युहन्ना 8
8
बेभिचारि मेॽनामिॽमि उद्धार लिबॽआ
1येसु जैतुन टोक्टोक्मे़ॽटु खडा। 2वागियाराम माक्मिसेल्लाम येसु मन्दिरबेॽ टेघडा। बेॽलो याॽमिजि येसु टुढामबेॽ किॽयु मिॽयु सुम्नुङ पेनामि, मोबा येसुडे़ॽ माहा याॽमिजि सिक्छे पिबोगुजि। 3यहुदि धारमिक नियम इःॽखुबाजिनुङ फरिसिजिडे़ॽ बेभिचार ले़ःॽखुबा मेॽनामिॽ राःप्चे़ॽनुङ याॽमिजिमि रुम्बेॽ येःप्मेॽटुजि। माहाजिडे़ॽ खो बेभिचार ले़ःॽमे़ॽनिङ्सिबॽआ चुप्नुङ राःप्पॽआ ले़टे़। 4मोबा माहाजिडे़ॽ येसु लुसुजि, “गुरु, इगो मेॽनामिॽ बेभिचार ले़ःॽठाम ठाउँबेॽ चुप्नुङ कानिङे़ॽ राःप्चे़टुङ्मे। 5मोसामि नियमबेॽ इडोक्हाजिगो रुङ्गोॽवाडे़ॽ फे़ङ्नेमा खे़ये लुबॽआ ले़ये। हे़ने़ॽ चाहिँ इमाङ लुन्डुए ?”
6माहाजिडे़ॽ येसुमि जाँच ले़ःॽमामि खोसोक्पेॽ ने़ॽनिहा आप्टिक टिडोक्इएन्डे मिॽनुङ इडोॽ लुबॽआ ले़टा। तर येसु उःक्युनुङ हुक्खे़ॽवासिडे़ॽ भुइबेॽ साबु। 7तर माहा याॽमिजिडे़ॽ खो सिम्डुङ्घे़ॽटुजि, मोबा येसुडे़ॽ माहाजि खाङ्साङ लुसुजि, “हे़निङ्बेॽ असा पाप मे़ले़ःॽखु टुये मोसे़ॽ याक्लो आक्को मेॽनामिॽ रुङ्गोॽवाडे़ॽ फे़क्सुरो।” 8मोबा फेरि येसु भुइबेॽ उःक्युनुङ साप्पोगु। 9तर माहाजिडे़ॽ इडोक्मा खा खेम्नुङ याक्लो बेॽहाजि खडामि, मोबाङ ए़डे़ॽहाजिसो इक्को इक्को ले़ःॽसाङ चोप खे़ॽपेसामि। येसुनुङ मो मेॽनामिॽरेॽनोॽ मोबेॽ याःॽयोसुजि, मोबा मो मेॽनामिॽ चाहिँ येसुमि पोम्बेॽ येःप्सिडा। 10येसु पुकडा मोबा मो मेॽनामिॽ लुसु, “खोइ माहाजि हाम्बेॽ खडामे ? माहाजि असे़ॽसो हे़न दन्डा मे़म्पिसामे ?”
11मो मेॽनामिॽडे़ॽ लुसु, “परभु, असे़ॽसो दन्डा मे़म्पिसामि।”
मोबा येसुडे़ॽ लुसु, “के़ॽसो हे़न दन्डा पिनानि, खडे हागोएम्बाङ फेरि पाप ए़ले़टे।”#युहन्ना ७:५३–८:११ ]
येसु मक्खाम्डेममि जोति
12मोबा येसुडे़ॽ फेरि माहाजि इःॽसाङ लुसुजि, “का मक्खाम्डेममि जोति ले़ङे, कानुङ राम्खुबा सेन्जुगुप्पेॽ सिॽनिबा, तर मोसे़ॽ हिङ्मवामि जोति चुप्मिन्डुए।”
13इगो खा खेम्नुङ, फरिसिजिडे़ॽ येसु लुसुजि, “हे़ने़ॽ आम्मि टुम्बेॽहा गबाहि पिमे़ॽनिङ्सिन्डुये, हे़ने़हा गबाहि चाइबमा ले़ःॽनिबा।”
14मोडोगे़ॽ येसुडे़ॽ माहाजि लुसुजि, “के़ॽ काङ्मि टुम्बेॽ गबाहि काङ्दाङ्बा पिनुङे़ तरसो काङ्मि गबाहि चाइबमा ले़ये। इन्ढोङ्होङ का हाम्बाङ लेङ्इटिङे मोबा का हाम्बेॽ खे़ॽमे़ॽनिङ्सिङे लुनुङ, के़ॽ नुरोॽ लेनुङे़ तर इगो खा हे़निङे़ॽ लेसानुम्नि। 15हे़निङे़ॽ याॽमिजिडे़ॽ ले़टिडोॽ न्याय ले़न्डानुम, तर के़ॽ असासो न्याय ले़टुङ्नि। 16तर के़ॽ ले़ःॽपॽआ न्याय चाइबमा लिये, इन्ढोङ्होङ न्याय ले़ःॽखुबा काङ्दाङ्बा टुङानि, का पाङ्घुबा निवाहाङ पाबा कानुङ सोरि टुये। 17मोसाडे़ॽ पिबॽआ हे़निङ्मि यहुदि धारमिक नियमबेॽ इडोॽ साप्पॽआ ले़ये, ‘निप्पाङ याॽमिडे़ॽ पिबॽआ गबाहि चाइबमा लिहा#यहुदि धारमिक नियम १९:१५ ।’ 18टाङ्बामि टुम्बेॽ के़ॽ काङ्दाङ्बे़ॽ गबाहि पिनुङे़, मोबा का पाङ्घुबा पाबाडे़ॽ काङ्मि टुम्बेॽ गबाहि पिये।”
19माहाजिडे़ॽ येसु सिप्सुजि, “हे़ने़ए़ पाबा हाम्बेॽ टुये ?”
