युहन्ना 9
9
टोक्पॽआबाङ्नोॽ मिक मे़ए़ॽखुबा याॽमि नुबुक्पॽआ
1इक्याक येसु खे़ॽमे़ॽनिङ्सिमाबेॽ खोसे़ॽ मिक मे़ए़ॽखुबा इक्को याॽमि खाङ्डोक्टु। मो याॽमि टोक्माबेॽनोॽ मिक मे़ए़डे़। 2मोबा खोमि चोङ्साजिडे़ॽ खो सिप्सुजि, “गुरु, इगो याॽमिडे़ॽटे खोमि पाबा मामाडे़ॽ पाप ले़ःॽपॽआसे़ॽ खो मिक मे़ए़खुबा टोगे़ ?”
3येसुडे़ॽ खोजि लुसुजि, “इगोसे़ॽ पाप ले़ःॽपॽसे़ॽसो ने़ॽनि, खोमि पाबा मामे़ॽ पाप ले़ःॽपॽआसे़ॽसो ने़ॽनि इगो इडोॽ लिबॽआ, तर इगो याॽमिमि हिङ्मवाबेॽ निवाहाङ्मि योम्बोक खाङ्मुरो लुनुङ इडोॽ लिबॽआ ले़ये। 4का पाङ्घुबामि योम्बोक लेन्डानोॽ ले़ःॽयाक्मा खे़ये। सेन्डा लिघे़ॽयेम्बाङ असे़ॽसो मो योम्बोक ले़ःॽहेसुजिनि। 5का मक्खाम्डेमबेॽ टुङारो कानोॽ मक्खाम्डेममि जोति ले़ङे़।”
6इगो खा इःसेॽनुङ येसुडे़ॽ भुइबेॽ चेःडु मोबा आक्खामा नाक्नुङ मो याॽमिमि मिकपेॽ टिबेॽटु। 7मोबा येसुडे़ॽ मो याॽमि लुसु, “खडे सिलोआममि टोम्लिॽवाबेॽ खे़ॽनुङ हे़ने़ए़ नजिक वासोगे।” (सिलोआम लुबॽआ पाङ्बॽआ ले़ये।) मो याॽमि खे़ॽनुङ मोबेॽ वासोगु मोबा खो मिक ए़ःॽखुबा लिनुङ टेआबा।
8मोबा ए़क्साङ खोमि पेन्लागामजिनुङ याक्लो खो खाङ्घुबाजि खोजिदाङ्बा कासामि “राम्बेॽ ङाःक्चाघुबा याॽमि इगोनोॽ ने़ॽने ?” 9इन्डोक याॽमिजिडे़ॽ लुसुजि, “इगो मोनोॽ ले़ये।” मोबा आढाजिडे़ॽ लुसुजि, “ने़ॽनि, इगो मोडोक्मानोॽ खाङ्मुउ।”
तर नुबोक्पॽआ याॽमिडे़ॽ माहाजि लुसुजि, “का मो याॽमिनोॽ ले़ङे़।”
10मोबा माहाजिडे़ॽ खो सिप्सुजि, “हे़ने़ए़ मिक इन्डोक्टे खाङ्मे लिसे़ ?”
11मोसे़ॽ लुसु, “येसु निङ ले़ःॽखुबा याॽमिडे़ॽ आक्खामा नाक्नुङ काङ्मि मिकपेॽ टिबेॽनुङ लुसिङा, ‘सिलोआमबेॽ खे़ॽनुङ वसोगे।’ के़ॽ मोडोक्नोॽ ले़टुङ मोबा के़ए़ मिक ए़ॽपोगा।”
12माहाजिडे़ॽ खो सिप्सुजि, “मो याॽमि हाम्बेॽ टुये ?”
