मरकुस 12
12
अङ्गुरमि सोङ्राबेॽ योम्बोक ले़ःॽखुबाजिमि खानवा
(मत्ति २१:३३-४६; लुका २०:९-१९)
1येसुडे़ॽ माहाजि खानवाबाङ इडोॽ लुसुजि, “इक्को याॽमिडे़ॽ खोमि सोङ्राबेॽ अङ्गुरमि बालि टिसु। मोमि खिरिरि गारो सोक्नुङ बार इसु। मो सोङ्रामि रुम्बेॽ अङ्गुर यिम्ढाम कोलसो टोक्सु। मोबा मो अङ्गुरमि सोङ्रा हुङ्घुबा पेन्ढाम याक्सासो टोङ्नुङ अधिया ले़ःॽखुबा मोहिजि पिआनुङ खो चाहिँ हाइको देसबेॽ खडा।”
2 “अङ्गुर टुम्नुङ ए़क्साङ खोसे़ॽ खोमि भागा लासिॽ इक्को सेउते पाक्सु। 3तर माहा मोहिजिडे़ॽ मो सेउते राःप्नुङ मोगुजि मोबा इमाङ्सो मे़म्पिरेॽ पाक्सुजि। 4मोबा ए़क्साङ सोङ्रादाङ्बे़ॽ हाइको सेउते पाक्सु, तर मोसो माहा मोहिजिडे़ॽ निन्डवाँनोॽ पोक्खे़ॽलो मोःक्नुङ बेजेत ले़टुजि।
5 “सोङ्रादाङ्बे़ॽ फेरि हाइकोसो सेउते पाक्सु। मो सेउतेगो छना माहाजिडे़ॽ सेॽनेसुजि। इडोॽ सोङ्रादाङ्बे़ॽ पाङ्बॽआ बेॽलो सेउतेजि माहा मोहिजिडे़ॽ मोगुजि, आढाजि चाहिँ सेॽनेसुजि।
6 “हागो चोप्पा ए़क्साङ मो सोङ्रादाङ्बामि नम्नम ले़ःॽपॽआ इक्कोमा पसा टुसे़, काङ्मि ‘पसागो मोहिजिडे़ॽ नुरोॽ ले़न्डुजि’ होला मिॽनुङ चोप्पाङ ए़क्साङ मोहिजिबेॽ पाक्सु।
7 “तर माहा मोहिजिडे़ॽ सोङ्रादाङ्बामि पसा लेम्बॽआ लेडोक्नुङ इडोॽ कासामि, ‘इगोगो सोङ्रादाङ्बामि पसा ले़ए। आबानिङे इगो सेॽनेमा मोबा इगो सोङ्रासो कानिङ्मिनोॽ लिये।’
8 “इडोॽ लुनुङ माहाजिडे़ॽ खो राःप्नुङ सेॽनेसुजि, मोबा सोङ्राबाङ पाखे़ॽयु राप्पेसुजि।
9 “हागो मिॽखाक्सानुमे, मो सोङ्रादाङ्बे़ॽ माहाजि इमाङ ले़न्डुजे ? खोनोॽ आप्नुङ माहा मङे़हा मोहिजि सेॽनेन्डुजे, मोबा अङ्गुर टिबॽआ सोङ्रा हाइखा याॽमिजि अधिया ले़चामा पिन्डुजे।
10 “इमा हे़निङे़ॽ धारमिक नेॽचिराबेॽ साप्पॽआ इगो खा मे़नेॽटिॽटानुमे ? खिम आङ्घुबाजिडे़ॽ फे़न्नि लुनुङ राप्पेबॽआ रुङ्गोॽवानोॽ खिममि चरबेॽ सुर टिढाम रुङ्गोॽवा लिसा।
11 “इगो योम्बोक परमपरभुडे़ॽ ले़ए़टुए, मोबा कानिङ्मि लागि इगो खरिमा ले़ये।”
12इगो खा येसुडे़ॽ खोजिमिन्नोॽ बिरोधबेॽ लुबॽआ लुनुङ यहुदि धारमिक खा इःॽखुबाजिडे़ॽ लेडोक्टुजि। मोडोगे़ॽ माहाजिडे़ॽ खो राःप्मा योगुजि तर मोबेॽ सुम्बॽआ याॽमिजिनुङ किस्सिबॽआसे़ॽ खो याःॽयासुजि।
