मरकुस 11
11
यरुसलेमबेॽ येसु स्वागत ले़ःॽपॽआ
(मत्ति २१:१-११; लुका १९:२८-४०; युहन्ना १२:१२-१९)
1येसुनुङ खोमि चोङ्साजि खे़ॽमे़ॽनिङ्सिमाबेॽ यरुसलेम के़क्पेॽ सिॽइये जैतुन टोक्टोक्मामि के़क्पेॽ बेथफागेनुङ बेथानिया खिम्डेमबेॽ रुक्टुजि। मो ठाउँबाङ येसुडे़ॽ निप्पाङ चोङ्साजि इडोॽ लुनुङ पाक्सुजि, 2“आक्को मेॽयोङ खाङ्मुये खिम्डेमबेॽ खडाजे। मोबेॽ आयुरो असासो मे़साङ्बॽआ इक्को गधामि नुनि पसा हिःक्नुङ युङ्बॽआ चुप्मिन्जुए। मो हे़ङ्आप्टाजे। 3मोडोक्पेॽ हे़न्जिङ ‘इगो इमाङ ले़ःॽमे़ॽनिङ्सिन्जुए ?’ लुमिहोङ ‘इगो गधा आयु परभु पाप्मिटे़, खोसे़ॽ चान्डोनोॽ टेबेये’ लुसाजे।”
4मोबा खोजि खे़ॽमाबेॽ, चइबानोॽ इक्को खिममि राम्डेम पोम्बेॽ मो गधामि नुनि पसा हिःक्नुङ युङ्बॽआ चुप्टाजु, खोजिडे़ॽ मोमि पडाक हेनाजु। 5मोबेॽ येःप्टिङ्बॽआ याॽमिजिडे़ॽ खोजि लुसुजि, “आक्को गधा हेन्नुङ इमाङ ले़न्जुए ?” 6येसुडे़ॽ इःॽपॽआडोक्नोॽ खोजिडे़ॽ लुसाजु, मोबा माहाजिडे़ॽ योङ्मेॽटुजि।
7चोङ्साजिडे़ॽ मो गधामि नुनि पसा येसुबेॽ लाजे़ॽनुङ मोसोक्पेॽ खोजिमि चेॽ रिःॽएन्बेॽटुजि, मोबा मोसोक्पेॽ येसु पेना। 8बेॽलो याॽमिजिडे़ॽ टाङ्बामि चेॽ, ओप्ताङ रामबेॽ रिःॽएम्बेॽटुजि, हाइखाजिडे़ॽ चाहिँ सिङ्बु डाङ्मि सेउला एॽआप्नुङ रामबेॽ रिःॽएम्बेॽटुजि।
9येसुमि पोम्बेॽनुङ ए़ङ्गुवाबेॽ राम्खुबाजिडे़ॽ इडोॽ लुसाङ ओहाङ ले़ःॽपोगुजि, “निवाहाङ्मि ओहाङ लिरो! परमपरभुमि निङ्बेॽ लेङ्घुबा आसिसित ले़ये। 10कानिङ्मि पाबा हाङ्बा दाउदमि लेङ्सिॽपोरोइटे़ राज्य आसिसित लिरो, थाङ्सिरिॽटु पेङ्घुबा निवाहाङ्मि महिमा लिरो!”
11इडोॽ येसु यरुसलेम लेन्नुङ मन्दिर होङ्सिॽयु पे़खडा। मोबा मन्दिरमि इगिॽयु मिॽयु चोप थोक खाक्सु। तर नम किक्खे़ॽपॽआसे़ॽ चोङ्साजिनुङ बेथानिया खिम्डेमबेॽ खडा।
चा मे़ङ्किङ्बॽआ वेॽलाभुमि डाङ
(मत्ति २१:१८-१९)
12वागियाराम माक्मि येसु बेथनियाबाङ यरुसलेम टेमे़ॽनिङ्सिमाबेॽ खो सगे़ॽ सिबॽआ ले़टे़। 13येसुडे़ॽ अडे़ॽ मेॽयोङ इक्को वेॽलाभुमि मुक्मुक्मा डाङ खाङ्डोक्टु, मोबेॽ चा किङ्इटे़न्डे मिॽनुङ वाःप्माबेॽ आॽवारेॽनोॽ टुसा, चागो माॽआड। 14मोबा येसुडे़ॽ मो वेॽलाभुमि डाङ लुसु, “हागोएम्बाङ हे़नबाङ असे़ॽसो चा मे़न्चोडोक्टुजिरो लुसु।” इडोॽ लुबॽआ खा खोमि चोङ्साजिडे़ॽ खेप्सुजि।
येसु मन्दिरबेॽ खे़ॽपॽआ
(मत्ति २१:१२-१७; लुका १९:४५-४८; युहन्ना २:१३-२२)
15येसु खोमि चोङ्साजिनुङ यरुसलेम खे़ॽनुङ मन्दिरबेॽ पे़खडा, मोबेॽ बेपार ले़ःॽखुबा चोप याॽमिजि यिक्सेडुजि। याङ लेङ्घुबाजिमि टेबुल, मोबा हाइखा चोप थोक इन्जाघुबाजिमि पेन्ढाम काङ्एम्बेॽटुजि। 16मोबा येसुडे़ॽ मन्दिरमि सोॽलुङ्राजि इमाङ थोकसो मे़याङ्घे़ॽमेॽटुजिनुङ मे़इन्जामेॽटुजि। 17मोबा येसुडे़ॽ माहा याॽमिजि इःॽसाङ इडोॽ लुसुजि, “धारमिक नेॽचिराबेॽ इडोॽ साप्पॽआ ले़हा, ‘के़ए़ खिम चोप जातिहा याॽमिजिडे़ॽ पारथना ले़ःॽठाम ठाउँ लिमा खे़ये’ तर हे़निङे़ॽको खुसुबाङ्जिमि रुम्मुक टोङ्इटानुमे।” 18येसुडे़ॽ ले़ःॽपॽआ इडोक्मा खा एप्पा याडाङ्बाजिनुङ यहुदि धारमिक खा इःॽखुबाजिडे़ॽ खेम्डोक्टुजि। माहाजिडे़ॽ येसु इन्डोक्टे सेॽमे लुनुङ मोत्ता इबोगुजि। तर माहाजि येसुनुङ किस्सिडामे इन्ढोङ्होङ बेॽलो याॽमिजि खोमि सिक्छे खेम्नुङ खरि मिनामि। 19युडा लियेम्बाङ येसु खोमि एप्पा चोङ्साजिनुङ यरुसलेम सहरबाङ खे़ॽपेसा।
