एप्पा चोङ्सा 4
4
पत्रुसनुङ युहन्ना यहुदि न्यायधिसजिमि सभामि पोम्बेॽ
1पत्रुसनुङ युहन्नाडे़ॽ याॽमिजिनुङ यामुमारोनोॽ याडाङ्बाजि, मन्दिर हुङ्खुबा तिरिङ्गाजिमि एप्पानुङ सदुकिजि मोबेॽ लेस्सामि। 2माहाजिडे़ॽ येसु सिघे़ॽपॽआबाङ हिङ्बोक्इटे़ मोडोक्नोॽ येसुबेॽ हाइखा याॽमिजिसो सिघे़ॽपॽआबाङ हिङ्बोइम्मे लुमे खा परचार ले़ःॽपॽआसे़ॽ माहाजि खोजिनुङ बेॽलो सुरिकडामि। 3मोबा माहाजिडे़ॽ पत्रुसनुङ युहन्ना राःबुजि। मोडोक्पेॽ नमकिॽखे़ॽपॽआसे़ॽ सेन्से याॽमि से़क्ठाम खिमबेॽ खोजि से़गुजि। 4तर खोजिबाङ सुसमाचार खेम्खुबाजिबेॽ बेॽलो याॽमिजिडे़ॽ बिस्वास ले़टुजि। बिस्वास ले़ःॽखुबा वडाङ्पसाजिरेॽ ङाउम हजारडोक लिसामि। 5मोबा वागियाराम एप्पा याडाङ्बाजि, यहुदि धारमिक नियम इःॽखुबाजि मोबा हाइखा एप्पाजि यरुसलेमबेॽ सुप्सामि। 6मोबेॽ चोप्पाङ एप्पा याडाङ्बा हन्नास, खोमि टाङ्बाङ कैयाफा, युहन्ना, अलेक्जेन्डरनुङ चोप्पा एप्पा याडाङ्बामि खिमबेॽहा हाइखा याॽमिजिसो टुसामे। 7मोबा माहाजिडे़ॽ युहन्नानुङ पत्रुस खोजिमि पोम्बेॽ लाजे़ॽनुङ इडोॽ लुसाङ सिप्सुजि, “हाम्बे सक्तिबाङ, अथबा असामि निङ्बेॽ हे़न्जिङेॽ इघा योम्बोक ले़न्जुए ?”
8मोबा पत्रुसडे़ॽ पबित्रा होङ्निवामि सक्ति चुप्नुङ माहाजि लुसुजि, “होउ याॽमिजिमि एप्पा सासकनुङ डायोङ्बाजि, 9आयु कानिङे़ॽ इगो ए़क्सोक्या याॽमि नम्नम ले़ःॽनुङ नुबोक्पॽआसे़ॽ मोबा इन्डोक इगो याॽमि नुबुक्पॽआ खा सिम्मामि लागि हे़निङे़ॽ कानिङ लाजे़ॽपॽआहोङ, 10हागो हे़निङ्नुङ इस्राएलबेॽहा चोप याॽमिजिडे़ॽ इगो खा लेसानुमे। हे़निङ्मि पोम्बेॽ येःप्मिये इगो याॽमि नासरतमि येसुमि निङ्बेॽ नुबोक्इटे़। हे़निङे़ॽ चाहिँ येसुगो काप्सिङ सोक्पेॽ किङ्नेसानुम, तर निवाहाङ्डे़ॽ खो सिघे़ॽपॽआबाङ हिङ्बोक्इटुए। 11खोमि टुम्बेॽ धारमिक नेॽचिराडे़ॽ इडोॽ लुबॽआ ले़ये,
‘गारो सोक्खुबाजिडे़ॽ फे़न्निबा लुनुङ राप्पेबॽआ
रुङ्गोॽवानोॽ जग युङ्ढाम रुङ्गोॽवा लिसा।’
12“येसुबेॽरेॽनोॽ पापमि छुट्कारा टुये। मोडोगे़ॽ याॽमिजि पापबाङ छुट्कारा लिमामि लागि मक्खाम्डेमबेॽ हाइको निङ माॽआये।”
