लुका 18
18
राङ्मिॽमानुङ न्यायधिस
1मोबा ए़क्साङ येसुडे़ॽ चोङ्साजि “सानिङ्नोॽ पारथना ले़ःॽमा खे़येनुङ हरेस चामा फे़न्निबा” लुमे खा इःॽमामि इडोॽ इःबेॽटुजि, 2“इक्को सहरबेॽ इक्को न्यायधिस टुसे़। मो निवाहाङ्नुङ मे़ङ्किस्सिडे़, मोबा असामिसो ले़ख्खो मे़ले़टुए। 3मो सहरबेॽनोॽ इक्को राङ्मिॽमासो टुसे़। मो राङ्मिॽमा सानिङ खोबेॽ लेन्नुङ लुसुए, ‘कानुङ खिघुबा याॽमिनुङ काङ्मि चान्डो न्याय ले़ःॽपेॽमाना।’ 4इक्याक नियाकको मो राङ्मिॽमामि खा मे़ङ्खेप्सु। तर ए़क्साङ मो न्यायधिसडे़ॽ निवाहोङ्सिॽयु मिडु, ‘का निवाहाङ्नुङ्सो किस्सिङानि, याॽमिजिमिसो ले़ख्खो ले़टुङ्नि! 5तर इगो राङ्मिॽमाडे़ॽ सारोनोॽ झिजो ले़ःॽपॽआसे़ॽ इगोमि खा टोङ्बेॽपेमे़ होला। इडोॽ मे़ले़ःॽलो इगोसे़ॽ सानिङ्नोॽ लेन्नुङ का झिजो ले़ये’।”
6मोबा परभुडे़ॽ लुसु, “मिॽखाक्सानुमे! मो निवा छॽइये न्यायधिस इमाङ कामे़ॽनिङ्सिये। 7मोडोक्नोॽ लेन्डा, सेन्डा सानिङ्नोॽ निवाहाङ्नुङ पारथना ले़ःॽखुबा याॽमिजिमि लागि निवाहाङ्डे़ॽ नुबा खा ले़ःॽपेॽनिबा ? इमा खोमि याॽमिजिमि लागि ढिलो ले़टुङ्घे़न्डुए ? 8के़ॽ हे़निङ लुनिम्ने़, खोसे़ॽ खोमि याॽमिजि नुबा खा चान्डोनोॽ ले़ःॽपेन्डुजे। तर याॽमिमि पसा मक्खाम्डेमबेॽ लेम्माबेॽ इमा इगोबेॽहा याॽमिजिबेॽ बिस्वास चुप्मिन्डुएन्डे ?”
पारथना ले़ःॽखुबा निप्पाङ याॽमिजि
9टाङ्बारेॽ धरमि मिॽखुबा तर हाइखाजि हेला ले़ःॽखुबा याॽमिजिमि लागि येसुडे़ॽ इक्को खानवा इःबेॽटुजि, 10“फरिसिनुङ मे़क्चेन लाघुबा निप्पाङ याॽमिजि मन्दिरबेॽ पारथना ले़ःॽसिॽ खडाजि।
11 “फरिसि चाहिँ ए़डे़ॽ ओःनोॽ येःप्नुङ इडोॽ कासाङ पारथना ले़टु, ‘हे निवाहाङ पाबा, हे़न ओहाक पिन्ने़, इन्ढोङ्होङ का हाइखा याॽमिजिडोॽ खिक्तुबाङ्नुङ बेमानि ले़ःॽङानि। के़ॽ बेभिचार मे़ले़ःॽटिॽ, का इगो मे़क्चेन लाखुबाडोक्सो ले़ःॽङानि। 12का साताबेॽ निघे़ॽ मे़न्जारेॽ पारथना ले़ङे। के़ॽ चुप्पॽआ चोप थोकबाङ इक्पोङ्मि इक भागा हे़न पिन्ने।’
13 “तर मे़क्चेन लाघुबा याॽमि चाहिँ ओःनोॽ येःप्नुङ थाङ्सिरिॽटु खाङ्मासो किस्सिमानुङ हुगे़ॽ हाङ्डाङ फे़ःक्साङ लुसु, ‘हे निवाहाङ पाबा, का पापि नम्नावा ले़ःॽमा’!” 14मोबा येसुडे़ॽ लुसु, “के़ॽ हे़निङ लुनिम्ने़, मो फरिसि ने़ॽनि तर हाइको मे़क्चेन लाखुबा याॽमि चाहिँ निवाहाङ्मि पोम्बेॽ धरमि लिनुङ खिम टेघडा। हाइखाजिबाङ टाङ्बानोॽ बेॽए मिॽखुबाजि चोप ए़डे़म्मा लिम्मेनुङ टाङ्बा ए़डेम्मा मिॽखुबाजि चाहिँ चोपजि एप्पा लिम्मे।”
