लुका 20
20
येसुमि अधिकार
(मत्ति २१:२३-२७; मरकुस ११:२७-३३)
1इक्याक येसु मन्दिरमि सोक्लुङ्बेॽ सिक्छे इःॽसाङ्नुङ सुसमाचार खेम्मेॽमे़ॽनिङ्सिडा। मोडोक्पेॽ एप्पा याडाङ्बाजि, धारमिक खा इःॽखुबाजिनुङ हाइखा बेॽहा याॽमिजि मोत्ता ले़ःॽनुङ येसुबेॽ लेस्सामि। 2माहाजिडे़ॽ येसु लुसुजि, “कानिङ लुबेॽमा, हे़ने़ॽ हाम्बाङ अधिकार चुप्नुङ इघा योम्बोक ले़न्डुए ? इगो अधिकार असाबाङ चुप्टुए ?”
3येसुडे़ॽ माहाजि लुसुजि, “के़ॽसो हे़निङ इक्को खा सिम्इनिम्ने़। 4का लुमाजे, युहन्नाडे़ॽ बप्तिस्मा पिमे अधिकार असाबाङ चुप्टुए निवाहाङ्बाङ्डे याॽमिबाङ ?” 5इगो खेम्नुङ माहाजि इडोॽ इःघुसे़ॽचुसामि, “हागो कानिङे़ॽ इमाङ इःमे ? निवाहाङ्बाङ लुमाहोङ ‘इन्ढोङ हे़निङे़ॽ बिस्वास मे़ले़टानुमे लुये ?’ 6याॽमिबाङ लुमाहोङ इगोबेॽ सुम्बॽआ याॽमिजिडे़ॽ कानिङ रुङ्गोॽवाडे़ॽ ए़ःॽनेम्मे इन्ढोङ्होङ इघाजिडे़ॽ युहन्ना अगमबक्ता मिॽइन्डुजे।” 7मोडोगे़ॽ माहाजिडे़ॽ येसु लुसुजि, “लेहाडे, मो अधिकार हाम्बाङ चुप्टुए कानिङे़ॽ लेसुङ्मानि।” 8मोबाङ येसुडे़ॽ माहाजि लुसुजि, “मोडोक्होङ के़ॽसो हाम्बाङ इगो अधिकार चुप्नुङ इघा चोप योम्बोक ले़ःॽमे़ॽनिङ्सिनुङे हे़निङ्सो लुनिम्नानि।”
अङ्गुरमि सोङ्राबेॽ योम्बोक ले़ःॽखुबाजि
(मत्ति २१:३३-४६; मरकुस १२:१-१२)
9मोबा येसुडे़ॽ याॽमिजि इक्को खानवाबाङ लुसुजि, “इक्को याॽमिडे़ॽ सोङ्राबेॽ अङ्गुरमि खेति टिसु मोबा ए़क्साङ याॽमिजि अधियाबेॽ पिआनुङ खो चाहिँ बेॽलो याक परदेस खे़ॽनुङ पेना। 10अङ्गुर टुम्येम्बाङ टाङ्बामि बन्डो लासिॽ सोङ्राबेॽ खोमि इक्को सेउते पाक्सु। तर मोहिजिडे़ॽ सेउते इमाङ्सो मे़म्पिरेॽ मोःक्हाक्सुजि। 11फेरि मो सोङ्रादाङ्बे़ॽ हाइके सेउते पाक्सु। मोसो माहाजिडे़ॽ इमाङ्सो मे़म्पिरेॽ मोःक्नुङ बेजेत ले़ःॽनुङ होप्रे़ॽवा पाक्सुजि। 12मोबा ए़क्साङ हाइको सेउतेसो पाक्सु। तर माहाजिडे़ॽ मोसो सिघे़ॽलो रोम्नुङ सोङ्राबाङ पाखे़ॽयु राप्पेसुजि।
13 “मोबा अङ्गुरमि सोङ्रादाङ्बे़ॽ निवाबेॽ मिडु, ‘हागो के़ॽ इमाङ ले़ःॽमे ? के़ए़ इक्कोमा पसा पाङ्इनुङे। के़ए़ पसागो माहाजिडे़ॽ नुरोॽ ले़न्डुजेन्डे।’ 14तर माहाजिडे़ॽ सोङ्रादाङ्बामि पसा लुनुङ लेडोक्मासोरोॽ ‘इडोॽ कासाङ मोत्ता इःबुगामि, लो आबानिङे आक्कोगो सोङ्रादाङ्बामि पसा ले़ए़ आक्को सेॽनेनुङ मोमि चोप याङ्सरावा कानिङ्मि टोङ्मा।’ 15मोबाङ माहाजिडे़ॽ खो सोङ्राबाङ पाखाबेॽ चोक्खे़ॽनुङ सेॽनेसुजि।” “हागो सोङ्रादाङ्बाडे़ॽ माहाजि इमाङ ले़न्डुजे ? 16सोङ्रादाङ्बा लेन्नुङ माहा चोप मङे़हा मोहिजि सेॽनेनुङ खोमि सोङ्रा हाइखा याॽमिजिनोॽ अधिया पिन्डुजे!” इगो खानवा खेम्नुङ लुसुजि, “इडोक्को इन्डोक्पेॽसो मे़लिरो।”
