Yohanna 20

Əsilye səka əmta gəm ərba məs Daya arban zəni

(20:1-31)

Magamas mekeleŋ

(MAT 28:1-8; MAR 16:1-8; LUK 24:1-12)

1Pay maddaabəŋ na lumu taka, Miryam mə Magdala təmbatək də mompumo aka təki dəɓəl əddaŋ tagay ɓa a magamasə, yaŋ tula gərəm nak məddergən sə magamasə. 2Tənzat kan təmbat aza Simoŋ Piyer gəm aza gawla məs Yesu aŋgələ. Təɓsit na: Agəmənək Daya səddəv magamasə, ya məsən təki aɗinən ɓa. 3Piyer gəm gawla məs Daya aŋgələ, agilyoŋ, ambataŋ a magamasə. 4Ndəɗaŋ sulagit pak anzoŋ matakə, ya gawla maɓɓan nak anzanək gu' dayki Piyer, agapək daabəŋ a magamasə. 5Ndən ɓe' awle gabagaɗe ɓosso, ya dətoŋ adak ɓa hara. 6Yaŋ Simoŋ Piyer məzəzban nak agap tamə, atoŋ addəv magamasə, awle gabagaɗe ɓosso. 7Ya gabaga məs məsərət ki Yesu dəndən dəsap dit gabagaɗe ɓosso nek ɓa, nan məktəmni temme a təki maɓɓani. 8Yaŋ gawla məs dənzan dəgap daabəŋ a magamas nak atoŋ tamə. Awlaka atafəka. 9Vi dəprəmnən gabba an Əver apel tagay ɓa. Anahək na: Aslək dəsilgən səret ɗiy mimtiti. 10Yaŋ gewleɗ sula nek amndoŋ anetda.

Yesu tay ərban zən azat Miryam na Magdala

(MAT 28:9-10; MAR 16:9-11)

11Ya Miryam tat ziwwe appaka gu'o də magamasə, əhəma. Adan tədawhəma, ndət ɓe' kawla addəv magamasə. 12Yaŋ təwəl maslayɗe sula də zəga babar azeti, tahəŋ tuŋtuŋ a təki məvoŋgən kigəbay Yesu naka. Taka də disiŋ kiyən, taka dəmmba təlni. 13Anah sətən na: Ɗakə vimi kədawhəm di? Təzlan sitik na: Agəmənək Daya nawa, nəsən təki aɗinən ɓa. 14Səza əpel wənəska, ndət harat kpaŋgən dərɓe, tulak Yesu tay ziwwe adaka, ya təsən na Yesu yi ɓa. 15Yesu anah sət na: Ɗakə, vimi kədawhəm di? Naway kədawkayan di? Azat na afən guli yi. Təɓsən na: An is kəgəm na daya, anah su təki kəɗiya, naw nəmbatgən əgəmən. 16Yesu aɓsət na: Miryam, ndət kpaŋgən harata, yaŋ təɓsən də ma Ibri na: Rabbuni. Va ənah na Mərbəzəga. 17Yesu aɓsət na: Kədawrəŋgu ɓa, vi nəpeŋ aza Afən tagay ɓa, ya dok azet milmiŋgiɗwa, anah sit na, in tat əpeŋ aza Əbba məs dəsan Afukum, aza Maŋgəlva nawa məs dəsan Maŋgəlva nokum. 18Yaŋ Miryam na Magdala təmbat ənah sit gewleɗ na: Nulak Daya, yaŋ tənah sit an apel səta.

Yesu tay ərban zən azet gewleɗ nani

(MAT 28:16-20; MAR 16:14-18; LUK 24:36-49)

19Də moskoy na pay maddaabəŋ na lumu taka vani, maddambeɗe na təki məs gewleɗ vet assoŋ tahəŋ kpuɓ-kpuɓ vi geslne sit mə Yudeɗi. Yesu pay ziw a waleŋti, aɓsit na: Zazay dəsan akokum. 20Adan apel aska, arban sitik van də təkzləmən. Gewleɗ, annekenənək zit dawla Daya kana. 21Yesu aɓsit əmpa kan na: Zazay dəsan akokum. Va Afən aslənwa, naw pak in tat əslənkum. 22Səza apel vaska, afu' səmyã səman aketi, yaŋ aɓsit na: Mətaf Zeŋgile Salala. 23Ɗiy en məs kəvvuyon sitin mambraya, kavvuyon siti, ɗiy en məs kəvvuyon sitin ɓa, mambray net wasani.

Yesu gəm Tomas

24Ya Tomas, taka naret kəlaw kiyit sula məs adawyaŋ na meseŋge tay dəndit gala Yesu ade ɓa. 25Gewleɗ meɓɓet aɓsənən kan na: Mulak Daya. Yaŋ Tomas azlan sit na: An nula gəlet penteɗe naza vanəŋ ɓa, an nəɗi pərəŋ vaw a gəlet penteɗe vet ɓa, an nəgul vaw ara huwa naka təkzləmən ɓa, nətaf na wən nan kpak ɓa.

26Əvoŋ dodopoɗo sə dərɓagani, gewleɗ akkalaŋgək addəv gəla əmpa. Tomas tay dənɗaŋ. Maddambaɗe məmseti, yaŋ Yesu payə, aziw a waleŋti, amna: Zazay dəsan akokum. 27Yaŋ aɓsən Tomas na: Atəl pərəŋ vok aŋka. Awla vawa, atəl voko, agul aka təkzləmwa, apan ənzla ma, atafə. 28Tomas azlanka, aɓsən na: Daya nawa, Maŋgəlva nawa. 29Yesu aɓsən na: Vi kuluwi kətafu sa? Zəzay azet məs dətafaŋ məza ulan ɓa.

An məver ɗereweləŋ aka wən nani

30Yesu agəɗək sekeneɗ meɓɓet diyɗa əmpa a maheret gewleɗ nani, məvertiŋ addəv ɗereweləŋ ɓa. 31Məverit eŋ vet na vi kətafəngən na Yesu iyi Kristu Wətən Maŋgəlva, gəm vi kərəhaŋgən zeŋgile addəv iya nan də ətaf vani.

Currently Selected:

Yohanna 20: GB

Highlight

Copy