Yohanna 15

Yesu, megezlembirke an gegesiŋ

1Yesu amna: Naw megezlembirke an moggon nani, Əbba yi afən guli net megezlembirkeɗi. 2Kivan məs dəsap azaw pak, an awa ɓa, wabəla. Ya kivan məzuwa, wazaɓani vi dəwəgən diyɗa dayki lahəŋka. 3Məzaɓokum kənanaŋ səkay də əpel məs nəpel sukum. 4Məssoŋ addəvu va nəsaw addəvkum. Vaska'e kivan an dəsap aza megezlembirke ɓa, aɓap na uwa sən kiyən ɓa. Nokum vaski an kəsapaŋ də in ɓa.

5Naw, intə megezlembirke, munokumtə kivani. Ɗəf dəsan addəvu va nəsaw addəvən nan wawə diyɗa, vi tay məs kədawɓap əɗɗaŋ məza in ɓa ɓa. 6An ɗəf tay addəvu ɓa, məzgani a gizbe va kivani, waŋkələ. Kawndeti, kawndolti aka offo, dəzlaŋgəni. 7An mənokum tat addəvwa, əpel naw tay addəvkum, məssõh an kəŋglaŋ pakə, wagəɗ sukum. 8Addəv aŋki adawgagdakanən Əbba, an mənokum tat uwa diyɗa gəm an kəkkpaŋgək gewleɗ nawa. 9Va Afən aŋgluwa, naw pak nəŋglukumko, məssoŋ addəv əŋgla nawa. 10An kərmanənək an nəɗi naɗɗa, wakəssoŋ addəv əŋgla nawa, va naw nərma an Əbba aɗi naɗɗa, nəsaw addəv əŋgla nani.

11Nənah sukum wənəs na vi ənnek naw dəsangən addəvkum, ənnek nokum tamə dəknahgəni. 12#YOH 13:34; 15:17; 1YOH 3:23; 2YOH 1:5Aŋki an məs nəɗiyə, məŋglu zukum va nəŋglukum. 13Əŋgla tay mədayki va ɗəf dəpan zeŋgilen viyit bayneŋgiɗin ɓa. 14Bayneŋgiɗu kənanaŋgə, an mənokum tat əɗɗa zəga an nəɗi sukum naɗɗa. 15Nəyukum na məɗɗaŋ wəza nawa ɓa, vi məgəɗ wəza asən na an məs daya nan adaɗɗa ɓa. Wanəyukum na bayneŋgiɗwa, vi nərban sukumək an məs nəprəm səza Əbba pakə. 16Munokum kəwelwən ɓa, in nəwelkum, nəɗikum kəddoŋgən vi kuwaŋgəni, uwa nokum dəsangəni, vi Afən dəpsukumgən an kədassohoŋ avan də iya naw pakə. 17An nədawɗi sukum na, məŋglu zukum.

Dələv tay əzel Yesu dit ɗiy nani

18An dələv tay əzelkum, məsən na anaw azel daabəŋ. 19Va ɗiy na dələv kənanaŋ na, dələv waŋglu ɗiy na vawrayən. Ya adan səka dələv kəzzoŋ ɓa, nəwelkumuk səddəv dəlva, sən aski dələv adawzelkum. 20#MAT 10:24; LUK 6:40; YOH 13:16Məɗɗumon an məs nənah sukum: Məgəɗ wəza aday na ki daya nan ɓa. Va asərnən mawa wasərnən mokum. Va armanənək əpel naw, warmanən əpel nokumu'e. 21Ya zəgeɗis pak waɗɗen sukumən aka wən na iya nawa, vi dəsənən məs dəslənu ɓa. 22Va nəde ɓa gəm nəpel sit ɓa, kəta tahəŋ də mambray ɓa. Ya kakaŋ na, təki narma vet tay vi mambray net ɓa. 23Ɗəf dədawzelwa tay əzel Əbba'e. 24Va nəgəɗ wəza a walaŋgit məs ɗəf dəgəɗ ɗah ɓa ɓa, kəta tahəŋ də mambray ɓa. Ya kakaŋ na awleninke, də as pak azelmənək ina də Əbba. 25#GLƊ 35:19; 69:5Agəɗ vasna vi əpel an məverin addəv mahenziŋ net dəknahgəni: Azelwənək aka mekeleŋ.

26Pay məzəbbah adazzani, məs nədawslən sukum səza Afəni, Əmpəs na gesiŋ məs dəgil səza Afəni. Ndəni dədawpel akawa. 27Nokum, mənokumtə miziwwe, vi far də wətəŋ nani mənokum tat də iyna.

Currently Selected:

Yohanna 15: GB

Highlight

Copy