAR 10:13-16)

15Ɗiy akiyaŋgək kirin memeɗeŋɗe dayday sən Yesu vi dərəŋgitigəni, ya adan gewleɗ nan awlanən vaska, ahayẽtini. 16Yesu ayeke, amna: Məppet kirin dəzzoŋ azawa, kədawteknin ɓa, vi məlĩ na Maŋgəlva tay viyit ɗiy en dəgilyoŋ va ndəɗaŋ. 17Gesiŋ gesiŋ nədawnah sukum: An ɗəf dətaf məlĩ na Maŋgəlva va wiyən muzliya ɓa, sessel atoŋ na addəvən ɓa.

Ɗəf məsarya

(MAT 19:16-30; MAR 10:17-31)

18Ɗəf daya maɓɓan assohõnək Yesu dawnəh na: Mərbəzəga moggoni, mi nədaɗɗa nərahgən zeŋgile an nassa faɗ di? 19Yaŋ Yesu azlan səna: Vimi kənah su na moggoko di? Ɗəf təttaka yi moggoni, Maŋgəlva yi. 20#ƏGI 20:14; ƏMS 5:18 ƏGI 20:13; ƏMS 5:17 ƏGI 20:15; ƏMS 5:19 ƏGI 20:16; ƏMS 5:20 ƏGI 20:12; ƏMS 5:16Kəsinik mahenziŋɗe ɓa sa: Kədakuh a gizbe ɓa, kədawbay gəbay ɓa, kədawhal ɓa, kədawa wən aka ɗəf ɓa, agagdakan afuk dət moko. 21Zəgeɗis pak nərmek far səka sawãwã. 22Adan Yesu aprəm vaska, aɓsən na: Apəl sukuk zəga təttaka əmpa: Avəl zəga nok pakə. Awɗak sit məssehẽŋɗe, vasna wakərah arya məzaɓan a disiŋ. Asna kədegən əzbaw kana. 23Adan aprəm wənəska, ɗəf nak kpaŋ gədəvən mədan, vi məsarya yi sawɓa. 24Yesu awlak vaska, amna: Tuwãhi məsaryeɗ dətoŋgoŋgən məlĩ na Maŋgəlva. 25Ɗəɗah zlogomo watoŋ dəmmba lapina kulat ki məsarya ətoŋ məlĩ na Maŋgəlva. 26Məzəprəmən wən nan aɓɗaŋ na: An vaski na naway nawkõh di? 27Yaŋ amna: An tuwãh azet ɗiyi, aza Maŋgəlva tay tuwãh ɓa. 28Yaŋ Piyer amna: Awle nam məppetik zəgeɗ nawray vamə, məzbokko. 29Yesu aɓsit na: Gesiŋ nədawnah sukum, ɗəf tay dədappan gəla nani, awaniɓa guluk nani, awaniɓa milmiŋgiɗni, awaniɓa migilni, awaniɓa kirtini aka batam məlĩ na Maŋgəlva, 30məza arah na vas təl ɓaɓay aka pay an kakaŋka, gəm zeŋgile nassa faɗ aka pay an dədazan ɓa ɓa.

Yesu tay ərban əmta gəm əsilye nan səka əmta təl mahoko'ən

(MAT 20:17-19; MAR 10:32-34)

31Yaŋ Yesu agim gewleɗ kəlaw kiyit sula, aɓsit na: Mənam tat əmbat a Yerusalem yaŋka, an məskəleŋɗe avereŋ aka Wətən Ɗəf pak waknahə. 32Vi kappani ammba vet ɗiy-ɗarə, kawmasi akani, kawrani, kawtufi mefɗe akani, 33dərɓaga ərgan də ɗoŋgroŋ, wabayəni; pay mohoko'ən wasil səka əmta. 34Ya dəprəmən an məs Yesu adawpel akan ɓa. Wənəs aɗamək a mahereti, dəsənnən an aŋgəl əpel ɓa.

Yesu tay əmbəlgən daŋgar

(MAT 20:29-34; MAR 10:46-52)

35Adan Yesu agap go'o aza Yeriko, daŋgar maɓɓan tay ɗewwe aba tive əbbəka. 36Adan aprəm ɗiy ətoŋgoŋgu, attok aka an dəgəɗə. 37Yaŋ mənah sən na: Yesu mə Nazaret məzutoŋgo. 38Aɗiyək geŋgere dawnəh na: Yesu Wətən Davit awəl sahã akawa. 39Ɗiy en nabe ahayãnənək dəɓətgəni, yaŋ adaŋzla vaŋvəl dayki lahəŋka: Wətən Davit awəl sahã kawa 40Yesu aziwke, aɗi wən nan dəkisənəngəni. Adan agap azani, assohõn na: 41Mi kəŋgəl nəgəɗ sukugən di? Azlanəka: Daya, kəta nəmsak ula. 42Yesu aɓsən na: Amsak awələ, ətaf nok akõhgukko. 43Haran akoluk gətgətəs ləŋ, azbanək Yesu də əgagdakan Maŋgəlva. Ɗiy dulanən as pak aɗiyənək ki Maŋgəlva.

Currently Selected:

Luka 18: GB

Highlight

Copy