Əgilye 4

Maŋgəlva arbanək gagdak nan sən Moyis

1Moyis azlanəka: «Ya awle! Watafən wən naw ɓa, waprəmən maw ɓa. Vi wanahaŋ na: Yawe dərban zən azok ɓa!» 2Yawe aɓsən na: «Miy avokəs di?» Yas aɓsən na: «Zleŋge yi.» 3Aɓsən na: «Azgan afuŋ.» Ndən firik əzgan afuŋ: yas zleŋge akkpaŋ dohõ, Moyis ɓak ənzan səbani. 4Yawe anah sən Moyis na: «Atəl voko, arma kuturun.» Moyis atələk vani, armaka: dohõ nak kpaŋ zleŋge ammba vani. 5«Vi dətafəngən na, Yawe, Maŋgəlva net afiŋgiɗit arbanək zən azoko, Maŋgəlva na Abraham, Maŋgəlva na Isak, Maŋgəlva na Yakob.» 6Yawe aɓsən əmpa na: «Abas vok a mokroko.» Abasək van a makrani, ndən zargən sə makran na: van tay babar kaɗak kaɗak va ɓeɓrezlerizze, kokolo arosko. 7Yas anah na: «Amndagan vok a mokroko.» Amndaganək van a makrani, ndən zargən sə makran na: van kpaŋ təstəs va gəba zəni. 8Ya, an dətafnən gəm dəprəmnən sekene maddaabəŋ ɓa, asna watafnən ma an masulani. 9Ya, an dətefnin sekeneɗ sules ɓa, dəprəmən mok ɓa, kəmbaɗgən iŋkile na Nil, kəggbo'gin aka dələvafuŋ; iŋkile kədawmbaɗ sə Nil əŋki, wakkpaŋgaŋ ka mbel aka dəlvafuŋ.

Maŋgəlva tay əwel Aron ka masula Moyis

10Moyis anah sən Yawe: «Nəkkamokko Yawe, maw tay petpet aza wəpel ɓa, na dəfɗaŋgay dayday ɓa, nasuŋgoy dayday ɓa, səza kədawpel sən balam noki ɓa. Maw gədaki, dədək tay aza hərzlumuwa.» 11Yawe aɓsən na: «Naway dəpsən ma ɗəf di? Naway dədarma hərzlum ɗəfa, əsukun goryom, məzula ketek keteki may əkkpaŋgan daŋgar di? Kəsən na, in Yawe tə ɓa sa? 12Ya kakaŋ na, doko, IN TAT də moko, wanərban suk an kədawpele.»

13Amna: «Nəkkomokko Yawe, kamə aslən ɗəf maɓɓan an kəŋgələ!» 14Gədəv Yawe adək aka Moyis, anah sən na: «Nəsənək Aron mə Levi məlmuko, man gbi'gbi'iy ɓa, nan wapeli. Yaŋ dərəŋ əgilyen abok ələm suko; pay adawluko, zən wanneki. 15Kəpel səngəni, kənah səngən an nawnəhã. Nawa, IN TAT də moko gəm də mani, wanərban sukum an kədaɗɗaŋ. 16Nan wapel sit ɗiy a gəloko, wasan ka moko, wakəsok ka Maŋgəlva nani. 17An dəwəl sən zleŋgeŋ na, agəm a voko! Dəndən kədaɗɗa sekeneɗi.»

Moyis amndanək azet ɗiy nani

18Moyis ambatəka, amilik aza Yetro, afət goni, aɓsən na: «Kamə appaw ndawa, wanəmndaw azet milmiŋgiɗu a Eziptə, wanule, tahəŋ mederet əmpa sa?» Yetro anah sən Moyis na: «Dok zayə!» 19Yas Yawe anah sən Moyis sə Madiyan na: «Doko, amndok a Eziptə, vi ɗiy məzukayanən zeŋgilok pak amtaŋka.» 20Moyis agəmtək ɗak nan dit kirtini, apeŋgitik aka koro, ndən buryok aka dələv na Eziptə. Moyis agəmək zleŋge na Maŋgəlva nak avani. 21Yawe anah sənək Moyis: «Pay kədodok vi kawmilnya a Eziptə, Awle! Sekeneɗ nəpsuk pakə, kəɗɗegin aba Farawən. Ya naw, wanəɓɓəlan makrani, appet na ɗiy əmbat ɓa. 22Kənah səngən Farawən na: Vaŋki Yawe anahə: Israyel iyi wətu uwa maddaabəŋ nawa; 23#ƏGI 12:29nənah sukuk na: Appan wətu dəmbat əgəɗ su wəza, yaŋ kəɓoŋ dappan əmbata! Ya asna wanəbay wutuk uwa maddaabəŋ noko.»

24Yaŋ aka tive, addəv əffete, Yawe arufo, akay əbayni. 25Sipora təgəmək ɗoro, tətaw magəmən wətəta, tənis aban dawnəh na ha'aw: «Zəlu net mbel kənani.» 26Ndəni appani. Tədawnəh na: «zəlu net mbeləŋ na», wən naskəl awray. 27Yawe anah sən Aron na: «Dok ələmsən Moyis a kapta-muyã.» Alək ələmsən aka gərəm na Maŋgəlva, yaŋ allam a makrani. 28Moyis aprəman sənək əpel na Yawe sən Aron pakə, dit sekeneɗ en aɗi sən naɗɗa pakə.

29May Moyis də Aron, addoŋgu, akkeletin ɗiy məsɓet net mə Israyel pakə. 30Aron apelik wən məs Yawe anah sən Moyis pakə, gəm aɗɗek sekeneɗ nek a maheret ɗiyi. 31Ɗiy atafənək wən nani. Aprəmənək na Yawe akək wən ammbet mə Israyelɗe, awlak ərba wil neti. Ndəni agdukoŋ appu'oŋgu.

Currently Selected:

Əgilye 4: GB

Highlight

Copy