मे़क्चेनमि टुम्बेॽए खा
(मत्ति २२:१५-२२; लुका २०:२०-२६)
13मोबा ए़क्साङ फरिसिजिनुङ हेरोदमि कोहि याॽमिजि येसु खाबेॽ रेमएम्मामि पाक्सुजि।
14माहाजि येसुबेॽ लेन्नुङ इडोॽ लुसुजि, “हे गुरु, कानिङे़ॽ लेन्डुङ्मे़ हे़ने़ॽ रेम्देडुनिबा। याॽमिजिडे़ॽ इमाङ लुम्मे लुनुङ्सो खा इःसुनिबा। चोप खालहा याॽमिजिनुङ इक्कोनोॽ बेबहार ले़न्डुहा। निवाहाङ्मि चाइबमा राम नुरोॽ इःॽखुबा ले़ये। मोडोगे़ॽ कानिङ लुमा यहुदि धारमिक नियमडोॽ कैसर मे़क्चेन फोङ्मा नुयेन्डे फे़न्निबा ?
15“कानिङे़ॽ मे़क्चेन फोङ्मेन्डे ए़फोङ्मे़ ?” तर येसुडे़ॽ माहाजिमि कप्टि निवा लेनुङ माहाजि लुसुजि, “इन्ढोङ हे़निङे़ॽ का जाँच ले़न्डानिङे ? इक्को ढे़क लाप्टानुमे के़ॽ खाङ्खाङ्मा।”
16माहाजिडे़ॽ इक्को ढे़क येसु पिसुजि। मोबा खोसे़ॽ लुसुजि, “इगोबेॽ असामि छापनुङ लावा टुये ?” माहाजिडे़ॽ लुसुजि, “कैसरमि टुउ।”
17मोबा येसुडे़ॽ माहाजि इडोॽ लुसुजि, “कैसरमि थोक कैसरनोॽ पिसानुमे मोबा निवाहाङ्मि थोक निवाहाङ्नोॽ पिसानुमे।” माहाजि येसुमि इडोक्मा खा खेम्नुङ खरि मिनामि।
सिघे़ॽपॽआबाङ हिङ्पुक्मे खा
(मत्ति २२:२३-३३; लुका २०:२७-४०)
18मोबेॽ इक्को निप्पाङ सदुकिजि येसुबेॽ लेस्सामि। इघाजिडे़ॽ सिघे़ॽपॽआ याॽमि फेरि हिङ्बोक्इये लुमे खाबेॽ बिस्वास मे़ले़टुजे। माहाजिडे़ॽ येसु सिप्सुजि, 19“हे गुरु, मोसाडे़ॽ साप्पॽआ खाडे़ॽ इडोॽ लुटे़ इक्को वावामि पसा मे़लिरेॽ सिघे़ॽहोङ, मो वावामि लागि पसा टोङ्बेॽमामि लागि निसाडे़ॽ मो किॽना फुङ्सया ले़ःॽमा खे़ये।
20“इक्को खिमबेॽ एच्चि जना सानुङ्उजि टुसामि। टुम्मिडे़ॽ फुङ्सया ले़टु, खोमि इक्को पसा मे़लिरेॽ सिघडा। 21मोबा सरुम्बाडे़ॽ खोम किॽना फुङ्सया ले़टु, खोबाङ्सो इक्को पसा मे़लिरेॽ सिघडा। इडोक्नोॽ याङ्सरुम्बाडे़ॽ मो किॽना फुङ्सया ले़टु। खोबाङ्सो इक्को पसा मे़लिरेॽ खो सिघडा। 22इडोॽ एच्चि सानुङ्उजिडे़ॽनोॽ मो मेॽनामिॽ फुङ्सया ले़टुजि तर माहा चोप्पाङ पसा मे़लिरेॽ सिघडामि। मोबा ए़क्साङ मो मेॽनामिॽसो सिघडा।