13पत्रुसनुङ युहन्ना बेॽलो मे़नेॽपॽआ ले़टाजे, तरसो खोजिमि बेॽए आँट खाङ्नुङ माहाजि खरि मिनामि। माहाजिडे़ॽ इगो याॽमिजि याक्लो येसुनुङ्नोॽ टुसामे लुनुङ्सो लेडोक्टुजि। 14तर मो नुबोक्पॽआ याॽमिसो पत्रुसनुङ युहन्नानुङ्नोॽ सोरि येःप्टिङ्बॽआ खाङ्नुङ माहाजिडे़ॽ इमाङ्सो मे़लुहेसुजि। 15मोडोगे़ॽ माहाजिडे़ॽ पत्रुसनुङ युहन्ना बेॽए सभाबाङ पाखे़ॽयु पाक्सुजि, मोबा माहाजि चाहिँ इडोक्मा मोत्ता इबोगामि, 16“हागो इघा याॽमिजि इमाङ्डे ले़ःॽमाहाजि ? इघाजिडे़ॽ ले़ःॽपॽआ खरिहा योम्बोक यरुसलेमबेॽ पेङ्खुबा चोप याॽमिजिडे़ॽ खाङ्बेटुजे। कानिङे़ॽसो इगो ने़ॽनिहा लुनुङ लुहेसुङ्मानि। 17तर इगो खा हाइखा याॽमिजिबेॽ मे़मुक्खेॽलो लुनुङ माहाजि हागोएम्बाङ ‘येसुमि टुम्बेॽहा खा असासो ए़ॽलुमे’ लुनुङ खोजि योप्नुङ किस्सिमा उःक्पेॽमा खे़म्मे।”
18मोडोगे़ॽ माहाजिडे़ॽ पत्रुसनुङ युहन्ना होङ्सिॽयु के़ःॽनुङ लुसुजि, “येसुमि निङ्बेॽ हागोएम्बाङ असासो इमाङ्सो ए़इःॽमेनुङ ए़लुमे लुनुङ आग्या पिसुजि।” 19तर पत्रुसनुङ युहन्नाडे़ॽ लुसुजि, “हागो कानिङे़ॽ याॽमिजिडे़ॽ लुबॽआ खा खेम्मे़न्डे, निवाहाङ्डे़ॽ लुबॽआ खा खेम्मे़ ? हे़निङे़ॽनोॽ मिॽखाक्सानुमे। 20तर कानिङेॽको खाङ्बॽआनुङ, खेम्बॽआ खा मे़लुरेॽ पेन्नोॽ पेङ्हेसिङ्मानि।” 21इगो खा खेम्नुङ चोप यहुदिजि सुम्ढाम खिमबेॽहा याॽमिजिडे़ॽ माहाजि किस्सिमा उःक्पेॽटुजि। खोजि दन्डा पिमे निहु मे़न्चुप्टुजि इन्ढोङ्होङ खोजिडे़ॽ ले़ःॽपॽआ खरिहा खा खाङ्नुङ याॽमिजिडे़ॽ निवाहाङ ओहाङ पिमे़ॽनिङ्सिडुजे। 22इडोॽ खरिमा योम्बोकबाङ नुबोक्पॽआ याॽमि रिक्पोङ निङ्बाङ्सो चुरोॽ याक्पॽआ ले़टे़।
बिस्वासिजिमि पारथना
23माहाजि लेॽखे़ॽमासोरोॽ पत्रुसनुङ युहन्ना खोजिमि लङ्गामजिबेॽ टेखडाजि। मोबा एप्पा याडाङ्बाजिनुङ यहुदि एप्पाजिडे़ॽ लुबॽआ चोप खा लङ्गामजि इःबेॽटुजि। 24इडोक्हा खा खेम्नुङ माहाजिडे़ॽ इक्को निवा ले़ःॽनुङ इडोॽ कासाङ पारथना ले़टामि, “होउ कानिङ्मि चोप्पा सक्तिदाङ्बा परभु निवाहाङ हे़ने़ॽनोॽ इगो थाङ्सिरि मक्खाम्डेमनुङ माहोङ्मा, मोबेॽ टुहा चोप थोक टोङ्इटुहा। 25हे़ने़ए़ पबित्रा होङ्निवाबाङ कानिङ्मि टुबा दाउदमि याबुकबाङ इडोॽ लुटे़,
इन्ढोङ अयहुदि जातिजि सुरके़म्मे ?
