एप्पा चोङ्सा 5
5
हननियानुङ सफिरा
1तर मोबेॽ हननिया निङ ले़ःॽखुबा याॽमि टुसे़। खोमि सफिरा निङ ले़ःॽखुबा बनिमा टुसे़। खोजिडे़ॽसो ए़डे़ॽवा रोपा इन्जानुङ 2ए़डे़ॽवा याङ खोजिटाङ्बामि लागि खुस्रिङ्मु चुप्साजु, मोबा हाइखा याङ हननियाडे़ॽ एप्पा चोङ्साजिबेॽ लाजे़डु।
3मोबा पत्रुसडे़ॽ सिप्सु, “होउ हननिया, हे़ने़ए़ निवाबेॽ सैतान युङ्नुङ इन्ढोङ पबित्रा होङ्निवामि पोम्बेॽ रेम्डेॽमे़ॽनिङ्सिन्डुए ? रोपा इन्जाबॽआ याङ्बाङ ए़डे़ॽवा याङ आम्मि लागि इन्ढोङ चुप्सुए ? 4मो रोपागो इन्जामा याक्लोसो हे़निङ्मिनोॽ ले़टे़। मोबा इन्जानुङ्सो माहा याङ हे़निङ्मिनोॽ ले़टे़। तर इन्ढोङ हे़न्जिङेॽ रेम्देडाजुए ? हे़न्जिङेॽ याॽमिजि ने़ॽनि तर निवाहाङ्नुङ रेम्डेॽचुए।”
5पत्रुसबाङ इडोक्मा खा हननियाडे़ॽ खेम्मासोरोॽ मोबेॽनोॽ काङ्नुङ सिघडा। मोबा मो खा खेम्खुबा चोप याॽमिजि बेॽलो किस्सिडामि। 6मोबा मोबेॽ टुघुबा वेन्जाजिडे़ॽ सिचेॽडे़ॽ यिप्नुङ पाखे़ॽयु लाघे़ॽनुङ हुप्सुजि।
7मोबा सुम्बोङ ए़क्साङ हननियामि बनिमा सफिरासो मोबेॽ लेस्सा। मोडोक्लो खोमि बनिबामि टुम्बेॽ इमाङ्सो मे़लेबॽआ ले़टे़।
8पत्रुसडे़ॽ सफिरा सिप्सु, “का लुमा चइबानोॽ हे़न्जिङेॽ रोपा आक्टोक्पेॽनो इन्जासाजुए ?” खोसे़ॽसो लुसु, “एडो आक्टोक्पेॽनोॽ इन्जाबॽआ।”
9मोडोगे़ॽ पत्रुसडे़ॽ खो लुसु, “इन्ढोङ परभुमि होङ्निवानुङ रेम्डेॽमा योगाजुए ? खाक्से, हे़ने़ए़ बनिबा येःॽमाबेॽ युङ्घुबाजि राम्डेमबेॽनोॽ टुम्मे। माहाजिडे़ॽ हे़नसो खिघे़ॽनुङ हुम्इम्मे।”
10मोबा खो पत्रुसमि खा खेम्मासोरोॽनोॽ पत्रुसमि पोम्बेॽ काङ्नुङ खोमि सोःक्मा खडा। मोबा माहा वेन्जाजि होङ्सिॽयु पे़खे़ॽमाबेॽ सफिरा सिघे़ॽपेबॽआ खाङ्डोक्टुजि मोबा माहा वेन्जाजिडे़ॽ खिःघे़ॽनुङ खोमि बनिबामि येःॽमा के़क्पेॽनोॽ हुप्सुजि। 11मोबा माहा खा खाङ्डोक्नुङ मन्डलिबेॽहा चोप याॽमिनुङ हाइखा याॽमिजिसो सारोनोॽ किस्सिसामि।
एप्पा चोङ्साजिबाङ खरिहा योम्बोकनुङ चिङ्गा
12मोबा एप्पा चोङ्साजिडे़ॽ बेॽलो खरिहा योम्बोकनुङ खरिहा चिङ्गा याॽमिजिमि रुम्बेॽ ले़टुजि। येसुबेॽ बिस्वास ले़ःॽखुबाजि चोप सोलोमान लुमे दलानबेॽ सोरि सुप्सामि। 13हाइखा याॽमिजिडे़ॽ खोजि आदर ले़टुजेहोङ्सो खोजिनुङ सोरि टोङ्नुङ पेम्मे आट चाहिँ मे़ले़ःॽहेसुजि। 14मोडोक्सो हाइखा बेॽलो मेॽनामिॽचिनुङ वडाङ्पसाजि येसुबेॽ बिस्वास ले़पोगामि। 15याॽमिजिडे़ॽ टुक्खुबा याॽमिजि रामराजि लाप्नुङ रुङ्घाक्नुङ्नोॽ युङ्बेॽटुजे। पत्रुस मो रामबाङ खे़ॽमाबेॽ खोमि लावारेॽहोङ्सो टुक्खुबाजिसोक्पेॽ सिॽनुङ नुबोक्मिरो लुनुङ इडोॽ ले़टुजे। 16यरुसलेम किॽयु मिॽयुहा सहरबाङ्सो बेॽलो याॽमिजि सुप्सामि। माहाजिडे़ॽ टुक्खुबाजिनुङ मङे़हा चाबे़ॽ राःप्पॽआजि मोबेॽ लाजे़ॽडुजि, मोबा माहाजि चोप नुबोगामि।
