मरकुस 10
10
छोडपत्रामि टुम्बेॽ येसुमि सिक्छे
(मत्ति १९:१-१२; लुका १६:१८)
1येसु मो ठाउँबाङ यरदन यिवामि मे़ॽए़रेङ यहुदिया ठाउँबेॽ खडा। फेरि मोबेॽसो बेॽलो याॽमिजि सुप्सामि, मोबाङ येसुडे़ॽ याक्लोएडोक्नोॽ सिक्छे पिसुजि। 2फरिसिजि लेन्नुङ येसु रेम्एम्मामि इडोॽ लुनुङ खो सिप्सुजि, “कानिङ लुमा, कोहि याॽमिडे़ॽ खोमबनिमा लेॽपेमा नुयेन्डे फे़न्निबा ?” 3येसुडे़ॽ माहाजि सिप्सुजि, “मोसाडे़ॽ हे़निङ इमाङ आग्या पिटे़ ?” 4माहाजिडे़ॽ लुसुजि, “मोसाडे़ॽको छोडपत्रा साप्नुङ टाङ्बामि बनिमा लेप्पेमा नुये लुटे़।” 5येसुडे़ॽ माहाजि लुसुजि, “मोडोक्मा आग्यागो खोसे़ॽ हे़निङ लुमाबेॽ मे़ङ्खसिबॽआसे़ॽ लुबॽआ ले़टे़। 6तर निवाहाङ्डे़ॽ पुःक्मरामि याकबाङ्नोॽ याॽमि वडाङ्पसानुङ मेॽनामिॽ निप्पाङ्नोॽ टोक्सु। 7‘मोडोगे़ॽ वडाङ्पसाडे़ॽ फुङ्सया ले़ःॽनुङ ए़क्साङ पाबा मामा याःॽयानुङ टाङ्बामि बनिमानुङ खोरो पेङ्इन्जे। 8मोबा खोजि निप्पाङ इक्को हिङा लिन्जे’ हागो खोजि निप्पाङ ने़ॽनि इक्को हिङा लिन्जे। 9मोडोगे़ॽ निवाहाङ्डे़ॽ इक्को टोङ्बॽआजि, याॽमिडे़ॽ फाक्मा फे़न्निबा।” 10येसुनुङ चोङ्साजि खिमबेॽ टुमाबेॽ चोङ्साजिडे़ॽ इगो खामि टुम्बेॽ येसु सिप्सुजि। 11येसुडे़ॽ माहाजि लुसुजि, “असे़ॽ टाङ्बामि बनिमा लेॽपेनुङ, हाइको मेॽनामिॽनुङ फुङ्सया ले़न्डुए, मोसे़ॽ खोमि याक्लोए बनिमामि बिरोधबेॽ बेभिचार ले़न्डुए। 12मोडोक्नोॽ टाङ्बामि बनिबा लेप्पेनुङ हाइको वडाङ्पसानुङ फुङ्सया ले़ःॽखुबा मेॽनामिॽडे़ॽसो बेभिचार ले़न्डुए।”
येसुडे़ॽ पिच्छाजि आसिस पिबॽआ
(मत्ति १९:१३-१५; लुका १८:१५-१७)
13बेॽलो याॽमिजिडे़ॽ खोजिमि पिच्छाजि येसुडे़ॽ हुक युङ्नुङ आसिस पिसुजिरो लुनुङ लाजे़डुजि, तर खोमि चोङ्साजिडे़ॽ माहाजि वोबुजि। 14मोबा येसुडे़ॽ मो खाङ्डोक्नुङ चोङ्साजि वोप्साङ लुसुजि, “पिच्छाजि काबेॽ आप्मेटानुमे, खोजि ए़ॽसे़गानुमे, इन्ढोङ्होङ निवाहाङ्मि राज्यगो इडोक्हा पिच्छाजिमि लागिनोॽ ले़ये। 15चइबानोॽ हे़निङ लुनिम्ने़ निवाहाङ्मि राज्य इक्को एडे़ॽमा पिच्छाडे़ॽडोॽ मे़मिॽटुहोङ खो मोबेॽ पे़खे़ॽहेनिबा।” 16मोबा येसुडे़ॽ माहा पिच्छाजि खोमि पोम्बेॽ खिनुङ माहाजिसोक्पेॽ हुक युङ्साङ आसिस पिसुजि।
