Yohanna 19

1Yaŋ Pilat kan aka Yesu, mərgan də ɗoŋroŋ. 2Yaŋ məzəlpaŋ aturoɗoŋ kulpup na məlyã dit gedirgeɗi, aɗupsənən akani, aguloŋ sənən lukut pepreŋge. 3Azaraŋ azani, aɓsənən na: əsɗoko məlĩ net mə Yudeɗi, arganəni.

4Pilat vit əmpa, aɓsit na: yaŋ na, intat əgilgin sukum, vi kəsənnən gən na, heslepe tay nərah azan gala narman ɓa. 5Yesu vit kana, kulpupu net gedirgeɗ akani, gəm lukut pepreŋ nak azani. Yaŋ Pilat aɓsit na: Ɗəf van yaŋka. 6Ya adan deyeɗe net məsdəlveŋge dit məzu gaŋ awlanəni, aŋzlaŋgək vaŋvəl dawnəh na: akkpa' aka məzliwrihe! Akkpa' aka məzliwrihe! Pilat aɓsit na: Məgəm sən kikum, məkkpa' aka məzliwrihe. Vi naw nərah heslepe azan gala narman ɓa. 7Yaŋ mə Yudeɗ azlan sənən na: Nam mənam tat də mahenziŋ, mahenziŋ van tay ənəh na dəmtə, vi aɗiyək zən ka wətən Maŋgəlva.

8Adan Pilat aprəm wənəska, geslne armak əmpa dayki lahəŋka. 9Ndən toŋ addəv gəla nawtaw wən empa, aɓsən Yesu na: Səŋga kənan di? Yesu dəzlan sən ɓa. 10Pilat aɓsən kan na: Anawi kawpel su ɓaŋ sa? Kəsən na wanəɓap əppok va nədawɓap əkkpa'uk aka məzliwrihe ɓa sa? 11Yaŋ Yesu azlan sən na: Gagdak tay kədawrəh akaw an məpsuki sə disiŋ ɓa ɓa. Sən aski ɗəf məs dəpsuwu suk asandə mambray an metiŋgin day.

12Təŋ siske na, Pilat akayək əppani. Ya mə Yudeɗ aŋzlaŋgək vaŋvəl dawnəh na: An kəppanka, bayna Kaysar kənan ɓa. Vi ɗəf dəɗi zən ka məlĩ pak məzuzel na Kaysara iyi. 13Adan Pilat aprəm əpeliska, ndən vitgin Yesu appaka, yaŋ asan addəv gəla nawtaw wəna, a təki adawyaŋ na gərmeŋge məɗeslti, də ma Ibri na Gabbata. 14Pay nawsla zə ɗəf na Pak, aza tataŋpaya. Pilat aɓsit mə Yudeɗ na: Məlĩ nokum yaŋka. 15Anzlaŋgək vaŋvəl na: Dəmtə, dəmtə, akkpa' aka məzliwrihe. Pilat aɓsit na: Nəkkpa' məlĩ nokum sa? Deyeɗe net məsdəlveŋge azlanənka: Məlĩ nam tay maɓɓan abbər Kaysara ɓa. 16Yaŋ Pilat appan sit kan dəkkpa'əngən aka məzliwrihe.

Tay əkkpa'nən Yesu aka məzliwrihe

(MAT 27:32-34; MAR 15:21-32; LUK 23:26-43)

Yaŋ agəmən Yesu kana. 17Yesu dəslan məzliwrihe nan dəvani agil əmbat a təki məs adawyaŋ də ma Ibri na Golgata, va ənah na bəbər kiya. 18Adaki akkpa'ən aka məzliwrihe dit ɗiy meɓɓet sula, taka daha, taka daha, Yesu adak təkiya. 19Pilat averik aka zəga sloprokko əmpa, atip aka məzliwrihe, məverin akan na: Yesu mə Nazaret, məlĩ net mə Yudeɗi. 20An məverin aka zəga sloprokko van mə Yudeɗ diyɗa aŋɗanənka, vi təki məkkpa' Yesu aka məzliwrihe van go'oy də walaŋgəla-metiŋ. Əver van də ma Ibri, də ma Rom gəm də ma Gəreki. 21Yaŋ deyeɗe net məsdəlveŋge net mə Yudeɗ aɓsənən Pilat na: Kəver na: Məlĩ net mə Yudeɗi ɓa, aver na: Ɗəfəŋ anahək na intə məlĩ net mə Yudeɗi. 22Pilat azlanək na: An nəveri, nəverke.