17मोबाङ येसुडे़ॽ माहाजि खाङ्साङ लुसुजि, “धारमिक नेॽचिराबेॽ इडोॽ साप्पॽआ ले़हा, खिम टोङ्घुबाजिडे़ॽ हाम्बे रुङ्गोॽवा फे़न्निबा लुसुजि, मोनोॽ सुर युङ्ढाम रुङ्गोॽवा लिसा#भजनसङ्ग्रह ११८:२२।
18 “मो रुङ्गोॽवाबेॽ चेप्खुबाजि चोप पिजिक्टोॽ खे़ॽए़म्मे, मोबा मो रुङ्गोॽवा इमाङ्सोक्पेॽ हेॽएये, मोसो पिजिक्टोॽ खे़ये।” 19मोबा यहुदि धारमिक नियम इःक्खुबाजिनुङ एप्पा याडाङ्बाजिडे़ॽ इगो खा कानिङ्मि टुम्बेॽनोॽ लुबॽआ लुनुङ माहाजिडे़ॽ लेबॽआसे़ॽ येसु राःप्मा योगुजि, तर याॽमिजिनुङ किस्सिडामि।
सारकार मे़क्चेन फोङ्मे टुम्बेॽ खा
(मत्ति २२:१५-२२; मरकुस १२:१३-१७)
20मोडोगे़ॽ माहाजिडे़ॽ येसु खुस्रिङ राःप्मामि सुक्पुगुजि। माहाजिडे़ॽ येसु राःप्नुङ रोमि एप्पा मायोङ्बामि हुक्पेॽ पिमा मिॽटुजे। येसुमि पोम्बेॽ नुबा रे़ङ्नुङ खोसे़ॽ इःबॽआ खाबाङ रेम्मामि माहाजिडे़ॽ टाङ्बामि याॽमिजि पाक्सुजि। 21खा रेम्घुबाजि येसुबेॽ खे़ॽनुङ सिप्सुजि, “हे गुरुज्यु, कानिङे़ॽ लेन्डुङ्मा, हे़ने़ॽ नुबा खा इःॽये। हे़ने़ॽ याॽमि खाङ्नुङ खा इःसुनिहा, चइबानोॽ हे़ने़ॽ निवाहाङ्मि राम नुरोॽ इःॽये। 22रोमि हाङ्बा मे़क्चेन फोङ्मा खे़येन्डे फोङ्मा पाप्निबा ?” 23तर माहाजिमि निवामि खा लेडोक्नुङ येसुडे़ॽ लुसुजि, 24“खोइ खोइ इक्को मुन्डा खाङ्मुघाक्सानुमे, आक्को मुन्डाबेॽ असामि निङ साप्पॽआ ले़ये ?” माहाजिडे़ॽ लुसुजि, “इगोबेॽको रोमि हाङ्बामि निङ साप्पॽआ ले़ये!” 25मोबा येसुडे़ॽ लुसुजि, “रोमि हाङ्बामि खोनोॽ पिसानुमे, निवाहाङ्मि निवाहाङ्नोॽ पिसानुमे।” 26माहाजिडे़ॽ येसु याॽमिजिमि रुम्बेॽ इमाङ खाबेॽसो मे़रेम्हेसुजि मोबा येसुमि खा खेम्नुङ खरि मिन्साङ योङ पेनामि।
सिघे़ॽपॽआबाङ हिङ्बोक्मे खा
(मत्ति २२:२३-३३; मरकुस १२:१८-२७)
27इक्को निप्पाङ सदुकिजि येसुमि के़क्पेॽ लेस्सामि। माहाजिडे़ॽ सिघे़ॽपॽआबाङ असासो हिङ्बुक्मिने मिॽटुजे, मोडोगे़ॽ येसु सिप्सुजि 28“हे गुरुज्यु, मोसाडे़ॽ साप्पॽआ नेॽचिराबेॽ इडोॽ साप्पॽआ ले़ये, इक्को याॽमिडे़ॽ फुङ्सया ले़ःॽनुङ खोमि पसा मे़ल्लिरेॽ सिघे़ॽएम्बाङ, खोम्निसे़ॽ वावामि पसा टोङ्बेॽमामि किॽना फुङ्सया ले़ःॽमा खे़ये। 29याक्लो लिबॽआ इक्को खा एच्चि जना सानुङ्उजि टुसामे। माहाजिबेॽ टुम्मिडे़ॽ फुङ्सया ले़टु तर खोमि पसा मे़ल्लिरेॽ सिघडा। 30मोबाङ सरुम्बाडे़ॽ खोम्किॽना फुङ्सया ले़टु, तर खोमिसो पसा मे़ल्लिरेॽ सिघडा। 31मोबाङ याङ्सरुम्बाडे़ॽसो मोडोक्नोॽ ले़टु, इडोक्नोॽ एच्चि जनाडे़ॽ पालो पालो किॽना फुङ्सया ले़टुजि, तर असाबाङ्सो पसा मे़ल्लिरेॽ सिघडामि। 32ए़क्साङ मो मेॽनामिॽसो सिघडा। 33हागो सिघे़ॽपॽआबाङ हिङ्बोक्माबेॽ मो मेॽनामिॽ हाम्बेम्मि बनिमा लिये ? इन्ढोङ्होङ खोगो चोप सानुङ्उजिडे़ॽ फुङ्सया ले़ःॽपॽआ ले़टे़।”