एप्पा चोङ्साजि चुङ्जाबॽआ
17मोबा चोप्पा एप्पा याडाङ्बानुङ सदुकिजिमि हुलजिडे़ॽ एप्पा चोङ्साजि बेॽलो चेजेवा ले़पोगुजि। 18मोबा माहाजिडे़ॽ एप्पा चोङ्साजि राःप्नुङ तिरिङ्गा खिमबेॽ से़गुजि। 19तर सेन्डा परभुमि इक्को थाङ्सिरिदुत लेन्नुङ मो तिरिङ्गा खिममि राम्डेम हेम्बोगु, मोबा एप्पा चोङ्साजि पाखे़ॽयु चिआप्नुङ माहाजि लुसुजि, 20“हागो हे़निङ मन्दिरबेॽ खे़ॽनुङ याॽमिजि चोङ हिङ्मवामि खा इःबेॽटानुमे।” 21मोबा माहा खा खेम्नुङ वागियाराम माक्मिॽ नम के़ॽमा याक्लो माहाजि मन्दिरबेॽ खे़ॽनुङ याॽमिजि इःॽमा तरिगुजि। चोप्पा एप्पा याडाङ्बानुङ हाइखा यहुदि न्यायधिसजिमि सभा सुम्ढाम महासभाबेॽ चोप याॽमिजि इःसिॽ के़डुजि। मोबा एप्पा चोङ्साजि तिरिङ्गा खिमबाङ चिआप्टानुमे लुनुङ याॽमिजि पाक्सुजि।
22तर तिरिङ्गाजि तिरिङ्गा खिमबेॽ रुक्माबेॽ एप्पा चोङ्साजि मे़न्चुप्पॽआसे़ॽ माहाजि टेघे़ॽनुङ इडोॽ लुसुजि, 23“कानिङ तिरिङ्गा खिमबेॽ रुक्माबेॽ नुरोॽ राम्डेम से़क्पॽआ ले़टा। मोबा तिरिङ्गाजिसो राम्डेम हुङ्साङ येःप्टिक्सामि, तर कानिङे़ॽ होङ्सिॽयु खाङ्माबेॽ से़क्पॽआ याॽमिजि असासो माडामि।”
24मन्दिर हुङ्घुबाजिमि एप्पानुङ एप्पा याडाङ्बाजिडे़ॽ इगो खा खेप्सुजि। तर इमाङ लिबॽआ लुनुङ खोजि खरि मिनामि। 25मोडोक्पेॽनोॽ मोबेॽ इक्को याॽमि लेन्नुङ खोजि इडोॽ लुसुजि, “खेप्सानुमे, हे़निङे़ॽ तिरिङ्गा खिमबेॽ से़क्पॽआ याॽमिजिगो मन्दिरबेॽ येःप्नुङ येसुमि टुम्बेॽ सिक्छे इःॽमे़ॽनिङ्सिन्डुजे।” 26इघा खा खेम्नुङ तिरिङ्गाजि एप्पा तिरिङ्गानुङ हाइखा तिरिङ्गाजि एप्पा चोङ्साजि राःप्सिॽ खडामि। हाइखा याॽमिजिडे़ॽ कानिङ रुङ्गोॽवाडे़ॽ फे़ङ्नेम्मे मिॽनुङ माहाजिडे़ॽ खोजि इमाङ्सो मे़ले़ःॽरेॽ यहुदि न्यायधिसजि सुम्ढाम सभा खिमबेॽ चिक्चे़डुजि। 27माहाजिडे़ॽ एप्पा चोङ्साजिबेॽए यहुदि न्यायधिसजिमि महासभामि पोम्बेॽ येःप्मेॽटुजि मोबाङ चोप्पा एप्पा याडाङ्बाडे़ॽ खोजि सिप्सुजि, 28“कानिङे़ॽको इगो येसुमि निङ्बेॽ याॽमिजि इमाङ्सो हे़निङे़ॽ ए़इःॽमे लुनुङ लुबॽआ ने़ॽनेन्डे ? हे़निङे़ॽको यरुसलेमबेॽहा चोप याॽमिजि इःडाजु। मोबा येसु सेॽनेबॽआ खामि आप्टिकसो कानिङ्बेॽ टिमा योॽइन्जुए!”
