Luka 17

Mambraya gəm əvvu mambraya

(MAT 18:6-7,21-22; MAR 9:42)

1Yaŋ Yesu aɓsit gewleɗ nan na: Tuwãhi ka zəgeɗ nawtaŋgbãygən ɗəf adazzoŋ ɓa, ya əray aka ɗəf an dəsan tive nawkiti. 2Ɗəɗah sən iynan gərəm metiŋgin awlan əzgan addəv kpukpum na pehe ki ndən əskotgən təttaka səmmbet kirin muzliyeɗiŋki. 3#MAT 18:15Məga zukum.

An məlmuk agəɗək mbərayən, anah sən də maɗula. An aɗiyək marava, avvuyon səni. 4An agəɗ sukuk mbərayən təl buhul pay taka, tay əzan azok təl buhul nan pak dawnəh na: «Nəɗiyək marava», avvuyon səni.

Ətafa

5Yaŋ maslənɗe aɓsənən Daya na: Apsəm ətaf azani. 6Daya amna: Va munokum tat də ətaf gba zeŋve na meslene, wakənah sənən korvoŋgəŋ na: Apətə, ampə a pehe, waɓe' sukum.

Wəza na balam

7Naway səmmbokum də balam nan məzənse awaniɓa məzutaɗa, an adek sə gulyo ndən kawnah sən na: Go' ade aŋ azəmə di? 8Anah sən na dərəŋ na: Azaɓan su zəga nawzəma, agəm lukut na wəza noko, agəɗ suw wəza hã an nəgrakək əzəm də əsa, dərɓagan kan na, kəzəmgəni gəm kəsəgən tamə. 9Wasokon balam van vi aɗɗa sən an məs aɗi sən wən nan sa? 10Vaski yi'e nokum van adawsan sukum, an kəɗɗanənək an məs məɗi sukum wən nan pakə, mənah na: Balamɗe mənan ɗarə, an dəslə naɗɗa nam məgəɗə.

Yesu tay əmbəlgit məskokoleɗ kəlaw

11Adan Yesu adawmbat kəla Yerusalem, atoŋguk də Samari gəm də Galile. 12Aka adawtoŋ a walaŋgəla maɓɓani, məskokoleɗ kəlaw azzoŋguk ələm səni. Aziweŋgik faraɗa. 13Aslanənək wəlet ənahaŋ na: Yesu mərbəzəga awəl sahã akamə. 14#MƏS 14:1-32Adan awle aɓsit na: Məddoŋ mərban zukum azet məsdəlveŋge. Aka adaddoŋ abburoŋko. 15Taka səmmbet adan awla na ambəlka, ndən buryok də əgagdakan Maŋgəlva wəlan koɓo'koɓo'u. 16Ndən kup də magədəvən ammba təl Yesu, agəɗ sənək soko. Ɗəf nan mə Samari yi. 17Yesu assohũ amna: Kəlawgit pak dəbburoŋ ɓa sa? Ya ngahəŋ en vaytak di? 18Tay məs dəɗɗum əmilyen əgəɗ sən əsoko sən Maŋgəlva ɓa abbər malakaŋ kaka sa? 19Yaŋ aɓsən na: Asili, doko, ətaf nok akõhgukko.

Əzza na məlĩ na Maŋgəlva

(MAT 24:23-28,37-41)

20Farisaɗe assohõnənək Yesu: Dewɗe məlĩ na Maŋgəlva adazzan di? Azlan aɓsit na: Məlĩ na Maŋgəlva ade na va zəga nawla ɓa. 21Kawnahi na tay aŋka, awaniɓa tay ada ɓa. Vi məlĩ na Maŋgəlva tay a walaŋkum.

22Aɓsit gewleɗ nan na: Pay wade, akəŋglaŋ ula pay təttaka səmmba pay na Wətən Ɗəfa, ya kulanən na ɓa. 23Wanah sukumən na yanda ada awaniɓa yaŋ aŋka. Kədaddoŋ adak ɓa, kədanzoŋ adak ɓa. 24Vi va buwən adawiɗ piti' a disiŋ təŋ sə maŋgava hã amaŋgava maɓɓani, vaski Wətən Ɗəf adawsan pay nani. 25Ya daabəŋ nani wazəm sahã diyɗa, sayit ɗiy en kakaŋkiŋ wazgani. 26#VAA 6:5-8An məs dəgəɗ pay na Nuwe, vas adaɗɗa'e pay na Wətən Ɗəfa. 27#VAA 7:6-24Ɗiy əzəmaŋgə, əsaŋgə, əɗiyaŋ gili əɗiyaŋ zeli hã gap pay an Nuwe atoŋ addəv bəlay, buwən mə vekeveke pay azet pakgiti. 28#VAA 18:20—19:25Va agəɗə'e aka pay na Lot, ɗiy tay əzəmaŋgə, əsaŋgə, əlbahaŋ zəga, əvəl zəga, əmpaŋ wəleŋɗe, ərkaŋ gəla. 29Pay məs Lot agil sə Sodom, offo na busuk azi sə disiŋ va buna, azet pakgiti. 30Vas adawsan pay na Wətən Ɗəf adarban zəni.

31 # MAT 24:17,18; MAR 13:15,16 Pay nan dəpaska, ɗəf məs naka təgbalka məs zəgeɗ nan eŋgili, adawpriken əndet ɓa. Vaska'e Ɗəf məs na gulyo, adawmilyen dərɓe kpak ɓa. 32#VAA 19:26Məɗɗumon wən nat ga Lot. 33#MAT 10:39; 16:25; MAR 8:35; LUK 9:24; YOH 12:25Ɗəf an nawkay əkõhgən zeŋgileni, wazani, ɗəf an nawzani wakõhgəni. 34In tat ənah sukum: Dəfəɗ nani ɗiy sula wassoŋ aka zəga nawvoŋ taka, Kawgəmi taka, mbagən maɓɓani. 35Gil sula wassoŋ əsər a təki taka, Kawgəmi taka, mbagət maɓɓata. [ 36Zel wassoŋ sula awra, Kawgəmi taka, mbagən maɓɓani.] 37Gewleɗ nan azlanənka aɓsənən na: Aŋga adaɗɗa di Daya? Yaŋ aɓsit na: A təki mogogoy asani adaki mogdok ziyneɗ adakkalaŋ.

Currently Selected:

Luka 17: GB

Highlight

Copy