एप्पा चोङ्सा 3
3
इक्को सोगुबा याॽमि नुबोक्पॽआ
1इक्याक पत्रुसनुङ युहन्ना लेन्डा सुमबोङ्राजि मन्दिरबेॽ पारथना ले़ःॽसिॽ खे़ॽमे़ॽनिङ्सिडाजे। मोडोक्पेॽ निवाहाङ्नुङ पारथना ले़ःॽमे बेला ले़टे़। 2मोबेॽ, सुन्दर लुमे राम्डेमबेॽ, इक्को सोगुबा याॽमि पेने़। खो टोक्माबेॽनोॽ सोगुबा ले़टे़, हाइखा याॽमिजिडे़ॽ सानिङ मोबेॽ खिजे़ॽओसुजे। खोसे़ॽ मोबेॽ लेङ्खुबा याॽमिजिनुङ इमा इमा ङाःक्चोसुए। 3मोसे़ॽ पत्रुसनुङ युहन्ना मन्दिरबेॽ खे़ॽमे़ॽनिङ्सिबॽआ खाङ्डोक्नुङ खोजिनुङ्सो ङाःगु। 4युहन्नानुङ पत्रुसडे़ॽ मो ङाःक्खुबा नुरोॽ वाःप्नुङ लुसाजु, “इगिॽयु खाक्से!” 5मोबा मोसे़ॽसो मोजिबाङ इमाङ चुप्मिनुङे मिॽनुङ नुरोॽ खाक्सु।
6पत्रुसडे़ॽ लुसु, “कानुङ सुनानुङ सिसे़ङ्गो इमाङ्सो माॽआये तर कानुङ इमाङ टुहा मोनोॽ हे़न पिन्ने़। नासरतबेॽए येसु खिरिस्टमि निङ्बेॽ#३:६ आढा बाइबलबेॽ इगो खा माॽआहा येपोक्नुङ राप्से।” 7मोबा पत्रुसडे़ॽ इडोॽ लुनुङ नासरतबेॽए येसुमि निङ्बेॽ पुके़ॽनुङ राप्से लुसाङ मो सोगुबामि चुप्थिङ हुक राःप्नुङ येपोक्माराप्टु। मोडोक्पेॽनोॽ मो याॽमिमि सराङ्मि राङ्ठुॽमाबेॽ बोल लेस्सा। 8मोबा खो येःप्पोक्नुङ राम्बोगा। मोबा खो चोम्रोक चोम्रोक आम्साङ, सिम्आसाङ निवाहाङ्मि ओहाङ ले़ःॽसाङ पत्रुस, युहन्नानुङ मन्दिर होङ्सिॽयु पे़ए़ना। 9इडोॽ राम्साङ निवाहाङ्मि ओहाङ ले़ःॽपॽआ चोप याॽमिजिडे़ॽ खाङ्डोगुजि। 10इगोगो मन्दिरमि सुन्दर लुमे राम्डेमबेॽ सानिङ ङाःक्चासाङ पेङ्खुबा याॽमि लुनुङ लेबेसुजि। “इगो याॽमि इन्डोक्टे राम्बोगे ?” कासाङ माहाजि चोप खरि मिनामि।
मन्दिरबेॽ पत्रुसमि परचार
11मो याॽमि पत्रुसनुङ युहन्नामि ए़ङ्गुवा ए़ङ्गुवा राम्बॽआ खाङ्डोक्नुङ याॽमिजि खरि मिन्साङ मन्दिरमि सोलोमान लुमे दलानबेॽ खाङ्सिॽ पिन्जासामि। 12मोबा पत्रुसडे़ॽ माहाजि खाङ्साङ लुसुजि, “होउ इस्राएलि वावानिसाजि, इगो खा इन्ढोङ हे़निङ खरि मिङ्साङ खाङ्इन्डानिङे ? इगो याॽमि कानिङ्मिनोॽ बोलनुङ भक्तिडे़ॽ राम्बोक्पॽआ मिॽइन्डानुमे ? 13कानिङ्मि टुबा अब्राहाम, इसहाकनुङ याकुबमि निवाहाङ्डे़ॽ खोमि सेवाक येसु महिमित टोक्सु। हे़निङे़ॽ चाहिँ खो सेॽनेमा खे़ये लुनुङ राःबानुम। एप्पा मायोङ्बा पिलातसडे़ॽ खो लेॽमा योक्माबेॽसो हे़निङे़ॽ लेॽमा फे़न्नि लुसानुम। 