लुका 19
19
मे़क्चेन लाखुबा जखायस
1येसु यरिहो सहरमि राम ले़ःॽसाङ खे़ॽमे़ॽनिङ्सिडा। 2मो सहरबेॽ जखायस निङ ले़ःॽखुबा इक्को टाङायोङ्बा याॽमि टुसा, खो मे़क्चेन लाखुबाजिमि एप्पा ले़टे़। 3जखायसडे़ॽ येसु असा ले़येले़ लुनुङ खाङ्मा मिॽटुए। तर खो ने़क्ने़क ले़टे़न्से़ॽ, बेॽलो याॽमिजिडे़ॽ यिप्सेडु मोडोगे़ॽ खोसे़ॽ मे़ङ्खाङ्डोक्टु। 4मोबाङ खो पोम्बेॽ पिङ्खे़ॽनुङ इक्को वेॽलाभुमि डाङ सोक्पेॽ सक्सा। येसु मो रामबाङ्नोॽ आप्मे़ॽनिङ्सिडे़। 5येसु मोबेॽ लेन्नुङ सिङ्बु डाङबेॽटु खाङ्साङ लुसु, “जखायस चान्डो मिॽमु उक्से। आइ का हे़ने़ए़ खिमबेॽ पोप्सिॽ खे़ए़ङे।” 6जखायस साप्थाक्साङ चान्डो मिॽमु उङ्नुङ येसुमि स्वागत ले़टु, मोबा खिमबेॽ चिॽखे़ॽटु। 7इगो खाङ्खुबा चोप याॽमिजि कुनुक-कुनुक काबुगामि, “येसुगो पापि याॽमिमि खिमबेॽ पोप्सिॽ खडा!” 8तर इॽछोॽ ए़क्साङ जखायसडे़ॽ येसुमि पोम्बेॽ येःप्नुङ लुसु, “खेप्से, परभु कानुङ टुहा याङ्सरावामि हे़क भागा गरिबजि हाःबेनुङ्हाजि। मोबा असा असाजिमि के़ॽ चुरोॽ लाबॽआ ले़ःॽहोङ माहाजिमि रिभागा चुरोॽ टेबेनुङ्हाजि।” 9मोबा येसुडे़ॽ खो लुसु, “आयु जखायसनुङ खोमि खिमबेॽहा याॽमिजिडे़ॽ छुट्कारा चुप्मिटुजे, इन्ढोङ्होङ जखायससो अब्राहाममिन्नोॽ बङ्स ले़ये। 10का याॽमिमि पसा मे़खे़ॽपॽआजि योक्सिॽनुङ छुट्कारा पिसिॽ लेङ्इटिङे।”
सुनामि मुन्डामि खानवा
(मत्ति २५:१४-३०)
11येसुडे़ॽ लुबॽआ खा याॽमिजिडे़ॽ खेम्मे़ॽनिङ्सिमाबेॽ खोसे़ॽ हाइको इक्को खानवा इःसु। खो यरुसलेममि के़क्पेॽ रुक्पॽआ ले़टे़। मोबेॽहा याॽमिजिडे़ॽ निवाहाङ्मि राज्य मोडोक्पेॽनोॽ लेङ्इये मिॽटुजे। 12खोसे़ॽ लुसु, “इक्को एप्पा याॽमि ओः देसबेॽ खे़ॽनुङ खोमि देसबेॽए हाङ्बा लिआप्मा पोरोगा। 13खो खे़ॽमा याक्लो खोमि इक्पोङ जना सेउतेजि के़डुजि। मोबाङ इक्को इक्को सुनामि मुन्डा#१९:१३ इक्को भे़क इक सय याकमि नमयाकडोक्नोॽ ले़टा। पिसाङ इडोॽ लुसुजि, ‘का टेजामाबेॽ इगो मुन्डाबाङ ब्यापार ले़ॽनुङ हाइखा बेॽलो याङ टोङ्युक्सानुमो।’ 14तर मो देसबेॽहा याॽमिजिडे़ॽ खो मे़नेन्जोसुजे। मोडोगे़ॽ खो खे़ॽपॽआ इॽछोॽ ए़क्साङ मोबेॽहा याॽमिजिडे़ॽ ‘आक्को याॽमि कानिङ्मि हाङ्बा लिबॽआ नेन्जासुङ्मानि, लुनुङ लम्बवाँ पाक्सुजि।’