पिच्छाजि आसिस पिबॽआ
(मत्ति १९:१३-१५; मरकुस १०:१३-१६)
15येसुडे़ॽ खोमि हुक पिच्छाजिबेॽ युङ्माबेॽ आसिस चुप्टुजिरो लुनुङ याॽमिजिडे़ॽ खोजिमि ओङे़क पिच्छाजि येसुबेॽ चिक्चे़डुजि। इघा खाङ्नुङ खोमि चोङ्साजिडे़ॽ माहा याॽमिजि वोबुजि। 16तर येसुडे़ॽ माहा पिच्छाजि के़ःॽनुङ लुसुजि, “पिच्छाजि काबेॽ आप्मेॽटानुमे, खोजि ए़ॽसे़गानुमे इन्ढोङ्होङ निवाहाङ्मि राज्यगो इडोक्हाजिमिनोॽ ले़ये। 17चइबानोॽ के़ॽ हे़निङ लुनिम्ने़, निवाहाङ्मि राज्य ए़द्रिहा पिच्छाजिमिडोक्मा चोखो निवाडे़ॽ मिॽमाहोङ्रेॽ खोमि राज्यबेॽ पे़खे़ॽटोॽइये।”
टाङायोङ्बा याॽमि
(मत्ति १९:१६-३०; मरकुस १०:१७-३१)
18इक्को इस्राएलि एप्पा याॽमिडे़ॽ येसु सिप्सु, “हे नुबा गुरु, इन्डोक्पेॽसो ए़ॽसिघे़ॽमे हिङ्मवा चुप्मामि लागि इमाङ्डे ले़ःॽमा खे़ये ?” 19येसुडे़ॽ मो याॽमि लुसु, “हे़ने़ॽ इन्ढोङ का नुबा लुङे ? निवाहाङ्बाङ हाइखा असासो नुबा ले़ःॽमिने। 20निवाहाङ्मि नेॽचिरामि चोप आग्या हे़ने़ॽनोॽ लेन्डुए, बेभिचार ए़ले़ःॽमे़, याॽमि ए़ॽसेॽमे, ए़क्खुमे, ए़रेम्डेॽमे, हाइखाजि ए़चुङ्जामे, मोबा पाबा मामामि खा खेम्मे, खोजिमि आदर ले़ःॽमे।” 21मोसे़ॽ इडोॽ लुसु, “इघा चोप आग्यागो के़ॽ पिच्छाबाङ्नोॽ ले़ःॽमे़ॽनिङ्सिनुङे।” 22इगो खा खेम्नुङ येसुडे़ॽ मो याॽमि लुसु, “हे़ने़ॽ हागोसो इक्को योम्बोक ले़ःॽमा खे़ये। हे़न्नुङ टुहा चोप थोक इन्जानुङ इमा मे़ङ्काप्खुबा गरिबजि हाबेॽनुङ कानुङ राप्से, मोबा हे़ने़ॽ थाङ्सिरिॽटुहा याङ्सरावा चुप्मिन्डुए।” 23इगो खा खेम्नुङ खोमि नरिङ हेॽयुसा इन्ढोङ्होङ खो बेॽलो टाङायोङ्बा ले़टे़।
24मो याॽमि खाङ्नुङ#१८:२४ गिरिक बाइबलबेॽ “टाङायोङ्बा याॽमि दुःखि लिबॽआ खाङ्नुङ” सो साप्मिटाह येसुडे़ॽ लुसु, “खाक्सानुमे, टाङायोङ्बाजि निवाहाङ्मि राज्यबेॽ पे़ॽखे़ॽमा इन्डोक सारो सिॽइयेले़। 25उट समिकमि होवायाबाङ रेङ्घे़ॽमा ने़ःक्चा ले़ए़ होला, तर टाङायोङ्बा याॽमिजि निवाहाङ्मि राज्यबेॽ पे़एम्मा बेॽलो छॽइये!” 26इगो खा खेम्घुबाजिडे़ॽ येसु इडोॽ लुनुङ सिप्सुजि, “मोडोक्होङ असे़ॽ छुट्कारा चुप्हेन्डुए ?” 27येसुडे़ॽ माहाजि लुसुजि, “याॽमिडे़ॽ ले़ःॽहेनिहा योम्बोकसो निवाहाङ्डे़ॽ ले़ःॽहेन्डुहा।”