येसुडे़ॽ लुसुजि, “हे़निङे़ॽ ना का लेन्डानिङे ना काङ्मि पाबा लेन्डानुमे। हे़निङे़ॽ का लेसानिङ्होङ काङ्मि पाबासो लेसानुम होला।”
20इघा खा येसुडे़ॽ मन्दिरमि भेटि चेॽटिढाम ढुकुटिमि के़क्पेॽ येःप्नुङ लुबॽआ ले़टे़। तर असे़ॽसो खो मे़राबुजि, इन्ढोङ्होङ खोमि बेला हागोसो मे़लेम्बॽआ ले़टा।
का असा ले़ङे, मोनोॽ ले़ङे
21खोसे़ॽ फेरि माहा फरिसिजि लुसुजि, “का खे़ॽपेङे। हे़निङे़ॽ योॽइन्डानिङे, तर हे़निङ टाङ्बामि पापबेॽ सिघे़न्डानिङे। इन्ढोङ्होङ का खे़ॽसिॽपोरोक्पॽआ ठाउँबेॽ हे़निङ लेङ्हेसानिङ्नि।”
22माहा यहुदि डायोङ्बाजिडे़ॽ लुसुजि, “इगोगो खोमटाङ्बा सिघे़ये चारा ? इन्ढोङ्होङ इगोसे़ॽको खो खे़ॽसिॽपोरोक्पॽआ ठाउँबेॽ कानिङ लेङ्हेसानिङ्ने लुउ।”
23येसुडे़ॽ माहाजि लुसुजि, “हे़निङ मिम्मुहाजि, तर का चाहिँ मिन्डुए, हे़निङ इगो मक्खाम्डेमबेॽहाजि, तर का चाहिँ इगोबेॽए ने़ॽनि। 24के़ॽ हे़निङ लुनिम्ने़, ‘हे़निङ टाङ्बामि पापबेॽ सिघे़न्डानिङे’, इन्ढोङ्होङ का असा ले़ङे, मोनोॽ लुनुङ बिस्वास मे़ले़टानुमहोङ हे़निङ्मि पापबेॽ सिघे़न्डानिङे।” 25माहाजिडे़ॽ येसु सिप्सुजि, “हे़न असाडे ?” येसुडे़ॽ माहाजि लुसुजि, “का मोनोॽ ले़ङे, मो खा याक्लोएम्बाङ के़ॽ हे़निङ लुमे़ॽनिङ्सिनिम्ने़। 26के़ॽ हे़निङ्मि टुम्बेॽ लुमाहा खानुङ न्याय ले़ःॽमे खागो बेॽलोनोॽ टुहा, तर का पाङ्घुबा चइबामा ले़ये, खोसे़ॽ इमाङ लुटे़ मो खानोॽ के़ॽ खेम्नुङ मक्खाम्डेमबेॽहा याॽमिजि इःबेनुङ्हाजि।”
27येसुडे़ॽ निवाहाङ पाबामि टुम्बेॽ लुबॽआ लुनुङ माहाजिडे़ॽ मे़लेसुजि। 28मोडोगे़ॽ येसुडे़ॽ लुसु, “इन्डोक्पेॽ हे़निङे़ॽ याॽमिमि पसा मिन्डु काप्सिङ्बेॽ ठेॽपोॽइन्डानुमे का असा ले़ङे, लुनुङ हे़निङे़ॽ लेन्डानुमे। के़ॽ काङ्मि अधिकारडे़ॽ इमाङ्सो ले़टुङ्नि, तर पाबाडे़ॽ इःॽपॽआ खारेॽ इःनुङ्हा लुनुङ लेन्डानुमे। 29का पाङ्घुबा सानिङ कानुङ टुये, खोसे़ॽ का काङ्दाङ्बा याःॽयाङानि, इन्ढोङ्होङ के़ॽ खो साप्थाङ्मे योम्बोकरेॽ सानिङ ले़नुङे।” 30येसुडे़ॽ इघा खा इःमाबेॽनोॽ बेॽलो याॽमिजिडे़ॽ खोबेॽ बिस्वास ले़टुजि।
अब्राहाममि पसाजि
31येसुडे़ॽ खोबेॽ बिस्वास ले़ःॽखुबा यहुदिजि लुसुजि, “हे़निङ के़ए़ बचनडे़ॽ लुबॽआडोॽ ले़टानुमहोङ, हे़निङ चइबानोॽ के़ए़ चोङ्सा ले़न्डानिङे। 32मोबा हे़निङे़ॽ चाइबमा इमाङ्डे लुनुङ लेन्डानुमेनुङ मो चाइबमा खाडे़ॽनोॽ हे़निङ छुट्कारा पिये।”