23“हागो ए़क्साङ माहाजि सिबॽआबाङ हिङ्बोक्माबेॽ मो मेॽनामिॽ हाम्बे चाहिँमि बनिमा लिये ? इन्ढोङ्होङ मो मेॽनामिॽ माहा एच्चि जानडे़ॽनोॽ फुङ्सया ले़ःॽपॽआ ले़टे़।” 24येसुडे़ॽ माहाजि लुसुजि, “हे़निङ सारोनोॽ फाङ्सिघे़टानिङे, इन्ढोङ्होङ हे़निङे़ॽ ना धारमिक नेॽचिरामि खा लेन्डानुमे, ना निवाहाङ्मि सक्तिमि खा लेन्डानुमे।
25 “सिघे़ॽपॽआबाङ हिङ्बोक्पॽआ याॽमिजि फुङ्सया ले़ःॽमिने। माहाजिगो थाङ्सिरिदुतजिडोॽ लिम्मे।
26 “सिघे़ॽपॽआबाङ हिङ्बोक्मे खामि टुम्बेॽ मोसाडे़ॽ साप्पॽआ नेॽचिराबेॽ हे़निङे़ॽ मे़नेडानुमे ? मोबेॽ मि हाङ्मे़ॽनिङ्सिबॽआ पोथ्रामि खाबाङ लुटुए, ‘कागो अब्राहाम, इसहाकनुङ याकुबमि निवाहाङ ले़ङे।’ 27मोडोगे़ॽ निवाहाङ्गो सिघे़ॽपॽआजिमि निवाहाङ ने़ॽनिबा, तर हिङ्रिकजिमि निवाहाङ ले़ये। हे़निङ्गो सारोनोॽ फाङ्सिघे़टानिङे।”
चोप्पाङ बेॽए आग्या
(मत्ति २२:३४-४०; लुका १०:२५-२८)
28मोबेॽ इक्को यहुदि धारमिक नियम इःॽखुबा याॽमिसो टुसे़। मोबेॽ येसुडे़ॽ सदुकिजि नुरोॽ लुबॽआ खेम्नुङ खोसे़ॽसो येसु सिप्सु, “हे गुरु, निवाहाङ्मि आग्याबेॽ चोप्पाङ बेॽए आग्या चाहिँ हाम्बेन्डे ?”
29येसुडे़ॽ लुसु, “चोप्पाङ बेॽए आग्या चाहिँ इगोनोॽ ले़ये। चोप इस्राएलिजिडे़ॽ खेप्सानुमे, कानिङ्मि निवाहाङ चाहिँ इक्कोरेॽ परमपरभु ले़ये। 30‘हे़ने़ॽ हे़ने़ए़ निवाहाङ आम्मि चोप होङ्निवाडे़ॽ, चोप निवाडे़ॽ, चोप सोःक्माडे़ॽ मोबा चोप सक्तिडे़ॽ नम्नम ले़टे’। 31मोबाङ हाइको बेॽए आग्या चाहिँ ‘आम्मि पेन्लागाम टाङ्बाडोक्नोॽ नम्नम ले़टे’ इगोबाङ बेॽए आग्या हाइको माॽआये।”
32इगो खा खेम्नुङ मो यहुदि धारमिक नियम इःॽखुबाडे़ॽ येसु लुसु, “चइबानोॽ हे़ने़ॽ नुरोॽ इःसु, हे़ने़ॽ लुबॽआडोक्नोॽ निवाहाङ्गो इक्कोरे टुये, खोबाङ हाइको असासो माॽआम्मे। 33मोडोगे़ॽ याॽमिडे़ॽ निवाहाङ चोप निवाडे़ॽ, चोप सक्तिडे़ॽनुङ चोप सोःक्माडे़ॽ नम्नम ले़ःॽमा खे़ये, मोबा टाङ्बामि पेन्लागाम टाङ्बाडोक्नोॽ नम्नम ले़ःॽमा खे़ये। चोप खालहा भोगनुङ हिॽनुङ पिमे बलिबाङ्सो इघा आग्या पालना ले़ःॽमा चुये।” 34मो याॽमि निवादाङ्बा लिनुङ इःबॽआ खा खेम्नुङ येसुडे़ॽ लुसु, “हे़न निवाहाङ्मि राज्यमि के़क्पेॽनोॽ टुये।” मोबा ए़क्साङ असे़ॽसो येसु इमाङ्सो मे़सिम्हेसुजि।
