Yohanna 18

Ərma na Yesu

(MAT 26:47-56; MAR 14:43-50; LUK 22:47-53)

1Adan apel vaska, Yesu mbat dit gewleɗ nan dəgar kiyət məlpaŋ na Kedron, guli net wəleŋɗe tay adaka, ndən toŋ dit gewleɗ nani. 2Yudas məs nawzəm kiyən asənək gəla təki nani, vi Yesu dit gewleɗ nan assərəkaŋgək əkkal adaka. 3Yudas yi abet məzəlpaŋ gəm məzugaŋ məs Deyeɗe net məsdəlveŋge dit Farisaɗe aslənaŋgə, tahəŋ dit offoɗe mətelti, lalamɗe gəm zəgeɗ nawgaya. 4Yesu asənək məs nawrəhən pakə, agilke yaŋ aɓsit na: Nawa kədawkayanən di? 5Azlan sənən na Yesu mə Nazaret. Yesu aɓsit na: Intə.

Yudas məs dəzəm kiyən tay dənɗaŋ adak ziwe. 6Adan Yesu anah sit na: Intə, adereŋgək dirɓe, azbəraŋgək afuŋgu. 7Assohotik əmpa: Naway kədawkayanən di? Azlanənka: Yesu mə Nazaret. 8Yesu amna: Nənah sukumuko, intə. An anaw kədakayawən na, məppet ɗiyiŋ dəmbataŋ. 9Agəɗ vasna vi wən məs apel nak dəknahgəni: Nəzan ɗəf taka səret en kəvay ɓa.

10Simoŋ Piyer tay də masalam, aptuwəka, abələk gawla na daya net məsdəlveŋge, apiw sləman dəzəŋ. Iya na gawla van na Malkus. 11#MAT 26:39; MAR 14:36; LUK 22:42Yaŋ Yesu aɓsən Piyer na: Agul masalam nok a gəlani. Azok na nəsət na huloŋguk məs Afən avaykəŋ ɓa sa?

Məkani Yesu aba Annas

12Yaŋ məzəlpaŋ də daya neti, gəm mə Yudeɗ məzugaŋ dərmanən Yesu, aɓrukuni. 13Akanənək daabəŋ aba Hanna, ndəni dəhən Kayafas, daya net məsdəlveŋge addəv əzvaska. 14#YOH 11:49,50Kayafas vani dənah sit mə Yudeɗ na: Ɗəɗah ɗəf taka dəmtə viyit ɗiy pak naka.

Piyer tay ənəh na gawla na Yesu yi ɓa

(MAT 26:69-70; MAR 14:66-68; LUK 22:55-57)

15Simoŋ Piyer də gawla maɓɓan azbanənək Yesu. Gawla van daya net məsdəlveŋge asənəka, atoŋgək də Yesu a daŋgla na daya net məsdəlveŋgə da. 16Na Piyer tay ziwe appaka ama meŋgle. Yaŋ gawla maɓɓan məs daya net məsdəlveŋge asən nak agili, apel sət məgə maddamba, yaŋ tətoŋgən Piyer. 17Guluk məgə maddamba nak təɓsən Piyer na: Nok pak səret gewleɗ na ɗəfəŋ kənan ɓa sa? Azlanəka: Intə ɓa.

18Balamɗe dit məgaɗe armanənək offo, tay əluwəni, vi səmyã tay. Piyer pak tay ziwe dənɗaŋ əlu offo.

Daya net məsdəlveŋge tay əssohon ma Yesu

(MAT 26:59-66; MAR 14:55-64; LUK 22:66-71)

19Yaŋ daya net məsdəlveŋge assohõn ma Yesu aka wən net gewleɗ nani gəm aka ərba zəga nani. 20Yesu azlan sən na: Kerekere nəpel sit ɗiyi. Pay pak nərbək zəga addəv gəla nakkal net mə Yudeɗi gəm addəv Gəla na Maŋgəlva, a təki mə Yudeɗ adawsapaŋ pakə, tay məs nəpel də mahaɗama ɓa. 21Vi mi kədassohõn maw di? Assohẽt met ɗiy məs dədaprəmən an məs nənah siti, net asənənək an məs nənahə. 22Adan Yesu apel wənəska, taka səret məzugaŋ dəssoŋ adak argak Yesu aka tapaslayən, dawnəh na: Vas kədawzlan sən daya net məsdəlveŋge sa? 23Yesu azlan sənək na: An də tiveni nəpel ɓa na, arbani. Ya an də tiveni nəpel vimi kədargu di? 24Yaŋ Hanna aslən məɓrukun sən Kayafas daya net məsdəlveŋge.