15 “तर मो याॽमि हाङ्बानोॽ लिनुङ टेजासा, मोबाङ लेम्मासोरोॽ खोसे़ॽ याङ पिआबॽआ सेउतेजिडे़ॽ इन्डोक याङ टोक्सुजि लुनुङ सिम्मामि के़डुजि। 16मोबाङ याक्लोए सेउते लेन्नुङ लुसु, ‘मायोङ्बा, हे़ने़ॽ पिबॽआ सुनामि इक्को मुन्डाडे़ॽ ब्यापार ले़ॽनुङ हाइखा इक्पोङ मुन्डा टोङ्इटुङे।’ 17हाङ्बे़ॽ ओहाक पिसाङ लुसु, ‘हे़ने़ॽ ए़डे़म्मा योम्बोकसो नुरोॽ ले़ःॽपॽआसे़ॽ, हे़न इक्पोङ सहरमि एप्पा लिडोक्इये।’ 18हाइके सेउते लेन्नुङ लुसु, ‘के़ए़ मायोङ्बा, हे़ने़ॽ पिबॽआ मुन्डाबाङ ब्यापार ले़ॽनुङ हाइखा ङाउम मुन्डा टोङ्इटुङ्हा।’ 19मो मायोङ्बाडे़ॽ मोसो लुसु, ‘ओहाक, हे़नसो ङाउम सहरमि एप्पा लिडोक्इये।’ 20तर ए़क्साङ्ए सेउते लेन्नुङ मायोङ्बा लुसु, ‘के़ए़ मायोङ्बा, हे़ने़ॽ पिबॽआ मुन्डा के़ॽ इक्को चेॽपेॽ मोम्नुङ युङ्इटुङे, मो इगोबेॽनोॽ टुये। 21का हे़न्नुङ किस्सिडिङा, इन्ढोङ्होङ हे़न गो सारो निवा छॽइये याॽमि ले़ये, हे़ने़ॽको मे़युङ्बॽआ ठाउँबेॽसो योॽइन्डुए, मोबा टाङ्बे़ॽ मे़रिःॽपॽआ ठाउँबाङ्सो चा सुम्इन्डुए।’ 22मोबाङ मायोङ्बाडे़ॽ लुसु, ‘हे़न इःनाम्या सेउते, हे़ने़ॽ लुबॽआ खाबाङ्नोॽ हे़न सजाय पिन्ने़। का निवा छाॽखुबा याॽमि ले़ङे, के़ॽ मे़म्पिबॽआबाङ्सो लाघुबा, मे़रिःॽपॽआबाङ्सो सुम्घुबा लुसिङा। 23मोडोक्होङ इन्ढोङ के़ॽ पिबॽआ याङ ब्याजबेॽसो मे़न्टिसुए, ब्याजबेॽरेॽनोॽ टिबॽआ ले़टाहोङ्सो का लेम्माबेॽ ए़डेॽवागो बेॽलो लिसा होला’ 24मोबाङ मो मायोङ्बाडे़ॽ खोमि के़क्पेॽ टुघुबा याॽमिजि लुसुजि, ‘इगोनुङ टुहा मुन्डा ङाप्नुङ इक्पोङ मुन्डा काप्खुबा पिसानुमे।’ 25माहाजिडे़ॽ लुसुजि, ‘हजुर, मोनुङ्गो खोमिनोॽ इक्पोङ टुहाडि!’ 26मो मायोङ्बाडे़ॽ लुसु, ‘के़ए़ खा खेप्सानुमे असानुङ टुहा मोबेॽ हागोसो येॽयुहा, तर असानुङ माॽआये ए़डे़ॽवासो ङाप्खे़हा।
27 “‘हागो असाजिडे़ॽ का हाङ्बा लिबॽआ नेन्जामिने माहा सतुरजि चोप चिॽआप्नुङ के़ए़ पोम्बेॽनोॽ सेॽनेसानुमे’।”
यरुसलेमबेॽ येसु लेम्बॽआ
(मत्ति २१:१-११; मरकुस ११:१-११; युहन्ना १२:१२-१९)
28येसुडे़ॽ इगो खानवा इःसेॽनुङ खो यरुसलेमलाम खडा। 29बेथफागेनुङ बेथानियामि के़क्पेॽ सिॽइये जैतुन टोक्टोक्मे़ॽटु रुक्नुङ येसुडे़ॽ खोमि निप्पाङ चोङ्साजि इडोॽ लुनुङ पाक्सुजि। 30“मो खाङ्मुये खिम्डेमबेॽ खडाजे। आक्को खिम्डेमबेॽ हे़न्जिङ रुक्माबेॽ आयुरो असासो मे़साङ्बॽआ इक्को गधामि नुनि पसा हिःक्युङ्बॽआ चुप्मिन्जुए। मो हेन्नुङ इगोबेॽ टिङ्आप्टाजे। 31‘मो हेम्माबेॽ कोहिडे़ॽ इन्ढोङ हेङ्इन्जुए’ लुमिहोङ कानिङ्मि परभु पाप्मिटे़ लुमे़।”
