Va'Atəŋ 44

Məɗiyni Benyamin ka məhãla

1Yosef aɗiyək wən nan sən daya neŋgil ananda dawnəh na: «Aknəh mazlambayɗe net ɗiyiŋ də zəga nawzəm gba adawɓap əkaŋgə, aɗi koɓeɗ na naway pak ama mazlambay nani. 2Kəɗiyətgən huloŋguk na təbəz babar net iŋkile naw ama mazlambay na an sawã, gəm koɓeɗ nan en aki nalbəh zoŋgoro.» Aɗɗak va Yosef anah səni. 3Təki addaŋka, məpəl siti tive sit ɗiy nek dit korɗe neti. 4Agilyoŋguk sə walaŋgəla-metiŋ, dəzaraŋ ɓuhho ɓa, yaŋ Yosef anah sən daya neŋgil ananda nak na: «Asili! Azbet ɗiy neki, kərufgin kənah sitgin na: Vimi kəmndaganən mbərayən agəla moggon di? 5Huloŋguk nawsa iŋkile na daya naw gəm nawla helig nan tat avokum ɓa sa? An kəɗɗaŋgəŋ mbərayni.»

6Arufke, yaŋ anah sit wən naka. 7Azlan sənən na: «Mbarmbar ɗəf daya naw adawnəh wən vas di? Belemɗe nok aɓapaŋ na wəɗɗa zəga vas ɓa! 8Koɓeɗ mərah a met mazlambayɗe, məmndeget sukuk səka dələv na Kana'an, ya mbarmbar mədawhãl təbəz babara may meleŋge səna daya nok da kandi? 9Ɗəf an mərəhən avan səret belemɗe noko, dəmtə! Asna nam pak waməkkpaŋ ka belemɗe na ɗəf daya nawa.» 10Yaŋ amna: «Kakaŋ adan əpel nokum vaski na, ɗəf məs mərəhən avani, ndən dədawsan ka balam nawa, nokum, wən tay ɓa.» 11Agəmənək ziti, naway pak əprikgit mazlambayɗe nan afuŋ, naway pak akoluk ma mazlambay nani. 12Yaŋ atəŋ əkayan səka daya neti, agrak aka tabuwa, yaŋ mərəhət huloŋguk nak ama mazlambay na Benyamin. 13Aŋgeretinik lukutɗe səzeti, naway pak əslan zəga nan aka koro nani, amndoŋ a walaŋgəla-metiŋ.

Yuda atoŋguk əka wən ammba Benyamin

14Yuda dit milmiŋgiɗin azzoŋ ana Yosef da, tay eŋgil tagay, azbəraŋgək aban afuŋ. 15Yosef aɓsit na: «Mə wəza miy kəɗɗaŋgəŋ di! Kəsənən na, ɗəf va iynəŋ awla heligi ɓa sa?» 16Yuda azlan sən na: «Miy mədawɓap ənah sən ɗəf daya nam kandi? Miy mədawpel di? Aza miy mədarma vam sam di? Maŋgəlva yi dəppasan heslepe net belemɗe noko. Mənam yakəŋ belemɗe na ɗəf daya namə, mənam də ɗəf an mərəhət huloŋguk avan pakə.» 17Yosef aɓsit na: «Dədah nəɗɗagən vas ɓa, məs mərəhət huloŋguk avani yi nawsan balam nawa; nokum məddoŋ zay aza afukumu.»

18Yuda, azar azan go'o, amna: Kamə, daya nawa! Appan balam nok dəpel suk wən məza kədawda gədəv akan ɓa! Va Farawən asani, tay duɗakokum ɓa. 19Is Daya nawtə, kəssohẽt belemɗe noko, kəɓsəm na: Afukum tay sa, məlmukum mbərən tay ɓa sa? 20Yaŋ məzlan sən daya nam na: «Məgal afəm tay, muzliya awə səka wəgal nan slawraŋga yi. Məlmən amtəka, mbəgən takərgən avat mani, afən saka aŋglu ɓa.» 21Yaŋ kənah sit belemɗe nok na: «Məki suwa, nulagən də harawa.» 22Məzlan sən daya nam na: «Əzar na wiynəs tuwãhi yi səza afəni, an azarək səzan na, wamtə.» 23Yaŋ kənah sit belemɗe nok na: «An tabuwa nokuməŋ dəprik də mənokum aŋ ɓa na, kədawkiynən horokum abaw aŋ ɓa.» 24Adan məgap aza balam nok afəmə, məprəman sənək an kənah səmə daya. 25Afəm anah na: «Məmndoŋ kəlbahaŋ səməngən zəga nawzəm siɗikke.» 26Məzlan sən dəpas na: «Məɓap na kaddam, an tabuwa naməŋ al na də mənam ɓa ɓa; ɗəf ndak aŋgəm na kawləm a maharan an tabuwa nam tay də mənam ɓa ɓa.» 27Yaŋ afəm, balam nok anah səm kan na: «Kəsənənka, ɗak naw kirin mezeŋgleket sula tuwə su kaka'ə. 28Taka yaŋ appawka, nənahək na, zəga darawən dəpiwweni. Nulaɗah əmpa ɓa. 29Yaŋ kədaŋglaŋ kabyam su aŋkəŋ əmpa! An wəray ateh akan na, də magalagala babar nawəŋ na, wakətoŋguwən na sahã a vov net mimtiti.» 30An nəmbatək aza balam nok əbba, wiynəŋ tay də mənam ɓa, megenegenen sap də an nani yi. 31Wamtə an dula wiynəŋ ambam ɓa. Mənam belemɗe nok, waməndək mazza afəməŋ na sahã, a təki net ɗiy mimtiti. 32Gawla nok azlan sənək afən aka wən na wiynəŋ dawnəh na: «An nəki suk ɓa, wən nan akawi, pay pak in tat də mambray nan a mahara əbba.» 33Kakaŋ na, kamə gawla nok dəsan balam a gəla wiynəŋka daya! Nan dəmbat dit milmiŋgiɗni! 34Mbarmbar nədaddaw aza əbba an wiynəŋ tay də in ɓa di? Kamə kəppaw ula tatwãh nawrəh əbba ɓa!

Currently Selected:

Va'Atəŋ 44: GB

Highlight

Copy