खोसे़ॽ लुसु, “के़ॽ लेसुङ्नि।”
13मोबा ए़क्साङ माहाजिडे़ॽ मो मिक नुबोक्पॽआ याॽमि फरिसिजिबेॽ चिॽखे़ॽटुजि। 14येसुडे़ॽ मो याॽमिमि मिक नुबोक्पॽआ याक चाहिँ यहुदिजि नाजामे याक ले़टा। 15फरिसिजिडे़ॽ मो याॽमि सिप्सुजि, “हे़ने़ए़ मिक इन्डोक्टे ए़पुगे़ ?” मोसे़ॽ लुसुजि, “येसु लुमे याॽमिडे़ॽ आक्खामा चोक्नुङ मिकपेॽ टिबेॽटा, के़ॽ वासोगुङ मोबा के़ए़ मिक ए़ॽपोगा।”
16फरिसिजिबेॽ इक्को निप्पाङे़ॽ लुसुजि, “आक्को याॽमि निवाहाङ्बाङ लेम्बॽआ ने़ॽनि, इन्ढोङ्होङ आक्कोसे़ॽ नाजामे याक नेडुनि।” तर आढाजिडे़ॽ लुसुजि, “इन्डोक्टे पापि याॽमिडे़ॽ खरिहा योम्बोक ले़ःॽहेन्डुहा ?” खोजिमि रुम्बेॽ खा मे़न्टोक्सा।
17माहाजिडे़ॽ मो मिक नुबोक्पॽआ याॽमि फेरि इक्खेॽ सिप्सुजि, “खोसे़ॽ हे़ने़ए़ मिक नुबोक्पेॽटा, हागो खोमि टुम्बेॽ हे़ने़ॽ इमाङ लुन्डुए ?”
मोसे़ॽ लुसु, “खो अगमबक्ता ले़ये।”
18यहुदि डायोङ्बाजिडे़ॽ मो याॽमि याक्लो मिक मे़ए़ॽखुबा ले़टे़, मोबा हागो ए़ॽपोइटे़ लुनुङ बिस्वास मे़ले़टुजि। मोडोगे़ॽ खोजिडे़ॽ मो याॽमिमि खोम्बा खोम्मा के़ःॽनुङ इडोॽ सिप्सुजि, 19“इमा इगो हे़निङ्मि पसा ले़ये ? इमा इगो टोक्माबेॽनोॽ मिक मे़ए़डे़ ? मोबा हागो चाहिँ इन्डोक्टे मिक ए़ॽपुगे ?”
20मोमि पाबा मामाजिडे़ॽ माहाजि लुसुजि, “इँहिॽ, इगो कानिङ्मिनोॽ पसा ले़ये, खो टोक्माबेॽनोॽ मिक मे़ए़डे़। 21तर आयु इगो इन्डोक मिक ए़ॽपुगे़नुङ इगोमि मिक असे़ॽ नुबोक्पेॽटुए कानिङे़ॽ लेसुङ्मानि। हागो इगो बेॽए लिघे़टे़, हे़निङे़ॽनोॽ खो सिप्सानुमे, खोमि टुम्बेॽ खोसे़ॽनोॽ लुहेन्डुए।” 22मोमि खोम्बा खोम्मा माहा यहुदिजिनुङ किस्सिबॽआसे़ॽ मोडोॽ लुसुजि। इन्ढोङ्होङ असे़ॽ येसु मुक्ति पिघुबा हाङ्बा खिरिस्ट लुनुङ बिस्वास ले़न्डुजे मो याॽमि यहुदिजि सुम्ढाम खिमबाङ यिक्पेमा खे़ये लुनुङ यहुदिजिडे़ॽ याक्लोनोॽ मोत्ता ले़ःॽपेबॽआ ले़टे़। 23मोडोगे़ॽ मोमि पाबा मामाजिडे़ॽ इडोॽ लुसुजि, “इगोनोॽ खोमटाङ्बामि टुम्बेॽ लुहेघुबा बेॽए लिघे़टे़, खोनोॽ सिप्सानुमे।”
24मोबा माहा फरिसिजिडे़ॽ मो नुबोक्पॽआ याॽमि फेरि लुसुजि, “हे़ने़ॽ चाइबमा खा लुनुङ निवाहाङ्मि ओहाङ ले़टे। कानिङे़ॽ लेन्डुङ्मे़, मो येसु लुमे याॽमि चइबानोॽ पापि ले़ये।”
25मो याॽमिडे़ॽ माहा फरिसिजि लुसुजि, “खो पापि ले़येन्डे ले़ःॽनिबा मोगो के़ॽ लेसुङ्नि, तर के़ॽ इक्को खा चाहिँ लेनुङे़, का याक्लो मिक मे़ए़ॽखुबा ले़टिङे, तर हागो का मिक ए़ङे।”
26माहाजिडे़ॽ खो सिप्सुजि, “मोसे़ॽ हे़न इमाङ ले़टे़ ? खोसे़ॽ हे़ने़ए़ मिक इन्डोक्टे नुबोक्पेॽटे़ ?”
27मो याॽमिडे़ॽ माहाजि लुसुजि, “के़ॽ असिॽनोॽ लुबेनिम्ना, तर हे़निङे़ॽ मे़ङ्खेप्सानुम, हागो फेरि इन्ढोङ सिम्इन्डानिङे ? इमा हे़निङ्सो खोमि चोङ्सा लिमा मिङ्इन्डानिङे ?”
