Va'Atəŋ 45

Yosef arbanək zəni

1 # WNM 7:13 Yosef dəɓap əsok zən a maheret ɗiy dəssoŋ a maŋgavan ɓa. Amna: «Migilgit ɗiy pak sə maŋgavawa.» Ɗəf taka tay dəziw azan gala Yosef arban zən azet milmiŋgiɗniŋ ɓa. 2Ahəmək wəlan koɓo'koɓo', hã gap mə Eziptiɗ də gəla na Farawən aprəmən wəlani. 3Yosef aɓsit milmiŋgiɗin na: «Intə Yosef. Hara əbba tay egge'e sa?» Milmiŋgiɗin dəɓap əzlan sənən ɓa, vi mekret azlahək abani. 4Yosef aɓsit milmiŋgiɗin na: «Məzar azaw aŋ go'o.» Azaraŋgək azani. Amna: «Intə Yosef məlmukum məs kəvəlaŋ a Eziptə naka.» 5Yaŋ na Mokrokum assokum ɓa, kədawdaŋ gədəv aka zukum vi kəvəlwən aŋ ɓa, vi kawkõhgən zeŋgilokumi Maŋgəlva aslənu daabəŋ kiykum. 6Vi əzva sula yaŋ dətoŋ na may aka dəlva, apələk əzva sle' əmpa, winse asan na ɓa, wəkkal zəga na mawala asan na ɓa. 7Maŋgəlva aslənu abokum na, vi kawzaɓ sukum wəzəm aka dəlvi, kawmbəlgukum. Diyɗa nokum dəkõhoŋgəni. 8Ya kakaŋ na, mənokum kəslənwən aŋ ɓa, vi Maŋgəlva dəɗiyu daya net məɗɗaŋ wəza na Farawən, va daya aka gəla nan pakə, məzəm məlĩ aka dələv na Eziptə dəwənnani. 9#WNM 7:14Məgəm zukum məddoŋ aza əbba, kənahaŋ sənəngən na: Yaŋ an Yosef wətuk anahə: Maŋgəlva aɗiywək ka daya naka dələv na Eziptə dəwənnani, ade azawa kədalya ɓa. 10Kəsoŋgən də gəla aka dələv na Gosen, vasna wakəsok go'o azawa, isi, kirtuko, dihiŋgiɗko, gilewi, timeŋgiɗ dit wasliɗe gəm zəgeɗ nok pakə. 11Adak na, wanəkə suk əzəma, vi zəga adakkpap sənokda is də gəla nok gəm zəga nok dəwənnan pak ɓa, vi wəzva na may appələk sle' abe.

12Horokum awlak yaŋka, məlmu Benyamin awlak də harani, in sən kiyu nədawpel sukum dəvawa. 13Kəboton sənəngən gagdak naw a Eziptə də an kulaŋ pak sən əbba; kulanənka məgəm zukum kəkiyəngən afu aŋka. 14Yaŋ azlah ama wəla Benyamin məlməni, armanən zit sulegit pakə, ahəmaŋgə. 15Allemik milmiŋgiɗin dəwənnet pak a makrani, alɓet dit sini, sissiŋ milmiŋgiɗin azgaŋ meŋ dəndəni.

Farawən ayak Yakob a Eziptə

16Wən nan aprəmək eŋgil ana Farawən da na: «Milmiŋgiɗ Yosef azzoŋko!» Farawən dit gewleɗ nan awlanənək na lewi yi. 17Yaŋ Farawən anah sən Yosef na: «Anah sit milmiŋgiɗuk na: “Məslet gabalɗe nokum aket korɗe məddoŋ məgap aka dələv na Kana'an. 18Məgəm afukum, dit ɗiy nokum, mide azawa, vi nəpsukumgən nenek naka dələv na Eziptə, kəzəmnəngən səlhã naka dəlvəŋka.” 19Noko, wən an nəɗi sukuŋ na, anah siti: məgəm mawteɗ sə Eziptə səŋ nawki kirtukum dit gil nokum, kəslanəŋgən afukum kəzoŋgəni; 20horokum adaskəla aket zəgeɗ nokum nadak ɓa, moggon naka dələv na Eziptə aŋ pak nokumi.»

21Vaski mə Israyel aɗɗaŋgə. Aka wən Farawən aɗi naka, Yosef apsitik mawteɗ nek də zəga nawzəm net tive tive. 22Ndən wəɗak wəɗak sit lukutɗe naddəɗeti, sən Benyamin na, apsənək koɓeɗ na təbəz babar səkat hoku, gəm lukutɗe naddəɗet sle'i. 23Ndən slən korɗe mezeŋgleket kəlaw dit zəgeɗ mogget na Eziptə aket sən afəni, gəm korɗe muguluŋgit kəlaw dəslanən haykəmari də peŋ gəm zəga nawzəm na afən tive tive. 24Appet milmiŋgiɗin nek addoŋgu, anah sit dawmbat na: «Kədaŋgrãhaŋ tive tive ɓa.» 25Addoŋguk sə Eziptə, azzoŋ aka dələv na Kana'an aza Yakob afiti, 26aboton sənən na: «Yosef tay madarane'e dəmtə ɓa, ndəni dədawzəm məlĩ aka dələv na Eziptə dəwənnani!» Yakob asanək fiwwe vi dətaf wən net ɓa. 27Aboton sənənək an Yosef anah sit kpekpe'i. Yaŋ awle mawteɗ en Yosef aslən nawkan naka, maɗɗula Yakob afit akolu. 28Israyel amna: «Məkə, Yosef wətu tay egge; wanəmbat nulagən tak nəɓəl əmta ɓa.»

Currently Selected:

Va'Atəŋ 45: GB

Highlight

Copy