23Adan məzəlpaŋ agrakən əkkpa' Yesu aka məzliwrihe, agəminik lukutɗe nani, awɗeketin gəlet poɗo, gəlan taka sən məzəlpa pakə. Agəmənək lukut nan məsilipi, lukut məsilip məza ərma azan ɓa, məhon sə disiŋ hã afuŋ. 24#GLƊ 22:19Yaŋ apeleŋ a walaŋ ziti: Mədawngaran ɓa, məgəɗ səm vẽpəlu akani mulagən sən naway adawsan di. Agəɗ vasna vi an Əver apel dəgəɗgəni, an dənah na:

Awɗakanənək lukutɗe naw aweleŋti.

Aɗɗaŋgək vẽpəlu aka lukut məsilip nawa.

Aski an məzəlpaŋ aɗɗaŋgə.

25Ma Yesu təziwik a maŋgava məzliwrihe nani, dət məlməta, gəm Miryam ga Klopas, gəm Miryam mə Magdala. 26Adan Yesu awlət mani, gəm gawla an məs aŋgəl ziwe adaka, aɓsət man na: Ɗakə wətuk yaska. 27Siske, aɓsən gawla nak na: Mok yakəskə. Sissiŋgi ləŋ gawla nak agəmət ananda.

Əmta na Yesu

(MAT 27:45-56; MAR 15:33-41; LUK 23:44-49)

28 # GLƊ 69:22; 22:16 Dərɓaga aska, adan Yesu asənək na zəga pak agəɗka, ka Əver dəknahgəni, amna: Meme tay əduwəni. 29Mozgoy tay adak məknəhən də mbazla ɓaɓlaka. Agəmən gizlete məyopən ara mbazla ɓaɓlak nak asləkən ama wəlaŋga isop atəlsənən a mani. 30Adan asə mbazla ɓaɓlak na, Yesu amna: Pak agraka. Ndən kiyən ɓe'gən amtə.

Məzəlpa tay əmpa təkzləm Yesu

31Adan pay nawzaɓan zə ɗəfi, ka kigəbeyit adawsan aka məzliwrihe pay naffet ɓa, vi pay naffet vanəs pay metiŋgini, ndəni kan mə Yudeɗ assohõnən ma Pilat, kaŋzlu tilit ɗiy məkkpe'it neki, asna, kawzlərəɓti. 32Yaŋ məzəlpaŋ azzoŋgu, aŋzluwən təl an daabəŋ gəm an maɓɓan məs məkkpe'it dəndəni. 33Agapaŋ aza Yesu, awlanən na, nan amtək səkay, dəŋzlunən tələn ɓa. 34Yaŋ ɗəf taka səret məzəlpaŋ aska aka təkzləmən də tulhõ, yaŋ mbel dit iŋkile agulyoŋ ləŋgə. 35Ɗəf məs dula apelik wən nani, əpel nan van gesiŋgi, vi asənək na an adawpel van gesiŋgi, vi nokum pak kətafaŋgəni. 36#ƏGI 12:46; ƏŊƊ 9:12; GLƊ 34:21As agəɗ vasna vi an Əver apel dəgəɗgəni: Sleŋsleŋ nan tay naŋzla təttaka ɓa. 37#ZAK 12:10; HNH 1:7Yaŋ Əver maɓɓan tay ənəh əmpa na: Wawlaŋ aza ɗəf məs ampaŋgə.

Tay ətoŋgənən Yesu addəv magamas

(MAT 27:57-61; MAR 15:42-47; LUK 23:50-56)

38Dərɓaga aska, Yosef na Arimate, gawla na Yesu, ya də mahaɗama, vi geslne sit mə Yudeɗi, assohõnək ma Pilat vi kawprigin kigəbay na Yesu. Pilat apsənək tive, ndən kan pay agəm kigəbayən. 39#YOH 3:1,2Yaŋ Nikodem məs dəde aza Yesu daabəŋ dəfəɗ nak tam ade. Akiyək gaŋgilya məslahan də tigbire ammba kilo kaklaw hoku. 40Agəmənək kigəbay na Yesu kana, atərənən dit gabagaɗe gəm aggbo' sənən tursan va mə Yudeɗ assərəkaŋ əndək ɗəfa. 41A təki məkkpa' Yesu vanəska, guli net teɓ tay adaka. Addəv guli vani, magamas tay adak meleketeni, məɓəli əndək ɗəf addəvən ɓa. 42Adak məndək Yesu kana, vi mə Yudeɗ tay əzaɓanən ziti vi pay naffete gəm vi magamas van go'oy.

Currently Selected:

Yohanna 19: GB

Highlight

Copy