34येसुडे़ॽ माहाजि लुसुजि, “इगो मक्खाम्डेमबेॽ टुघुबाजिरेॽनोॽ फुङ्सया ले़म्मे मोबा हाइखाजिसो फुङ्सया ले़पेन्डुजे। 35तर सिघे़ॽपॽआबाङ हिङ्बोक्नुङ थाङ्सिरिॽटु खे़ॽमारोहा याॽमिजि फुङ्सया ले़ःॽमिने। 36माहाजि थाङ्सिरिदुतडोक्नोॽ लिम्मे मोबाङ फेरि इन्डोक्पेॽसो सिघे़ॽमिने। खोजि निवाहाङ्मि पसाजि लिम्मे इन्ढोङ्होङ माहाजि सिघे़ॽपॽआबाङ हिङ्रिक लिम्मे। 37सिघे़ॽपॽआबाङ हिङ्मे खा चाइबानोक्मा खा ले़ये लुनुङ मोसाडे़ॽ मि हाङ्मे़ॽनिङ्सिबॽआ पोथ्रामि खानवामि खा साप्माबेॽ लुटुए। मोबेॽ ‘परमपरभु निवाहाङ चाहिँ अब्राहाम, इसहाकनुङ याकुबमि निवाहाङ’#परस्थान ३:६ लुबॽआ ले़ये। 38निवाहाङ चाहिँ सिबॽआजिमि ने़ॽनि हिङ्रिकजिमि निवाहाङ ले़ये, इन्ढोङ्होङ चोपजि खोमि लागिनोॽ हिङ्रिक लिम्मे।” 39मोबाङ यहुदि धारमिक नियम इःॽखुबाजिडे़ॽ लुसुजि, “गुरुज्यु हे़ने़ॽ नुरोक्नोॽ लुसु।” 40मोबा ए़क्साङ आसे़ॽसो खो इमाङ खासो मे़सिम्हेसुजि।
खिरिस्ट असामि पसा
(मत्ति २२:४१-४६; मरकुस १२:३५-३७)
41येसुडे़ॽ माहाजि सिप्सुजि, “खिरिस्ट इन्डोक्टे दाउदमि पसा लिसे़ ? 42-43दाउदडे़ॽ साप्पॽआ भजनसङ्ग्रहबेॽ खोमदाङ्बे़ॽ इडोॽ लुटुए
‘परमपरभुडे़ॽ के़ए़ परभु लुसु, के़ॽ हे़ने़हा सतुरजि हे़ने़ए़ सराङफे़क्मा होङ्बेॽ मे़युङ्रेॽलो हे़न के़ए़ चुप्थिङ्लाम पेने।’ #
भजनसङ्ग्रह ११०:१
44 “दाउद हाङ्बाडे़ॽनोॽ ‘परभु’ लुन्डुएहोङ इन्डोक्टे खिरिस्ट दाउदमि पसा लिसे़ ?”
यहुदि धारमिक नियम इःॽखुजिबाङ होसियार लिमे
(मत्ति २३:१-३६; मरकुस १२:३८-४०)
45चोप याॽमिजिडे़ॽ खा खेम्मे़ॽनिङ्सिमाबेॽनोॽ येसुडे़ॽ खोमि चोङ्साजि लुसुजि, 46“इघा यहुदि धारमिक खा इःॽखुबाजिबाङ होसियार ले़टानिङे। अक्खाजिगो खाङ्माबेॽ नुबा चे़ॽ चाङ्मानुङ वाइडुमा मिङ्इम्मे। हाटाराजि याॽमिजिडेॽ सेवा मुनुङ खोजि आदर ले़ःॽपॽआ नेन्जोन्डुजे। मोबा यहुदिजि सुम्ढाम खिमनुङ भत्तेरबेॽ बेॽए आदरनुङ्हा पेन्ढाम योॽइम्मे। 47अक्खाजिडे़ॽ राङ्मिॽमाजि चोप्नुङ खोजिमि चोप याङ्सरावा ङाप्मिन्डुजे। याॽमिजिमि पोम्बेॽ धरमि खाङ्मुमामि बेॽए सेम्ले़ॽ पारथना ले़म्मे। इघाजिडे़ॽनोॽ हाइखाजिबाङ्सो बेॽलो दन्डा चुप्मिन्डुजे।”
Currently Selected:
लुका 20: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