टाङायोङ्बा याॽमि
(मत्ति १९:१६-३०; लुका १८:१८-३०)
17येसु मो ठाउँबाङ खे़ॽपेसिॽ पोरोक्माबेॽ इक्को याॽमि पिन्जानुङ खोमि सराङ्बेॽ उःक्मानुङ इडोॽ लुसु, “हे नुबा गुरु, ए़स्सिमे हिङ्मवा टोक्मामि लागि के़ॽ इमाङ ले़ःॽमा खे़ये ?” 18येसुडे़ॽ मो याॽमि लुसु, “हे़ने़ॽ का इन्ढोङ नुबा लुङे ? निवाहाङ्बाङ असासो नुबा ले़ःॽमिने। 19हे़ने़ॽ बेॽए आग्यागो नुरोक्नोॽ लेन्डुहा, याॽमि ए़सेॽमे, बेभिचार ए़ले़ःॽमे, ए़ॽखुमे़, मे़ॽनोक्हा साक्छि ए़ॽपिमे मोबा पाबा मामामि खा खेम्मे।” 20मो याॽमिडे़ॽ येसु लुसु, “गुरुज्यु, अक्खा चोप खालहा योम्बोकको के़ॽ पिच्छाबाङ्नोॽ ले़ःॽआप्मिटुङ्हा।” 21येसुडे़ॽ मो याॽमिलाम हिङ्घे़ॽनुङ नम्नावे़ॽ खाङ्साङ लुसु, “हागोसो हे़ने़ॽ इक्को योम्बोक ले़ःॽमा खे़ये, हे़न खडे हे़न्नुङ इमाङ इमाङ टुहा माहा चोप इन्जानुङ इमाङ मे़ङ्काप्खुबाजि हाबेॽटाजे, मोबा हे़ने़ॽ थाङ्सिरिॽटु बेॽलो चुप्मिन्डुहा। मोबा आप्नुङ कानुङ राप्से।” 22इगो खा खेम्नुङ मो याॽमिडे़ॽ नजिक सुम्नुङ दुःखि लिसाङ खे़ॽपेसा, इन्ढोङ्होङ खोनुङ बेॽलो याङ्सरावा टुसाहा।
23मोबा येसुडे़ॽ किॽयु मिॽयु खाङ्नुङ चोङ्साजि इडोॽ लुसुजि, “काङायोङ्बा याॽमिजि निवाहाङ्मि राज्यबेॽ पे़ए़म्मा सारोनोॽ छॽइये।” 24येसुमि मो खा खेम्नुङ चोङ्साजि खरि मिनामि तर येसुडे़ॽ फेरिसो हाइखा खा इःघे़ॽटु। “नानिजिओ, निवाहाङ्मि राज्यबेॽ पे़ए़म्मा सारो छॽइये। 25समिकमि नाथ्रिबाङ उट रेम्मा छाक्टिडोक्नोॽ, टाङायोङ्बा याॽमिजि निवाहाङ्मि राज्यबेॽ पे़ए़म्मा छॽइये।” 26इगो खा खेम्नुङ चोङ्साजि छना खरि मिन्नुङ, “मोडोक्होङ असे़ॽ चाहिँ मुक्ति चुप्मिन्डुए ?” 27येसुडे़ॽ चोङ्साजिलाम खाङ्नुङ लुसुजि, “इघा योम्बोक याॽमिजिबाङ्गो लिनोॽ लिहेनिहा तर निवाहाङ्बाङ चाहिँ लिहेहा इन्ढोङ्होङ, निवाहाङ्डे़ॽ चोप खा ले़ःॽहेन्डुहा।”
28मोबा पत्रुसडे़ॽ येसु लुसु, “खाक्से परभु, कानिङेॽको चोप थोक लेॽपेनुङ हे़न्नुङ राम्इटिङ्मे़।” 29येसुडे़ॽ लुसुजि, “चइबानोॽ हे़निङ लुनिम्ने़, कानुङ सुसमाचारमि लागि टाङ्बामि पाबा मामा, पसाजि, वावानिसानुङ नानुसाजि, खिम जग्गा जमिन चोप लेप्पेखुबे़ॽ 30सये गुना बेॽलो चुप्मिन्डुए। खेःनुङ चुङ्जामा खेःरेॽ ने़ॽनि खोसे़ॽ पाबा मामा, पसाजि, वावानिसाजि, नानुसाजिनुङ खिम जग्गा इगो हिङ्मवाबेॽनोॽ चुप्मिन्डुए मोबा ए़क्साङ्ए ए़स्सिमे हिङ्मवासो चुप्मिन्डुए। 31तर आयु पोम्बेॽ टुघुबाजि ए़क्साङ सिॽइम्मेनुङ आयु ए़क्साङ टुघुबाजि पोम्बेॽ सिॽइम्मे।”