14हे़निङे़ॽ पबित्रानुङ धारमिक याॽमिमि सट्टो याॽमि सेॽखुबा मङे़ॽमा याॽमि चाहिँ लेप्पेबेॽमा लुनुङ ङाःगानुम। 15इडोॽ हे़निङे़ॽ हिङ्मवा पिघुबा सेॽनेसानुम, तर निवाहाङ्डे़ॽ खो सिघे़ॽपॽआबाङ हिङ्रिक टोक्सु मो खामि कानिङ साक्छि ले़न्डिङ्मा। 16मोनोॽ येसुमि निङ्मि सक्तिडे़ॽ बोल चुप्टु। येसुमि निङ्बेॽ मो याॽमिडे़ॽ बिस्वास ले़ःॽपॽआसे़ॽ इगो याॽमि नुरोॽ नुबोक्नुङ हे़निङ्मि पोम्बेॽनोॽ टुये।
17“होउ वावानिसाजि, के़ॽ लेनुङे़ हे़निङ्मि सासकजिडे़ॽनुङ हे़निङे़ॽ येसु असाडे लुनुङ मे़लेरेॽनोॽ सेॽनेसानुम। 18तर खिरिस्टडे़ॽ खेः आङ्मा खे़ये लुमे खा निवाहाङ्डे़ॽ बेॽलो याक्लो अगमबक्ताजिबाङ इःबॽआ खा खोसे़ॽ मोडोॽ पुरा ले़टु। 19मोडोगे़ॽ हागोनोॽ हे़निङ टाङ्बा टाङ्बामि पाप लेॽपेनुङ निवाहाङ्बेॽ टेसानिङे। खोसे़ॽ हे़निङ्मि चोप पापमि आम्लाङ पिये मोबा हे़निङे़ॽ निवाहाङ्बाङ होङ्निवामि सान्ति चुप्मिन्डानुमे। 20इडोॽ निवाहाङ्डे़ॽ याक्लोनोॽ हे़निङ्मि लागि से़म्बॽआ खिरिस्ट फेरि हे़निङ्मि लागि पाङ्बेॽये। खोनोॽ येसु ले़ये। 21तर पबित्रा अगमबक्ताजिडे़ॽ याक्लोनोॽ लुडिडोॽ निवाहाङ्डे़ॽ चोप खा चोङ मे़न्टोङ्लो येसु थाङ्सिरिबेॽनोॽ टुमा खे़ये। 22मोसाडे़ॽसो इडोॽ लुबॽआ ले़टे़
परमपरभु हे़निङ्मि निवाहाङ्डे़ॽ
काडोक्मानोॽ, हे़निङ्मि लागि हे़निङ्मि जातिबाङ्नोॽ अगमबक्ता पाङ्इन्डुए।
खोसे़ॽ लुबॽआ चोप खा हे़निङे़ॽ खेम्मा खे़ये#यहुदि धारमिक नियम १८:१५,१८।
23तर खोमि खा मे़ङ्खेम्खुबाजि चाहिँ
निवाहाङ्मि याॽमिजिबाङ फाक्खे़ॽनुङ नासि लिम्मे#यहुदि धारमिक नियम १८:१९।
24“मोबा समुएलनुङ खोबाङ ए़क्साङ्हा चोप अगमबक्ताजिडे़ॽ इघा आयु वागिया लिमे़ॽनिङ्सिहा याकमि टुम्बेॽनोॽ इःबॽआ ले़हा। 25अगमबक्ताजिबाङ निवाहाङ्डे़ॽ हे़म्बॽआ हेन्ज्रुङ हे़निङ्मि लागिनोॽ ले़ये। मोबा निवाहाङ्डे़ॽ हे़निङ्मि टुबालाबाजिनुङ हे़म्बॽआ हेन्ज्रुङ हे़निङ्मि लागिसो ले़ये। निवाहाङ्डे़ॽ कानिङ्मि टुबा अब्राहाम इडोॽ लुबॽआ ले़टे़, ‘हे़ने़हा पसाजिबाङ्नोॽ मक्खाम्डेमबेॽहा चोप जातिहा याॽमिजि के़ॽ आसिस पिनुङ्हाजि।#उत्पत्ति १२:३; २२:१८; २६:४’ 26इडोॽ हे़निङ्मि मङे़हा योम्बोकबाङ टेआप्नुङ आसिस पिमामि लागि निवाहाङ्मि योम्बोक ले़ःॽखुबा येसु याक्लो हे़निङ्बेॽनोॽ पाङ्बॽआ ले़टे़।”
Currently Selected:
एप्पा चोङ्सा 3: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
