Əgilye 1
1
Əgilye net mə Israyelɗe səka balam sə Eziptə
(1:1—15:21)
Wəza na balam a Eziptə
(1:1-22)
1 #
VAA 46:8-27
Iya net mə Israyel məs dəzzoŋ a Eziptə də Yakob yeŋki, azzoŋgu naway pak də gəla nani:
2Ruben, Simeyon, Levi gəm Yuda,
3Isakar, Zabulon gəm Benyamin
4Dan də Neftali,
Gad də Aser.
5Zev Yakob dəwənnet pak tahəŋ ɗiy kaklaw buhulu: na Yosef na, a Eziptə yi səkay. 6Sədərɓagani, Yosef amtə adak dit milmiŋgiɗin pakə gəm sayit ɗiyis pakgəni. 7#WNM 7:17Mə Israyelɗe awaŋka, awanənək kiyit hõyo' hõyo'u, akkpaŋgaŋgək gboŋgboŋ diyɗa: dələv aknahək dəndəɗaŋgə.
8 #
WNM 7:18
Məlĩ meleketen, məs dəsən Yosef ɓa, asanək aka Eziptə. 9Anah sit ɗiy nan na: «Mule va mə Israyelɗe awanən kiyit day, gboŋgboŋ əŋgə day kimə. 10#WNM 7:19Mərah səm keket moggon aketi, adawwanən kiyit ɓa. An əgay agəɗəka, wasapaŋ dit məzuzelɗe namə, wagayaŋ də mənamə, wagilyoŋ səka dələv aŋka.» 11Aɗiyaŋgək deyeɗe aketi vi dəzimgitingin sahã, dəɗɗaŋgən wəza na vavyakə, arkaŋgək walaŋgəleɗe nakkelet zəgeɗ sən Farawən addəvti, Pitom də Ramses. 12Də adaŋzlu ma sleŋsleŋgit pak, mə Israyelɗe awanən kiyit hõyo'hõyo' diyɗa yas ageslne'eŋ sitinin mə Israyel. 13Mə Eziptiɗ azimgitinik sahã net mə Israyel va nawteme, 14akkpaŋganənək əssa net tuwãh diyɗa, də wəpsit wəza tatwãh naɗɗa: Dələv nawndəɓa, menekeɗe nawbaya, wəza net gulyeŋɗe, wəzeɗe en apsitin pak va nawtemi ɗarə.
Farawən tay əsər met mə Israyelɗe
15Məlĩ na Eziptə aɓsit gil məzuwaŋ gil net mə Ibriɗe, akən taka dawyətən na, Sifra, masulat tam na Pu'a: 16«An munokum tat uwenin gil net mə Ibriɗeŋ na, mula ba muzliya vani, An wiyni, məbaya. An waŋtə na, məppata.» 17Muwaŋ gil nek na, ageslne'eŋ sənənək Maŋgəlva; dəɗɗanən va məlĩ na Eziptə anah sit nak ɓa, appetinik kirin mezeŋgleket medereti. 18Yaŋ məlĩ na Eziptə, aye gil muwaŋ gil neki aɓsit na: «Vimi kəppetin kirin mezeŋgleket mederet di?» 19Muwaŋ gil anahaŋ sənən Farawən na: «Vi gil net mə Ibriɗe, va gil net mə Eziptiɗeŋ ɓa; net guromɗeŋgə; tak muwə guluk tədawgap azet na, awaŋgək səkay.» 20Maŋgəlva agəɗ sitik moggon sit muwaŋ gil neki, ɗiy awanənək kiyit diyɗa. Akkpaŋgaŋgək gboŋgboŋgu.
21Adan muwaŋ gil nek ageslne'eŋ sənən Maŋgəlva, Maŋgəlva apsitik zeŋviti, 22#WNM 7:19Farawən aɗi wən nan sit ɗiy pak də wənah na: «Wiyin muwan pak məzgan a Nil, waŋ pak na, məppat madarata!»
Currently Selected:
Əgilye 1: GB
Highlight
Share
Copy
Want to have your highlights saved across all your devices? Sign up or sign in
All right reserved