29तर पत्रुसनुङ हाइखा एप्पा चोङ्साजिडे़ॽ खोजि लुसुजि, “कानिङे़ॽको याॽमिजिडे़ॽ लुबॽआ खा ने़ॽनि, निवाहाङ्डे़ॽ लुबॽआ खा खेम्मा खे़ये। 30हे़निङे़ॽ काप्सिङ्बेॽ किङ्डिनुङ सेॽनेबॽआ येसु कानिङ्मि टुबालाबाजिमि निवाहाङ्डे़ॽ फेरि हिङ्बोॽइटुए। 31इस्राएलि याॽमिजि पापबाङ निवाहाङ्बेॽ टेआप्नुङ आम्लाङ चुप्टुजिरो लुनुङ निवाहाङ्डे़ॽ येसु छुट्कारा पिघुबा हाङ्बा टोङ्नुङ खोमि चुप्थिङ्लाम युङ्इटुए। 32इगो खामि साक्छि कानिङ्नोॽ टुन्डिङ्मा मोबा निवाहाङ्मि खा खेम्घुबाजि खोसे़ॽ पिबॽआ पबित्रा होङ्निवाडे़ॽसो साक्छि पिमे़ॽनिङ्सिन्डुए।”
33इगो खा खेम्नुङ मोबेॽ सुम्बॽआ यहुदिजि बेॽलो सुरकडामि, मोबा एप्पा चोङ्साजि सेॽनेमे निधो ले़टुजि। 34मोडोक्पेॽ गमलिएल निङ ले़ःॽखुबा फरिसि यहुदि न्यायधिसजिमि सभामि पोम्बेॽ येःप्पोगा। खो चोप याॽमिजिडे़ॽ आदर ले़ःॽपॽआनुङ यहुदि धारमिक नियम इःॽखुबा ले़टे़। खोसे़ॽ सभा खिमबाङ एप्पा चोङ्साजि चाहिँ इॽछोॽ पाखे़ॽयु पाक्सुजि। 35मोबा खोसे़ॽ मोबेॽहा याॽमिजि इडोॽ लुसुजि, “होउ इस्राएलि वावानिसाजि हे़निङे़ॽ इघा याॽमिजि इमाङ ले़ःॽमा मिॽइटानुमे ? अडिॽयो! 36याक्लोए इक्को खा थुदास निङ ले़ःॽखुबा याॽमि बेॽए काङायोङ्बा रे़क्से़। तर खो तिरिङ्गाजिडे़ॽ सेॽनेसुजि, मोबा खोमि चोप चोङ्साजिसो माङ्मिॽलिङ मे़खडामि। 37मोबा ए़क्साङ याॽमिमि निङ नेॽमे बेलाबेॽ, गालिल ठाउँबेॽए यहुदासो लेस्सा। खोसो बेॽलो याॽमिजिडे़ॽ खोमि खासो खेप्सुजि। तर ए़डे़ॽ ए़क्साङ खोसो तिरिङ्गाजिडे़ॽ सेॽनेसुजि मोबा खोनुङ राम्खुबाजिसो मे़खडामि। 38मोडोगे़ॽ के़ॽ हे़निङ लुनिम्ने़, इघा याॽमिजिसो योङ्मेॽटानुमे। इन्ढोङ्होङ इघाजिडे़ॽ ले़ःॽपॽआ खा याॽमिजिमि निवाबाङ ले़ःॽहोङ अक्खा चोप खोम्दाङ्बा मे़खे़हा। 39तर इघा निवाहाङ्बाङ्नोॽ ले़ःॽपॽआहोङ हे़निङे़ॽ इघा याॽमिजि इमाङ्सो ले़ःॽहेसानुम्नि। हे़निङे़ॽ इडोॽ ले़टानुमहोङ्गो निवाहाङ्मि बिरोध ले़ःॽखुबा याॽमि लिन्डानिङे।”
40गमलिएलडे़ॽ लुबॽआडोॽ यहुदिजि सुम्ढाम सभा खिमबेॽहा याॽमिजिडे़ॽ ले़टुजि। मोबा माहाजिडे़ॽ एप्पा चोङ्साजि होङ्सिॽयु के़ःॽनुङ कोरराडे़ॽ पे़गुजि। मोबा “येसुमि टुम्बेॽ असासो ए़ॽइःॽमे” आग्या पिनुङ लेःॽहाक्सुजि।
41मोबा एप्पा चोङ्साजि न्यायधिसजिमि सभाबाङ ओम्फिॽयु खडामि। मोबा खोजि इडोॽ कासामि, “येसुमि निङ्बेॽ खेः आङ्मारोमा लिटिङ्मे़ कासाङ” बेॽलो साप्थाक्सामि। 42मोबाङ ए़क्साङ सानिङ्नोॽ माहाजि मन्दिरबेॽनुङ याॽमिजिमि खिम-खिमबेॽ खे़ॽनुङ येसुनोॽ छुट्कारा पिघुबा हाङ्बा ले़ये लुनुङ सुसमाचार खेम्मेॽसाङ राप्सामि।
Currently Selected:
एप्पा चोङ्सा 5: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
