Yohanna 13

Pay nan an dərɓe faɗ addəv gəm go'o də Yerusalem

(13:1—19:42)

Yesu tay əɗɗa tilit gewleɗ nani

1Tak wəzləra na Pak, Yesu asənək na pay nan agapək nappan dəlvəŋ kawmbat aza Afəni. Aŋgluwik ɗiy en nan dəssoŋ aka dəlva, aŋgluwik sawɓa.

2Aka adawzəmaŋ way də moskoyo, diyabəl aguluk əɗɗum mbərayən a makra Yudas, wətən Simoŋ Iskariyot, vi kawzəm ki Yesu. 3Asənək na Afən apsinik zəgeɗ pak ammba vani, səza Maŋgəlva ade, wamndan aza Maŋgəlva. 4Asilik səka waya, aggbukuk lukut nani, agəm gabaga, aynani. 5Yaŋ amet iŋkile addəv ŋgefleŋ, atəŋgək əɗɗa tilit gewleɗ nani, akəlɓit iŋkile də gabaga məs aynə naka. 6Ndən gap aza Simoŋ Piyer. Piyer aɓsən na Daya is na, əɗasu təlwa? 7Yesu azlani, aɓsən na: Kəsən na an məs nədaɗɗaŋ kakaŋ ɓa. Ya abeŋ siɗikke akəprəm gabbani. 8Piyer aɓsən na: Agəɗ na ɓa, kəɗasu na ɗah təlu ɓa. Yesu aɓsən na: An nəɗa suk ɓa na, haran nok tay azaw ɓa. 9Simoŋ Piyer aɓsən na: An vaski Daya təlwi kaka' ɓa, vaw də kiyu paki. 10Yesu aɓsən na: Ɗəf dəslslay na, wəray nan na əɗɗa təlni kaka'ə vi zən salalayi. Salala kənanaŋ, ya pakgukumi ɓa. 11Vi asənək ɗəf məs nawzəm kini, sən aski anah na: Pakgukum kənanaŋ salala ɓa.

12 # LUK 22:27 Səɓa Yesu agrak əɗɗa sit tilti, aguluk lukut nani, asanək əzəm əmpa, aɓsit na, kəprəmənək gabba an nəgəɗ sukuməŋ sa? 13Nokum, munokum tat əyəwən na Mərbəzəga mãy Daya, gesiŋ kədawnahaŋgə, vi intə gesiŋ. 14Adan in Mərbəzəga gəm Daya nəɗa sukumuk təlkum na, nokum pak aslək kəɗanəngən təlkum a walaŋ zukum. 15Nəɗɗa vasna vi karban sukumi, vi nokum pak kəɗɗanəngən va naw nəɗɗa sukum. 16#MAT 10:24; LUK 6:40; YOH 15:20Gesiŋ gesiŋ nədawnah sukum: Məgəɗ wəza aday na ki daya nan ɓa, maslən aday na ki məs dəslən ɓa. 17An kəsənənək vaska, zukum wasan neki, an kəɗɗanənka.

18 # GLƊ 41:10 Nəpel akokum pak ɓa, nəsinik ɗiy en nəweli. Ya aslək an Əver apel dəgəɗgəni: Məs dədawzəm way də iyna, akkpaŋgək akawa. 19Nənah sukum dafsən tak dəgəɗgəni. Vi pay adazzan na, kətafəngən na intə iyna. 20#MAT 10:40; MAR 9:37; LUK 9:48; 10:16Gesiŋ gesiŋ nədawnah sukum: Ɗəf dətaf maslən nawa, atafwəka. Ɗəf dətafwa, atafək məs dəslənwa.

Yesu tay ərban na Yuda nawzəm kini

(MAT 26:20-25; MAR 14:17-21; LUK 22:21-23)

21Səɓa Yesu apel wənəska, attapka, apel amna: Gesiŋ nədawnah sukum ɗəf taka səmbokum wazəm kiwa. 22Gewleɗ nan awlanənək ziti, dəsənən aka nawa adawpele di ɓa. 23Taka səret gewleɗ nan məs Yesu aŋgələ, tay ɗewwe a maŋgava Yesu. 24Piyer Simoŋ amirzi'ik də haran dəssohongən na aka naway apel di. 25Gawla nak kan dəza Yesu aɓsən na: Daya, naway di? 26Yesu azlan na: Ɗəf an nədawyop mepteke aret teɓ kapsəni, ndəni. Yaŋ ayop mepteke, agəm apsən Yudas wətən Simoŋ Iskariyot. 27Səza Yuda azəm mepteke naka, Satan toŋ a makrani. Yesu aɓsən na: An kədaɗɗa aɗɗa gu'u.

28Ɗəf tay səret sədak taka dəprəm vimi anah sən vas di ɓa. 29Adan Yudas yi mərəm gabalə, ɗiy meɓɓet aɗɗumon na Yesu anah sən dəlgən əlbah zəga məs wərayəm azan na wəzləra, awaniɓa vi dəpsitgən zəga sit məssehẽŋɗe. 30Səza Yuda ataf mepteke naka, ndən ləŋ viti. Dəfəɗ atirke.

Wən məɗiyən meleketeni

31Səza Yuda agili, Yesu amna: Kakaŋ na məgagdakani Wətən Ɗəfa, məgagdakani Maŋgəlva dəndəni. 32An məgagdakani Maŋgəlva dəndəni, Maŋgəlva pak wagagdakan ndən zək nani, wagagdakan ləŋgə. 33#YOH 7:34Kirtuwa in tat də munokum pay siɗikke tagay. Wakəkayawəni, va nənah sit mə Yudeɗ na: Kəɓapaŋ na əmbat a təki məs nədadaw ɓa, vas nədawnah sukum kakaŋka'e. 34#YOH 15:12,17; 1YOH 3:23; 2YOH 1:5In tat əɗi sukum wən meleketeni: Məŋglu zukum. Va nəŋglukum, nokum pak məŋglu zukum. 35Aza aski ɗiy pak adawsənnən na gewleɗ naw kənanaŋgə, an əŋgla tay a walaŋkum.

Yesu tay ərban na Piyer wanah na dəsən ɓa

(MAT 26:31-35; MAR 14:27-31; LUK 22:31-34)

36Simoŋ Piyer aɓsən Yesu na: Daya aŋga kədaddok di? Yesu azlan na: A təki nədaddawa, kəɓap na əzbaw kakaŋ ɓa, ya wakəzbaw laha. 37Piyer aɓsən na: Vimi nəɓap na əzbok kakaŋ ɓa di Daya? Nəzaɓanək zu nappan zeŋgilew ammboko. 38Yesu azlanək na: Əppan zeŋgilok ammbawa? Gesiŋ gesiŋ nədawnah suko: Gəmnda adawhəm man pa' taka wakənah na kəsənu ɓa təl hoku.

Currently Selected:

Yohanna 13: GB

Highlight

Copy