28मोबा पत्रुसडे़ॽ लुसु, “खाक्से, कानिङ्मि चोप थोक याःॽयानुङ हे़ने़ए़ चोङ्सा लिटिङ्मे़।” 29येसुडे़ॽ माहाजि लुसुजि, “चइबानोॽ के़ॽ हे़निङ लुनिम्ने, निवाहाङ्मि राज्यमि लागि टाङ्बामि पाबा, मामा, वावानिसा, बनिमा, पसाजि याःॽयाघुबा याॽमिडे़ॽ, 30इगो हिङ्मवाबेॽनोॽ बेॽलो आसिस चुप्मिन्डुए, मोबा ए़क्साङ लेङ्इये हिङ्मवाबेॽ सिघे़ॽनिबा हिङ्मवा चुप्मिन्डुए।”
येसुडे़ॽ खो सिमे खा फेरिसो इःबॽआ
(मत्ति २०:१७-१९; मरकुस १०:३२-३४)
31येसुडे़ॽ खोमि बारो चोङ्साजि इक्के़ङ्बेॽ के़ॽखे़ॽनुङ लुसुजि, “खेप्सानुमे, कानिङ यरुसलेम खे़ॽमे़ॽनिङ्सिन्डिङ्मा। अगमबक्ताजिडे़ॽ याॽमिमि पसामि टुम्बेॽ साप्पॽआ चोप खा पुरा लिहा। 32खो अयहुदिजिमि हुकपेॽ जिम्मा पिन्डुजे, माहाजिडे़ॽ खो सिःक्चोन्डुजे, बेजेत ले़न्डुजे, चेन्डुजे, 33माहाजिडे़ॽ खो कोरराडे़ॽ मोइन्डुजे, मोबा सेॽनेन्डुजे। तर खो सुम याक एक्साङ हिङ्बोक्इये।” 34तर येसुडे़ॽ इमाङ लुबॽआ लुनुङ चोङ्साजिडे़ॽ मे़लेहेसुजि। इन्ढोङ्होङ इगो खाडे़ॽ लुमायोक्पॽआ खा माहाजिबाङ चुम्बॽआ ले़टा।
ङक्चाघुबा मिक ए़ॽपुक्पॽआ
(मत्ति २०:२९-३४; मरकुस १०:४६-५२)
35येसु यरिहो सहरबेॽ रुक्सिॽपोरोक्माबेॽ इक्को मिक मे़ए़ॽखुबा ङक्चाघु याॽमि राम के़क्पेॽ पेन्नुङ ङाःक्चामे़ॽनिङ्सिडा। 36मो रामबाङ बेॽलो याॽमिजि खे़ॽमे़ॽनिङ्सिबॽआ खोसे़ॽ लेडोक्नुङ मोसे़ॽ याॽमिजि सिप्सुजि, “इगोबेॽ इमाङ लिमे़ॽनिङ्सिये ?” 37याॽमिजिडे़ॽ खो लुबेॽटुजि, “नासरतबेॽए येसु इगो रामबाङ खे़ॽमे़ॽनिङ्सिये।” 38इगो खा खेम्नुङ मो मिक मे़ए़ॽखुबा वोसाङ कासा, “हे येसु दाउदमि पसा, का नम्नावा ले़ःॽमे!” 39मोडोक्पेॽ पोम्बेॽ खे़ॽखुबाजिडे़ॽ खो ए़क्काने लुनुङ वोबुजि। तर खो छना बेॽए सेम्लाडे़ॽ कासा, “हे दाउदमि पसा येसु, का नम्नावा ले़ःॽमा!” 40इडोॽ येसुडे़ॽ राम्मरोनोॽ येःप्नुङ लुसु, “आक्को याॽमि इगोबेॽ चिॽआप्टानुमे!” मो मिक मे़ए़ॽखुबा ङक्चाघुबा याॽमि के़क्पेॽ लेस्सा, मोबा येसुडे़ॽ सिप्सु, 41“के़ॽ हे़ने़ए़ लागि इमाङ ले़ःॽपेॽमे़ ?” “परभु, के़ए़ मिगे़ॽ खाङ्डोक्हेसुरो!” लुसाङ मोसे़ॽ बिन्ति ले़टु। 42येसुडे़ॽ खो लुसु, “हे़ने़ए़ बिस्वासडे़ॽ हागो हे़ने़ॽ खाङ्डोक्हेन्डुए।” 43मोडोक्पेॽनोॽ मिक नुघे़ॽनुङ खोसे़ॽ खाङ्हेसु मोबा निवाहाङ्मि ओहाङ ले़ःॽसाङ येसुनुङ राप्सा। इघा खा खाङ्नुङ हाइखा याॽमिजिडे़ॽसो निवाहाङ्मि ओहाङ ले़टुजि।
Currently Selected:
लुका 18: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