32मोबाङ चोङ्साजि मो खिम्डेमबेॽ खडाजि, खे़ॽमाबेॽ चइबानोॽ येसुडे़ॽ लुबॽआडोक्नोॽ हिःक्युङ्बॽआ गधामि नुनि पसा चुप्टाजु। 33खोजिडे़ॽ मो गधा नुनि पसा हेम्माबेॽ मोमि खिमदाङ्बाजिडे़ॽ खोजि सिप्सुजि, “हे़न्जिङे़ॽ इन्ढोङ आक्को हेङ्इन्जुए ?” 34मोबाङ खोजिडे़ॽ लुसाजु, “इगो कानिङ्मि परभु पाप्मिटे़।” 35इडोॽ मो गधामि नुनि पसा येसुबेॽ लाजे़ॽनुङ मोसोक्पेॽ माहाजिमि ओप्ताङ रिःॽएम्बेॽटुजि, मोबाङ येसु मोसोक्पेॽ सक्सा। 36इडोॽ येसु खे़ॽमे़ॽनिङ्सिमाबेॽ याॽमिजिडे़ॽ रामबेॽ खोजिमि चेॽ रिएन्बेॽटुजि।
37येसु यरुसलेममि के़क्पेॽ सिॽइये जैतुन टोक्टोक्मामि युरामबेॽ लेस्सा। मोडोक्पेॽ येसुडे़ॽ ले़ःॽपॽआ खरिहा योम्बोक मिॽनुङ चोप चोङ्साजि सुम्नुङ बेॽए सेम्लाडे़ॽ साप्थाक्साङ इडोॽ निवाहाङ्मि ओहाङ ले़ःॽपोगुजि,
38“परभु निवाहाङ्मि निङ्बेॽ लेङ्घुबा हाङ्बा आसिसित ले़ये! थाङ्सिरिबेॽ सान्ति लिरो निवाहाङ्मि महिमा लिरो!”#भजनसङ्ग्रह ११८:२६
39तर बेॽलो याॽमिजिमि रुम्बाङ फरिसिजिडे़ॽ येसु लुसुजि, “होउ गुरुज्यु, हे़ने़ए़ चोङ्साजि योङ उक्मेॽटाजे।” 40येसुडे़ॽ माहाजि लुसुजि, “के़ॽ इघाजि योङ उक्मेॽमाहोङ्गो रुङ्गोॽवा वोबुॽइम्मे।”
यरुसलेममि लागि येसु हाःप्पॽआ
41यरुसलेम के़क्पेॽ लेम्माबेॽ येसुडे़ॽ यरुसलेम सहर खाङ्मानुङ हाःप्साङ लुसु, 42“हे यरुसलेमबेॽहा याॽमिजि, हे़निङे़ॽ सान्ति चुप्मामि इमाङ ले़ःॽमा खे़ये लुनुङ आयुनोॽ लेमा खाडे़, तर मे़लेसानुम, हागो बेला खे़ॽपेसा! 43हागोगो इडोक्मा बेला लेङ्इये, हे़निङ्मि सतुरजिडे़ॽ मोत्ता इःनुङ हे़निङ किॽयुमिॽयुबाङ से़क्इम्मे। 44मोबा यरुसलेमनुङ मोबेॽ पेङ्घुबाजि चोप नास ले़न्डुजे। माहाजिडे़ॽ इक्को रुङ्गोॽवाबेॽ हाइको रुङ्गोॽवासो मे़युङ्रेॽ चोप योबेन्डुजे, इन्ढोङ्होङ निवाहाङ हे़निङ हिङ्मेॽसिॽ लेम्बॽआ बेला हे़निङे़ॽ मे़लेसानुम।”
येसु मन्दिरबेॽ
(मत्ति २१:१२-१७; मरकुस ११:१५-१९; युहन्ना २:१३-२२)
45मोबा येसु मन्दिरमि सोॽलुङ्बेॽ खे़ॽनुङ मोबेॽ इमाङ इमाङ इन्जाखुबाजि इडोॽ लुसाङ यिगुजि, 46“धारमिक नेॽचिराबेॽ इडोॽ लुनुङ साप्पॽआ ले़ये- ‘के़ए़ खिम पारथना ले़ःॽठाम खिम लिमा खे़ये।’ तर हे़निङे़ॽको खुसुबाङ्जिमि रुम्उक#यसैया ५६:०७; यरमिया ७:११ टोक्सानुमे।”
47मोबाङ येसुडे़ॽ सानिङ्मु मन्दिरबेॽ सिक्छे पिसुजि, एप्पा याडाङ्बा, यहुदि धारमिक नियम इःॽखुबानुङ हाइखा एप्पा याॽमिजिडे़ॽ चाहिँ खो सेॽमा योगुजे, 48तर माहाजिडे़ॽ मे़सेॽहेसुजि, इन्ढोङ्होङ चोप याॽमिजिडे़ॽ खोमि सिक्छे खेम्मा बेॽलो नेन्जोसुजे।
Currently Selected:
लुका 19: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