वेॽलाभुमि डाङ्बाङ सिक्छे चिम्मा
(मत्ति २१:२०-२२)
20वागियाराम माक्मि मो याक्लोएनोॽ रामबाङ टेघे़ॽमाबेॽ खोजिडे़ॽ मो वेॽलाभुमि डाङ समठोकनोॽ हेगे़ॽपॽआ खाङ्डोक्टुजि। 21येसुडे़ॽ मो डाङ लुबॽआ खा पत्रुसडे़ॽ मिॽनुङ लुसु, “गुरु खाक्से, हे़ने़ॽ चापहिबॽआ वेॽलाभुमि डाङ्गो हेघे़टा।” 22मोबा येसुडे़ॽ चोङ्साजि लुसुजि, “निवाहाङ्बेॽ बिस्वास ले़टानुमे।
23 “चइबानोॽ हे़निङ लुनिम्ने़, असे़ॽहोङ्सो निवाबाङ आडे़ॽवासो सङ्क मे़ले़ःॽलेॽ टाङ्बे़ॽ लुबॽआ खा पुरा लिये लुनुङ बिस्वासनुङ इगो नङ्लाखा ‘माहोङ्मे़ॽमु हेडे’ लुसुहोङ मोडोक्नोॽ लिये। 24मोडोगे़ॽ के़ॽ हे़निङ लुनिम्ने़, हे़निङे़ॽ पारथनाबेॽ इमाङ ङाःक्माहोङ्सो चुप्मिनुङे मिॽनुङ बिस्वास ले़टानुमे, मो खा चुप्मिन्डानुमे। 25इन्डोक्पेॽ हे़निङ पारथना ले़ःॽमा पोरोइन्डानिङे, मोडोक्पेॽ कोहिजिमि बिरोधबेॽ सुरिक टुहोङ याक्लो आम्लाङ पिबेसानुमे। मोबाङ्रेॽ थाङ्सिरिबेॽ पेङ्खुबा हे़निङ्मि निवाहाङ पाबे़ॽसो हे़निङ्मि पापमि आम्लाङ पिये। 26[तर हे़निङे़ॽ हाइखाजि आम्लाङ मे़म्पिसानुमहोङ्गो थाङ्सिरिबेॽटु पेङ्घुबा हे़निङ्मि निवाहाङ पाबे़ॽसो हे़निङ आम्लाङ पिनिबा।”]
येसुमि अधिकारमि खा
(मत्ति २१:२३-२७; लुका २०:१-८)
27येसुनुङ खोमि चोङ्साजि फेरिसो यरुसलेम टेआबामि। मोबेॽ येसु मन्दिरमि ओम्फिबेॽ राम्डुमे़ॽनिङ्सिमाबेॽ एप्पा याडाङ्बाजि, यहुदि धारमिक खा इःॽखुबाजिनुङ हाइखा बेॽहा याॽमिजि येसुबेॽ लेस्सामि। 28खोजिडे़ॽ येसु सिप्सुजि, “हे़ने़ॽ हाम्बाङ्ए अधिकारडे़ॽ इघा योम्बोक ले़ःॽमे़ॽनिङ्सिन्डुए ? असे़ॽ इघा योम्बोक ले़ःॽमे अधिकार पिसे़ ?” 29मोबा येसुडे़ॽ माहाजि लुसुजि, “के़ॽ हे़निङ इक्को खा सिम्इनिम्ने़, हे़निङे़ॽ मो खा लुमाजे, मोबा के़ॽ हाम्बाङ इगो अधिकार चुप्नुङ इघा योम्बोक ले़ःॽमे़ॽनिङ्सिनुङे मो खासो हे़निङ लुनिम्ने़। 30लो लुघाक्सानुमे युहन्नाडे़ॽ बप्तिस्मा पिमे अधिकार हाम्बाङ चुप्टुए ? थाङ्सिरिबाङ्डे ? याॽमिबाङ ?” 31इगो खा खेम्नुङ माहाजि इडोॽ काबोगामि, “हागो ‘थाङ्सिरिबाङ’ लुमाहोङ हे़निङे़ॽ खो इन्ढोङ बिस्वास मे़ले़टानुमे लुये, 32याॽमिबाङ लुमाहोङ मोबेॽहा याॽमिजिनुङ किस्सिडामि।” इन्ढोङ्होङ बेॽलो याॽमिजिडे़ॽ युहन्ना चाइबमा “अगमबक्ता” लुनुङ मिॽटुजे।
33मोबा माहाजिडे़ॽ येसु लुसुजि, “लेहा कानिङे़ॽ लेसुङ्मानि” मोबा येसुडे़ॽसो माहाजि इडोॽ लुसुजि, “के़ॽसो इघा चोप योम्बोक हाम्बाङ्ए अधिकारडे़ॽ ले़ःॽमे़ॽनिङ्सिनुङे लुसुङ्नि।”
Currently Selected:
मरकुस 11: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