Piyer tay ənəh na dəsən Yesu ɓa əmpa

(MAT 26:71-75; MAR 14:69-72; LUK 22:58-62)

25Pay nani Simoŋ Piyer tay adak ziwe, tay əlu offo. Yaŋ aɓsənən kan na: Nok pak naret gewleɗ nan kənan sa? Yaŋ aɗamani, amna, intə ɓa. 26Taka naret belemɗe na daya net məsdəlveŋge, məlmən ɗəf məs Piyer abəl sləman naka aɓsən na: Nuluk addəv guli net wəleŋɗe dəndən ɓa sa? 27Piyer aɗaman wən nan əmpa. Yaŋ ləŋ gəmnda ahəmə.

Yesu aba Pilat

(MAT 27:1-2,11-14; MAR 15:1-5; LUK 23:1-5)

28Vit pummo nan pumu, akanənək Yesu kan səna Kayafas da addəv gəla nawtawwəna. Ɗiy en dərmanən van dətoŋgoŋ addəv gəla nawtawwən van ɓa, vi adarnokoŋ ɓa, vi dəzəmaŋgən way na Pak. 29Pilat kan vit azet appaka, assohẽt na: Dolgoy na mi kəkiyaŋ aka ɗəfəŋ di? 30Azlanənka, aɓsənən na: Va ɗəf məgəɗ mbərayni ɓa na məki suk na kəta ɓa. 31Pilat aɓsit kan na: Məgəma mətawwən akan dəvokum va aza mahenziŋ nokum. Mə Yudeɗ azlanənək na: Məpəl səmi tive nawbay ɗəf ɓa. 32#YOH 3:14; 12:32Vi an Yesu apel dəgəɗgən gesiŋ, məs apel narban əmta məs adamta.

33Pilat kan toŋ addəv gəla nawtawwən əmpa, ayak Yesu, anah sən na: Nok istə məlĩ net mə Yudeɗ sa? 34Yesu azlanəka: Istə kənah sən kiyuk sa, ɗiy meɓɓet dəpeleŋ sukun aka wən nawa? 35Pilat azlanəka: Mə Yuda nan sa? Həlfiŋgiɗuk dit deyeɗe net məsdəlveŋge dəkikun suwa. Mi kəgəɗ di? 36Yesu azlanəka: Məlĩ naw naka dəlvəŋki ɓa. Va məlĩ naw naka dəlvəŋki na, kəta gewleɗ naw wagayaŋ vi adappawən avet mə Yudeɗ ɓa. Ya kakaŋ məlĩ naw naŋki ɓa. 37Pilat aɓsən kan na: Məlĩ kənan sa? Yesu azlan na: Istə kənah na məlĩ nani. Məwəwi, nəde aka dəlvəŋka, vi kawpel aka gegesiŋgi. Ɗəf na gegesiŋ pak aprəm wəlawa. 38Pilat aɓsən na: Mi gegesiŋ di?

Mətawi wən namta aka Yesu

(MAT 27:15-31; MAR 15:6-20; LUK 23:13-25)

Yaŋ Pilat agil azet mə Yudeɗ əmpa, aɓsit na: Naw, heslepe tay nərah narma ɗəfəŋ ɓa. 39Ɗayɗay na, nawpəl sukum mə fərsəna taka də wəzləra na Pak, kəŋglaŋgək kan nəppan sukumgən məlĩ net mə Yudeɗ sa? 40Ya anzlaŋgək vaŋvəl kan əmpa dawnəh na: Ɗəf aŋki ɓa, Barabbasi. Barabbas van məvoŋtive yi.

Currently Selected:

Yohanna 18: GB

Highlight

Copy