33माहाजिडे़ॽ खो लुसुजि, “कानिङ्गो अब्राहाममि पसा ले़न्डिङ्मा, आयुरो असामिसो सेउते मे़लिडिटिङ्मा। मोबा ‘इगो चाइबमा खाडे़ॽ हे़निङ छुट्कारा पिन्डानिङे’ लुबॽआ चाहिँ इमाङ्डे ?”
34येसुडे़ॽ माहाजि लुसुजि, “चइबानोॽ, के़ॽ हे़निङ लुनिम्ने़, पाप ले़ःॽखुबा चोप याॽमि पापमि सेउते लिये। 35सेउते सानिङ खिमबेॽ पेन्निबा, तर पसा चाहिँ सानिङ खिमबेॽ पेङ्इये। 36मोडोगे़ॽ पसाडे़ॽ हे़निङ छुट्कारा पिहोङ हे़निङ चइबानोॽ छुट्कारा लिन्डानिङे। 37हे़निङ अब्राहाममि पसाजि ले़न्डानिङे लुनुङ के़ॽ लेनुङे़, मोडोक्सो के़ए़ बचन हे़निङे़ॽ मे़नेन्जानुङ का सेॽमा योॽइन्डानुमे। 38इमाङ इमाङ के़ॽ काङ्मि पाबानुङ टुमाबेॽ खाङ्इटुङे, मोनोॽ के़ॽ लुनुङे। हे़निङे़ॽसो इमाङ हे़निङ्मि पाबाबाङ खेम्इटानुमे, मोनोॽ ले़न्डानुमे।”
39मोबा माहाजिडे़ॽ येसु लुसुजि, “कानिङ्मि पाबागो अब्राहामनोॽ ले़ये।”
येसुडे़ॽ माहाजि लुसुजि, “हे़निङ अब्राहाममि पसा ले़टानिङ्होङ्गो, अब्राहामडे़ॽ ले़टिडोक्नोॽ ले़टानुम। 40के़ॽ निवाहाङ्बाङ्नोॽ खेम्बॽआ चाइबमा खा हे़निङ लुमाबेॽ, हे़निङे़ॽ का सेॽनेमा योॽइन्डानुमे। अब्राहामडे़ॽको इडोक्मा योम्बोक मे़ले़टु। 41हे़निङ्मि पाबाडे़ॽ इमा ले़टु हे़निङे़ॽ मोडोक्नोॽ ले़न्डानुमे।”
माहाजिडे़ॽ येसु लुसुजि, “कानिङ बेभिचारबाङ टोक्पॽआ ने़ॽनिबा। कानिङ्मि पाबा इक्कोनोॽ टुये, खो निवाहाङ ले़ये।”
42येसुडे़ॽ माहाजि लुसुजि, “निवाहाङ हे़निङ्मि पाबा ले़टाहोङ्गो हे़निङे़ॽ का नम्नम ले़टानिङ होला, इन्ढोङ्होङ का निवाहाङ्बाङ लेङ्इटिङे। का काङ्दाङ्बा लेम्बॽआ ने़ॽनि, निवाहाङ्डे़ॽ का पाङ्इटिङे। 43के़ॽ लुबॽआ खा हे़निङे़ॽ इन्ढोङ लेसानुम्ने ? इन्ढोङ्होङ हे़निङे़ॽ के़ए़ बचन खेम्हेसानुम्नि। 44हे़निङ्मि पाबा सैतान ले़येनुङ हे़निङ्मि पाबाडे़ॽ ले़ःॽमा मिॽटिडोक्नोॽ हे़निङे़ॽ सानिङ ले़न्डानुमे। मोगो याक्लोएम्बाङ्नोॽ याॽमि सेक्खुबा ले़टे़, खोसे़ॽ चाइबमा खामि ले़ख्खो ले़टुनिबा इन्ढोङ्होङ खो रेम्डेॽखुबा ले़ये। खोबेॽ मङे़हा निवा टुये मोबा मोडोक्नोॽ यामुये इन्ढोङ्होङ खो रेम्सिङ्मि पाबा ले़ये। 