Va'Atəŋ 43

Yakob atafək dəkanəngən Benyamin

1May gədaki aka dəlva. 2Adan agrakən əzəm zoŋgoro akiyaŋ sə Eziptə naka, afit aɓsit na: «Məmndoŋ kəlbahaŋ səməngən zəga nawzəm siɗɗike.» 3Yuda aɓsən na: «Ɗəf nan anah səmək wat səkkay na, an kəkinən məlmukuməŋ avokum ɓa na, haraw adalma də mənokum ɓa.» 4An wakəppan məlməməŋ dəlgən də mənamə, asna wamiprik əlbah suk zəga nawzəma; 5Ya an kəppan na ɓa na, nam miprikna ɓa, vi ɗəf van anah səm na: «Haraw adawlukum an məlmukum tay də mənokum ɓa ɓa.» 6Israyel amna: «Vimi kəɗɗaŋ suwən mbərayən kənah sənən ɗəf van na, məlmukum tay maɓɓan lah di?» 7Azlan sənən na: «Ɗəf van dəssohõm də gəla namə, Amna: “Afukum tay egge sa? Məlmukum maɓɓan tay sa?” Aka əpel na manəski məboton sən ɗəf vani. Nam aŋga məsən na, wanah na: Məki məlmukum di?»

8Yaŋ Yuda anah sən Israyel afəni: «Aslən wiynəŋ dəmbat də iyna. Misilgən məlgəni, waməsam madaramə, məmtə na mənam də is zək noko, gəm kirtəm ɓa. 9Naw nəslanək wən nan akawa, avaw kədassohõn an nəki suk ɓa; an nəmndagan suk ɓa, asna wanəsaw də mambray pay pak aboko. 10Va məli vaŋ ɓa na, kəta yas mimilik təl sula.» 11Israyel, afit aɓsit na: «Adan vaski, asna yaŋ an kədaɗɗaŋgə. Məndə zəgeɗ naka dəlvəŋ addəvit gabalɗe nokum kəkasənəngən ɗəf vani: telembe siɗikke, amama siɗikke, makarɓaɓay, timbe məs məŋginit neki, kirit tassaka gəm teŋɗeke. 12Kəndaŋgən koɓeɗ meɓɓet avokum sap azet en miziyit a met mazlambayɗe nokumiŋki; wasan wəzlzlaɓi yi soko. 13Məgəm məlmukum məsil məmndoŋ aza ɗəf vani. 14Maŋgəlva Məzuɓappak wapsukum ulasahã nan a mahara ɗəfəska, dəppan məlmukum maɓɓanəŋ dəmilgin də munokum gəm Benyamin! Kirtu azaŋka, yaŋ na kirtu tawzaŋgə'e!»

Wəlma na Yosef masula'ən dit milmiŋgiɗin

15Ɗiy nek agəmaŋgək wəvəla, ndəɗaŋ hãs koɓeɗ meɓɓeti aveti gəm Benyamin. Asilyoŋ addoŋ a Eziptə, aziwweŋgik aba Yosef. 16Yosef awla Benyamin dənɗaŋ, aɓsən daya neŋgil ananda na: «Ake ɗiyiŋ eŋgili, kətawgən wəla zəga kədagəni, vi ɗiyiŋ də in adawzəmaŋ də kapaya.» 17Ɗəf nak aɗɗak an Yosef anah səni, akek ɗiy nek eŋgil ana Yosef da.

18Geslne armek ɗiy nek vi mətoŋgit ana Yosef da. Aɓɗaŋ na: «Viyit koɓeɗ məziyit addəvit mazlambayɗe nam maddaabəŋ neki yi. Mətoŋgəm vi kaɗɗaŋ akam surro, kaskot akamə, kakkpaŋgam ka belemɗe dit korɗe na miyi.» 19Yaŋ azaraŋ aza daya neŋgil ana Yosef da naka, apeleŋ sənən a kirit memeŋgle. 20Aɓɗaŋ na: «Kamə, ɗəf daya nawa. Məprikik aŋ na maddaabəŋ əlbəh zəga nawzəma. 21Ya adan məgap a təki nawvoŋ na, mənam met mazlambayɗe nam pəlpələ, mula na naway pak tay dit koɓet nan ama mazlambay nani. Koɓeɗ nam va məsle, məmilgitik avamə. 22Koɓeɗ meɓɓet məki avam nalbəh zəga nawzəma. Məsən ɗəf an dəziy koɓeɗ namiŋ addivit mazlambayɗe nam ɓa.» 23Azlan sit na: «Məssoŋ zayə, kəgeslne'eŋ ɓa. Maŋgəlva nokum, Maŋgəlva na afukumi yi, dəpsukum wəzaɓ addəvit mazlambayɗe nokum. Nərihik koɓeɗ nokum.»

Yaŋ agilgin Simeyon azeti, 24ɗəf nak akiyik ɗiy nek eŋgil ana Yosef da. Aki sitik iŋkile nawɗa tilti, ndən mah sit mogzol sit korɗe neti. 25Azaɓanənək əvəl net nak dawga wəmilyẽ na Yosef də tətaŋ paya; vi aprəmənək na, adaki adawzəmaŋ waya. 26Yosef adek eŋgili, yaŋ akisənən əvəl navet nak eŋgili, appu'oŋ afuŋ abani. 27Assohõn zay na gəɓa ziti, amna: «Mbari mazza afukum məs kənahaŋ wən nan nak di? Tay egge'e sa?» 28Aɓɗaŋ na: «Balam nok afəm tay zayə, tay egge tagay dəpaŋka.» Aɓe'eŋke, appu'oŋguk afuŋgu. 29Yosef le'gən haran, awla Benyamin məlmən wətət mani. Amna: «Aŋki tabuwa nokum kənahaŋ suwənəŋ sa?» Yaŋ amndan anahə: «Maŋgəlva dula sasãhko wətuwa.»

30Yosef awla məlmənəŋ na, gəɗe' sən zloŋzloŋgu ndən dal a giziŋ kulo' ahəm adaka. 31Ndən haran heɗe'heɗe', viti. Asokuk zəni, yaŋ amna: «Məki waya.» 32Məɗi sən nan temme, net temme, net mə Eziptiɗ məzuzəmaŋ dəndən temme, vi tive tay mə Eziptiɗ dəzəmaŋgən way dit mə Ibriɗe ɓa. Agəɗək azet va zəga nawmə'ã. 33Yaŋ assoŋ aban də mabərki ziti, Tizi, də gəlani, Tabuwa də gəlani, ulaŋ aza zit wizleɗ wizleɗ, gəɗe' sit gərəŋgə. 34Agəm səza haran nan naban apsiti, na Benyamin na, ɗaɗak ɗaɗak day ki an net gap təl sle'i.

Asaŋgək sap dəndən hã kiyit viwwe.

Currently Selected:

Va'Atəŋ 43: GB

Highlight

Copy