Əgilye 3

1Moyis tay ətaɗ gilew na Yetro, afət goni, məsdələv na Madiyan. Akek gilew balsən kapta-muyã, agap aba gərəm na Maŋgəlva, a Horeb. 2#WNM 7:30-34Maslay na Yawe arbanək zən azan addəv herzləm offo, sə weleŋgit gaslambeɗi. Ndən təmə: awla offo tay əgilyen səddəvit gaslambeɗi, ya gaslambeɗ dəzlaŋ ɓa. 3Moyis amna: «Nəsulək kawla səserge metiŋgin nəwələŋka: vimi gaslambeɗ awzlaŋ ɓa di?» 4Yaŋ Yawe awla na, tay əkkpaŋ kawla, Maŋgəlva ayak səddəvit gaslambeɗi: «Moyis! Moyis!» Amna: «In yakəŋkə!» 5Amna: «Kəzar aŋ ɓa! Akgbuk hensek noko, vi təki məs kəziwiŋka, salala yi.» 6Yaŋ amna: «Intə Maŋgəlva na afuko, Maŋgəlva na Abraham, Maŋgəlva na Isak, Maŋgəlva na Yakob.» Moyis aɗamanək harani, vi tay əgeslne' dawla Maŋgəlva. 7Yawe amna: «Nulak wəzəmsahã net ɗiy naw a Eziptə, nəprəmək əhəm net ama wərga net məzusərən meti. Vi nəsənək tatwãh neti. 8Nəprik na, vi kawkõhgit səvet mə Eziptiɗi, kawgilgit səka dəlvəŋ, kawket aka dələv moggon fədiy fədiyə, aka dələv məs moŋvo də amama adawdawaŋ akan lokloku, kəlaka təki net mə Kana'anɗe, na Hitti, na Amori, na Perzi, na Hivvi, gəm na Yebusi. 9Ya kakaŋka əhəm net mə Israyelɗe agapuwa, adan nulak tatwãh gagdak mə Eziptiɗ aɗi sitin gəresi, 10kakaŋ na, doko; nəslunuk aza məlĩ Farawən, agilgit su ɗiy naw mə Israyelɗe sə Eziptə.»

Maŋgəlva tay ərban iya nan sən Moyis

11Moyis aɓsən Maŋgəlva na: «Nawa nan nəmbatgən aza Farawən, ka nəgilgitgin mə Israyelɗe sə Eziptə di?» 12Maŋgəlva amna ha'aw: «IN TAT də isi. Awle, zəga an narban suk na, intə nəslunko: pay kədawgilgit ɗiy naw sə Eziptə, kəgagdakanəngən Maŋgəlva aka gərməŋka.» 13#ƏGI 6:2,3Moyis aɓsən Maŋgəlva na: «Yaŋ in tat əddaw azet mə Israyelɗe, wanənah sit na: Maŋgəlva net afiŋgiɗkum dəslənu azokum. An anahaŋ suwənək na: mbari yi iya nan di na, mbar nədawneh sit di?» 14#HNH 1:4,8Maŋgəlva aɓsən Moyis na: «IN TAT MƏS NƏSAWA.» Yas amna: «Kənah sitgin mə Israyelɗe vaska: IN TAT dəslənu azokum.» 15Maŋgəlva anah sən Moyis əmpa na: «Yaŋ an kədawpel sit mə Israyelɗe: Yawe, Maŋgəlva net afiŋgiɗkum, na Abraham, Maŋgəlva na Isak, Maŋgəlva na Yakob, dəslənu azokum. Aski iya naw faɗə, vaski adakkamawən aza va sayit ɗiy asani. 16Doko, akkelet ɗiy məsɓet na Israyel, anah sit na: Yawe, Maŋgəlva net afiŋgiɗkum, Maŋgəlva na Abraham, na Isak, na Yakob, dərban zən azaw, dawnah su na: Nətoŋ addəv wən nan ambokum na, aka an məgəɗ sukum a Eziptə yi, 17nənahək na: wanəgilgukum səka wəzəmsahã na Eziptə, Kawkukum kəlaka dələv na Kana'an, na Hitti, na Amori, na Perzi, na Hivvi, gəm na Yebusi, aka dələv məs moŋvo də amama adawdawaŋ akan lokloku.

18Waprəmən moko, kətoŋgoŋgən, ana məlĩ na Eziptə da, isi, gəm ɗiy məsɓet na Israyel; kənahaŋ sənəngən na: Yawe, Maŋgəlva net mə Ibriɗ, arbanək zən azamə; ya kakaŋ na, kamə, mam aka əmbat malaka nasɓəta hoku aka ədaw a kapta-muyã, ətaw wəla zəga nawzaɓ-Maŋgəlva sən Yawe, Maŋgəlva namə. 19Ya naw Nəsənək hara na, məlĩ na Eziptə appokum na kəddoŋgən ɓa, an wəlan məskan ɓa ɓa. 20Vasna wanəslan vaw aka dələv na Eziptə, wanərga dit sekeneɗ temtem məs nədaɗɗa akani. Dərɓaga aska, wappokum kəmbataŋgəni. 21#ƏGI 12:35,36Wanəkkpeŋget mə Eziptiɗ dulanəngən sasẽhit ɗiy nokum; vokum asan na halay halay pay kədaddoŋ ɓa: 22Guluk pak watəssõh zəgeɗ na təbəz babara, na meleŋge, lukutɗe azat meggeta də azat məsgəlata; kəslan sitingin aket kirtukum mezeŋgleket dit muguluŋgiti. Vaski kədappəttin mə Eziptiɗi.»

Currently Selected:

Əgilye 3: GB

Highlight

Copy