45का चाइबमा खा यामुङे़, तर हे़निङे़ॽ का बिस्वास ले़टानिङ्नि। 46हे़निङ असे़ॽ का पापमि आप्टिक टिहेन्डानुमे ? मोबा के़ॽ चाइबमा खा इःमाबेॽसो इन्ढोङ हे़निङे़ॽ काबेॽ बिस्वास ले़टानुम्ने ? 47निवाहाङ्मि पसाजिडे़ॽको निवाहाङ्मिन्नोॽ खा खेम्इन्डुजे, तर हे़निङ निवाहाङ्मि पसाजि ने़ॽनि मोडोगे़ॽ खोमि खा खेप्सानुम्ने।”
अब्राहामबाङ्सो येसु महान
48यहुदिजिडे़ॽ येसु लुसुजि, “कानिङ्मि खा चाइबमा ले़ये, हे़न सामरि ले़ये, हे़न मङे़ॽमा चाबे़ॽ राःप्मिटे़।”
49येसुडे़ॽ माहा यहुदिजि लुसुजि, “का मङे़ॽमा चाबे़ॽ मे़राःप्टिॽ, के़ॽ पाबामि आदर ले़नुङे, तर हे़निङे़ॽ चाहिँ का आदर ले़टानिङ्ने। 50के़ॽ काङ्मि महिमा योगुङ्निबा, तर काङ्मि महिमा ले़ःॽमा योक्खुबा इक्को टुये खोसे़ॽ न्यायसो ले़न्डुए। 51चइबानोॽ के़ॽ हे़निङ लुनिम्ने, काङ्मि बचन खेम्नुङ पालना ले़ःॽखुबे़ॽ इन्डोक्पेॽसो सिमा पाप्निबा।”
52यहुदिजिडे़ॽ येसु लुसुजि, “चइबानोॽ हे़न मङे़ॽमा चाबे़ॽ राःप्मिटे़ ले़ः। अब्राहाम सिघडा, अगमबक्ताजिसो सिघडामि, तर हे़ने़ॽ चाहिँ लुये ‘असे़ॽ काङ्मि बचन पालना ले़न्डु मो सिनिबा।’ 53इमा कानिङ्मि टुबा अब्राहामबाङ्सो हे़न बेॽए ले़ये ? खो सिघडा, मोबा अगमबक्ताजिसो सिघडामि। हे़ने़ॽ चाहिँ आमटाङ्बा असा ले़ङे लुनुङ मिॽइन्डुए ?”
54येसुडे़ॽ माहाजि लुसुजि, “के़ॽ काङ्मि महिमा ले़टुङ्होङ मो इनामा लिये। का महिमा पिघुबा काङ्मि पाबा टुये, खो हे़निङे़ॽ ‘कानिङ्मि निवाहाङ’ लुन्डानुमे। 55हे़निङे़ॽ खो लेसानुम्नि, के़ॽ चाहिँ खो नुरोॽ लेनुङे़, के़ॽ खो लेसुङ्नि लुमाहोङ कासो हे़निङ्डोक्नोॽ रेम्सिङ लिङे। तर के़ॽ खो नुरोॽ लेनुङे़ मोबा खोसे़ॽ लुडिडोॽ ले़नुङे़। 56हे़निङ्मि पाबा अब्राहाम का लेङ्इङे याक खाङ्मामि सारो मिॽटुये, मो याक खाङ्नुङ खो सारोनोॽ साप्थाक्सा।”
57मोडोगे़ॽ यहुदिजिडे़ॽ खो लुसुजि, “हे़न आयु पचास निङ्सो मे़रुक्टिटु, हे़ने़ॽ इन्डोक्पेॽटे अब्राहाम खाक्सुए ?”
58येसुडे़ॽ माहाजि लुसुजि, “चइबानोॽ के़ॽ हे़निङ लुनिम्ने, अब्राहाम टोक्मा याक्लोबाङ का टुसिङे।”
59मोबा माहाजिडे़ॽ येसु रुङ्गोॽवाडे़ॽ फे़ङ्नेमा योगुजि, तर येसु खुस्रिङ्मु मन्दिरबाङ खे़ॽपेसा।
Currently Selected:
युहन्ना 8: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