मुक्ति पिघुबा हाङ्बा खिरिस्टमि टुम्बेॽ खा
(मत्ति २२:४१-४६; २३:१-३६; लुका २०:४१-४७)
35येसुडे़ॽ मन्दिरबेॽ सिक्छे पिमाबेॽ इडोॽ लुसु, “यहुदि धारमिक खा इःॽखुबाजिडे़ॽ इन्डोक्टे खिरिस्ट, दाउदमि पसा लुन्डुजे ? 36पबित्रा होङ्निवाडे़ॽ हाङ्बा दाउदनोॽ इडोॽ लुमेॽपॽआ ले़टे़-परमपरभुडे़ॽ के़ए़ परभु लुसु, ‘के़ॽ हे़ने़ए़ सतुरजि आम्मि सराङ्फे़क्माहोङ्बेॽ मे़युङ्रेॽलो हे़न के़ए़ चुप्थिङ्लाम पेने।’
37 “दाउद खोमदाङ्बे़ॽनोॽ खिरिस्ट ‘परभु’ लुन्डुएहोङ, फेरि इन्डोक्टे खिरिस्ट दाउदमि पसा लिहेये ?” येसुमि खा याॽमिजिडे़ॽ निवा टिनुङ खेम्मे़ॽनिङ्सिडुजे। 38येसुडे़ॽ सिक्छे पिसाङ इडोॽ लुसुजि, “यहुदि धारमिक नियम इःॽखुबाजिबाङ होसियार ले़टानिङे। अक्खाजि किएङ्हा, नुबा चेॽ चाङ्नुङ वाइजामा मिङ्इम्मे। मोबा हाटाराजि याॽमिजिडे़ॽ खोजि सेवा मुनुङ आदर ले़ःॽपॽआ नेन्जोन्डुजे। 39मोबा यहुदिजि सुम्ढाम खिमबेॽनुङ भत्तेरबेॽ बेॽहा याॽमिजि पेन्ढाम ठाउँबेॽ पेम्मा योॽइम्मे। 40माहाजिडे़ॽ राङ्मिॽमाजिमि खिम ङाप्इन्डुजे, हाइखाजि खाङ्मेॽमामि लागि बेॽलो बेॽलो किएङ्हा पारथना ले़ःॽखाङ्इम्मे। मोडोक्हाजिडे़ॽ बेॽलो दन्डा चुप्मिन्डुजे।”
राङ्मिॽमामि भेटि
(लुका २१:१-४)
41मोबा येसु मन्दिरबेॽ भेटि ए़न्ढाम के़क्पेॽ पेन्नुङ याॽमिजिडे़ॽ भेटि ए़म्बॽआ खाङ्मे़ॽनिङ्सिडुए। मोबेॽ बेॽलो टाङायोङ्बाजि लेन्नुङ बेॽलो बेॽलो भेटि ए़न्डुजि। 42मोबा मोबेॽ इक्को गरिब राङ्मिॽमासो लेन्नुङ सिसे़ङमि निभे़क भेटि ए़न्डु। 43मोबा येसुडे़ॽ खोम चोङ्साजि के़ःॽनुङ लुसुजि, “के़ॽ हे़निङ चइबानोॽ लुनिम्ने़, इगो गरिब राङ्मिॽमाडे़ॽ हाइखाजिबाङ बेॽलो भेटि ए़ङ्इटुए। 44इन्ढोङ्होङ हाइखाजिडे़ॽ चाहिँ खोजिमि एम्बॽआबाङ ए़डे़ॽवा भेटि ए़न्डुजि, तर इगो गरिब राङ्मिॽमाडे़ॽ चाहिँ खोबेॽ टुबॽआ चोप थोकनोॽ भेटि ए़न्डु।”
Currently Selected:
मरकुस 12: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