येसुडे़ॽ खो सिमे खा सुमखेॽ इःबॽआ
(मत्ति २०:१७-१९; लुका १८:३१-३४)
32येसुनुङ खोमि चोङ्साजि यरुसलेमबेॽटु खे़ॽमे़ॽनिङ्सिडामे, मोडोक्पेॽ येसु चाहिँ पोम्बेॽ राम्मे़ॽनिङ्सिडे़, चोङ्साजि चाहिँ खरि मिम्बॽआ ले़टामे। मोबा हाइखा ए़ङ्गुवा एङ्गुवा राम्खुबा याॽमिजि चाहिँ किस्सिबॽआ ले़टामे। फेरि येसुडे़ॽ खोमि बारो जना चोङ्साजि इक्के़ङ्बेॽ चिॽखे़ॽनुङ खोसोक्पेॽ लेङ्इये खामि टुम्बेॽ इःबेॽटुजि। 33“खेप्सानुमे, हागो कानिङ यरुसलेमबेॽटु खे़ॽमे़ॽनिङ्सिन्डिङ्मा। मोबेॽ रुक्नुङ याॽमिमि पसा राःप्नुङ एप्पा याडाङ्बाजि, यहुदि धारमिक नियम इःॽखुबाजिमि हुकपेॽ जिम्मा पिम्मे। मोबा खो सेॽनेमा खे़ये लुनुङ अयहुदि जातिजिमि हुकपेॽ जिम्मा पिन्डुजे। 34मोबा खोजिडे़ॽ खो सिःक्चोन्डुजे, चेन्डुजे, कोरराडे़ॽ मोइन्डुजेनुङ ए़क्साङ सेॽनेन्डुजे। तर सुम याकपेॽ खो सिघे़ॽपॽआबाङ हिङ्बोक्इये।”
याकुबनुङ युहन्नामि बिन्ति
(मत्ति २०:२०-२८)
35मोबा ए़क्साङ जब्दियामि निप्पाङ वडाङ्पसाजि याकुबनुङ युहन्ना येसुबेॽ लेन्नुङ लुसाजु, “गुरुज्यु, कानिङ्मि निवाडे़ॽ मिॽपॽआ खा पिमाना लुनुङ काजिङ लेङ्इॽचिङे।” 36येसुडे़ॽ माहाजि सिप्सुजि, “हे़न्जिङ्मि लागि के़ॽ इमाङ ले़ःॽपेॽमा मिङ्इन्जे ?” 37खोजि कासाजि, “गुरु, हे़न महिमाबेॽ लेम्माबेॽ काजिङ सानुङ्उ हे़ने़ए़ चुप्थिङ्लामनुङ ए़ङ्सिङ्लाम पेन्डोक्मा।” 38तर येसुडे़ॽ मोजि लुसुजि, “हे़न्जिङेॽ इमाङ ङाःक्मे़ॽनिङ्सिन्जुए, हे़न्जिङेॽ लेसाजुने। इमा के़ॽ उङ्बॽआ खोरियाबाङ हे़न्जिङेॽ उङ्हे़न्जुए ? इमा के़ॽ लाबॽआ बप्तिस्मा हे़न्जिङेॽ लाहेन्जुए ?” 39मोजिडे़ॽ लुसाजु, काजिङे लाहेन्जुङे। मोबा येसुडे़ॽ मोजि लुसुजि, “हे़न्जिङे़ॽसो के़ॽ उङ्बॽआ खोरियाबाङ उङ्हेन्जुए, के़ॽ लाबॽआ बप्तिस्मा लाहेन्जुए। 40तर खेप्साजे, काङ्मि चुप्थिङ्लामनुङ ए़ङ्सिङ्लाम पेम्मे़ॽमे अधिकार कानुङ माॽआ। इघा ठाउँगो निवाहाङ पाबाडे़ॽ असामि लागि पोरोइटुए मोसे़ॽरेॽ पेन्डोक्इन्डुए।”
