Luka 16

Məgəɗ wəza məs pepete

1Yesu aɓsit gewleɗ nan na: Ɗəf tay məsarya də məgəɗ wəza aban məs məzəm kiyən azan na tay əraygən sən arya nani. 2Yaŋ aya, aɓsən na: Mi nədaprəm əpel akokuŋ di? Aŋɗan su wəza narma arya nawa, vi kəɗɗa wəza narma arya naw əmpa ɓa. 3Məgəɗ wəza aɗɗumuk a makrani: Mbar nədaɗɗa adan daya naw tay ətaf wəza narma arya nan səvawəŋ di? Winse nəɓap na ɓa əbbəka wil waduwəni. 4Nəsənək an nədaɗɗa vi pay məzargu səka wəza narma arya na, nərahgən ɗiy en nawtafwən anet da. 5Ayek məsdəmənɗe na daya nan taka taka. Aɓsən an daabəŋ na: Dəmən na daya naw mbarway akok di? 6Azlanək na: Mẽl məbbere səkatə. Yaŋ anah sən na: Agəm ɗerewel noko asoko, go'u aver kaklaw sle. 7Yaŋ aɓsən ɗəf maɓɓan na: Dəmən na daya naw mbarway akok di? Azlanək na: Haykəmari sak səkat. Yaŋ aɓsən na: Agəm ɗerewel noko, aver kaklaw dədopoɗo. 8Daya na məgəɗ wəza narma arya nan nak afetik aka məgəɗ wəza nan matakataka naka, vi agəɗək pepete. Vi ɗiy naka dəlvəŋ petpetiŋ a walaŋ zit dit ɗiy na sayit daykiyit ɗiy na təki babara.

9Ya naw in tat ənah sukum: Məkay bayneŋgiɗkum də Arya mbərayən naka dəlva. Pay agrak səvokum na, dətafkuməngən a təki nassa an faɗə. 10Məs dəgəɗ moggon də zəga siɗikke, wagəɗ moggon də zəga diyɗa'e. Məs dəgəɗ mbərayən də zəga siɗikke wagəɗ mbərayən də zəga diyɗa'e. 11An kəɗɗaŋ moggon də Arya mbərayən məppan sukuməŋ ɓa, naway nappan sukum zəga an təstəs di? 12An kəɗɗaŋ moggon də arya net ɗəf ɓa na naway napsukum an nawray vokum di?

13 # MAT 6:24 Gawla tay naɗɗa wəza viyit ɗiy gugriɗ sula ɓa, vi wazel ɗəf aŋka, waŋglu andaka, wabay zən aza ɗəf aŋka, wazelen andaka. Kəɓapaŋ na əgəɗ sən wəza sən Maŋgəlva gəm sən Arya ɓa.

Wən temtem məs Yesu apeli

(MAT 11:12-13; 5:31-32; MAR 10:11-12)

14Adan Farisaɗe məŋglaŋ deleɗis aprəmən wənəs pakə, amasaŋgək akani. 15Yesu aɓsit na: Nokum, mokum aka kəsoŋgən ɗiy təstəs a maheret ɗiyi, ya Maŋgəlva asənək mokrokum, vi an məs ɗiy adawlaŋ va zəga metiŋgini, daryawi aza Maŋgəlva.

16 # MAT 11:12,13 Mahenziŋ na Moyis gəm ɗerewel net məskəleŋɗe hã gap aza Yohanna məgəɗ baptem. Təŋ siske yi mərban alabara nenek na məlĩ na Maŋgəlva, naway pak tay əgay ətoŋ na gəgay addəvən. 17#MAT 5:18Disiŋ də dəlvafuŋ wazaŋ go' dayki nzef na mahenziŋ əbəta.

18 # MAT 5:32; 1KO 7:10,11 Ɗəf dəppat ɗak nan pak yaŋ akay maɓɓata, məku a gizbe yi, ɗəf dəgəm guluk məs zələt apəl pak məku a gizbe yi.

Məsarya gəm Lazar

19Ɗəf maɓɓan tay məsarya, məzugul lukutɗe pepreŋɗe na gabaga na ngərayã kukulfuto. Pay pak ndən əɗɗa əzləra gədakə. 20Məssahã an məs adawyaŋ na Lazar, tay ɗuffo a maddamban zən pak yoreɗi, 21aŋgələk dəbəgən də zəga an dədawbəta səmmba va məs arya kəta ya kirɗe əzzoŋ ətarne yoreɗ nan əmpa. 22Məssahã nak zamə, yaŋ maslayɗe akanən aza Abraham. Məsarya tam zamə, məndəkni. 23Aka adawzəm sahã a təki net ɗiy mimtiti, aslan haran awla Abraham faraɗa də Lazar a maŋgavani. 24Aŋgəzlək vaŋvəla, amna: Afu Abraham awəl sahã akawa. Aslən Lazar dəyopgən metteɓ van aret iŋkile, dətte' su gən aka hərzlumwa, vi in tat əzəmsahã diyɗa addəv offoŋka. 25Yaŋ Abraham azlan na: Wətuwa, aɗɗumon na kərahək zəga moggon nok addəv ənziya egge noko, Lazar tam əzəmsahã; ya kakaŋ na, tay də maɗɗulani, nok tam is tat əzəmsahã. 26An day əmpa na, delŋgeɗek məza meŋge nan ɓa tay aka walaŋgəmə, vi ɗiy en dəŋglaŋ əggar səzam azokum gəm en səzokum sədak əggar azamə, aɓapən na ɓa. 27Məsarya amna: Ya kan na, in tat əkkamoko əbba, kəsləgən Lazar ana əbba da. 28Vi milmiŋgiɗu tahəŋ sle, dənah sitgən wənəŋka, vi net pak adazzoŋ a təki nawzəm sahãŋ ɓa. 29Abraham azlan na: Tahəŋ də Moyis gəm məskəleŋɗe dəprəmnən meti. 30Məsarya amna: Vaski ɓa, afu Abraham, an ɗəf səzet ɗiy mimtit dəmbat azet na, waɗiyaŋ marava. 31Abraham aɓsən na: An dəprəmən ma Moyis dit məskəleŋɗe ɓa, kəta ɗəf səzet ɗiy mimtit dayday dəsil səka əmta, atafən na ɓa.

Currently Selected:

Luka 16: GB

Highlight

Copy