Yohanna 14

Yesu yi tive nadda aza Afəni

1Yesu aɓsit gewleɗ nan na, mokrokum adazlzlaɓ ɓa. Mətaf Maŋgəlva, mətafwa. 2Təki tay diyɗa eŋgil ana Əbba da. Va vaski ɓa na, kəta wanənah sukum na, wanəmbat əzaɓan sukum təkiya sa? 3An nəmbatək əzaɓan sukum təkiya, wanəmili, wanəkukum azawa, vi a təki naw nəsawa, nokum pak kəssoŋgən adaka. 4Təki nədaddawa, kəsənənək tive nani. 5Tomas aɓsən na: Daya məsən təki kədaddok ɓa, mbarmbar mədawsən tive nan di? 6Yesu azlan sən na: Naw, intə tive, gegesiŋ gəm zeŋgile. Ɗəf tay nawmbat aza Afən an də iyni ɓa ɓa. 7Va kəsənwənka, wakəsənən Əbba'e. Təŋ kakaŋka kəsənnənka, kulanənka.

8Filip aɓsən na: Daya, arban səm Afəni wasan səm məkə. 9Yesu aɓsən na: Filip nənziyək də munokum diyɗa, yaŋ kəmna kəsənu ɓa? Ɗəf duluwa, awlak Afəni. Mbarmbar nok kədawnəh na arban səm Afəni di? 10Kətaf na in tat addəv Afəni, Afən tam tay addəvwa ɓa sa? Əpel məs naw nədawpel sukum, na kiywi nədawpelin ɓa. Afən məs dəsan addəvu dədaɗɗa wəza nani. 11Mətaf an nədawnah sukum: In tat addəv Afəni, Afən tam tay addəvwa. An kətafən əpel naw ɓa, mətaf viyit wəzeɗe zək neti. 12Gesiŋ gesiŋ nədawnah sukum: Ɗəf dətaf wəzeɗe məs nəgəɗə, wagəɗ mədaykiyit eski, vi naw aza Afən nədawmbata. 13An məs kəssohoŋ də iya naw pak, wanəɗa, vi Afən dəsangən məgagdakan addəv Wətəni. 14An kəssohowən də iya naw pak, naw wanəɗa.

Iynama nawslən Zeŋgile Salala

15Yesu anahək əmpa na: An kəŋgluwənka, wakərmenin mahenziŋɗe en nawa. 16Naw wanəkkaman Afən dəslən sukumgən məzəbbah mbərni, ndəni Zeŋgile Salala, vi dəsangən də munokum hã faɗə. 17Əmpəs na gegesiŋ məs dələv aɓap na ərəh ɓa, vi awlan ɓa, dəsənən ɓa. Ya nokum kəsənnənka, vi tay a maŋgavokum, wasan addəvkum.

18Nəppokum na mitiweɗ ɓa, wanəde azokum. 19Abe aŋ siɗikke, dələv awlu na əmpa ɓa, ya nokum wakuluwəni. Vi naw madaraw nani, nokum pak wakəssoŋ modorokum. 20Pay dəpaska, wakəsənən na, naw in tat addəv Əbba, va kəssoŋ addəvwa, in tam addəvkum.

21Ɗəf dərma məs nəɗi naɗɗa, gəm dəɓe' səni, ndəni dəŋgluwa. Afən waŋglu ɗəf an dəŋgəluwa, naw pak wanəŋgluwa, wanərban zu azani. 22Yuda məza Iskariyot ɓa aɓsən na: Daya, vimi adaɗɗa kədarban zuk azam məza sən dələv ɓa di? 23Yesu azlanka, aɓsən na: An ɗəf aŋgluwəka, warma əpel nawa, Əbba waŋgluwa. Waməde azani, waməzaɓ təki nassa nam azani. 24Ɗəf məs dəŋgəlu ɓa arma na əpel naw ɓa. Əpel məs kədaprəmaŋgə, na kiywi ɓa, an na Afən məs dəslənwi.

25Nəpel sukumuk vas aka nəsaw də mənokum. 26Ya məzəbbaha, Zeŋgile Salala məs Afən adawslən də iya nawa, nan warban sukum zəga pakə, waɗɗumon sukum an məs nəpel sukum pakə.

27In tat əppan sukum zəzaya, in tat əpsukum zazay nawa, va dələv adapsukum nədapsukum ɓa. Mokrokum adazlzlaɓ ɓa, ageslne' ɓa. 28Kəprəmənək nənah sukumuk na, wanəmbatə, ya wanəmil azokum. An kəŋgəluwənka wakənnekenən zukum, vi in tat əmbat aza Afən, vi Afən adayək kiywa. 29Kakaŋ na nəpel sukumuk tak dəɓəl əɗɗa ɓa, vi pay adaɗɗa na kətafəngəni. 30Zəga tay nədawpel də munokum diyɗa əmpa ɓa, vi məlĩ na dəlvəŋ tay əzzani. Haran nan tay azaw ɓa. 31Ya vi dələv dəsəngən na nəŋgluwək Afəni, va Afən aɗi naɗɗa, vas nədaɗɗani. Məsili, mədam səŋka.

Currently Selected:

Yohanna 14: GB

Highlight

Copy