एप्पा चोङ्सा 6
6
एच्चि जना सेवाकजि से़न्बॽआ
1मोडोक्पेॽ परभु येसुबेॽ बिस्वास ले़ःॽखुबाजि बेॽलो लिमे़ॽनिङ्सिडामे। मोडोक्पेॽनोॽ हिब्रु खाप्ला यामुघुबाजिनुङ गिरिक खाप्ला यामुघुबाजि कुनुक्कुनक काबोगामि। इन्ढोङ्होङ सानिङ्नोॽ चामे खा हाःमाबेॽ “कानिङ्हा राङ्मिॽमाजिडे़ॽ उक्खारो मे़न्चुप्टुजि”। 2मोडोगे़ॽ एप्पा चोङ्साजिडे़ॽ चोप हाइखा चोङ्साजि के़ॽनुङ इडोॽ लुसुजि, “होउ वावानिसाजि, कानिङे़ॽको निवाहाङ्मि खा इःॽमे योम्बोक लेॽनुङ चामा उङ्मा हामे योम्बोकलाम फोसिघे़ॽमा फे़न्निबा। 3मोडोगे़ॽ हे़निङ्मि रुम्बेॽ पबित्रा होङ्निवामि सक्ति चुप्खुबाजिनुङ निवादाङ्बा एच्चि जना याॽमिजि से़नानुमे। माहाजिनोॽ इघा चामे खामि योम्बोक ले़ःॽमे जिम्मा पिमा खे़म्मे। 4तर कानिङ चाहिँ सानिङ्नोॽ निवाहाङ्नुङ पारथना ले़ःॽसाङ खोमि खा याॽमिजि खेम्मेॽमे योम्बोक ले़ःॽमा खे़ये।” 5एप्पा चोङ्साजिमि इगो खा चोबे़ॽ नेन्जोसुजि। मोबा माहाजिडे़ॽ येसुबे़ॽ बिस्वास ले़ःॽखुबा, पबित्रा होङ्निवा चुप्पॽआ स्तिफनस, फिलिप, परखरस, निकनोर, तिमोन, परमिनासनुङ एन्टिओकमि यहुदि धरम लाघुबा निकोलाउससो से़नुजि। 6खोजिडे़ॽ से़न्बॽआ माहा याॽमिजि एप्पा चोङ्साजिबेॽ चिक्चे़डुजि। मोबा एप्पा चोङ्साजिडे़ॽ खोजिसोक्पेॽ हुक युङ्नुङ निवाहाङ्बाङ आसिस चुप्टुजिरो लुनुङ पारथना ले़ःॽपेॽटुजि।
7निवाहाङ्मि बचन चोप ठाउँराजि मुक्खडा। मोबा परभु येसुबेॽ बिस्वास ले़ःॽखुबाजि यरुसलेमबेॽ छना बेॽलो लिसामि। मोबा बेॽलो याडाङ्बाजिडे़ॽसो परभु येसुमि निङ्बेॽ बिस्वास ले़टुजि।
स्तिफनस राःप्पॽआ
8मोबा स्तिफनसडे़ॽ निवाहाङ्बाङ बेॽलो आसिसनुङ सक्ति चुप्नुङ याॽमिजिमि रुम्बेॽ खरिहा चिङ्गानुङ योम्बोक ले़टु। 9तर आढा याॽमिजिडे़ॽ खोमि बिरोध ले़ःॽपोगुजि। माहाजि यहुदि न्यायधिसजि सुम्ढाम खिमबेॽहा स्वतन्तरा लुमे हुलबेॽहा याॽमिजि मोबा अलेक्जेन्ड्रिया सहरनुङ किलिकिया, कुरेनि एसिया ठाउँबाङ लेम्बॽआ यहुदिजि ले़टामे। माहाजि चोप इक्को लिनुङ स्तिफनसमि टुम्बेॽ मङे़ॽमा निवा खिबोगामि। 10तर पबित्रा होङ्निवामि सक्तिबाङ स्तिफनस यामुबॽआसे़ॽ माहाजिडे़ॽ खो इमाङ्सो मे़लुहेसुजि। 11मोबा माहाजिडे़ॽ खुस्रिङ्मु याॽमिजि इडोॽ लुनुङ रेम्डेॽमेॽटुजि, “कानिङे़ॽको इगोसे़ॽ मोसानुङ निवाहाङ्मि बिरोधबेॽ खा इःबॽआ खेप्सुङ्मा।”
12इडोॽ माहाजिडे़ॽ हाइखा चोप याॽमिजिनुङ यहुदि न्यायधिसजिमि बेॽए सभा खिमबेॽहा एप्पाजि, मोबा यहुदि धारमिक नियम इःॽखुबाजिबेॽ खा ओक्टिसुजि। मोबा माहाजिडे़ॽ यहुदि न्यायधिसजिमि सभा खिमबेॽ स्तिफनस राःप्चे़डुजि। 13मोबा माहाजिडे़ॽ स्तिफनसमि टुम्बेॽहा खा रेम्डेॽखुबा याॽमिजि पोम्बेॽ चिक्चे़डुजि। मोबा माहा याॽमिजिडे़ॽ इडोॽ लुसुजि, “इगो याॽमिडे़ॽको मन्दिरनुङ मोसाडे़ॽ पिबॽआ नियममि बिरोध ले़ःॽपॽआ खेम्इटुङ्मे। 14मोबा इगोसे़ॽ इडोक्सो लुबॽआ खेम्इटुङ्मे, नासरतमि येसुडे़ॽ इगो मन्दिर योबेन्डुरो, मोसाडे़ॽ कानिङ पिबॽआ नियमसो फेङ्इन्डुरो। इडोक्हा खा इगोसे़ॽ इःबॽआ कानिङे़ॽ खेम्इटुङ्मे।”
15मोडोक्पेॽ यहुदि न्यायधिसजिमि बेॽए सभा खिमबेॽ सुम्बॽआजि चोबे़ॽ स्तिफनस नुरोॽ खाङ्माबेॽ खोमि नजिक गो थाङ्सिरिदुतमिडोॽ उज्यालोमा खाङ्डोक्टुजि।
Currently Selected:
एप्पा चोङ्सा 6: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