41इडोक्मा खा खेम्नुङ हाइखा इक्पोङ चोङ्साजि चाहिँ याकुब, युहन्नानुङ सुरकडामि। 42मोबा येसुडे़ॽ खोसे़हा चोप चोङ्साजि के़ःॽनुङ लुसुजि, “हे़निङे़ॽ लेन्डानुम इगो मक्खाम्डेमबेॽहा राज्य ले़ःॽखुबाजिडे़ॽ जनताजिसोक्पेॽ खोमि खुसि सासन ले़न्डुजे। मोबा बेॽहा याॽमिजिडे़ॽ हाइखा याॽमिजि अधिन ले़न्डुजे। 43तर हे़निङे़ॽ चाहिँ आक्टोक ले़ःॽमा फे़न्निबा। हे़निङ्बेॽ असा बेॽएम्मा लिमा मिङ्इन्डानिङे खोसे़ॽ सेउते लिनुङ हाइखाजिमि सेवा ले़ःॽमा खे़ये। 44चोप्पाङ याक्लोमा लिमा मिङ्खुबे़ॽ चोपमि सेउते लिमानोॽ खे़ये। 45इन्ढोङ्होङ याॽमिमि पसा हाइखाजिबाङ सेवा चुप्सिॽ ने़ॽनि, तर हाइखाजि सेवा ले़ःॽसिॽनुङ टाङ्बामि सोःक्मा पिनुङ बेॽलो याॽमिजि पापबाङ छुट्कारा पिमामि लागि लेङ्इटे़।”
मिक मे़ए़ॽखुबा बारतिमै लुमे याॽमि
(मत्ति २०:२९-३४; लुका १८:३५-४३)
46मोबा ए़क्साङ येसुनुङ खोमि चोङ्साजि यरिहो सहरबेॽ आबामि। येसुनुङ चोङ्साजि, मोबा बेॽलो याॽमिजिनुङ यरिहोबाङ रामबेॽ खे़ॽमे़ॽनिङ्सिमाबेॽ, तिमैमि पसा मिक मे़ए़ॽखुबा ङाःक्चाघुबा राम के़क्पेॽ पेम्मे़ॽनिङ्सिडा। 47मोसे़ॽ नासरतबेॽए येसु मो रामबाङ्नोॽ आप्मे़ॽनिङ्सिये खा लेडोक्नुङ खो वोबुगा, “हे येसु, दाउदमि पसा, कासोक्पेॽ नम्नावा ले़ःॽमाना।”
48मोबेॽहा बेॽलो याॽमिजिडे़ॽ खो योङ उःक्मेॽमामि योबुजि। तर खो छना बेॽए सेम्ले़ॽ वोबुगा, “हे दाउदमि पसा कासोक्पेॽ नम्नावा ले़ःॽमाना।” 49येसुडे़ॽ येःप्नुङ लुसु, “आक्को याॽमि इगिॽयु के़डानुमे।” मोबा खोमि चोङ्साजिडे़ॽ मो याॽमि इडोॽ लुसुजि, “साप्थाक्से, गुरुडे़ॽ हे़न के़ःॽमे़ॽनिङ्सिये, चान्डो आबे।” 50मोबा मो याॽमि खोमि खाम्जिरा राप्पेनुङ येःपोक्नुङ येसुबेॽ आबा। 51येसुडे़ॽ मो याॽमि सिप्सु, “लो लुसे, हे़ने़ए़ लागि के़ॽ इमाङ ले़ःॽपेॽमे ?” मो याॽमिडे़ॽ लुसु, “गुरु, के़ॽ खाङ्डोक्हेसुम।” 52येसुडे़ॽ मो याॽमि लुसु, “खडे, हे़ने़ए़ बिस्वासडे़ॽ हे़न नुबुइटे़।” मोडोक्पेॽनोॽ मो याॽमि मिक नुबोक्नुङ खाङ्डोक्हेसु, मोबा खोसो येसुनुङ सोरि राम्बोगा।
Currently Selected:
मरकुस 10: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