28इगो खा खेम्नुङ फरिसिजिडे़ॽ खो योप्साङ लुसुजि, “हे़नगोरे मोमि चोङ्सा लिटे़, तर कानिङ्गो मोसामि चोङ्साजि ले़न्डिङ्मा। 29कानिङे़ॽ लेन्डुङ्मे़, मोसानुङ निवाहाङ यामुबॽआ ले़टा, तर लेसुङ्मानि इगो याॽमि चाहिँ हाम्बाङ लेङ्इटे़।”
30मो याॽमिडे़ॽ माहा फरिसिजि लुसुजि, “इन्डोक्मा खरिमा खा, काङ्मि मिक खोसे़ॽ नुबोक्पेॽटिङ। खो हाम्बाङ लेस्से़ लुमे खा हे़निङे़ॽ लेसानुम्ने ? 31कानिङे़ॽ लेन्डुङ्मे़, निवाहाङ्डे़ॽ पापिजिमि खा खेप्सुनिबा लुमे खा चोबे़ॽ लेन्डुङ्मे़, तर निवाहाङ आदर ले़ःॽखुबानुङ खोसे़ॽ लुडिडोॽ ले़ःॽखुबामि खा निवाहाङ्डे़ॽ खेम्इन्डुए। 32टोक्माबेॽनोॽ मिक मे़ए़ॽखुबा असे़ॽसो मिक नुबोक्पॽआ खा आयुरो मक्खाम्डेमबेॽ मे़ङ्खेम्डिॽ। 33मो याॽमि निवाहाङ्बाङ लेम्बॽआ मे़ले़टाहोङ खोसे़ॽ इमाङ्सो मे़ले़हेसुए।”
34मोबा माहा फरिसिजिडे़ॽ खो लुसुजि, “हे़न पापबेॽ टोॽइटे़नुङ पापबेॽनोॽ वाबुक्पॽआ याॽमिडे़ॽ कानिङ खा इःॽमा योॽइये ?” लुसाङ माहाजिडे़ॽ खो पाखे़ॽयु यिॽहाक्सुजि।
मिक्सुरुम्बा होङ्निवा
35माहा यहुदिजिडे़ॽ मो याॽमि यहुदिजि सुम्ढाम खिमबाङ यिगुजि लुमे खा येसुडे़ॽ खेप्सु, मोबा खोसे़ॽ मो याॽमि चुप्नुङ सिप्सु, “इमा हे़ने़ॽ याॽमिमि पसाबेॽ बिस्वास ले़न्डुए ?”
36मोसे़ॽ लुसु, “खो असाडे ले़ये का लुबेॽमा, मोबा के़ॽ खोबेॽ बिस्वास ले़नुङे।” 37येसुडे़ॽ मो याॽमि लुसु, “हे़ने़ॽ खो खाङ्इटुए, हे़न खोनुङ्नोॽ यामुमे़ॽनिङ्सिये।”
38मो खेम्नुङ खो येसुमि सराङ्बेॽ उःक्युनुङ सेवा मुसाङ लुसु, “परभु, के़ॽ बिस्वास ले़न्ने।”
39मोबा येसुडे़ॽ लुसु, “मिक मे़ए़ॽखुबा याॽमिजि मिक ए़ॽमिरो, मोबा मिक ए़खुबाजि मे़ए़खुबा लिमिरो लुनुङ का न्यायमि लागि इगो मक्खाम्डेमबेॽ लेङ्इटिङे।”
40इगो खा खेम्नुङ येसुमि के़क्पेॽ टुघुबा फरिसिजिबाङ इक्को निप्पाङ्डे़ॽ येसु लुसुजि, “इमा कानिङ्सो मिक मे़ए़ॽखुबाजि लुनुङ मिॽइये ?”
41येसुडे़ॽ माहाजि लुसुजि, “हे़निङ मिक मे़ए़ॽखुबाजि ले़टानिङ्होङ आप्टिकनुङ्मा मे़लिसानिङ होला, तर हे़निङ्गो ‘कानिङे़ॽ नुरोॽ खाङ्डोहेन्डुङ्मे’ कान्डानिङे, तर इमाङ्सो खाङ्डोक्टानुम्निबा मोडोगे़ॽ हे़निङ आप्टिकनुङ्मानोॽ ले़न्डानिङे।”
Currently Selected:
युहन्ना 9: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