याॽमिजि इन्ढोङ मे़ॽनोक्सो निवाबेॽ मङे़हा खा टोङ्इन्डुजे ?
26निवाहाङ्नुङ खोसे़ॽ से़न्बॽआ खिरिस्टमि बिरोध ले़ःॽसिॽ
मक्खाम्डेमबेॽहा हाङ्बाजिनुङ सासकजि सुप्सामि।
27“इन्ढोङ्होङ चइबानोॽ हे़ने़ॽ से़म्बॽआ हाङ्बा येसु छुट्कारा पिहेखुबा टोक्सु। खोमि बिरोधबेॽ येःप्खुबा हेरोदनुङ पन्तियस पिलातस मोबा इस्राएलबेॽहा हाइखा अयहुदि जातिहा याॽमिजिसो इगो सहरबेॽनोॽ सुप्सामि। 28तर माहाजिडे़ॽ हे़ने़ए़ सक्तिनुङ हे़ने़ए़ निवाडे़ॽ याक्लोनोॽ मिॽपॽआडोॽ ले़टुजि। 29हागो हे परभु, कानिङ किस्सिमा उक्मेॽखुबाजिडे़ॽ पिबॽआ खाबेॽ निवा टिसे। मोबा हे़ने़ए़ योम्बोक ले़ःॽखुबाजि हे़ने़हा खा मे़ङ्किस्सिरेॽ खेम्मेॽहेमे सक्ति पिमायो। 30कानिङ हे़ने़ए़ योम्बोक ले़ःॽखुबा येसुमि निङ्बेॽ याॽमिजि नुबोक्मे, खरिहा योम्बोक ले़ःॽमेनुङ चिङ्गा खाङ्मुमे सक्ति पिमायो।”
31माहाजिडे़ॽ निवाहाङ्नुङ पारथना ले़ःॽसेॽनुङ ए़क्साङ माहाजि सुम्बॽआ ठाउँबेॽ रुॽमि लेम्बॽआडोॽ सोक्सा। मोबा माहाजि चोपबेॽ पबित्रा होङ्निवामि सक्ति लेस्सा, मोबा निवाहाङ्मि बचन मे़ङ्किस्सिरेॽ याॽमिजिडे़ॽ खेम्मेॽपोगुजि।
बिस्वासिजिमि चोप थोक साझा
32परभुबेॽ बिस्वास ले़ःॽखुबाजि इक्को निवा लिनुङ खोजिनुङ टुहा चोप थोक “असे़ॽसो इगो के़ए़” लुनुङ मे़लुसुजे, तर माहाजिमि चोप थोक साझा ले़टहा। 33मोबा एप्पा चोङ्साजिडे़ॽ बेॽए सक्तिनुङ येसु हिङ्रिक लिबॽआ खामि साक्छि पिसुजेनुङ निवाहाङ्मि बेॽलो आसिस खोजिबेॽ टुसहा। 34-35खोजिमि रुम्बेॽ असासो इमाङ पाप्होङ्सो याङ्सरावा, खिम, सोङ्रा, रोपा, इन्जानुङ याङ लाजे़डुजे। 36-37इक्को योसेफ निङ ले़ःॽखुबा साइपरस देसबेॽए लेबि कुलमि इक्को याॽमि टुसे़। खोसे़ॽसो रोपा इन्जाबॽआ याङ एप्पा चोङ्साजिनोॽ पिसुजि। खो एप्पा चोङ्साजिडे़ॽ बारनाबास लुनुङ के़डुजे। बारनाबास लुबॽआ हौसला पिघुबा याॽमि।
Currently Selected:
एप्पा चोङ्सा 4: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
