Əgilye 2

Uwa na Moyis gəm əɓay nani

(2:1—4:31)

1Ɗəf səddəv məlma na Levi, alək əgəmət wətən Levi. 2#WNM 7:20; IBR 11:23Guluk nak təɗiyək daway, təwək wiyna, tula wiyin van lawi, ndət haɗamgən gap təla hoku. 3Adan təɓap na əɗaman əmpa ɓa na, təgəm kəggəl mərkan də sleɗu, təkkəɗ sən timbe gəm membezleŋ, təktuk wiyin nak addəvni, təl əɗiyən addəvit vəlarɗe a mabuzgum na Nil. 4Məlmən wiyin nak muguluŋgut tek ziw faraɗa kawla an dədawrəhni. 5Yaŋ wətən Farawən təprik kaslslay a Nil, gorɗeŋge nammbat tam azbanən ma məlpa. Ndət təm keggəl addəvit vəlarɗe, yas təslənət balamək nat əgəmən. 6Ndət kol əkolən na, muzliya: wiyni dədawhəma. Tulak sãhə̃: «Təmna, aŋ van wətit mə Ibriɗe yi.» 7Məlmən nak tənah sət wətən Farawən na: «Nəmbat iyə suk ɗak nawaɗgən səret gil net mə Ibriɗ təwaɗgən sukgən muzliya van sa?» 8Wətən Farawən təpsət na: «Doko.» Waŋ nak təmbat, təyət ma muzliya naka. 9Wətən Farawən təpsət na: «Aka wiynəŋka, awaɗgən suwa, wanəfaɗ suko.» Ɗak nak təgəmək wiyin naka təwaɗgənəka. 10#WNM 7:21Muzliya aɓayka, təki sətək sət wətən Farawən naka. Asanək ka wətəta, yaŋ təlvan na Moyis, vi təmna: «Səret iŋkile nəkdəha.»

Moyis tay ənzan a Madiyan

11 # WNM 7:23-28 # IBR 11:24 Moyis agilik kəlazet milmiŋgiɗin, aka əvoŋ nan dasək na, aɓayək səkkay, awlak va adawzəmaŋ sahã aka wəza. Awla mə Eziptə məzərga mə Ibriɗ, taka naret milmiŋgiɗni. 12Ndən haran balbal, ɗəf tay ɓa, yas avək mə Eziptə nak vək bay əbayni, aɗaman ammba hoyoŋko. 13Vit pummo nan əmpa na, ndən pay, gas ərih mə Ibriɗ sula ərganən ziti. Anah sən ɗəf an dəraygənəŋ na: «Vimi kədarga meggok di?» 14Ɗəf nak amna: «Naway dəɗiyuk ka ɗəf daya mətaw wən nam di? Mok aka wəbayu va kəbay mə Eziptə sa?» Moyis ageslne'ke, amna: «Mbara wənəŋ aprəmka!» 15#WNM 7:29; IBR 11:27Farawən aprəmək wənəska, akayanək Moyis kawbayni. Yaŋ Moyis anzan səna Farawən da; al əsa də gəla aka dələv na Madiyan, asanək a maŋgava vov net iŋkile. 16Məsdələv na Madiyan, tay dit kirin muguluŋgit buhulu. Azzoŋguk əmbaɗaŋ iŋkile, kaknəhiŋ horkotɗe gilew na afit dəsaŋgəni. 17Məzuteɗeŋɗe azzoŋ arɓehetini. Yaŋ Moyis asil atəre, apsit iŋkile sit gilew neti. 18Amndoŋ aza Re'uwel, afiti, anah sit na: «Vimi kəgəmən zukum əmilye dəpaŋ di?» 19Aɓɗaŋ na: «Mə Eziptə tay də tərəm səvet məzuteɗeŋɗe; ndəni yi dəmbeɗ səm iŋkile, apsit gilew dəsaŋgəni!» 20Anah sit kirtin muguluŋgit neki: «Ya, ŋgay di? Vimi kəppanən ɗəfəs adak di? Miya! Dəzəmgən peŋ!» 21Moyis atafək əsa ana ɗəf daska, apsəntək Sipora wətən sən Moyis. 22Təwək wiyna; alvan na, Gersom vi amna: «Molhõyõ nan aka dəlvəŋka!»

Maŋgəlva awelik Moyis, kawkõhgən Israyel

23Sə dərɓagan alyaŋ adaka, məlĩ na Eziptə zamə. Mə Israyelɗe aɓuhunək met sən wəza, ahəmaŋka. Əhəm net agapək aza Maŋgəlva aka wən na wəza. 24#VAA 15:13,14Maŋgəlva aprəmək əhəm neti; Maŋgəlva aɗɗumuk aka wənmiyna na walaŋgən də Abraham, də Isak gəm də Yakob. 25Maŋgəlva awlek mə Israyelɗe; arbanək zən azeti.

Currently Selected:

Əgilye 2: GB

Highlight

Copy